1, 2. (a) Mu mafuku a kala bafubi ba Yehowa babaadi abamulangwila mbalo kinyi? (b) Yesu baadi apusha naminyi bwa ntempelo a Yehowa a mu Yeelusaleme? (c) Mu uno mwisambo atukyebe kwisambila kinyi?

BAFUBI b’Efile Mukulu ba kala na ba lelo abekalaa na ma mbalo a kumulangwila. Bu kileshesho, nsaa ibatushishe Abele mulambu kwi Yehowa, pangi beebakile kilambwilo. (Kibangilo 4:3, 4) Nowa, Abrahame, Isaake, Yaakobo, na Moyiise booso bwabo babayibakile bilambwilo. (Kibangilo 8:20; 12:7; 26:25; 35:1; Efilu 17:15) Yehowa balungwile beena Isaleele’shi bayibakye tabernakele. (Efilu 25:8) Kunyima, baadi mwibaleeshe bya kwibaka ntempelo. (1 Banfumu 8:27, 29) Kunyima kw’abo kutuuka mu bupika mu Babilone, mwilo w’Efile Mukulu ubaadi awibungu mu bitumbwilo. (Maako 6:2; Yowano 18:20; Bikitshino 15:21) Na dingi beena Kidishitu ba mu bipwa lukama babaadi abebungila mu mashibo. (Bikitshino 12:12; 1 Beena-Kodinto 16:19) Lelo uno, mwilo wa Yehowa mu nsenga ishima ukwete kwibunga mu Mashibo a Bufumu binunu na binunu, mwabakwete kulonga myanda ya Yehowa na kumulangwila.

² Yesu baadi na kaneemo kakata bwa ntempelo a Yehowa baadi mu Yeelusaleme. Kifulo kya Yesu bwa ntempelo kibaadi kitentekyeshe balongi baaye ano mayi a mufundji a misambo bambile shi:  “Kifulo kyandi na nshibo yobe akitembe’nka bu kâlo munda mwande.” (Misambo 69:9; Yowano 2:17, EEM) Nshibo ya Bufumu ta “Nshibo ya Yehowa” bu bibaadi ntempelo a mu Yeelusaleme nya. (2 Myanda 5:13; 33:4) Anka abitungu twikale na kanemo kakata bwa mbalo yeetu ya lulangwilo. Mu uno mwisambo, atukyebe kwisambila mayi a kulonda a mu Bible aetulongyesha mwikeelo watudi balombeene kwikala nao nsaa yatudi ku Nshibo ya Bufumu, byatudi balombeene kwiyibaamba, na bya kukwatshisheena lwibako lwa ano mashibo. *

3-5. Nshibo ya Bufumu nkinyi, na abitungu tupushe naminyi bwa bisangilo byetu?

³ Nshibo ya Bufumu nyi mbalo ayibungilaa bantu bwa kulangwila Yehowa. Bisangilo nyi kya-buntu kitupe Efile Mukulu, na abitukwasha bwa kunyingisha kwipwano kyeetu naye. Mu bisangilo byetu, ndumbulwilo aaye kwete kwitukankamika na kwitupa buludiki bwibuwa. Kwitaminyibwa na Yehowa na Mwana’aaye bwa kudya ku “meesa a Yehowa” lubingo looso nkineemo kikata. (1 Beena-Kodinto 10:21) Tatulubanga efuku su ndimune’shi luno ndwitanyino lwi na muulo ukata.

⁴ Yehowa etulungula patooka’shi akumiina tutwele mu bisangilo bwa kumulangwila na kwikankamisheena ku muntu na muntu. (Badika Beena-Ebreeyi 10:24, 25.) Bu byatunemeka Yehowa, tatukishanga bisangilo su takwi mwanda ukata. Atuleesha lutumbu bwa bisangilo byetu nsaa yatwibilumbuula kumpala na kwaluula mwanka.​—Misambo 22:22.

⁵ Mwikeelo watuleesha mu bisangilo na byatubaamba Nshibo yeetu ya Bufumu auleesha byatukwete kunemeka Yehowa. Atukumiina shi mwikeelo wetu utumbishe eshina dya Yehowa, adyo difundwe ku Nshibo ya Bufumu.​—Tala byabidi bipushene na 1 Banfumu 8:17.

