We mu kipwano kya binyibinyi na Yehowa su?
“Efubwileeyi kwi Efile Mukulu, byabya aye namu efubwila peepi neenu.”—JA. 4:8.
1. Bwakinyi twi na lukalo na kunyingisha kipwano kyetu na Yehowa?
WE TEMWE a Yehowa mwilambule na mubatshibwe su? Su mbyabya, we mu kipwano kibuwa n’Efile Mukulu. Byabya, uuka shi kyakya kipwano bakwete kukimba bya kwikilwisha kwi ndumbulwilo a Satana na kukutwa kwetu kwa kupwidika. Ino myanda ikwete kutompa bena Kidishitu booso. Anka, abitungu kipwano kyetu na Yehowa kiikale ki bukopo.
2. (a) Kipwano nkinyi? (Tala mayi e kuushi kw’esaki.) (b) Twi kunyingisha kipwano kyetu na Yehowa naminyi?
2 We mu kipwano kya binyibinyi na Yehowa su? Okumiina kwikinyingisha? Mukanda wa Jaake 4:8 aukulungula kya kukita, awamba shi: “Efubwileyi kwi Efile Mukulu, byabya aye naamu efubwila peepi neenu.” Lamiina shi uno mwanda ngutale mpese yooso ibidi. * Nsaa yatwele etabula dya kwifubwila peepi n’Efile Mukulu, aye namu eele dyaye etabula dya kwifubwila peepi netu. Kukita kwa byabya misango ibungi, akwende na kunyingisha kipwano kyetu na Yehowa. Papa, kyakya kipwano akikala kya binyibinyi kwatudi. Atukapete lukulupilo lubaadi na Yesu nsaa ibakwile shi: “Muntume nga binyibinyi, . . . Ank’ami namuuku.” (Yo. 7:28, 29) Matabula kinyi odya kwela bwa kwifubwila peepi na Yehowa?
We kwisamba n’Efile Mukulu naminyi? (Tala paragrafe 3)
3. Mishindo kinyi yatwisabaa na Yehowa?
3 Kwisamba nsaa yooso na Yehowa kwi na muulo ukata bwa kwifubwila naye peepi. We kwisamba n’Efile Mukulu naminyi? Byabya, mushindo kinyi wesambaa na kuuk’obe mushale kwi bula? Anwifundishenaa mikanda na kwakula ku telephone, pangi misango ibungi. Wesambaa na Yehowa kukiila ku nteko ibungi yomutekye. (Badika Misambo 142:2.) Otadiila Yehowa bwashi esambe noobe, nsaa yobadika na kunangusheena pa Eyi dyaye efuku dyooso. (Badika Yeeshaya 30:20, 21.) Binobino, tutaluuleyi ino mishindo ibidi ya kwisamba byaidi ikumbeene kunyingisha kipwano kyetu na Yehowa, na kwikasha kipwano kyetu naye kya binyibinyi.
YEHOWA ESAMBA NOOBE—MU KULONGA KWA BIBLE
4, 5. Yehowa esamba noobe kukiila ku Eyi dyaye mu mushindo kinyi? Tuusha kileshesho.
4 Okumiina kushi mpaka shi Bible e na mukandu w’Efile Mukulu bwa bantu booso. Kadi Bible aleesha dingi kipaso kyoodi mukumbeene kwifubwila peepi na Yehowa su? Oolo. Mushindo kinyi? P’obadika na kulonga Bible efuku dyooso, kimba myaluulo ku myanda yalongyesha na kunangusheena bya kwiyitumikila mu nshalelo oobe; yaya nsaa otadiila Yehowa bwa’shi esambe noobe ku bukwashi bw’Eyi dyaye. Kukita bino akukwikasha peepi naaye.—Eb. 4:12; Ja. 1:23-25.
