1, 2. (a) Nkwipusheena kinyi kwi pankatshi pa kwikala na lulamato kwi Yehowa na kupela kutwelakana mu myanda ya pa nsenga? (Tala kifwatulo ki ku mbangilo.) (b) Bantu bebungi mbalamate ku myanda kinyi, na bino abituusha bipeta kinyi?

BAFUBI ba Yehowa tabatwelakanaa mu myanda ya pa nsenga sunga kwisanga mu myanda ayabuula bantu bu kifulo ky’eumbo dyabo, ekoba dyabo sunga bipikwa byabo. Bwakinyi? Mwanda twi bafule Yehowa, twi na lulamato kwadi na atumukookyelaa. (1 Yowano 5:3) Mbalo yooso yatudi bashaale sunga yatudi batuukile, atulondaa miiya y’Efile Mukulu. Kwikala na lulamato kwi Yehowa na ku Bufumu bwaye kwi na muulo kukila ingi myanda yooso. (Mateo 6:33) Nyi bwakinyi twi bya kwakula’shi: ‘Ta twi ba pa nsenga.’​—Badika Yowano 17:11, 15, 16; Yeeshaya 2:4.

² Lelo uno, bantu bebungi be na lulamato ku maumbo aabo, bisamba byabo, bipikwa byabo sunga bisaka byabo bya maasha. Mbya malwa, mwanda ino myanda ngituushe kwipikeena, kwishikwena, ingi nsaa kwipaa baaba be mu kingi kisaka. Bino bi kwitufwishisha makyenga mu bifuko byetu sunga tatutwelakana mu ino mishikwa, akupu, twi kukyenga mwanda wa kukutwa kwa kululama. Bi kwikala bibofule bwatudya kutwelakana mu myanda ya mafumu a bantu pabakitshi myanda ishii ilulame, mwanda Efile Mukulu mmwitupangye  na ngobesha ya kushinguula mwanda wibuwa na ushii buwa. (Kibangilo 1:27; Miiya Ikituulwe 32:4) Opushaa naminyi nsaa ayikitshika mwanda ushii buwa? Opelaa kutwelakana mu wanka, su we mutwelakanaa?

3, 4. (a) Bwakinyi tatukilaa ku lupese kampanda apatuuku mushikwa munkatshi mwa bantu? (b) Nkinyi kyatukyebe kwisambila mu uno mwisambo?

³ Bantu bebungi abatwelakanaa mu mishikwa mwanda banfumu baabo abebalungula’shi bino nyi abileesha shi we mwina eumbo ebuwa. Anka atwe atulondo Yesu. Nyi bwakinyi tatutwelakanaa mu myanda ya politike, na ya ngoshi. (Mateo 26:52) Beena Kidishitu ba binyibinyi t’abapwandikishaa’shi kipindji kampanda kya ndumbulwilo a Satana nkikile kingi nya. (2 Beena-Kodinto 2:11) Tatutwelakanaa mu mishikwa ya uno ndumbulwilo nya.​—Badika Yowano 15:18, 19.

⁴ Pa mwanda wa kukutwa kupwidika, bangi ba kwatudi mbalombeene kwikala na binangu bibubi bwa bangi bantu. (Yeelemiya 17:9; Beena-Efeeze 4:22-24) Mu uno mwisambo atukyebe kulonga mayi a kulonda aetukwasha bwa kulwa na kukambila bino binangu abitwesha ntondo munkatshi mwa bantu. Atwisambila dingi byatudi balombeene kushaala na lulamato pa kwilongyela bya kunangusheena mu mushindo aunangushenaa Yehowa na Yesu.

5, 6. Pabaadi Yesu pa nsenga, baadi amono bantu booso naminyi, na bwakinyi?

⁵ Su opushaa bukopo bwa kupela kutwelakana na kukwatshisheena lupese kampanda, eyipushe’shi: ‘Mu uno mwanda Yesu baadi mulombeene kukita naminyi?’ Pabaadi Yesu pano pa nsenga, kubaadi mishikwa na kwikutwena pankatshi pa beena Yudeya, beena Ngalileeya, na beena Samariya. Banda kutala bino bileshesho. Beena Yuuda na beena Samariya tababaadi abeakusheena. (Yowano 4:9) Bafadisee na Basaduseo babaadi abesabulusheena mu myanda ibungi. (Bikitshino 23:6-9) Beena Yuuda balongye miiya abaadi abanangusheena shi mbakile baaba bashii balongye. (Yowano 7:49) Bebungi babaadi bashikwe bafutshishi ba bitadi na beena Looma. (Mateo 9:11) Anka Yesu tabaadi mutwelakane mu yaaya mishikwa nya. Sunga bibaadi akalwila bya binyibinyi pabitale Yehowa na mushingule’shi beena Isaleele babaadi mwilo usangulwe n’Efile Mukulu, efuku su ndimune ntamulongyeshe’shi balongi baaye mbakile bangi bantu nya. (Yowano 4:22) Mu kwilekeene na byabya, baadi mwibalongyeshe bwa kufula bantu booso.​—Luuka 10:27.