6. Bantu mbaakule naminyi pabitale Mashibo eetu a Bufumu na bantu abemwibungila? (Tala kifwatulo ki kumbangilo.)

⁶ Patuleesha kanemo bwa Nshibo ya Bufumu, abimweneka kwi bangi bantu. Bu kileshesho, ungi muntu a mu Turquie bakwile’shi: “Mankenda na kukita kwa bintu mu mulongo binamwene ku Nshibo ya Bufumu bibankaanyiishe. Bantu be kwanka mbafwale kalolo, be na muloo ku meeso, na babaadi bankukile ngofu. Bibaadi binkaanyishe bikile.” Yawa muntu babangile kufika mu bisangilo byooso na kunyima kwa mafuku baadi mubatshishibwe. Mu kingi kibundji kya mu Indonésie, bakwetu babaadi betanyine ba nkungishaanyi nabo, nfumu a kibundji, na bangi bakata bwa kufika mu kutala Nshibo yabo ya Bufumu ipya. Nfumu a kibundji baadi mukaanye mwanda nshibo ibaadi kalolo na ibakwe bibuwa na mu lupango mubaadi bilongo bibuwa. Bambile’shi: “Ano mankenda a ino Nshibo aalesha lukumiino lwenu lwa binyibinyi.”

7, 8. Twi kuleesha’shi atunemeka Yehowa nsaa yatudi ku Nshibo ya Bufumu naminyi?

⁷ Yehowa nyi etwitanyinaa ku bisangilo, na atalaa mushindo watukitshi myanda mwanka. Byabya abitungu twikale na nkatshinkatshi. Mu ungi mushindo, ta twi balombeene kutshiba miiya anka tatulenguulaa myanda i na muulo nya. Eyendo Yehowa akumina’shi atwe na bantu batwitanyina ku Nshibo ya Bufumu twipushe bibuwa. Anka tatukutwanga kuleesha kanemo bwa bisangilo mu mwanda su ngumune. Nyi bwakinyi tatufwalaa bufwalefwale sunga bikambe kupulumuka, na atupelaa kutuma mesaje, kwisamba, kudya sunga kutoma munkatshi mwa bisangilo. Baledi mbalombeene kulongyesha bana baabo bwa kupela kusuuka lubilo sunga kwasha maasha mu Nshibo ya Bufumu.​—Mulungudi 3:1.

 ⁸ Nsaa ibaadi Yesu mumone bantu abaudisha bintu mu ntempelo a Efile Mukulu, Yesu bafiitshile munda, aye nkwibatuusha pasha. (Yowano 2:13-17) Ku Nshibo ya Bufumu, atulangwilaa Yehowa na kulongyeshibwa naye. Byabya tatwi balombeene kukita midimo ya busunga patudi mwanka nya.​—Tala byabidi bipushene na Neemi 13:7, 8.

9, 10. (a) Bafubi ba Yehowa abayibakaa Mashibo a Bufumu naminyi, na mbipeta kinyi byatudi bapete? (b) Ndumbulwilo a Yehowa mmukwashe tukongye tushii na mushindo wa kwibaka Mashibo a Bufumu naminyi?

⁹ Mwilo wa Yehowa wi mu nsenga ishima ukwete kwitatshisha bwa kwibaka Mashibo a Bufumu. Bakwetu bakwete kukwasha bwa kwiebaka na kwialumbuula kushii efuto. Pa mwanda wa byabya, mu bipwa 15 bibashaala, twibeebakye Mashibo a Bufumu ebuwa akile pa 28 000 sunga Mashibo a Bufumu atano kw’efuku dyooso.

¹⁰ Ndumbulwilo a Yehowa atumaa bafubi betuukile na kufuba na bya buntu bwa kwibaka Mashibo a Bufumu mu ma mbalo e lukalo. Atulondaa elango dya mu Bible dya’shi baaba be na bintu bibungi mbalombeene kukwasha baaba be bisumanga. (Badika 2 Beena-Kodinto 8:13-15.) Mbipeta kinyi byatudi bapete? Mashibo a Bufumu ebungi ngebakiibwe bwa tukongye tushii na mushindo wa kwibaka.

