1, 2. (a) Yesu baadi mwakule naminyi pabitale mafuku a ku nfudiilo? (b) Nkonko kinyi yatukyebe kutaluula?

MBILOMBEENE kwikala mwanda ukata wa kumona Yesu mushale ku Mwengye wa Olive—atala ku ntempelo a mu Yeelusaleme nsaa yakula matemuki aaye a kukaanya. Mpyeele, Andree, Jaake, na Yowano abateemesha kalolo Yesu pabaadi ebalungula butemuki bwaye abukalombana mu mafuku e kumpala. Bebalungwile myanda ikata itale mafuku a ku nfudiilo kwa uno ndumbulwilo e bubi, nsaa ibaadi na kya kwikala bu nfumu a Bufumu bw’Efile Mukulu. Bebalungwile shi mu aa mafuku e bukopo, “mpika [aaye] a kishima na mupatulukye” akalesha mpala yaye pa nsenga, na kupa bafubi baaye bidiibwa bya mu kikudi byabadi nabyo lukalo pa nsaa ilombane.​—Mat. 24:45-47.

² Akupu, mu bwabwa butemuki bumune, Yesu baadi muleshe lukindji lwa bansongwakashi ekumi. (Badika Mateo 25:1-13.) Tubande kutaluula ino nkonko: (1) Mmwanda kinyi ukata wi mu luno  lukindji? (2) Mushindo kinyi ulonde bashingwe mwimu ba sha lulamato elango dya mu lukindji, na mbipeta kinyi bituukye? (3) Mushindo kinyi ulombeene ooso a kwatudi kupeta bukwashi ku lukindji lwa Yesu lelo?

3. Mikanda yetu ibaadi ayipatuula naminyi kala lukindji lwa bansongwakashi ekumi, na mbipeta kinyi bibaadi bilombeene kutuuka?

³ Mu mwisambo ushaale tumwene shi, mu bipwa bishaale mpika a kishima na mupatulukye mmwende na kupatuula Bifundwe pa kwimeena ngofu pa malongyesha atudi balombene kutumikila pamutwe wa kushimika kasele pa matemuki a mu kifwanyi. Kala, mikanda yetu ibaadi ayipatuula ingi nsaa mpa na tu myanda tupeela twa mu lukindji lwa Yesu lwa bansongwakashi ekumi, bu bimuyi, mwimu, byaasa, na ingi myanda. Byabya, mbilombeene kwikala shi tubaadi bashimishe malongyesha aalo apelepele na akutumikila bukidibukidi su? Nka bu byatukyebe kwibimona, lwaluulo lwa ku luno lukonko lwi na muulo ukata.

4. Mushindo kinyi watudi balombeene kutundula (a) mulume? (b) bansongwakashi?

⁴ Tubandeyi kutaluula mwanda ukata wa Yesu wi mu luno lukindji. Kya kumpala tubande kutala bantu be mwanka. Mulume a mu lukindji nnanyi? Abimweneka patooka shi nyi Yesu. Mwanda, mu ma mbalo elekeene, baadi akula bwaye’ye nabeene bu mulume! (Luk. 5:34, 35) Kadi ba nsongwakashi bashyabandile kuuka balume mba nnanyi? Mu lukindji, Yesu akula shi ba songwakashi be na bushito bwa kushaala belumbuule na bimunyi byabo abitembe nsaa ayikafiki mulume. Banda kutala elango di mumune aditusha Yesu kwi “lombe [lwaye] lupeela” lwa balondji bashingwe mwimu: ‘Shalayi na bilamba bya mufubo, malampi eenu ekale aatembe. Ikalayi bu bantu abayindila nfumw’abo pataaluka ku madyo a bulunda.’ (Luk. 12:32, 35, 36) Kukatusha byabya, ku bukwashi bwa kikudi kiselele, Mpoolo mutumiibwa na Yowano mutumiibwa babaadi bapwandikishe balondji bashingwe mwimu na bansongwakashi tumame. (2 Kod. 11:2; Bif. 14:4) Abimweneka patooka shi Yesu beelele lukindji lwi mu Mateo 25:1-13 bwa kulanga na kudimusha balondji baaye bashingwe mwimu.