⁶ Bwakinyi Yesu tabaadi amono kisamba kya bantu bu kikile kingi? Mpa mwanda wa byabapushaa na Nshaye pabitale bantu. Yehowa bapangile bantu na mushindo wa kuusha nsenga na bantu belekene. (Kibangilo 1:27, 28) Nyi bwakinyi Yehowa na Yesu tabamonaa bantu b’ekoba, b’eumbo sunga ba ludimi kampanda bu bakile bangi. (Bikitshino 10:34, 35; Bifumbulwe 7:9, 13, 14) Abitungu tulonde kileshesho kyabo kipwidikye.​—Mateo 5:43-48.

7, 8. (a) Twi ku kulupese lwa nanyi, na bwakinyi? (b) Abitungu tushinguule kinyi pabitale kupudisha kwa makyenga a bantu?

⁷ Bwakinyi tatwi balombeene kukwatshisheena ma mbulamatadi a bana ba bantu? Mwanda twi ku lupese lwa Yehowa. Nnaye Nfumw’etu. Mu lupango lwa Edene, Satana bakwile’shi Yehowa takwete kukunkusha bantu kalolo nya. Satana baadi musukume bantu bwabadya kukumiina shi bukunkushi bwaye bwi buwa kukila bw’Efile Mukulu. Yehowa mmwitulekyeele bwa’shi tusangule lupese lwatukumiina. Omonaa namiyi? Okwete kukookyela Yehowa mwanda okumiina shi akitaa myanda kalolo nkukila? We mushinkamishe’shi nka penda Bufumu bwaye nyi bukumbeene kupudisha myanda yeetu su? Omono shi bantu be kwikunkusha kalolo kushi Efile Mukulu?​—Kibangilo 3:4, 5.

⁸ Bu kileshesho, su muntu akwipusha pabitale byomonaa kisaka kampanda kya politique,  kisaka kya maasha sunga ungi ndumbulwilo, we kumwaluula naminyi? Pangi, bingi bya ku byabya bisaka bi kwikala abikitshi myanda kalolo na kukwasha bantu. Anka twi bashinguule shi nka penda Bufumu bwa Yehowa nyi bulombeene kupudisha makyenga a bantu na kukatusha kukutwa kwa kululama. Na dingi atulondo bukunkushi bwa Yehowa mu kakongye, pamutwe pa’shi muntu ooso akite kyooso kyakumiina. Nyi bwakinyi mu kakongye mwi buumune.

9. Mmwanda kinyi ubaadi nao bangi beena Kidishitu ba mu bipwa lukama, na Mpoolo bebalungwile bwabadya kukita kinyi?

⁹ Mu bipwa lukama, bangi beena Kidishitu ba mu Kodinto babaadi abekutwena munkatshi mwabo pa kwakula’shi: “‘Ami ne a Mpoolo,’ ‘Ami ne a Apolose,’ ‘Ami ne a Sefase,’ ‘N’ami ne a Kidishitu.’” Pabapushiishe Mpoolo uno mwanda, baadi mwinyongole. Uno ubaadi mwanda ukata, mwanda butaale bwa kakongye bubaadi mu masaku. Nyi bwakinyi bebayipwishe’shi: “A Kidishitu mwitshibuule su?” Mpoolo bebalangile’shi: “Nenukankamika bakwetu, mwishina dya Yesu Kidishitu’shi, nwikale anwakula booso ngakwilo umunenka, na byakushaa kwikala tusaka-tusaka munkatshi mwenu, anka nwikale belugeene kalolo mu lukalo lumune na mu kinangu kimune.” Ano mayi ngetutale naatwe be lelo. Mu kakongye ta mulombeene kwikala tusaka-tusaka nya.​—1 Beena-Kodinto 1:10-13; Badika Beena-Looma 16:17, 18.