5 Bu kileshesho, kubadika na kunangusheena pa bishima bya Yesu bya’shi “tanwibumbilanga bupeta pa nsenga.” Su opusha shi we mwipaane mu myanda ya Bufumu, omono shi we mukuminyibwe na Yehowa. Na dingi, su omono shi abitungu wekale na nshalelo mupelepele na kwipaana mu myanda ya Bufumu, Yehowa mmukulungule mbalo yoodi mulombeene kulumbuula bwa kwifubwila peepi naye.—Mat. 6:19, 20.
6, 7. (a) Kulonga kwa Bible, nkutale kifulo kyetu bwa Yehowa na kifulo kyaye kwatudi naminyi? (b) Abitungu twikale na kitshibilo kinyi patulongo Bible?
6 Kulonga kwa Bible takwitulesha nka penda ma mbalo a kulumbuula mu kikudi nya. Akutamisha dingi muloo wetu bwa ngikashi ibuwa ya Yehowa, abitutakula bwa kumufula ngofu. Na su kifulo kyetu na Yehowa akitama, naye namu atamisha kyaye kwatudi, byabya atukyebe kunyingisha kipwano kyetu naaye.—Badika 1 Beena-Kodinto 8:3.
7 Bwatudya kwifubwila peepi na Yehowa, abitungu tulongye na kitshibilo kibuwa. Mukanda wa Yowano 17:3 awakula shi: “Muuwa wa looso naamu ngi’shi bantu bakuukye, obe bupenka Efile a Binyibinyi, na yawa abotumine, Yesu Kidishitu.” Byabya, tabitungu tulongye bwa kupeta penda kyukilo nya, kadi, bwa ‘kuuka’ Yehowa kalolo bu Muntu a binyibinyi.—Badika Efilu 33:13; Mis. 25:4.
8. (a) Bangi be kwamba naminyi bwa bibakitshiine Yehowa bwa Nfumu Azariya bi mu 2 Banfumu 15:1-5? (b) Kyukilo kyetu bwa Yehowa akitukatusha mpaka yooso bwa bikitshino byaye naminyi?
8 Patuuku Yehowa kalolo bu kuuku’eetu, taatukyebe kukalakashwa su tatupusha kalolo ingi myanda ya mu Bible sunga bwakinyi baakitshiine byabya. Bu kileshehso, opusha naminyi pabitale bibaadi bikite Yehowa bwa Nfumu Azariya a mu Yuuda? (2 Bf. 15:1-5) Uuka shi “mwilo ubatungunukanga na kulambula milambu na kushiika musengo wa kabanda pa myengye,” Azariya aye “bekeele mululame ku meeso a Yehowa.” Anka, “Yehowa bafwambwishe mulopwe, aye nkukumba [nsudi] nyaa na kwifuku dya lufu lwaye.” Bwakinyi? Mwisambo tawibilesha nya. Bi kwitukalakasha sunga nkwitufitshisha munda pa kuuka shi Yehowa baadi munyookye Azariya kushi mwanda su? Anka su ta twi na kyukilo kya bukuuku na miiya ya Yehowa. Kwikala na kyakya kyukilo, akwitukwasha bwa kuuka shi dinyoka dya Yehowa adikala’nka “muîle kululama” kwaye. (Yel. 30:11, EEM) Kyakya kyukilo akitushinkamisha shi sunga taatuuku bwakinyi Yehowa bakitshine byabya pabitale Azariya, atukulupila nka shi kiimu Kyaye kibaadi kya kululama.