5. Mushindo kinyi ubaadi Yesu muleshe kipungo kya kulombana kwa lukindji lwaye?

⁵ Akupu, tubande kutala kipungo. Elango dya Yesu nditale kipungo kinyi? Yesu etulesha kalolo kitundwilo ku nfudiilo kwa lukindji p’akula shi: “Mulume basheele kufika.” (Mat. 25:10) Nka bu byatubaadi bamone mu Kitenta kya Mulami kya mu 1/7/2013, butemuki bwa Yesu bwi mu Mateo shapitre 24 na 25 bwi na bifundwe mwanda (8) abyakwila “kufika” kwaye; mu mwanda ooso, mwi kishima kya mu kiina Greke akilesha mwanda wi mumune. Mu mwanda ooso, Yesu baadi akwila kipungo kya mpombo ikata pakafiki bwa kutshiba kiimu na kubutula uno ndumbulwilo ebubi. Mu mishindo yooso, luno lukindji ndutale kipungo kya mafuku a ku nfudiilo, anka kipindji kya nfudiilo kya lukindji akikalombana mu mpombo ikata.

6. Mwanda kinyi ukata wi mu luno lukindji?

⁶ Mwanda kinyi ukata wi mu luno lukindji? Tentekyesha myanda i kumpala. Yesu baadi kyakatuka mu kwakula pa bitale ‘mpika aye a kishima na mupatulukye.’ Yawa mpika baadi na kya kwikala kasaka kapela ka balume bashingwe mwimu kabaadi na kya kukunkusha mudimo wa balondji ba Kidishitu mu mafuku a ku nfudiilo. Yesu baadi mudimushe baaba balume shi abitungu bashale na lulamato. Akupu, baadi mwakule mwanda wa lukindji lwa bansongwakashi ekumi bashyambandile kuuka balume bwa kudimusha balongi baaye booso bashingwe mwimu bwabadya kutungunuka na ‘kwikala bapasukye’ tala bashimisha efuto dyabo. (Mat. 25:13, EEM) Binobino tubandeyi kutaluula lwalwa lukindji bwashi tumone mushindo utumikile bashingwe mwimu elango di mwanka.

7, 8. (a) Bwakinyi bansongwakashi bapatulukye babaadi bashale bapasukye? (b) Mushido kinyi uleshe bashingwe mwimu shi mbelumbuule?

⁷ Lukindji lwa Yesu alulesha shi, mu kwilekeena na bansongwakashi batshikame, bansongwakashi bapatulukye babaadi na kya kushaala bapasukye mpa na pa kufika kwa mulume. Bwakinyi? Bwa ino myanda ibidi: Kwilumbuula na kwikala bapasukye. Bansongwakashi babaadya kushala bapasukye bwabwa bufuku bwa kutengyela kufika kwa mulume, babaadi balombene kushala na bimunyi byabo bitembe na kushala bapasukye munda mwa nsaa ibungi mpa nka na’pakafiki. Mu kwilekena na bangi batshikame, bansongwakashi batano babaadi belumbuule kalolo abo nkutwala byasa bya mwimu pamune na bimunyi byabo. Bashingwe mwimu ba sha lulamato, mbaleshe namu shi mbelumbuule byabya su?

⁸ Oolo! Mu mafuku a ku nfudiilo, beena Kidishitu bashingwe mwimu bakwete kukita nka bu bansongwashi bapatulukye, mbelumbuule bwa kulombasha mudimo wabo na lulamato mpa nka na ku nfudiilo. Abauku kyakukita bwa kushala na lulamato ku mufubo, babaamwene shi bwa kulombasha kalolo mudimo wabo, abitungu basumbushene myanda ibungi ya mu ndumbulwilo a Satana. Mbelambule kwi Yehowa bwa kumufubila, kushi bwa kutala nsaa sunga nfudiilo, kadi, bwa kifulo na lulamato lwabadi nalo bwa Yehowa na bwa Mwana aaye. Bakwete kulama kululama kwabo pa kupela kutwesha mu binangu byabo kikudi kya ndumbulwilo mulwile na binangu bya kukimba bintu bya ku mbindi, bya myanda i butete na bya kwisankisha. Bakwete kushala bapasukye, abatungunuka na kulesha etaata kushi kukooka, sunga Mulume amweneka bu bayisha.​—Fid. 2:15.