10. Mpoolo baadi mutentekyeshe Beena Kidishitu naminyi, na bino abitulongyesha kinyi?

¹⁰ Mpoolo baadi mutentekyeshe beena Kidishitu bashingwe mwimu’shi dyabo eumbo di mwiyilu na’shi ta mbalombeene kwipaana mu “bintu bya pa nsenga.” (Beena-Fidipe 3:17-20) * Bashingwe mwimu mmikyendji ayileesha mpala y’Efile Mukulu na ya Kidishitu. Su muntu aleesha mpala y’eumbo dyabo mwiumbo dyabeene, ta mulombeene kutwelakana mu politike na mu myanda ya mu dyadya eumbo nya. Bi mumune na bashingwe mwimu, ta mbalombeene kutwelakana mu myanda ya politike. (2 Beena-Kodinto 5:20) Baaba booso bakulupile kushaala pa nsenga bwa looso be na lulamato ku Bufumu na tabatwelekane mu myanda ya pa nsenga.

11, 12. (a) Mmwikeelo kinyi atungu’shi tulekye su atukyebe kushaala na lulamato ku Bufumu bw’Efile Mukulu? (b) Ungi mukwetu mukashi baadi amono bantu ba bingi bisamba naminyi, na nkinyi kibamukwashishe bwa kushintuluka?

¹¹ Mu bipindji bibungi bya nsenga, bantu abakambaa kwipusheena na bangi babadi nabo myanda, bipikwa, na ludimi lumune. Kebungi bakwete kwitatula pabitale byabadi bekale. Kadi tabitungu twekala na uno mwikeelo nya. Mu kwilekeena na byabya, abitungu tushintuule mweneno eetu na kulumbuula binangu byetu bwa’shi tulekye kutwelakana mu myanda yooso. Twi balombeene kwibikita naminyi?

¹² Bu kileshesho, Mirjeta * baadi mutandjikye mwiumbo dya Yougoslavie. Mu mbalo ibaadi mukudile, bantu babaadi bashikwe beena Serbes. Pabaadi mulongye bya kuuka Yehowa, baadi mushinguule’shi Yehowa t’ataa kabila kampanda bu kakile kakwabo na’shi Satana nyi akumiina’shi bantu beshikwene. Byabya babangile kwitatshisha bwa kushintuula binangu byaye. Anka pabatuukile ngoshi pankatshi pa bisamba bilekeene mu mbalo ibaadi mushaale, Mirjeta babangile kupusha mushikwa bwa beena Serbes dingi. Tabaadi akumiina sunga kwibalungula mukandu wibuwa nya. Baadi ashinguula’shi bino bibubi, nyi bwakinyi babangile kuteka Yehowa bukwashi bwadya kukambila byabya binangu. Bamutekyele dingi bwadya kumukwasha bwashi abanguule mudimo wa bu mbala-mashinda. Mirjeta akula’shi:  “Ne musangane’shi kwipaana mu mudimo wa bulungudi mbukwashi bwibuwa. Mu bulungudi, netatshishaa bwa kwambula kifulo kya Yehowa, na kutundula binangu bibubi bi mwandi.”

13. (a) Zoila baadi mufumankane na mwanda kinyi, na baadi mukite naminyi? (b) Kileshesho kya Zoila akitulongyesha kinyi?

¹³ Zoila ungi mukwetu mukashi a mu Mexique baadi mwende mu Europe. Mu kakongye kaabo mwi bakwetu balume na bakashi bakatukile mu bingi bibundji bya mu Amérique latine. Zoila akula’shi bangi ba kwabadi bakwete kusabuula myanda ya mu kibundji kyanfiki, bu bipikwa, na ngono ya kwetu. Baadi mufiite munda, aye nkuteka Yehowa bwa’shi amukwashe tala ebalamina nsungu. Su twi kumpala kwa mwanda wi byabya twi kukita naminyi? Bangi bakwetu balume na bakashi bakwete kulwa bwa kukambila nsungu yabo nsaa yabapusha ngakwilo e bubi a bangi pabitale kibundji kyabo. Tatukumanga kwakula sunga kukita kintu su nkimune kilombeene kumwesha’shi kisamba kampanda nkikile kingi. Tatukumanga kutwesha kwiabuula munkatshi mwa kakongye sunga ingi mbalo yooso yatudi.​—Beena-Looma 14:19; 2 Beena-Kodinto 6:3.