9. Myanda kinyi ayituusha etaata pa mwanda ubaadi Yehowa mupombeshe Azariya na nsudi?
9 Byabya, bwa kuuka uno mwanda kalolo, abitungu kuuka ingi myanda ayakula Bible. Nfumu Azariya babaadi abamuuku dingi bu Nfumu Ozyase. (2 Bf. 15:7, 32) Mu kwipusheena na mwanda wi mu 2 Banfumu 25:3-5, 16-21, atufiki mu kuuka shi Ozyase baadi mukite bibuwa ku meeso kwa Yehowa munda mwa mafuku, kunyima “kwitatula kubaatwelele mwishimba dyaye, mpaa na bibaakashimiine.” Pa mwanda wa kwitatula, babangile kukita midimo ya bu tshiite-mwakwidi kwashi na matalwa a kwiyikita. Ba tshiite-mwakwidi 81 babamulungwile shi bikitshino byaye mbilube n’abo nkumutosha. Ozyase bakitshine naminyi? Baadi muleshe kwitatula. Aye “nkufitshila [ba tshiite-mwakwidi] munda.” Nyi bwakinyi Yehowa baadi mumwele maladi a nsudi!
10. Bwakinyi tabitungu shi tukimbe misango yooso bwa kuuka myanda ibungi pa bikitshino bya Yehowa? Twi kushinkamisha shi Yehowa akitaa myanda ilulame naminyi?
10 Tatulubanga uno mwanda. Otentekyesha mwanda wabashii bapatuule mu Bible, wi mumune na ingi myanda ya mu Bible ish’ayukiibwa kalolo su? Okemeena kwiyipusha su mu wawa mwanda Yehowa bakitshiine myanda na kululama? Su okulupila shi Bible akatuusha tu myanda tooso atulesha shi myanda yooso ikite Efile Mukulu ta ngilulamame sunga shi ngilulame su? (Miy. 32:4) Nsaa yatushinguula Yehowa kalolo bu muntu, kifulo kyetu na kusangeela kwetu kwa bikitshino byaye akukatama mu mushindo watushatwikala na lukalo lwa shi betupatulwile myanda yooso yadi mukite. Shinkamisha shi kwakwa kusangeela akukatama mu kwitatshisha koobe kwa kulonga, kunangusheena na kwisamba n’Efile Mukulu ku bukwashi bw’Eyi dyaye. (Mis. 77:12, 13) Kukita kwa bino akukanyingisha kipwano kyoobe na Yehowa, na kwikiikasha kya binyibinyi.
ESAMBE NA YEHOWA—MU LUTEKO
11-13. Oshinkamisha shi Yehowa ateemeshaa nteko yobe naminyi? (Tala kifwatulo ki kumbangilo kwa mwisambo.)
11 Mu luteko atwifubwilaa peepi na Yehowa. Atumutumbisha, atumutumbula, na kuteka bukunkushi bwaye. (Mis. 32:8) Byabya bwashi kipwano kyobe na Yehowa kikale kya binyibinyi, abitungu wekale mushinkamishe shi apusha nteko yoobe.
12 Bangi bantu abamba shi luteko lwi nka penda na bukwashi bwa mu binangu. Abaakula shi su omono shi abaluula luteko loobe, mpa mwanda we mutuule binangu ku byokwete kuteka, oshinguula mwanda oobe, na kukimba bya kwiulombasha. Sunga byekela byabya, mushindo kinyi oodi mukumbeene kuuka shi Yehowa akyebe kwaluula ku nteko yoobe?
13 Banda kutala uno mwanda: Kubanga kumpala kwa’ye kufika pa nsenga, Yesu bamwene bwa musango wa kumpala lwaluulo lwa Yehowa ku nteko ya bafubi Baaye. Akupu, Yesu pabaadi pa nsenga baadi eele nteko bwa kwisamba na Nshaye e mwiyilu. Baadya kwikala eele nteko—munda mwa bufuku bushima—na kwela binangu shi Yehowa takwete kuteemesha nteko yaye? (Luk. 6:12; 22:40-46) Yesu badya kulongyesha balongi baye bwa kusambila na kwela binangu shi kwela nteko kwi nka penda na bukwashi bwa mu binangu? Abimweneka kalolo shi, Yesu baadi auku shi kuteka nkwisamba binyibinyi na Yehowa. Ungi musango, Yesu balungwile Nshaye shi: “Nakutumbula bu bibompushiisha. Eyendo, nawuku kalolo’shi ompushiishaa misuusa yooso.” N’atwe naamu, twi kwikala na lwalwa lukulupilo shi Yehowa “apusha nteko yeetu.”—Yo. 11:41, 42; Mis. 65:2.
