Bangi balangwidi b’Efile Mukulu mbafikye mu kwakula ano mayi pabitale kupeta muntu a kwiyibakisheena naye. Na dingi, abashinguula kalolo elango dya Mpoolo mutumiibwa dya kwiyibakisheena “nka penda mu Mwanana”​—elango aditungu shi bena Kidishitu booso beditumikile. (1 Kod. 7:39, NWT) Bwakinyi bakwete kwakula byabya?

Bantu abanangushena byabya abamono pangi shi kwi kwilekeena mu bungi bwa bakwetu balume na bakashi bakumbeene kwiyibakishena. Mu maumbo ebungi uno mwanda wi byabya. Tubande kutala bileshesho bibidi: Mu Corée, mu Batemwe 100 be bukupi, 57 mbakwetu bakashi na 43 mbakwetu balume. Rapore ya mu Colombie ayilesha shi mu Batemwe 100, bakashi be 66 na balume 34.

Mu angi maumbo kwi lukalakasho lwa baledi bashi bena Kidishitu bakwete kuteka eondo dikaamine, binobino, abifiki bukopo bwa bakwetu balume be na mushindo upeela bwa kwibakila. Pa mwanda wa byabya, ungi mukwetu mukashi mukumbeene kumona shi bi bukopo bwa kupeta muntu a kwiyibakishena naaye “mu Mwanana.” E kwiyipusha shi: “Eyendo shi nakyebe kupeta mulume ankumiina munkatshi mwa Batemwe ba Yehowa su?” *

Su tobopwile kwela bino binangu, ikala mushinkamishe shi Yehowa auku mwanda oobe. Byabya, mwiukye byokwete kupusha pabitale wawa mwanda.​—2 Mya. 6:29, 30.

 Sunga mbyabya, Yehowa ashinkamisha kalolo Mwiyi dyaye shi, abitungu kwibakila nka penda mu Mwanana. Bwakinyi? Mwanda auku kyakya kibuwa bwa mwilo waye. Takumiina penda kukalwila bafubi baaye ku kinyongwa kyabadi balombeene kupeta nya, kadi, akyebe dingi shi bekale na muloo. Pabaadi beena Yuuda bebungi abeyibakishena na beenyi bashy’abalangwila Yehowa mu mafuku a Neemi, baadi mwibalungule kileshesho ki bubi kya Salomone. Salomone “baadi mufudiibwe kwi Efile Mukulu aaye, . . . baadi mupambulwe kwi bakashi beenyi, aye nkukita bubi.” (Ne. 13:23-26) Yehowa kwete kulungula bafubi baaye ba ano mafuku bwabadya kwiyibakishena nka penda na mwina Kidishitu a binyibinyi bwabadya kwikala kalolo. (Mis. 19:7-10; Yesh. 48:17, 18) Bena Kidishitu ba binyibinyi be na lutumbu kwi Yehowa bwa kifulo kyaye na kalolo mu bukunkushi bwaye. P’abo kukookyela kwadi bu Nfumu, bakwete kushinkamisha shi naaye Nfumu mukile bukata a mwiyilu na pa nsenga.​—Mye. 1:5.

Eyendo shi tokumiina ‘kwianyîna mu kilombêno’ na bantu balombeene nkulubisha eshinda dy’Efile Mukulu. (2 Kod. 6:14, EEM) Beena Kidishitu bebungi lelo mbafikye mu kumona bulami bwa kukookyela ku uno mwiya na kushinkamisha shi be mwishinda di buwa. Kadi bangi mbakutwe kukita byabya.

Ungi mukwetu mukashi a mu Australie abetamina bu Maggy * aleesha kibaadi kimufikile p’aye kubanga kutuuka na muntu shi mwina Kidishitu, akula shi: “Naadi mubangye kukisha bisangilo bibungi, nka penda bwa kwikala naaye. Naadi mubofule mu kikudi.” Ranata a mu Inde baadi mubangye kwifuleena na mwina kalasa naaye babaangile kulonga Bible. Baafikile mu kumona shi baadi akimbi penda bwa kutuuka naaye. Ku nfudiilo a byooso, baadi mukatukye mu bya binyibinyi abanga kutwela mu kingi kipwilo bwashi bamwibakile.

