1, 2. Mu Bifundwe bya kina Ebreeyi, kishima “kituudilo kya ngwa” akileesha kinyi?

YEHOWA EFILE MUKULU akula’shi: “Eyilu nyi ndupuna-nsulu lwande, nsenga naamu nkituudilo kya ngwa yande.” (Yeeshaya 66:1) Efile Mukulu bakwile dingi pabitale “kituudilo kya ngwa” yaaye shi: ‘Kituudilo kya ngwa yande . . . nekîkasha na ntumbo.’ (Yeeshaya 60:13, EEM) Yehowa kwete kwikasha kituudilo kya ngwa yaaye na ntumbo sunga kwikilumbuula naminyi? Na byabya abileesha kinyi kwi baaba bashale pa nsenga, ayo kituudilo kya ngwa yaaye?

² Mu Bifundwe bya kiina Ebreeyi, kishima “kituudilo kya ngwa” mbekifunde dingi bwa kuleesha ntempelo a mu Isaleele. (1 Myanda 28:2; Misambo 132:7) Ntempelo baadi buwa ku meeso kwa Yehowa mwanda baadi mbalo ikata ya lulangwilo lwa binyibinyi. Baadi kwanka bwa kumutumbisha pa nsenga.

3. Mbalo ikata ya lulangwilo lwa binyibinyi lelo uno ayileesha kinyi, na ngibangye kwikala kwanka mafuku kinyi?

³ Mbalo ikata ya lulangwilo lwa binyibinyi lelo uno ayileesha kinyi? T’ayileesha mashibo bu bibaadi ntempelo nya. Nyi ntempelo a  mu kikudi, na kwete kutumbisha Yehowa kukila nshibo yooso yabadi balombeene kwibaka. Ntempelo a mu kikudi aleesha kinyi? Nyi mpàngo y’Efile Mukulu bwa kukwasha bantu bwabadya kwikala bakuuku baaye na kumulangwila. Ino mpàngo ayilombana nka penda ku bukwashi bwa nkuulo ya Yesu. Ino mpàngo ibaadi ibangye mu kipwa kya 29 pabaadi Yesu mubatshishibwe na kushingwa mwimu bu Tshiite-mwakwidi mukata e panundu a mu ntempelo a mu kikudi a Yehowa.​—Beena-Ebreeyi 9:11, 12.

4, 5. (a) Muyiile Misambo 99 Balangwidi ba Yehowa ba binyibinyi be na lukalo lwa kukita kinyi? (b) Ndukonko kinyi lwatudi balombeene kwiyipusha?

⁴ Twi na lutumbu lukata bwa mpàngo y’Efile Mukulu p’aye kutuula lulangwilo lwa binyibinyi. Atuleesha lwalwa lutumbu pa kulungula bangi eshina dya Yehowa na kya buntu kikile buwa kya nkuulo. Twi na muloo ukata bu byakudi beena Kidishitu bakile pa midiyo mwanda bakwete kutumbisha Yehowa efuku dyooso! Sunga bantu bebungi ba mu bipwilo bya madimi abanangusheena’shi abakatumbisha Efile Mukulu mwiyilu kunyima kwa lufu lwabo, bafubi ba Yehowa abauku muulo wa kumutumbisha pano pa nsenga kubanga binobino.

⁵ Patukwete kutumbisha Yehowa, tukwete kwambula kileshesho kya bafubi b’Efile Mukulu basha lulamato babadi baleeshe mu Misambo 99:1-3, 5. (Badika.) Bantu basha lulamato bu Moyiise, Aarona na Samwele babaadi bakwatshisheene mpàngo y’Efile Mukulu bwa lulangwilo lwa binyibinyi mu mafuku a kala. (Misambo 99:6, 7) Lelo uno, bashingwe mwimu bakii pa nsenga bakwete kufubila Yehowa mu kipindji kya ntempelo a mu kikudi ki pa nsenga kumpala kwa’shi babangye kufuba na Yesu bu batshiite-mwakwidi mwiyilu. Midiyo ya “ingi mikooko” ikwete kwibakwatshisheena na lulamato. (Yowano 10:16) Bisaka byooso bibidi bikwete kulangwila Yehowa mu buumune. Byabya, twi balombeene kwiyipusha’shi: ‘Nkwete kukwatshisheena mpàngo ya Yehowa bwa lulangwilo lwa binyibinyi?’