9. (a) Nkudimushibwa kinyi kutuushe Yesu pabitale baaba ababunguta? (b) Mushindo kinyi waluule bashingwe mwimu ku musaase wa’shi: “Ngyaawa mulume baafiki!”? (Tala na mayi e kuushi kw’esaki.)

⁹ Kupasuka nyi kintu kya kabidi kibaadi kikwashe baaba bansongwakashi bwabadya kwikala mbelumbuule. Nkulombene kwikala mushindo wa’shi bangi bena Kidishitu bashingwe mwimu babungute munda mwa nsaa ibungi bufuku su? Oolo. Pusha bibaadi Yesu mwakule bwa bansongwakashi ekumi shi “abo nkubunguta booso, nkulaala” p’abo kumona bu mulume bayisha. Yesu baadi auku shi, sunga binangu bipasukye mbilombene kukooka na kubofushibwa kwa mbidi. Bangi ba ku bashingwe mwimu mbatumikile kwakwa kudimushibwa na kunyisha kufuba ngofu bwa kushala bapasukye na babuule meso. Mu lukindji, bansongwakashi booso babapushishe musaase bufuku awamba shi: “Ngyaawa mulume baafiki!” Kadi nka penda bapasukye ndjo babaadi banyingiile na ku nfudiilo. (Mat. 25:5, 6; 26:41) Twi kwamba naminyi bwa bashingwe mwimu basha lulamato lelo uno? Mu mafuku a ku nfudiilo, mbaaluule ku musaase wa bishinkamiisho bi nka bu abyamba shi: “Ngyaawa mulume baafiki”—taadi pepi. Akupu, mbashaale banyingye mu bitompwanga, belumbuule bwa kufika kwa Mulume. * Byabya, kulombana kwa kipindji kya nfudiilo kya lukindji, akukafiki mu kipungo kitshibibwe. Mu mushindo kinyi?

10. Kwialulusheena kwa mayi pankatshi pa bansongwakashi bapatakane na badimukye akwibwesha lukonko kinyi?

¹⁰ Kipindji kikata kya lukindji akipetekwa pangi ku nfundiilo mu kwialulusheena mayi pankatshi pa bansongwakashi bapatakane na badimukye. (Badika Mateo 25:8, 9.) Kwakwa kwialulusheema kwa mayi akwibwesha luno  lukonko: “Mu myanda ya kala ya bafubi b’Efile Mukulu, nsaa kinyi ibaadi bafubi baasha lulamato bapele kukwasha bangi babebatekyele bukwashi?” Lwaluulo atwilupete mu kutaluula dingi kipungo kya mafuku. Tentekyesha mpushisho eetu mulumbulukye a shi Yesu, e bu Mulume afiki bwa kutshiba kiimu peepi na nfudiilo ya mpombo ikata. Byabya mbilombeene kwikala shi lukindji alwisambila myanda ayikitshika kumpala kwa nfudiilo ya mpombo ikata. Bwakinyi atwakula byabya? Mwanda mu yaya nsaa, bashingwe mwimu abakyebe nkediibwa kitampi kyabo kya nfudiilo.

11. (a) Nkinyi akikatshika kumpala kwa mbangilo a mpombo ikata kubanga? (b) Nkinyi kibaadi akikyebe kwakula bansongwakashi bapatulukye nsaa ibabalungwile bapatakane shi ndayi kwi bantu abaudishaa mwimu?