11. Bangi bakwetu mbaakule naminyi pababapetele Nshibo ya Bufumu ipya, na oobe namu opusha naminyi?

¹¹ Bangi bakwetu ba mu kakongye ka mu Costa Rica babafundjile’shi: “Nsaa yatwimana kumpala kwa Nshibo ya Bufumu, atumono nka bu kulota! Nka bu kupwandjikisha. Nshibo yeetu ibuwa ngibakwe paashi na kwiyilu penda mu mafuku mwanda! Ngibakwe ku bukwashi bwa myabi ya Yehowa, ku mpàngo yatshibwe kwi ndumbulwilo aaye, na mu kukwatshisheena kwa bakwetu ba kifulo. Eyendo ino mbalo ya lulangwilo nyi kya buntu kibuwa, i nka bu ebwe dya muulo ditupe Yehowa. Atwiyisankila bikata.” Abitusankisha ngofu patupusha bakwetu balume na bakashi abatumbula Yehowa bwa byadi mwibakitshine. Atukumina’shi bakwetu booso mu nsenga ishima bapete namu aabo Mashibo a Bufumu. Abimweneka shi Yehowa kwete kwelela lwibako lwa Mashibo a Bufumu myabi, mwanda kasha mashibo abanga kwibakibwa, bantu bebungi bakwete kutwela mu bisangilo bwa kulonga bwa kuuka Yehowa.​—Misambo 127:1.

12. We kukwatshisheena lwibako lwa Mashibo a Bufumu naminyi?

¹² We kukwatshisheena lwibako lwa Mashibo a Bufumu naminyi? Pangi we kwipaana bwa kwenda mu kukwatshisheena ku uno mudimo. Na ooso a kwatudi mmulombeene kutuusha bya buntu bwa kukwatshisheena lwibako lwa Mashibo a Bufumu. Nsaa yatukitshi bukopo bwetu booso bwa kukwatshisheena uno mudimo, atupusha muloo wa kupaana, na dingi atutumbisha Yehowa. Tukwete kulonda kileshesho kya bafubi b’Efile Mukulu ba mu mafuku a kala babaadi na muloo wa kutuusha bya buntu  bwa kwibaka ma mbalo aabo a lulangwilo.​—Efilu 25:2; 2 Beena-Kodinto 9:7.

13, 14. Myanda kinyi i mu Bible ayitulongyesha’shi abitungu tulame Nshibo yeetu ya Bufumu iselele na ilumbulwe kalolo?

¹³ Yehowa nyi Efile Mukulu e selele na musantu. Mwikale dingi Efile Mukulu a bulongame. Nyi bwakinyi abitungu tulame Nshibo yeetu ya Bufumu iselele na ilumbulwe kalolo. (Badika 1 Beena-Kodinto 14:33, 40.) Na dingi bwa kwikala batookye na beselele bi Yehowa, tabitungu tulame nka penda lulangwilo lwetu, binangu, na bikitshino byetu selele nya, kadi abitungu tulame na mbidi yeetu selele.​—Bifumbulwe 19:8.

¹⁴ P’atulama Nshibo yeetu ya Bufumu iselele na ilumbulwe kalolo, atwikala na muloo wa kwitanyina bantu ku bisangilo byetu. Na bantu abakamono’shi atutumikilaa myanda yatulambukisha pabitale ndumbulwilo mupya eselele. Abakamono’shi tukwete kulangwila Efile Mukulu musantu na e selele akalumbuula nsenga bu mpaladiiso.​—Yeeshaya 6:1-3; Bifumbulwe 11:18.

15, 16. (a) Bwakinyi ta mbibofule bwa kulama Nshibo ya Bufumu iselele? Bwakinyi abitungu’shi twiyilame nka iselele? (b) Mpàngo kinyi yanudi baate bwa kulumbuula Nshibo yeenu ya Bufumu, na ooso a kwatudi e na kineemo kinyi?

