Kubanga mu mafuku a kumpala, bantu mbaloote sunga kupwandjikisha bya kupeta muwa wa ikalayika kushii kununupa, na kushii mikumbo. Anka, mbya malwa mwanda booso bwetu tukwete kufwa. Mayi a Yoobo e kumbangilo, abaadi mwakule takudi bipwa bikile pa binunu bisatu, akwete kulombana lelo uno.

Twi na lukalo lukata lwa kwikala na muwa ushi na nfudiilo, na ndukalo lwi na muntu ooso. Bible etulungula shi Efile Mukulu mmwele mu mashimba eetu lukalo lwa kwikala na muwa wa looso na kipaso kya kwiusankila. (Mulungudi 3:11) Bu byabidi byabya, we mulombene kwela binangu shi Efile Mukulu sha kifulo mutuule byabya binangu mwatudi akutwe mushindo wa kulombasha byanka su? Su bopele, mmwanda wibuwa. Eyi dy’Efile Mukulu aditanyina lufu bu mwishikwanyi na kwitulungula shi: “Mwishikwanyi a nfudiilo akabutulwa, ndufu.”​—1 Beena-Kodinto 15:26.

Tatwi bakumbene kupela shi lufu mmwishikwanyi. Muntu ooso e na binangu bibuwa te bya kwilusankila nya. Su twi kumpala kwa masaku, atusukaa na kufwama, sunga kwiepenga Nsaa yatudi na maladi, atukimbaa mushindo wa kupusha bibuwa. Atukitaa mwetu mooso bwa kusuuka bintu bilombeene kwitufikisha ku lufu.

Kwi ingi myanda ilombene kwitutuma bwa kukumiina shi yawa mwishikwanyi a kala akabutudiibwa su? Oolo, i kwanka. Yehowa aye Mupangi, tabaakitshine muntu bwa kwikala na muwa penda munda mwa mafuku apeela na kufwa nya. Lufu lwa muntu talubaadi mu mpàngo ya Yehowa ya kumbangilo nya. Bapangile bantu bwabadya kwikala na muwa wa looso pa nsenga, na mpàngo yaaye akeyilombasha.—Yeeshaya 55:11.

Mushindo kinyi aukabutulwa lufu? Kubanga kala, bantu mbakimbe mushindo wa kupudisha mwanda wa lufu, kushi koobesha. Mu ano mafuku, wawa mwanda ukwete kutungunuka. Bena siyanse mbatushe nsalo na manga apeeleshe ingi mikumbo. Mbepaane mu kukimba bwa kuuka bi ma gène sunga tuntu twi ku ma cellule a bintu bi na muwa. Mu ma mbalo e bungi, bantu bakwete kukamba kukita mafuku ebungi kukila bibaabadi abakitshi mu bipwa lukama bishaale. Kadi sunga byekala byabya, lufu lwinka kwanka. Nka bu abyakula Bible, ‘booso abaalukiila ku lufuufi.’—Mulungudi 3:20.

Mukandu wibuwa ngwa shi tabitungu tukulupile mu ngobesha ya muntu bwa kupudisha uno mwanda nya. Yehowa baadi mupwe kulumbuula kumpala mushindo watudi balombeene kupashibwa ku lufu, na muntu e bu kitako kya kulombana kwa yaaya mpango nyi Yesu Kidishitu.