1, 2. (a) Mbileshesho kinyi bibaadi Yesu mwisambe na bakwabo ba mu kifuko? (Tala kifwatulo ki kumbangilo kwa mwisambo.) (b) Myanda kinyi ayitungu shi tuukye pabitale lukindji lwa mikooko na mbushi?

YESU e mu mwisambo na Mpyeele, Andree, Jaake na Yowano bakwabo ba mu kifuko. Bakatuka mu kwibapa bileshesho bitale mpika a kishima na mupatulukye, bansongwakashi ekumi na kya talenta. Apudisha mwisambo waye na kingi kileshesho. Mwanka, esambila kipungo akikeekala “Mwan’a-muntu” na kya kutshibila “bisamba byooso” kiimu. Luno lukindji lubaadi lukemeshe balongi baaye ngofu! Mwanka, Yesu esambila bisaka bibidi, kya kumpala ki bu mikooko na kya kabidi ki bu mbushi. Akupu aleesha kisaka kya kasatu ki na muulo ukata kyetanyina bu ‘bakwabo’ na “Nfumu.”​—Badika Mateo 25:31-46.

² Bafubi ba Yehowa bakwete kwisambila kino kileshesho takudi mafuku e bungi mwanda Yesu emwakula akikafikila bantu. Alesha bwakinyi bangi abakapete muuwa wa ikalayika aku namu bangi abakabutulwa bwa looso. Kipandjilo kyetu akituukila ku mushindo watupusha bya binyibinyi bibakwile Yesu na kwibitumikila. Na ino myanda yooso ibatupusha, twi balombeene kwiyipusha shi: Mushindo kinyi wende Yehowa na kutoosha mpushiisho eetu a luno lukindji? Bwakinyi  twi bya kwamba shi lukindji alushimika kasele pa muulo wi nao mudimo wa kulungula mukandu wibuwa? Mba nannyi babadi bape mudimo wa kulungula mukandu wibuwa? Na bwakinyi ino djo nsaa ya kwikala na lulamato kwi “Nfumu” na kwi baaba bayitanyina bu ‘bakwabo’?

3, 4. (a) Myanda kinyi isatu ayitungu shi tuukye bwa kupusha lukindji lwa mikooko na mbushi? (b) Mu Kitenta kya Mulami (Le Phare de la Tour de Sion) kya mu 1881, mushindo kinyi ubaabadi bapushishe luno lukindji?

³ Bwa kupusha kalolo lukindji lwa mikooko na mbushi, abitungu tuukye kalolo ino myanda ikata isatu: Kutundula kwa bantu be mwanka, nsaa ya kiimu na bwakinyi muntu e kwikala mu kisaka kya mikooko sunga kya mbushi.

⁴ Mu Kitenta kya Mulami (Le Phare de la Tour de Sion), kya mu 1881 babaadi baleshe shi “Mwana’a muntu,” abayitanyina dingi bu “Nfumu” nyi Yesu. Balongi ba Bible ba kala babapushiishe shi kishima kyabadi baalule mu ungi Bible (King James Version) bu “bakwetu” akilesha baaba abakamunana na Kidishitu mpa na bantu booso abakashaala pa nsenga na mbidi ipwidikye. Babaadi abamono shi kwabuula kwa mikooko na mbushi akukakitshika munda mwa Bipwa Kinunu bya Kumunana kwa Kidishitu. Na dingi, babaadi abakumina shi bantu babaadi na kya kukila ku lupese lwa mikooko pa mwanda wa kwikala na nshalelo mwipusheene na mwiya wa kifulo w’Efile Mukulu.