¹¹ Byabya, kumpala kwa shi mpombo ikata ibangye, bashingwe mwimu booso be pa nsenga abakyebe kwedibwa kitampi kya nfudiilo. (Bif. 7:1-4) Kubanga yaya nsaa, abakashinkamisha shi abende mwiyilu. Kadi banda kwela binangu pabitale bipwa abikeekala kumpala kwa shi mpombo ikata ibangye. Nkinyi akikyebe kukitshikila bashingwe mwimu bashii bashaaale bapasukye, bashimishe lulamato lwabo? Abakeekala bashimishe efuto dyabo dya kwenda mwiyilu. Kushii mpaka, tabakedibwa kitampi kya nfudiilo kumpala kwa mpombo ikata kubanga nya. Mu yaya nsaa, bangi bantu baasha lulamato abakasangudibwa bu bashingwe mwimu. Nsaa ayikabanga mpombo ikata, baaba bapatakane abakatapika ku mashimba pa kumona kubutuka kwa Babilone Mukata. Pangi nka mu yaya nsaa ngi mwabakamono shi ta mbelumbuule bwa kufika kwa Mulume. Mu yaya nsaa ya nfudiilo, su bateka bukwashi, nkinyi akikakitshika? Lukindji lwa Yesu alwitupa lwaluulo. Bansongwakashi bapatulukye babapelele kwiyapusha bapatakane mwimu, na kwibalungula shi ndayi kwi abaudishaa mwimu. Byabya, tentekyesha shi tamubaadi “munkatshy’a bufuku.” Babaadi na bya nkapeta bantu abaudishaa mwimu mu yaya nsaa su? Nya. Nsaa tayibaadi ipwe kukila.

12. (a) Nsaa ya mpombo ikata, mwanda kinyi wibubi aukafwila mushingwe mwimu ooso akeekala mushimishe lulamato kumpala kwa kwedibwa kitampi kya nfudiilo? (b) Nfudiilo a baaba booso be bu bansongwakashi bapatakane akeekala naminyi?

¹² Mu mushindo umune mu mpombo ikata, bashingwe mwimu basha lulamato taabakakwasha ooso mupele lukumiino nya. Takukeekala bukwashi bwa kwibapa nya. Nsaa ayikeekala ipwe kukila. Nfudiilo a baaba bantu akekala naminyi? Yesu apushisha kibakitshikile nsaa ibayile bansongwakashi bapatakane mu kwiumba shi: “Mulume basheele kufika; babaadi belumbuule nkutwela naaye mu nshibo ya madyo a bulunda, abo nkufunga kiibi.” Nsaa ayikafiki Yesu peepi na nfudiilo a mpombo ikata, akabungu bashingwe mwimu baa-sha lulamato mwiyilu. (Mat. 24:31; 25:10; Yo. 14:1-3; 1 Tes. 4:17) Eyendo, abakafunga kiibi bwa baaba bashi na lulamato, be bu bansongwakashi bapatakane. Byabya, mbalombeene kwela musaase shi: “Mwanaana, Mwanaana, etushitwile naamu!” Kadi abakapeta lwalulo lwi mumune na lwa bantu bebungi be bu mbushi mu yaya nsaa ya kiimu: “Eyendo neenushikwila’shi ntanenuwuku’mi.” Abikekala bi bubi bukile!​—Mat. 7:21-23; 25:11, 12.

13. (a) Bwakinyi tatwi balombene kwakula shi beena Kidishitu bashingwe mwimu bebungi tabakakutwa lulamato? (b) Bwakinyi mayi a Yesu a kudimusha e mulukindji aalesha kifulo na lukulupilo? (Tala kifwatulo ki kumbangilo kwa mwisambo.)