6, 7. Mwanda kinyi ubaadi ukitshikye mu kakongye ka kumpala ka beena Kidishitu, na nkiyi kibaadi kikitshikye mu kipwa kya 1919?

⁶ Bipwa peepi na 100 kunyima kwa kutuusha kakongye ka beena Kidishitu, malongyesha a madimi abaadi apalakane nka bu bibaabadi batemukye. (Bikitshino 20:28-30; 2 Beena-Tesalonika 2:3, 4) Kunyima kwa byabya, bibaadi bukopo bwa kutundula balangwidi b’Efile Mukulu ba binyibinyi. Kubaadi kukile bipwa  nkama kumpala kwashi Yehowa atume Yesu bwa kutundula baaba bakwete kufubila binyibinyi Efile Mukulu mu ntempelo aaye a mu kikudi.

⁷ Mu kipwa kya 1919, bantu babaabadi bakumiine kwi Efile Mukulu na babaadi abafubu mu ntempelo aaye a mu kukudi abaadi baukiibwe kalolo. Abaadi batungunukye na kulumbuula lulangwilo lwabo bwa’shi Yehowa anyishe kwilukumiina. (Yeeshaya 4:2, 3; Malakii 3:1-4) Kimonwa kibamwene Mpoolo mutumibwa takudi bipwa nkama kibabangile kulombana.

8, 9. “Mpaladiiso” bamwene Mpoolo mu kimonwa aleesha kinyi?

⁸ Kimonwa kya Mpoolo mbekileeshe mu 2 Beena-Kodinto 12:1-4. (Badika.) Mu kino kimonwa, Yehowa baadi muleeshe Mpoolo kintu kibaadi na kya kwikala kwanka mu mafuku e kumpala. “Mpaladiiso” bamwene Mpoolo aleesha kinyi? Kya kumpala, mmulombeene kuleesha Mpaladiiso ekadika pa nsenga binobino. (Luuka 23:43) Kya kabidi, mmulombeene kuleesha mpaladiiso a mu kikudi mupwidikye mu ndumbulwilo mupya. Na kya kasatu, mmulombeene kuleesha nshalelo e mwiyilu mu “mpaladiiso a Efile Mukulu.”​—Bifumbulwe 2:7.

⁹ Bwakinyi Mpoolo akula shi “bapushiishe myaku yabasha kubwela, yabashi bakumiine’shi muntu eyambuula”? Mwanda nsaa tayibaadi ibande kulombana bwadya kupatuula bintu bibuwa bibamwene mu kimononwa nya. Kadi lelo uno, Yehowa mmwitulekyele bwa kulungula bangi myabi ikwete kusangeela mwilo waye!

10. Bwakinyi mpaladiiso a mu kikudi mmwilekeene na ntempelo a mu kikudi?

¹⁰ Mpaladiiso a mu kikudi atukwete kwisambila nkinyi? Nyi nshalelo a butaale na buumune bwitupe Efile Mukulu mu ndumbulwilo aaye. Anka, mpaladiiso a mu kikudi na ntempelo a mu kikudi mbilekeene. Ntempelo a mu kikudi nyi mpàngo y’Efile Mukulu bwa lulangwilo lwa binyibinyi. Mpaladiiso a mu kikudi namu aleesha baaba booso babadi bakumiine kwi Efile Mukulu na bakwete kumulangwila mu yawa ntempelo aaye a mu kikudi.​—Malakii 3:18.

11. Nkineemo kinyi kyatudi nakyo lelo uno?

¹¹ Abitusankisha pa kuuka shi kubanga mu kipwa kya 1919, Yehowa mmutadiile bantu bakutwe kupwidika bwabadya kulumbuula, kunyingisha na kutamisha mpaladiiso a mu kikudi. Okwete kukwasha bwa kukita uno mudimo wibuwa su? Okwete kusankila kineemo kya kufuba na Yehowa bwa kumutumbisha pano pa nsenga?