5. Mu bipwa 1920, mushindo kinyi ubaadi ulumbulukye mpushisho eetu?

⁵ Kumbangilo kwa bipwa 1920, Yehowa baadi mukwashe bafubi baaye bwa kulumbuula mpushisho aabo a luno lukindji. Kitenta kya Mulami kya mu 15/10/1923, (mu Fwalanse) kibaadi kyakule shi “Mwana a muntu” nyi Yesu. Byabya, Kibaadi kyakule myanda ya mu Bifundwe ayikwasha bwa kutundula bakwabo na Kidishitu shi mbaaba abakamunana naye mwiyilu, na kibaadi kipatuule shi mikooko mbantu be na lukulupilo lwa kushaala pa nsenga mu bukunkushi bwa Bufumu bwa Kidishitu. Kadi, twi kwamba naminyi bwa nsaa ya kwabuula mikooko na mbushi? Uno jurnale baadi alesha shi bakwabo na Kidishitu abakakunkusha naye mwiyilu munda mwa Kumunana kwa Bipwa Kinunu, byabya ta mbalombeene kukutwa kwibakwasha sunga kwibalenguula kwi kisaka kya bantu ki pa nsenga nya. Anka, kwabuula kwa mikooko na mbushi kubaadi na kya kukitshika kumpala kwa shi Bufumu bwa bipwa Kinunu bubangye. Pabitale kabingilo sunga bwakinyi muntu mulombeene kukila ku lupese lwa mikooko, uno junrale baadi mwambe shi bantu mbalombeene kukila ku luno lupese nka su abakumina Yesu bu Nfumu’abo na kukulupila shi Bufumu ngi abukatwala nshalelo ebuwa.

6. Mu bipwa 1990, nkipaso kinyi kibaadi kyende mweneno eetu a myanda na kunyiisha kutooka?

⁶ Pa mwanda wa yawa mpushiisho ebuwa na mulumbulukye, bafubi ba Yehowa mbafikye mu kupusha shi bantu babaadi babangye kutudiibwa ku lupese lwa mikooko sunga lwa mbushi mu mafuku a nfudiilo a uno ndumbulwilo e bubi, muyile mushindo wabatambula mukandu wibuwa wa Bufumu. Anka, mu bipwa 1990, mweneno eetu a myanda bekeele mutoshiibwe. Miisambo ibidi ya mu Kitenta kya Mulami kya mu 15/10/1995, (mu Fwalanse) ibaadi ileshe kwipusheena kwi pankatshi pa mayi a Yesu e mu Mateo 24:29-31 (badika) na e mu Mateo 25:31, 32. (Badika.) * Kitshibilo kya nfudiilo kibaadi naminyi? Mwisambo ukata ubaadi wakule shi: “Kutshiba kwa kiimu pankatshi pa mikooko na mbushi akukakitshika mu mafuku e kumpala.” Nsaa kinyi? “Akukakitshika kunyima kwa ‘mpombo’ yabadi baleshe mu Mateo 24:29, 30 kubanga paapa Mwana a muntu ‘afiki mu ntumbo yaaye.’ . . . Kunyima, Yesu akafisha  ndumbulwilo mubi ooso ku nfudiilo, na akasambisha bantu na kwibatshibila kiimu.”

7. Mpushiisho kinyi mutookane atudi naye binobino?

⁷ Lelo uno, twi na mpushiisho mutookye a lukindji lwa mikooko na mbushi. Pabitale kutudula kwa bantu babadi batemune, Yesu nnaye “Mwana a muntu,” Nfumu. Baaba babadi bambe bu ‘bakwabo’ nyi mbalume na bakashi bashingwe mwimu wa kikudi, abakamunana pamune na Kidishitu mwiyilu. (Lom. 8:16, 17) “Mikooko” na “mbushi,” abalesha bantu ba mu miilo yooso. Bano ta bashingwe mwimu wa kikudi nya. Kadi nsaa kinyi yabakatshiba kiimu? Kino kiimu akikakitshika pepi na nfudiilo ya mpombo ikata itayidi peepi. Kadi, twi kwamba naminyi pabitale kabingilo kalombeene muntu kutudiibwa ku kisaka kya mikooko sunga kya mbushi? Kitshibilo kya nfudiilo akikemeena pa mushindo wabadi bakitshiine bashaale ba ku bakwabo na Kidishitu bashiingwe mwimu wa mu kikudi bakii pa nsenga myanda. Bu bikwete kwifubwila nfudiilo a uno ndumbulwilo pepi, twi na muloo ukata bwa mushindo ukwete Yehowa kwenda na kumunyika etaata pa luno lukindji na pa ingi ipusheene nalo i mu mukanda wa Mateo shapitre 24 na 25!