14. Nkinyi ki bya nkukwasha bwa kumona bantu abibamonaa Yehowa?

¹⁴ Booso bwetu atuuku shi bafubi b’Efile Mukulu be mu buumune, byabya tabitungu twamona’shi kibundji sunga eumbo kampanda dikile dingi. Anka beena kifuko na bantu be mu mbalo yodi mukudile mbalombeene nkutakula bwa kufula kibundji kyenu. Pangi, nyi bwakinyi okyopete binangu bibubi bwa bantu ba ingi miilo, bipikwa, ndjimi sunga ekoba. Nkinyi kilombeene nkukwasha bwa kushintuluka? Ikala onangusheena abipushaa Yehowa bwa bantu abetatula pa mwanda wa eumbo dyabo sunga abemono bu bakile bakwabo. Kimbuula myanda ibungi pa uno mwanda nsaa ywelongyela sunga mu lulangwilo lwa mu kifuko. Akupu otekye Yehowa bwa’shi akukwashe bwa kumona bantu bu byebamonaa.​—Badika Beena-Looma 12:2.

15, 16. (a) Bangi abakitaa naminyi pabetumono twibelekeene nabo? (b) Ba nambutwile be kukwasha bana baabo bwa kushaala na lulamato kwi Yehowa naminyi?

 ¹⁵ Atukumiina kufubila Yehowa na kondo k’eshimba katookane, nyi bwakinyi ingi nsaa atushalaa belekeene na beena mudimo neetu, beena kalasa neetu, bantu batudi bekungisheene nabo, sunga beena kifuko. (1 Mpyeele 2:19) Yesu baadi mwitudimushe’shi bangi bantu abaketushikwa mwanda twi belekeene nabo. Tentekyesha’shi bebungi abetushikwa tabauku kintu pa bitale Bufumu bw’Efile Mukulu nya. Byabya tabashinguula bwakinyi bi na muulo kwatudi bwatudya kwikala na lulamato ku buno Bufumu pamutwe pa kulamata ku mafumu a bana ba bantu.

¹⁶ Bwa kushaala na lulamato kwi Yehowa, abitungu tumukokyele sunga bantu betukitshina sunga kwitwakula myanda ibubi. (Danyele 3:16-18) Mbilombeene kwikala bukopo kwi ba songwa bwa kwikala belekeene na bangi. Ba nambutwile, kwashayi bana benu bwabadya kupela kwikala na moo ku kalasa. Bana benu be kwikala na moo wa kupela kutshibila ebendela dy’eumbo mpala sunga kusangeela ingi myanda y’eumbo. Nsaa ya lulangwilo lwa mu kifuko, nwi kulonga abipushaa Yehowa pabitale ino myanda. Ebalongyesheyi byabadi bakumbeene kupatuula kalolo bi lukumiino lwabo na kaneemo. (Beena-Looma 1:16) Dingi su kwi mushindo, kwashayi bana beenu bwabadya kwisamba na balongyeshi baabo na kwibapatulwila bi nkumiino yeetu.

17. Mbinangu kinyi abitungu tulekye, na bwakinyi?

¹⁷ Nsaa yooso atusangelaa bidibwa, ludimi, bintu, na bipikwa bya mbalo yatudi bakudile. Byabya atumonaa’shi myanda yatudi bakumiine ibuwa kukila ayikuminaa bangi su? Yehowa akumina’shi tusankye na bintu bilekenelekene byadi mupangye. (Misambo 104:24; Bifumbulwe 4:11) Byabya bwakinyi twi kwamba’shi mushindo wetu wa kukita myanda ngukile wa bangi?

18. Bwakinyi bi na muulo bwa’shi tumone bangi abibamonaa Yehowa?

¹⁸ Yehowa akumina’shi bantu ba bipaso byooso balongye bwa kumushinguula, bwa kumulangwila, na bwa kwikala na muwa wa looso. (Yowano 3:16; 1 Timotee 2:3, 4) Byabya, nsaa i bakwetu na binangu bilekeene na byetu, atukumiinaa kwibapushiisha su byabakula mbipusheene na abikumiina Yehowa. Su tubakitshi byabya, atwikala na nshalelo ebuwa na a muloo, na atwikala mu buumune na bakwetu balume na bakashi. Nka bu muyile byatubalongo, pa mwanda wa lulamato lwetu kwi Yehowa na ku Bufumu bwaye, tatutwelakanaa mu mishikwa ya uno ndumbulwilo nya. Twi bashikwe kwitatula na kwipikeena kwi mu ndumbulwilo a Satana. Twi na muloo ukata mwanda Yehowa mmwitulongyeshe bya kufula butaale na kwikala beyishe! Atupusha nka bu bibapushishe mufundji a misambo bakwile’shi: “Mmulô kinyi wi na bantu p’abashâla na bakwabo mu buumune!”​—Misambo 133:1, EEM.