1, 2. Nkinyi kibakitshine Yesu ku kyoolwa ky’efuku dya 14 dya mweshi wa Nisane kipwa kya 33 K.Y.K.? (Tala kifwatulo ki kumbangilo kwa mwisambo.)

TWI mu Yeelusaleme, bufuku bw’efuku dya 14 mweshi wa Nisane kipwa kya 33 K.Y.K. Mweshi ubalombana kifunda. Yesu na balongi baaye abakitshi Kidibwa kya lukilo, abatentekyesha kutuuka kwa beena Isaleele mu Ejiipitu takudi bipwa 1 500. Na batumibwa basha kululama 11, Yesu babanga kukita kidibwa ki pabwakyo—kya kutentekyesha lufu alukyebe kumukwata kumpala kwa shi dyadya efuku dipwe. *—Mat. 26:1, 2.

² Yesu eele luteko, atambika batumibwa baye mukate ushi wele kitatusho, na amba shi: “Ataayi nudye.” Aata dingi kipulu kya nfinyo, eele luteko, na amba shi: “Ekitomeyi booso.” (Mat. 26:26, 27) Yesu tebapa kingi kidibwa nya, kadi e na myanda ibungi yakyebe kwibalungula bwabwa bufuku.

3. Nkonko kinyi yatukyebe kwaluula mu uno mwisambo?

³ Byabya ndjo bibaadi Yesu mubangye Kitentekyesho kya lufu lwaye,  kyabetamina dingi bu “Kidibwa kya Mwanana.” (1 Kod. 11:20) Pabitale Kidibwa kya Mwanana, bangi mbalombene kwipusha shi: Bwakinyi atutentekyeshaa lufu lwa Yesu? Mukate na nfinyo abipushisha kinyi? Mushindo kinyi watudi balombene kulumbuula Kitentekyesho? Mbananyi balombene kudya na kutoma? Na mushindo kinyi autumikilaa beena Kidishitu abilesha bifundwe pabitale lukulupilo lwabo?

4. Lufu lwa Yesu ndwitupeteshe kinyi?

⁴ Bu byatudi bana ba Adame, twibapyane mulwisho na lufu. (Lom. 5:12) Muntu mukutwe kupwidika ta mulombene kupa Efile Mukulu nkuulo bwa muwa waye sunga kukuula bangi bantu. (Mis. 49:6-9) Anka, ku bukwashi bwa lufu lwaye, Yesu baadi mufute muulo wa nkuulo ibaabadi bakumiine—mbidi na mase aaye bipwidikye. Pa’ye kulubwila Efile Mukulu muulo wa nkuulo, Yesu mwitupe mushindo wa kupososhibwa ku mulwisho na ku lufu na kwitupetesha muwa wa looso.—Lom. 6:23; 1 Kod. 15:21, 22.

5. (a) Mushindo kinyi watuuku shi Efile Mukulu na Kidishitu mbafule bantu? (b) Bwakinyi abitungu tutwele mu kitentekyesho kya lufu lwa Yesu?

⁵ Kutusha kwa nkuulo akulesha shi Efile Mukulu mmufule bantu. (Yo. 3:16) Mulambu wa Yesu awitushinkamisha shi mmwitufule. Pabaadi mwiyilu, bu ‘mufubi sha kalolo’ a Efile Mukulu, Yesu baadi kwete “kusepêla na bantu”! (Mye. 8:30, 31) Kulesha lutumbu kwi Efile Mukulu na Mwana aaye akukyebe kwitutuma bwatudya kwikala mu kitentekyesho kya lufu lwa Yesu, byabya atutumikila mwiya awamba shi: “Ikalai anukitshi bino mwanda wa kuntentekyeshanga.”—1 Kod. 11:23-25.