8, 9. Bwakinyi abalesha mikooko bu “balulame”?

⁸ Mu lukindji lwa mikooko na mbushi Yesu tabaadi muleshe musango umune mudimo wa bulungudi nya. Binobino, mushindo kinyi watudi balombeene kushinkamisha shi alushimika kasele pa mudimo wa bulungudi?

⁹ Kya kumpala, lamina shi Yesu baadi alongyesha na bileshesho. Abimweneka kalolo shi tabaadi akula bwa kwabuula mikooko inabeene na mbushi inabeene nya. Mu mushindo umune, tabaadi akula shi muntu ooso e mu kisaka kya mikooko abitungu adiishe, afwadikye, abukishe, sunga kutala umune a ku bakwabo e mu lukano mu binyibinyi nya. Anka, baadi atusha kileshesho kya bilombeene kwikala mikooko ya mu kifwanyi kwi bakwabo. Baadi muleshe mikooko bu “balulame” mwanda abauku shi Kidishitu ngumune a ku bakwabo na bashingwe mwimu ba kii pa nsenga, na mikooko ayikwatshishena bakwabo na Kidishitu na kululama kooso mu ano mafuku e bubi a ku nfudiilo.​—Mat. 10:40-42; 25:40, 46; 2 Tim. 3:1-5.

10. Mushindo kinyi ulombene mikooko kulesha kalolo kwi bakwabo na Kidishitu?

¹⁰ Kya kabidi, tubande kutala mayi a Yesu abatukatuka mu kutaluula. Kwete kwisambila kitundwilo kya kwikala kwaye na kya nfudiilo a uno ndumbulwilo. (Mat. 24:3) Kumpala mu uno mwisambo waye, Yesu baadi alesha shi kitundwilo akikeekala na mwanda—wa’shi mukandu wibuwa wa Bufumu “aukalungulwa kwi maumbu ooso.” (Mat. 24:14, Kilombeno kipya 2009) Musango umune aye kyapu kwisamba pabitale mikooko na mbushi, baadi muleshe dingi kileshesho kya talenta. Nka bu byatwikeele bebimone mu mwisambo ushale, Yesu baadi mutuushe lwalwa lukindji bwa kushimika kasele shi abitungu “bakwabo” balongi bashingwe mwimu wa mu kikudi beekale na katshintshi ka kwipaana mu mudimo wa bulungudi. Byabya, kasaka kapeela ka bashingwe mwimu bakii pa nsenga mu mafuku a kwikala kwa Yesu bu Nfumu ke na mudimo ukata wa kulombasha—wa kulungula mukandu wibuwa kwi “bisamba byooso” kumpala kw’ashi nfudiilo ifikye. Lukindji lwa mikooko na mbushi alulesha shi bashingwe mwimu abakapeta bukwashi. Aku naamu, mushindo wa kumpala wi na muulo ulombeene bantu be bu mikooko kulesha shi bakwete kukwatshishena na lulamato bakwabo na Kidishitu ngwa kwibakwatshishena mu mudimo wa bulungudi. Binobino, nkinyi akileshe kyakya kineemo kya kwibakwatshisheena? Nkutale penda kwibakwatshisheena na bintu bya ku mbidi na bukwashi bwa mu binangu su, kwi bingi bintu abitungu?