Kingi kileshesho nkya Ndenguè ungi mukwetu mukashi a mu Cameroun baadi na bipwa 19 pabatwelele ku bulunda. Alesha shi: Mulume baadi akyebe kwimwibakila bamulungwile shi akyebe kumutadiila mu lulangwilo lwaye. Anka, kunyima kwa mbingo ibidi’bo abapu kwiyibakisheena mulum’aye baadi mumutoshe bwa kwenda ku bisangilo bya beena Kidishitu. Akula shi: “Naafikile mu kwimona bu musumbudibwe na naadi nadidi nsaa yooso. Namwene shi tshinaadi nataluula dingi nshalelo ande nya. Naadi na kinyongwa kikata.”

Byabya, nta balume booso bashi bena Kidishitu abatombokyelaa bakashi babo na kukutwa binangu nya. Sunga byekala shi tobandile kukyengeshibwa mwanda we mwiyibakishene na muntu shi mwina Kidishitu, mushindo kinyi wabidi bitale kipwano kyobe na Nshobe a mwiyilu? We kupusha naminyi p’obe kuuka shi twe mulonde elango dyaye bwa kaa koobe? Kunyima kwa byabya, okwete kupusha naminyi pabitale kitshibilo kyobe?​—Mye. 1:33.

Bakwetu balume na bakashi ba mu nsenga ishima mbafikye mu kushinkamisha shi kwibakila “nka penda mu Mwanana” mmwanda ukile buwa. Baaba bakii bukupi be na kitshibilo kya kusangasha eshimba dya Yehowa p’abo kutengyela bwabadya kupeta muntu e buwa abadya kwiyibakisheena naye munkatshi mwa balangwidi ba Yehowa. Kifuko kya ungi mukwetu mukashi abetamina bu Michiko a mu Japon kibamulungwile bwadya kwiyibakishena na muntu shi mwina Kidishitu. Kukatusha byabya, baadi amono bangi ba ku ba loole baye abapete balume bebuwa mu kakongye. Akula shi: “Naadi neakwila ami nabeene shi Yehowa nyi ‘Efile Mukulu a muloo,’ byabya, disanka dyetu taaditukila mu kwikala beebakilwe sunga kukutwa kwibakilwa. Akupu, naadi mushinkamishe shi etukitshinaa myanda muyile lukalo lwa mashimba eetu. Byabya, su tobandile kupeta muntu a kwiyibakishena naye, bi buwa kushaala bukupi pokyotengyela.” (1 Tim. 1:11) Kunyima kwa kutengyela, mukwetu Michiko baadi mupete mukwetu mulume e buwa, na mmwikale na muloo p’aye kutengyela.

Bangi bakwetu balume abafikile mu kutengyela nka byabya bwa kupeta mukashi e buwa. Bill a mu Australie ngumune a ku baaba bakwetu. Alesha shi babaadi bamukumiine ingi nsaa kwi bakashi ba pasha pa kakongye. Sunga mbyabya, baadi mupele kwikala nabo mu kipwano. Bwakinyi? Tabaadi  mukumiine ‘kwianyîna mu kilombêno na bashi bêna lukumîno’ nya. Baadi muyiile bakwetu bakashi bebungi munda mwa bipwa, kadi, kushi’bo kumukumiina nya. Mukwetu Bill baadi mutengyele munda mwa bipwa 30 kumpala kwa’ye kupeta mukashi mulombane naaye. Bill akula shi: “Tshinaadi na kwinyongola nya.” Apatuula shi: “Nyi mwabi ukata kwandi mwanda tukwete kwenda mu bulungudi pamune, kulonga pamune na kulangwila pamune. Ne na muloo wa kukisha kapapi pamune na baloole ba mukashi’ande mwanda booso mbalangwidi ba Yehowa. Tukwete kwibaka eyibakishi dyetu na malango a mu Bible.”