6. Mushindo kinyi watudi balombene kumona mukate na nfinyo bya ku Kitentekyesho?

⁶ Pabaadi mubangye Kitentekyesho, Yesu tabaadi mukite kilengyeleshi bwa kwalula mukate na nfinyo bu mbidi na mase aaye a binyibinyi nya. Bilekeene na byabya, baadi mwakule bino pabitale mukate: ‘Kino [akileesha] mbidi yande.’ Pabitale nfinyo bambile shi: Kino [akileesha] mase ande a kipwano, aasukumunwa bwa mwilo wa bantu.’ (Mak. 14:22-24) Bwa kwakula kalolo, mukate na nfinyo bibaadi penda bileshesho.

7. Mukate watukitaa nao Kitentekyesho aulesha kinyi?

⁷ Mu kyakya kitentekyesho, Yesu baadi mufube na mukate ushi wele kitatusho wa ku mikate ibaabadi bakite nayo Kidibwa kya lukilo. (Efi. 12:8) Ingi nsaa, Bifundwe abileshaa kitatusho bu mulwisho. (Mat. 16:6, 11, 12; Luk. 12:1) Anka, Yesu baadi mufube na mukate ushi na kitatusho bwa kulesha mbidi yaaye ishi na milwisho. (Eb. 7:26) Byabya, mukate ushi na kitatusho nyi watukitaa nao Kitentekyesho.

8. Kipulu kya nfinyo kya mu Kitentekyesho akilesha kinyi?

⁸ Nfinyo ibaadi Yesu mukite naye Kitentekyesho, baadi alesha mase a Yesu, nka bi ekopo dyatukitaa nadyo Kitentekyesho lelo uno. Betufwidiile ku Gologota, mbalo i pasha pa Yeelushaleme na kusukumuna mase aye “bwa kulekyelwa milwisho.” (Mat. 26:28; 27:33) Bu bi mukate na nfinyo bya mu kitentekyesho abilesha mulambu wa buntu wa Yesu waadi mutushe bwa bantu basha kukookyela na atusangela wawa mulambu aulesha kifulo, bibuwa twilumbuule muntu na muntu bwa Kidibwa kya Mwanana kya ku kipwa.

9. (a) Bwakinyi bibuwa kulonda programe a kubadika kwa Bible bwa Kitentekyesho? (b) Mushindo kinyi opushaa kwishimba pabitale nkuulo?

⁹ Kilombene kwitukwasha bwa kwilumbuula ku Kitentekyesho nyi kulonda programe a kubadika kwa Bible bwa Kitentekyesho e mu Examinons les Écritures chaque jour, na kunangushena  pa myanda ibakitshine Yesu kumpala kwa’ye kufwa. * Ungi mukwetu mukashi bafundjile shi: “Twibatengyele Kitentekyesho ngofu. Ki na muulo ku kipwa kyooso. Namonaa nka bu mi e ku maalo . . . , natala kwi nshami andi mufule na kusangeela nkuulo n’eshimba dimune. . . . Nauku bifundwe byooso na kwibipatuula! Kadi, nsaa yampusha kinyongwa akitukila ku lufu, eshimba dyande adisanka bwa byooso byabaketukitshina ku bukwashi bwa yaaya nkuulo.” Eyendo, nsaa yatwilumbuula bwa Kitentekyesho, bibuwa tunangusheene mushindo wi mulambu wa Yesu ngwitutuushe mu bupika bwa mulwisho na lufu.

10. Kwilumbuula kwetu bwa Kitentekyesho nkutale mudimo wetu wa bulungudi mu mushindo kinyi?

¹⁰ Kwilumbuula bwa Kitentekyesho akutekye kwilumbuula bwa kutamisha mudimo wetu wa bulungudi mu mushindo kampanda, pangi kwata mudimo wa bu Mbala-mashinda mu kipungo kya Kitentekyesho. Nsaa yatwitanyina bantu batulongaa nabo Bible na bangi bantu ku kidibwa kya Mwanana, atukekala na muloo pa kwakula pa bitale Efile Mukulu, mwana’aye, na myabi ayikapete bantu abasankisha Yehowa na kumutumbisha.—Mis. 148:12, 13.