11. Ndukonko kinyi lwatudi balombene kwiyela, na bwakinyi?

¹¹ Bantu bebungi lelo ba ku midiyo mwanda ya balongi ba Yesu ta mbekale bashingwe mwimu wa mu kikudi nya. Nta bapete talenta ibaadi Yesu mupe bapika baaye bashingwe mwimu nya. (Mat. 25:14-18) Lukonko binobino ndwa shi: ‘Mudimo wa bulungudi ngutale binyibinyi baaba booso bashi bashingiwe mwimu wa mu kikudi su?’ Tubaade kutala myanda ipeela ayilesha shi lwaluulo lwi byabya.

12. Mayi a Yesu e mu mukanda wa Mateo 28:19, 20, aetulongyesha kinyi?

¹² Yesu baadi mulambukishe balongi baaye booso bwa kulungula mukandu wibuwa. Kunyima kwa’ye kusanguka, Yesu baadi mulungule balondji baaye bwabadya kwikasha bantu bu balongi, kwibalongyesha bwabadya kukita “byoso” bibaadi mwibalungule. Mu wawa mwiya ubaadi mwibape mubaadi mudimo wa bulungudi. (Badika Mateo 28:19, 20.) Byabya, abitungu balongi booso ba Kidishitu balungule mukandu wibuwa, byabekala na lukulupilo lwa kwenda mwiyilu sunga lwa kwikala na muwa pa nsenga.​—Bik. 10:42.

13. Kimonwa kya Yowano akilesha kinyi, na bwakinyi?

¹³ Mukanda wa Bifumbulwe aulesha shi mudimo wa bulungudi aukitshibwa na bashingwe mwimu mpa na bangi. Yesu baadi mupe Yowano mutumiibwa kimonwa kya “mukashi” mwikale bantu 144 000 bashingwe mwimu abakamunana na Kidishitu mwiyilu, bakwete kwitamina bantu bwabadya “kupeta meema a muwa, buntu.” (Bif. 14:1, 3; 22:17) Aa meema a mu kifwanyi aalesha mpàngo yaate Yehowa bwa kupaasha bantu ku milwisho na ku lufu ku bukwashi bwa mulambu wa nkuulo wa Kidishitu. (Mat. 20:28; Yo. 3:16; 1 Yo. 4:9, 10) Nkuulo ngikale kitako kya mukandu wibuwa watukwete kulungula, na bashingwe mwimu nyi bakwete kukunkusha bwa kukwasha bantu bwa kulonga pabitale yanka na kyabadya kupetela ku yanka. (1 Kod. 1:23) Kadi mu kimonwa, Yowano baadi mumone bangi bantu bashii mu kasaka ka mukashi. Ebalungula bwabadya kwakula n’abo naamu shi: “Fika!”  Na kukookyela kooso, bakwete kulungula bangi bwabadya kupeta meema a muwa. Kino kisaka kya kabidi mbaaba booso be na lukulupilo lwa kwikala na muwa pa nsenga. Byabya, kimonwa kya Yowano akilesha kalolo shi booso abakumiina lwitamino lwa “kufika” be na bushito bwa kulungula mukandu wibuwa kwi bangi.

14. Nkinyi akilesha kukookyela “mwiya wa Kidishitu”?

¹⁴ Muntu ooso akookyela “mwiya wa Kidishitu” abitungu alungule mukandu wibuwa. (Gal. 6:2) Miiya ya Yehowa nta ngilekeene nya. Bu kileshesho, baadi mulungule beena Isalele shi: “Mwiya awikala wa mumune bwa mwin’eumbo na bwa mwenyi mushale munkatshi mwenu.” (Efi. 12:49; Lv. 24:22) Beena Kidishitu tabakwete kukunkushibwa na Mwiya wa Moyiise nya. Anka, ooso a kwatudi, byekala mushingwe mwimu sunga shi mushingwe mwimu, kwete kukookyela “mwiya wa Kidishitu.” Wawa mwiya ngubungye byooso bibaadi Yesu mulongyeshe. Aku naamu bulambukishi bwa Yesu abulesha shi abitungu balongi baaye baleeshe kifulo. (Yo. 13:35; Ja. 2:8) Na mushindo wa kumpala wi na muulo ukata wa kulesha kifulo bw’Efile Mukulu, bwa Kidishitu na bwa muntu n’etu, ngwa kulungula mukndu wibuwa wa Bufumu.​—Yo. 15:10; Bik. 1:8.

