Lufu lwa Yesu mwanda wi na muulo ukata ubaadi ukitshikye kala—bafwile bwa kwalusha muwa wa bantu muyiile byabibaadi bilombene kukitshika. Bantu tababaadi bapangibwe bwa kukita myanda i bubi, bwa kukumba sunga kufwa nya. (Kibangilo. 1:31) Kadi lufu lubaadi lutwele mu nsenga kukidila ku muntu a kumpala Adame. Yesu baadi mutuushe muwa waye bwa kwitukuula ku milwisho na ku lufu.​—Badika Mateo 20:28; Beena-Looma 6:23.

Efile Mukulu balesheshe kifulo kikata p’aye kutuma Mwan’aye bwa kwitufwila. (1 Yowano 4:9, 10) Yesu balungwile balondji baaye bwa kutentekyesha lufu lwaye ku bukwashi bwa kileshesho kya mukate na nfinyo. Kukita byabya ku kipwa kyooso nyi mushindo wa kulesha lutumbu lwetu bwa kifulo kyabadi betuleeshe kwi Efile Mukulu na Yesu.​—Badika Luuka 22:19, 20.

Mususa wa kumpala ubaadi Yesu mulungule balongi baaye bwa kutentekyesha lufu lwaye, baadi mwakule pabitale kilombeeno, sunga kipwano. (Mateo 26:26-28) Babaadi bapete mushindo, abo na bangi be bungi butshibiibwe bwa kufika banfumu na ba tshiite mwakwidi pamune naaye mwiyilu. Sunga byekala shi bantu bebungi nyi abakitshi kitentekyesho kya lufu lwa Yesu, nka penda baaba be mu kyakya kilombeeno nyi balombeene kudya mukate na kutoma nfinyo.​—Badika Bifumbulwe 5:10.

Munda mwa bipwa peepi na 2 000, Yehowa kwete kusangula baaba abakeekala bu ba nfumu. (Luuka 12:32) Mbekale bungi bushadile pe bwa bantu abakeekala na muwa wa looso pa nsenga.​—Badika Bifumbulwe 7:4, 9, 17.