14, 15. (a) Kuteka myanda yatudi nayo lukalo akwitukwasha ku kinyi? (b) Ungi mukwetu mukashi baadi munyingishe kipwano kyaye na Yehowa ku bukwashi bwa luteko naminyi?
14 Nsaa yotekye myanda yoodi nayo lukalo mu luteko, okamono mushindo awaluula Yehowa, sunga twekala tu myanda tupeela. P’omono mushindo awaluula Yehowa nteko yoobe, akekala muntu a binyibinyi koodi. Na dingi, su bonyiisha kulungula Yehowa myanda yoobe, akanyiisha kwifubwila peepi noobe.
15 Tubande kwata kileshesho kya Kathy. * Tabaadi asankila kwenda mu bulungudi, sunga bibaadi alungula myeshi yooso. Akula shi: “Ntshinaadi nasankila mudimo wa bulungudi nya. Mbinyibinyi, ntshinaadi neusanikila su nkapeela. Panaadi mwimikye mudimo wande, ungi mukulu mu kakongye baadi mundungule shi ne bya kufuba bu mbala-mashinda a myeshi yooso; na dingi baadi mumpe formilere. Natshile kitshibilo kya kufuba bu mbala mashinda, kadi nabangile kuteka Yehowa efuku dyooso bwa’shi ankwashe bwa kufula mudimo wa bulungudi.” Yehowa balulwile luteko lwaye su? Akula shi: “Kino nkipwa kyande kya kasatu kya bu mbala-mashinda. Pa mwanda wa kukisha nsaa ibungi mu bulungudi na kulonda kileshesho kya bangi bakwetu bakashi, ne mwende na kulumbuula mushindo wande wa kulambukisha. Lelo uno, nkwete kusangeela mudimo wa bulungudi—ne mwiufule. Kukatusha byabya, kipwano kyande na Yehowa kibanyingi kukila byakibaadi kumpala.” Nteko ya Kathy ibekeeshe kipwano kyaye na Yehowa bu mwanda wa binyibinyi.
KITA BYABYA ABIKUTUNGU
16, 17. (a) Twi kukita kinyi bwa kutungunuka na kutamisha kipwano kyetu na Yehowa? (b) Ndukalasho kinyi lukata lwatukyebe kwisambila mu mwisambo aulondo?
16 Kutamisha kipwano kyetu na Yehowa mwanda wa kukita mu mafuku ooso a muwa wetu. Abitungu twele dyetu etabula bwa kwifubwila peepi na Yehowa, aye naamu akeefubwila peepi neetu. Mu mishindo yooso, twikaleyi atwisamba efuku dyooso n’Efile Mukulu eetu p’atwe kulonga Bible na kwela nteko. Patukitshi byabya, atukyebe kwikala mu kipwano kya looso na Yehowa na kukambila nkalakasho.
Kutamisha kipwano kyetu na Yehowa mwanda wa kukita mu mafuku ooso a muwa wetu (Tala paragrafe 16, 17)
17 Nsaa ishy’ayipu mwanda wetu kunyima kwa kwela nteko i bungi nkulombeene kwikala bu lukalakasho. Mu yaaya nsaa, twi kukutwa lukupilo mwi Yehowa. Twi kubanga kwiyipusha su Yehowa kwete kupusha nteko yetu sunga kwiyipusha su tu kii naaye mu kipwano. Su twi mu lwalwa lukalakasho, twi kushinkamisha naminyi shi kipwano kyetu n’Efile Mukulu nkya binyibinyi? Mwisambo aulondo aukyebe kwisambila pabitale uno mwanda.