11. Bwakinyi Mpoolo bambile shi bangi bena Kodinto babaadiile mukate na kutoma nvinyo mu mushindo ushi ulombane mu Kitentekyesho?

¹¹ Polumbuula Kidibwa kya Mwanana, taluula kibaadi Mpoolo mutumibwa mufundile kakongye ka beena Kidishitu ba mu Kodinto. (Badika 1 Beena-Kodinto 11:27-34.) Mpoolo alesha shi yawa adi mukate na atomo nfinyo kwashi mwibilombene, “epiisha kumpala kwa mbidi na mase bya Mwanana,” Yesu Kidishitu. Byabya, abitungu mushingwe mwimu ooso “etaluule’ye nabene” kumpala kwa kudya wawa mukate na kutoma nfinyo. Bisumanga, “adi na atomo kupiishibwa kwaye’ye nabene.” Pamwanda wa mwikelo wibubi, beena Kodinto bebungi abaadi “ba-sha-mikumbo babofule bebungi, na bangi mbafwe mu kikudi.” Mbilombeene kwikala shi, bangi babaadiile na kutoma bikilekile kumpala sunga nsaa ayikitshika Kitentekyesho kushi kwilumbuula ku mbidi sunga mu kikudi. Kudya mukate na kutoma nfinyo mu wawa mushindo ushi ulombane kwi bya kwitwikasha bantu bashi bakuminyibwe n’Efile Mukulu.

12. (a) Mpoolo baadi mupwandikishe Kitentekyesho na kinyi, na baadi mudimushe baaba abadi naminyi? (b) Nkinyi kilombene kukita muntu adiyaa mukate na kutoma nfinyo mukite mulwisho ukata?

 ¹² Mpoolo baadi mupwandikishe Kitentekyesho bu kyakudya kyodi na bangi bantu, na baadi mudimushe baaba abadi shi: “Tanwi balombene kutoma ku kipulu kya Yehowa na kipulu kya Kafilefile pamune nya; tanwi balombene kudya ku meesa a Yehowa naa ano a Kafilefile pamune nya.” (1 Kod. 10:16-21) Su muntu adiyaa mukate na kutoma nfinyo ku kidibwa kya Mwanana mmukite mulwisho ukata, mmulombeene kukimba bukwashi bwa mu kikudi. (Badika Jaake 5:14-16.) Su mushingwe mwimu apa “bikuba abileesha kwilanga,” su adya mukate na nfinyo bya Kitentekyesho nta mubeepule mulambu wa Yesu nya.—Luk. 3:8.

13. Bwakinyi bi na muulo bwa kwela nteko pabitale lukulupilo lwitupe Efile Mukulu?

¹³ Nsaa yatwilumbuula bwa Kitentekyesho, twi balombeene kumona shi bibuwa bwa kukita nteko ya lutumbu bwa lukulupilo lwitupe Efile Mukulu. Mufubi a Yehowa na mulondji a lulamato a mwan’aye su ngumune nta mulombeene kukutwa kaneemo bwa mulambu wa Yesu p’aye kudya mukate na kutoma nfinyo su te na bishinkamisho abilesha shi mmwina Kidishitu mushingwe mwimu. Byabya, nanyi mulombeene kudya mukate na kutoma nfinyo sunga kukutwa kudya na kutoma?