Nkinyi kyodi mukumbeene kukita nsaa yoodi mutuule mwada oobe mu masa a kifulo a Yehowa? Banda kwela binangu bwakinyi tobandile kwibakila. Su mpa mwada wa kukookyela bukunkushi bwa Bible bwa kwibakila “nka penda mu Mwanana,” we mukumbeene lutumbu mukwetu bwa kunemeka mwiya w’Efile Mukulu. Ikala mushinkamishe shi Yehowa e na disanka bwa kitshibilo kyobe kya kukookyela ku Mwiya waye. (1 Sam. 15:22; Mye. 27:11) We mukumbeene kutungunuka na ‘kumufungwiila eshimba dyoobe.’ (Mis. 62:8) Okyebe kwikala na kishima kya kwela nteko ayikunyingisha, akupu, okeekala omutekye nsaa yooso. Okyebe kunyingisha kipwano kyobe n’Efile Mukulu efuku dyoso p’obe kunyingiila ku bitompwanga bya mishindo yooso. Ikala mushinkamishe shi Yehowa kwete kwitatshisha bwa bafubi baaye booso na we na muulo ku meso kwaye. Yehowa kwete kwitatshisha bwa nkalo yoobe na kyokwete kukimba. Nta mulee muntu ooso bwa kumupa muntu a kwiyibakishena naaye nya. Byabya, su we na lukalo lwa muntu a kwiyibakishena naye, Yehowa auku mushindo ukile buwa wa kupudisha nkalo yoobe.​—Mis. 145:16; Mat. 6:32.

We mukumbeene kupusha ingi nsaa bibaadi bipushe mufundji a misambo Davide pabambile shi: “Fika bukidi Yehowa ongaluule! Nee mufudiile. Tonfyanga lukyebo lwobe.” (Mis. 143:5-7, 10) Mu yaaya nsaa, kimba bya kulekyela Nshobe e mwiyilu mushindo wadya kulesha akikyeb’eshimba dyaye boobe. We mukumbeene kukita byabya p’obe kwata nsaa ya kubadika Eyi dyaye na kunangusheena ku byobadika. Okyebe kutamisha kyukilo kyobe pabitale miiya yaye na mushindo ubaadi mukitshine bafubi baaye ba kala myanda. P’obe kumuteemesha, okyebe kunyingisha lukulupilo lobe lwa kuuka shi bi na muulo bwa kumukookyela.

Nkinyi dingi kilombeene nkwikasha na muloo na nkupetesha bipeta bibuwa mu mafuku okii bukupi? We mukumbeene kukimba bya kutamisha mweneno oobe a myanda ya mu kikudi bu kalolo, katshintshi ku mudimo, kwipaana kwi Efile Mukulu, na nkumo i buwa—ngikashi i na muulo bwa kwikala na nshaleelo a kifuko e buwa. (Kib. 24:16-21; Lut. 1:16, 17; 2:6, 7, 11; Mye. 31:10-27) Kimba Bufumu pa mbalo ya kumpala p’obe kwipaana mu mudimo wa bulungudi na midimo ya bwina Kidishitu; kukita kwa byabya, akukyebe nkukalwila ku ingi myanda. Bill atubesambila kunundu akula pabitale mafuku abaadi atengyela bwa kwibakila shi: “Abaadi akile lubilo! Naadi mufubile Yehowa mu aa mafuku bu mbala-mashinda.”

Eyendo, kwibakila “nka penda mu Mwanana” kukii nka na muulo. Kukookyela ku bwabwa bukunkushi nkulombeene nkukwasha bwa kutumbisha Yehowa na kwikala na muloo. Bible akula shi: “Sha mwabi mmuntu atshiinyi Yehowa, yaawa mufule mayi aaye. Kwaye kwi bintu na bupeta, bululame bwaye abushaala bwa looso.” (Mis. 112:1, 3) Byabya, ikala na kitshibilo kya kutungunuka na kukookyela ku mwiya w’Efile Mukulu wa kwibakila “nka penda mu Mwanana.”