¹⁵ Bantu be na mweneno mwilekeene pabitale mankenda. Bwakinyi? Mbilombeene kwikala mwanda wa ma mbalo abadi bakudile. Bangi mbashaale mu ma mbalo e lufuufi sunga e mashinda alwile na e matekye. Bangi bantu ta be na meema ebungi sunga bintu bya kusuula nabyo mashibo. Byabya, sunga twekala mbalo kinyi na sunga bantu be mbalo yatudi bekala na mweneno e naminyi a mankenda, abitungu tulame Nshibo yeetu ya Bufumu iselele na ilumbuulwe kalolo. Nyi mbalo yatulangwilaa Yehowa.​—Miiya Ikituulwe 23:14.

¹⁶ Su atukumiina’shi Nshibo yeetu ya Bufumu ikale iselele nsaa yooso abitungu twilumbuule  kalolo. Bakulu bakite programe a kakongye na bekale abataluula’shi bintu bya kusuula nabyo bikwanka. Abitungu bakulu balumbuule mudimo wa kusuula Nshibo ya Bufumu bwa’shi ukitshikye. Kwi bintu abikuminaa kusuula kunyima kwa bisangilo byooso, bingi namu kunyima kwa mafuku. Ooso a kwatudi e na kineemo kya kwipaana mu kulumbuula kwa Nshibo yeetu ya Bufumu.

17, 18. (a) Kipaso kibaadi bafubi ba Yehowa ba kala ababaamba ntempelo akitulongyesha kinyi? (b) Bwakinyi abitungu’shi tubaambe Nshibo yeetu ya Bufumu?

¹⁷ Na dingi atulama Nshibo yeetu ya Bufumu kalolo pa kulumbuula mbalo yooso ilwile. Bafubi ba Yehowa ba mu mafuku a kala babaadi bebikite. Bu kileshesho, mu mafuku a kumunana kwa Yowase Nfumu a Yuuda, bantu babaadi balambule makuta mu ntempelo. Nfumu batumine ba-tshite mwakwidi bwa kufuba na ano makuta bwa kulumbuula ntempelo mbalo yooso ibaadi ilwile. (2 Banfumu 12:4, 5) Kunyima kwa bipwa 200, Nfumu Yosyase bafubile dingi na makuta a mu ntempelo bwa kumulumbuula.​—Badika 2 Myanda 34:9-11.

¹⁸ Angi ma Komite a filiale ngafikye mu kumona’shi mu bibundji byabo bantu t’abakwete kulama mashibo sunga bintu bya mudimo kalolo nya. Abimweneka’shi bantu bebungi t’abauku muulo wa kulama mashibo. Sunga’shi be kukutwa makuta ebungi bwa kwialumbulusha. Kadi su tatukwete kulumbuula Nshibo yeetu ya Bufumu pa nsaa ayitungu, ayibanga kumweneka butshafu na bantu abebimono. Tabilombeene kutuusha bu kamonyi bwi buwa nya. Pamutwe pa byabya, nsaa yatubaamba Mashibo eetu a Bufumu, atutumbisha Yehowa na ta tulwisha bya buntu bikwete kutuusha bakwetu.

19. Nkitshibilo kinyi kibwata bwa kuleesha’shi onemeka mbalo yatulangwila Yehowa?

¹⁹ Nshibo ya Bufumu nyi nshibo yatudi balambule Yehowa. Ta ngya muntu sunga kakongye nya. Nka bu byatubapusha mu uno mwisambo, mayi a kulonda a mu Bible aetukwasha bwatudya kwikala na mweneno ebuwa bwa mbalo ya tulangwila Efile Mukulu. Bu byatukwete kunemeka Yehowa, abitungu tunemekye bisangilo byetu mpa na Nshibo ya Bufumu. Twina muloo wa kuyididiila na kutuusha bya buntu byetu bwa lwibako lwa Mashibo a Bufumu, na kutumika bwa kwiabaamba kalolo na kwialama eselele. Nka bu Yesu, atuleesha katshintshi keetu na kanemo bwa mbalo yatulangwila Yehowa.​—Yowano 2:17.