14. Bu bi bashingwe mwimu ndjo be mu kilombeeno kipya, nkinyi kyabakitaa mu Kitentekyesho?

¹⁴ Baaba balombeene kudya mukate na kutoma nfinyo bya mu kitentekyesho mbashinkamishe na mashimba amune shi be munkatshi mwa baaba bakite kilombeeno kipya. Pa bitale nfinyo, Yesu bambile shi: “Kino kipulu [akilesha] kilombeeno kipya mu mase ande.” (1 Kod. 11:25) Ku bukwashi bwa mutemuki Yeelemiya, Efile Mukulu batemukile shi Akakitshi kilombeeno kipya kilekeene na kilombeeno kya Mwiya kibaadi mukite na bena Isaleele. (Badika Yeelemiya 31:31-34.) Efile Mukulu mmukite kilombeeno kipya na bena Isalele ba mu kikudi. (Gal. 6:15, 16) Kino kilombeeno nkikitshibwe ku bukwashi bwa mulambu wa Kidishitu na nkikitshibwe ku mase aaye abapongolokyele. (Luk. 22:20) Yesu ndjo mwakwidi a mu kilombeeno kipya, na bashingwe mwimu basha lulamato be mwanka abakapete bupyanyi mwiyilu.—Eb. 8:6; 9:15.

15. Mbantu kinyi batwele mu kilombeeno kya Bufumu, na mwabi kinyi wabakapete su babashaala na lulamato?

¹⁵ Bantu be na matalwa a kudya mukate na kutoma nfinyo mu kitentekyesho abashinguula shi be mu kilombeeno kya Bufumu. (Badika Luuka 12:32.) Baaba babekeele balondji ba Yesu bashingwe mwimu na babamulameete, babakyengyele pamune naaye, babaadi na kya kumunana naye mwiyilu. (Fid. 3:10) Bu byabadi mu kilombeeno kya mwiyilu, bashingwe mwimu basha lulamato abakamunana na Kidishitu bu ba nfumu mwiyilu bwa looso. (Bif. 22:5) Bano nyi bantu be na matalwa a kudya mukate na kutoma nfinyo mu Kidiibwa kya Mwanana.

16. Pushisha mu kikoso akilesha mukanda wa Beena-Looma 8:15-17.

¹⁶ Nkapenda baaba babadi balungule kwi kikudi shi mbana b’Efile Mukulu nyi balombeene kudya mukate na kutoma nfinyo bya mu kitentekyesho. (Badika Beena-Looma 8:15-17.) Lamina shi Mpoolo baadi mufube na kishima kya mu kiina Arame “Abba,” akipushisha shi “Yaaya!” Mwana mmulombeene kutemuna kino kishima nsaa yesamba bwa nshaaye, mwanda kibaadi kishima akilesha kifulo na kipwano kya “papa” na kishima kya kaneemo “Yaya.” Baaba batambule ‘kikudi kibeekashe bu bana ba bupyanyi’ nyi mbana ba kifulo ba mu kikudi b’Efile Mukulu. Kikudi kyaye kinabeene kikwete kushinkamiisha kikudi kyabo, akibapa bishinkamisho abilesha shi  mbana ba Yehowa bashingwe mwimu. Ta mpamwanda washi abo ta mbakumiine kushala pa nsenga nya. Abauku kalolo shi abakapyana pamune na Yesu mu Bufumu bwa mwiyilu su bashala na lulamato mpa na ku lufu. Abauku dingi shi ‘mbashingwe mwimu, wa kwi A-kishila,’ Yehowa. Lelo uno, nka penda bapeela ba ku baaba bantu 144 000 bekale bana b’Efile Mukulu nyi ba kii pa nsenga. (1 Yo. 2:20; Bif. 14:1) Abapusha shi be mu kipwano na Yehowa, nyi bwakinyi abamwitaminaa shi: “Abba, Yaya!”