¹³ Muyiile myanda ibatukatuka mu kulonga, twi balombeene kwamba naminyi ku nfudiilo? Yesu baadi akula shi bafubi baaye bashingwe mwimu bebungi abakashimisha lulamato bwa shi bebapyaane su? Nya. Tentekyesha, bibaadi adimusha “Mpika a kishima na mupatulukye” bwa shi taalulukanga afika mpika ebubi. Tabaadi akyebe kulesha shi bino abikakitshika nya. Mu mushindo umune, luno lukindji lubaadi penda bwa kwibadimusha. Nka bu bibaadi bansongwakashi bataano bapatakane na bangi bataano  bapatulukye, mushingwe mwimu ooso e na ngobesha ya kusangula su akumiina kushaala mwilumbuule na mupasukye sunga kushaala mupatakane na mukutwe lulamato. Ku bukwashi bwa kikudi kiselele Mpoolo mutumibwa baadi mudimushe bakwabo bena Kidishitu bashingwe mwimu bwa uno mwanda umune. (Badika Beena-Ebreeyi 6:4-9; opwandikishe na Miiya Ikituulwe 30:19.) Lamiina shi Mpoolo baadi ebadimusha na mayi ebukopo, kadi baadi mukumbashe mayi a kwibakulupila na a kifulo pa kwibalungula shi “bintu bibuwa” abitengyela bakwabo balume na bakashi bena Kidishitu. Mu mushindo umune, kudimusha kwi mu lukindji lwa Yesu ekutuusha na kifulo mpa na kwibakulupila. Kidishitu awuku shi mufubi aaye ooso mushingwe mwimu mmulombeene kushaala na lulamato na kupeta efuto di buwa!

14. Bwakinyi “ingi mikooko” ayikeekala ya kupeta bukwashi ku lukindji lwa bansongwakashi ekumi?

¹⁴ Bu byabidi shi Yesu alesha lukindji lwa basongwakashi ekumi bashyambandile kuuka balume na bashingwe mwimu, twi balombene kutshiba shi yawa verse te na bukwashi kwi “ingi mikooko” ya Kidishitu su? (Yo. 10:16) Tabi byabya nya! Tentekyesha shi mukandu wi mu lukindji aupushika kalolo: Kutungunuka na ‘kwikala bapasukye.’ Ngutale penda bashingwe mwimu su? Yesu akula shi: “Bino byanenulungula, nebilungula mpa na bangi booso shi: Ikalai bapasukye.” (Mak. 13:37, EEM) Yesu akumiina shi balongi baaye balumbuule mashiimba aabo bwa mudimo wa lulamato na kwibunga bwabadya kwikala na budimu mu mushindo umune. Byabya, mwina Kidishitu ooso kwete kulonda bukunkushi bwa bashingwe mwimu mu kino kipaso, kwete kwambula kileshesho kyabo kibuwa na kutuula mudimo wa Bufumu pa mbalo ya kumpala mu muwa waye. Ooso a kwatudi atungunukye na kutentekyesha shi bansongwakashi bapatakane babaadi batekye bapatulukye mwimu wabo. Kuteka kwabo kwa mu bisumanga, akwitulesha shi ta kwi muntu mukumbeene kwikala na lulamato bwetu, mukumbeene kwikala mu bya binyibinyi bwetu sunga kwikala mupasukye bwetu nya. Ooso a kwatudi akatshibilwa kiimu na Nsushi a kululama abadi basangule kwi Yehowa. Abitungu twikale belumbuule. Na kufika kwaye takudi peepi!

15. Bwakinyi eyibakishi dya Kidishitu na mukashi’aye mmwanda wa muloo kwi beena Kidishitu booso ba binyibinyi?

¹⁵ Beena Kidishitu booso abakapete myabi ayitukila ku mwanda ukata wi mu lukindji lwa Yesu. Akupu, nnanyi a kwatudi shi mukumbene kwikala na muloo pabitale lukalo lw’eyibakishi? Bashingwe mwimu abakyebe kwikala mwiyilu; kunyima kwa ngoshi ya Armagedone, abakyebe kufika bu mukashi a Kidishitu. (Bif. 19:7-9) Muntu ooso akeekala a kupeta myabi ku eyibakishi dya mwiyilu mwanda adikyebe kubunga bantu booso bapwidikye mu guvernema umune bwa booso. Byatwikala na lukulupilo lwa mwiyilu sunga lwa pa nsenga, twikaleyi na kitshibilo kya kupeta dilongyesha dikata dya mu lukindji lwa Yesu lwa bansogwakashi ekumi. Tulesheyi kwilumbuula p’atwe kulumbuula mashimba eetu na kutungunuka na kunyingiila bwa kwikala bapasukye bwashi tukasangeele myabi ibuwa ya Yehowa yadi mwitulumbulwile!