Tobweyipwishe nkonko bu ino? Su mbyabya, twe bupenka nya. Bantu mu nsenga ishima bakwete kwiyela nkonko ikata ya mu nshalelo. We bya kupeta myaluulo su?

Bantu midiyo be kwaluula shi, “Oolo!” Bwakinyi? Mwanda mbapete myaluulo ibuwa ku nkonko yabo mu Bible. Okumiina kuuka akyamba Bible su? Byabya, we kupeta myanda ibuwa mu programe a kulonga Bible na bantu buntu abakwete kutusha kwi Batemwe ba Yehowa. *

Eyendo, nsaa yabafiki mu kwibatala bwa kulonga Bible, bangi abakulaa shi: “Ntshi na nsaa.” “Mbikile bukopo.” “Ne na myanda ikile bungi.” Kadi bangi namu abakumiina. Abasankila bwa kulonga myanda ayilongyesha Bible. Tubande kutala bino bileshesho bipeela:

• Gill ungi mwana mukashi a mu Angleterre amba shi: “Naadi mutwele mu kipwilo kya bena Katolike na kya bena Mishoonyi, mu kipwilo kya bena Sikh, na kya bena Bouddha, na nalongyele teoloji ku universite. Anka ntshinadi mupete myaluulo ku nkonko yande pa bitale Efile Mukulu. Akupu Temwe a Yehowa umune bafikile kwande ku nshibo. Naadi mukeme mushindo ubaadi mungaluule ku bukwashi bwa Bible, ami nkukumiina kulonga Bible.”

• Koffi ungi mwana mulume a mu Benin akula shi: “Naadi na nkonko ibungi pabitle nshalelo, anka myaluulo ya pastere a mu kipwilo kyetu tayibaadi isankishe nya. Kadi Temwe a Yehowa baadi mungalule nka penda na Bible. Nsaa ibangipwishe su nakumiina kuuka myanda ibungi, nadi mukumine na muloo ooso.”

• José a mu Brésil amba shi: “Naadi nakyebe kuuka myanda itale bafwe. Naadi nauku shi bafwe mbalombeene kukyengyesha abatala, kadi naadi nakyebe kuuka akilongyesha Bible. Byabya nabangile kulonga Bible na kuuku’ande baadi Temwe.”

• Dennize mwana mukashi a mu Mexique akula shi: “Natompele kubadika Bible kadi ntshinaadi namupusha nya. Kunyima Batemwe ba Yehowa babafikile, abo nkumpushisha kalolo matemuki ebungi a mu Bible. Nakimbile bwa kulonga ingi myanda.”

• Anju mwana mukashi a mu Nepal bambile shi: “Naadi neyipusha su Efile Mukulu etatshishaa bwande. Natshile kitshibilo kya kuteka Efile Mukulu a Bible. Butookye Batemwe ba Yehowa babakookwele kwande, naadi mukumiine kulonga Bible.”

Ino myanda ikitshikye ayitutentekyesha ano mayi a Yesu: ‘Basha muloo anka balanda mu kikudi.’ (Mateo 5:3, Kilombeeno kipya 2009) Eyendo, bantu abatandikwaa na lukalo lwa kuuka Efile Mukulu. Nka penda Efile Mukulu nyi e bya kwibalombeesha lwalwa lukalo, na kwete kwibalombeesha ku bukwashi bwa Bible, Eyi dyaaye.

Byabya, kulonga kwa Bible akukitshikaa naminyi? Nkulombene nkukwasha naminyi? Abaluula ino nkonko mu mwisambo aulondo.