15. Bwakinyi twi balombeene kwakula shi mwiya wa Yesu ngutale ooso a ku balondji baaye?

¹⁵ Mayi a Yesu kwi kasaka kapeela ngalombene kutala dingi kisaka kikata. Twate kileshesho, Yesu baadi mukite kilombeeno bwa Bufumu penda na balongi baaye bapeela 11, aku naamu kyakya kilombeeno nkitale dingi ooso a ku bantu 144 000. (Luk. 22:29, 30; Bif. 5:10; 7:4-8) Mu mushindo umune, Yesu baadi mulungule nka penda kasaka kapeela ka balongi baaye​—baaba babaadi mumwenekyele aye kyapu kusanguka​—bwa kukita mudimo wa bulungudi. (Bik. 10:40-42; 1 Kod. 15:6) Anka, ooso a ku balongi baaye ba mu siekele a kumpala babaadi abauku shi wawa mwiya ngwibatale, sunga mbibabakutshilwe kupusha’bo banabeene pabaadi apebalungula Yesu. (Bik. 8:4; 1 Mp. 1:8) Mu mushindo umune lelo, Yesu nta mulungule ooso a ku bantu midiyo mwanda bwa kwipaana mu kulungula Bufumu nya. Kadi, booso abauku shi be mu kitungo kya kwikala na lukumiino mwi Kidishitu na kulesha lukumiino lwabo p’abo kwipaana mu mudimo wa kutuusha bukamonyi.​—Ja. 2:18.

16-18. Mushindo kinyi ulombeene mikooko kukwatshisheena bakwabo na Kidishitu, na bwakinyi abitungu bakite byabya kubanga binobino?

¹⁶ Satana kwete kulwa ngoshi na bakwabo na Kidishitu ba ku bashingwe mwimu ba kii pa nsenga, akafwimisha dingi bulwishi bwaye bu byauku shi kubamushadila “mafuku apeela” bwashi afikye ku nfudiilo. (Bif. 12:9, 12, 17) Sunga mbyabakwete kufumankana na kukyengyeshibwa kukata, bashingwe mwimu bakwete kukunkusha mudimo ukata wa kulungula mukandu wibuwa byaushakitshikile dingi mu nsenga. Kushi mpaka, Yesu e naabo, kwete kwibakwatshisheena.​—Mat. 28:20.

¹⁷ Kisaka kya bungi bwa mikooko kikwete kwenda na kukaamina ki na kineemo kya kukwatshishena bakwabo na Kidishitu mu ungi mushindo kushi penda mu mudimo wa bulungudi nya. Bu kileshesho, bakwete kutuusha bya buntu byabo na kukwasha bwa kwibaka Mashibo a Bufumu, Mashibo a Bikongeeno, na a ma biro a ma filiale, na bakwete kukookyela na lulamato looso bantu babadi batuule kwi “mpika a kishima na mupatulukye” bwa kukunkusha.​—Mat. 24:45-47; Eb. 13:17.

¹⁸ Binobino ba miikeyilu abakyebe kufungula bipapi bya kabutu ka mpombo ikata. Kumpala kwa’shi byabya bikitshikye, bakwabo na Kidishitu booso bakii pa nsenga abakyebe kupeta kitampi kyabo kya nfudiilo. (Bif. 7:1-3) Kumpala kwa Armagedone kufika, bashingwe mwimu abakeekala ba kwenda mwiyilu. (Mat. 13:41-43) Byabya, binobino nyi nsaa ayitungu shi baaba booso be na lukulupilo lwa kutshibilwa kiimu bu mikooko bakwatshishene na lulamato looso bakwabo na Kidishitu.