17. Bashingwe mwimu be na lukulupilo kinyi?, Na mmushindo kinyi wabelumonaa?

¹⁷ Su we mwina Kidishitu mushingwe mwimu, lukulupilo lwa kwenda mwiyilu ndulombene kwikala mwanda wi na muulo mu nteko yoobe. Na okyebe kwikala na mpushiisho a Bifundwe mwilekeene. Bu kileshesho, nsaa ayakula Bible pabitale eyibakishi dya mwiyilu pankatshi pa Yesu na “mukashi” aaye, okyebe kuuka shi byabya mbikutale na okyebe kukimba bya kwilumbuula. (2 Kod. 11:2; Yo. 3:27-29; Bif. 21:2, 9-14) Nsaa ayilesha Efile Mukulu mu Eyi dyaye kifulo kyadi nakyo bwa bana baaye ba mu kikudi, wakula shi: “Wawa mwanda nguntale.” Na nsaa i Eyi dya Yehowa adituusha malango kwi bana baaye bashingwe mwimu, kikudi kiselele akikutumu boodya kukookyela na kwakula mwishimba dyobe shi: “Nnami abakwila pano.” Kikudi ky’Efile Mukulu na kikudi kyoobe abikyebe kwibunga na nkushikamiisha shi we na lukulupilo lwa mwiyilu.

18. “Ingi mikooko” i na lukulupilo kinyi? Abapushaa naminyi pabitale lwalwa lukulupilo?

¹⁸ Ku lungi lupese, su we na lukulupilo lwa kwikala munkatshi mwa “kibumbu kikata” kya “ingi mikooko,” Efile Mukulu mmukupe lukulupilo lwa kwikala na muwa pa nsenga. (Bif. 7:9; Yo. 10:16) Okyebe kukumiina kwikala na muwa bwa looso mu Paladiiso na okapete disanka pa kutala abyakula Bible bwa nshalelo a pano pa nsega. Okyebe kumona mu binangu nshalelo a muloo na kufukama na kifuko kyobe na ba kuuku boobe. Okyebe kwikala na kisukusuku kya kutengyela mafuku asha akeekala dingi nsala, bulanda, makyenga, mikumbo na lufu sunga bipupa pa nsenga. (Mis. 37:10, 11, 29; 67:6; 72:7, 16; Yesh. 33:24) Okyebe kwikala na lukalo lukata lwa kumona baaba abakasanguka bwa kwikala na muwa wa looso pa nsenga. (Yo. 5:28, 29) Twi na lutumbu lukata kwi Yehowa bwa myabi ya lukulupilo lwa pa nsenga! Byabya, sunga toodi mukate na kutoma nfinyo, okwete kupetekyelwa ku Kitentekyesho kya lufu lwa Yesu bwa lutumbu loobe bwa mulambu wa nkuulo bwa Yesu Kidishitu.

19, 20. (a) Mushindo kinyi oodi mulombeene kwikala na muwa wa looso? (b) Bwakinyi okapetekyelwa ku Kitentekyesho?

¹⁹ Su we na lukulupilo lwa mwiyilu sunga lwa pa nsenga, alukyebe kwikala mwanda wa binyibinyi nka su we na lukumiino mwi Yehowa, mwi Yesu na mu mulambu wa nkuulo. P’oobe kupetekyelwa ku Kitentekyesho, okyebe kwikala na mushindo wa kulesha lukulupilo loobe na muulo wa lufu lwa Yesu. Byabya, ata kitshibilo kya kwikala umune a ku midiyo ya bantu abakyebe kupetekyelwa ku Kidibwa kya Mwanana mu dya Katano 3/4/2015 kunyima kwa nguba kupona ku Nshibio ya Bufumu na mu angi ma mbalo a mu nsega ishima.

²⁰ Kupetekyelwa mu Kitentekyesho akukyebe kutamisha lutumbu loobe bwa mulambu wa nkuulo wa Yesu. Kuteemesha kalolo mwisambo akukyebe nkutakula bwa kulesha kifulo bwa muntu noobe p’obe kwipaana bwa kwibalungula myanda yoodi mulongye pabitale kifulo kya Yehowa na mpango yaye bwa bantu. (Mat. 22:34-40) Kita mobe mooso bwa kupetekyelwa ku kidibwa kya Mwanana.