12. Atuuku naminyi shi mayi e mu Yeeshaya 60:17 akwete kwenda na kulombana? (Tala kifwatulo ki ku mbangilo.)

¹² Mutemuki Yeeshaya baadi mutemukye shi myanda ibungi ayikeekala na kya nkashintuluka na nkalumbuluka mu kipindji kya ndumbulwilo a Efile Mukulu ki pa nsenga. (Badika Yeeshaya 60:17.) Beena Kidishitu bakinga na bapya bakwete penda kubadika sunga kupusha pabitale kwakwa kushintuluka. Anka, kwi bakwetu balume na bakashi bebungi bapete kineemo kya kumona kwakwa kulumbuluka! Baaba bafubi basha lulamato mbafikye mu kushinkamisha shi Efile Mukulu kwete kutumika na Yesu bwa kuludika na kukunkusha ndumbulwilo Aaye! Patukwete kuteemesha myanda ayitulondela baaba bakwetu, atunyingisha lukumiino na lukulupilo lwetu mwi Yehowa.

13. Abitungu tukite kinyi muyiile Misambo 48:12-14?

¹³ Abitungu beena Kidishitu booso ba binyibinyi balungule bangi pabitale ndumbulwilo a Yehowa. Mmwanda wa kukaanya pa kwikala mu butaale na mu buumune na bakwetu mu ndumbulwilo e bubi a Satana! Abitungu twikale na muloo wa kulungula “lutandwa alufiki” pabitale ndumbulwilo a Yehowa na mpaladiiso a mu kikudi!​—Badika Misambo 48:12-14.

14, 15. Nkulumbuluka kinyi kukitshikye kunyima kwa 1970, na ndumbulwilo mmupete bukwashi naminyi?

 ¹⁴ Bantu bakulu bebungi mu tukongye twetu mbamone kulumbuluka kukata kukitshikye mu kipindji ki pa nsenga kya ndumbulwilo a Yehowa. Abatentekyesha pabaadi tukongye na mufubi umune a kakongye pamutwe pa kasaka ka bakulu, pabaadi maumbo na mukwashi a filiale pamutwe pa Komite a filiale sunga pabaadi mukunkushi a Sosiete a Watch Tower aludika pamutwe pa Kasaka ka Bakunkushi Bakulu ka Batemwe ba Yehowa. Sunga mbibaadi baaba bakwetu abafubu na lulamato, muntu umune nyi baadi na bushito bwa kwata bitshibilo mu tukongye, mu ma biro a filiale na ku biro byetu bikata. Kunyima kwa 1970, kubaadi kulumbuluka kwashi tusaka twa bakulu twikale na bushito bwa kwata bitshibilo mu tukongye pamutwe pa muntu umune.

¹⁵ Bwakinyi kwakwa kulumbuluka nkukwashe ndumbulwilo? Mwanda kubaadi kwimeene pa mpushiisho e buwa a Bifundwe. Pamutwe pa kufubisha binangu bya bu muntu, ndumbulwilo mmupete bukwashi bwa ngikashi ibuwa ya baaba bakwetu booso bakulu sunga ‘bantu bapeebwe bya-buntu’ na Yehowa.​—Beena-Efeèze 4:8; Myeele 24:6.

16, 17. Nkulumbuluka kinyi koodi mumone binobino akukukaanyisha, bwakinyi?

¹⁶ Banda kutentekyesha bilumbulukye ingi myanda bwa mikanda yeetu. Twi na muloo wa kutuusha bukwashi na kwabila bantu mikanda mu mudimo wetu wa bulungudi. Tentekyesha dingi byatukwete kulungula mukandu wibuwa ku bukwashi bwa teknoloji. Bu kileshesho, site eetu a jw.org kwete kukwasha bantu bebungi bwabadya kupeta bukwashi bwabadi nabo lukalo. Mu kwakwa kushintuluka kooso, tukwete kumona kwikalakasha kwa Yehowa bwa bantu na byadi mwibafule.

¹⁷ Tukwete kusangeela dingi kulumbuluka pabitale bisangilo byetu bwatudya kwikala na  nsaa ya kukita lulangwilo lwa mu kifuko sunga kwilongyela. Na kushintuluka kwa bikongeno byetu. Bikwete kunyisha kulumbuluka ku kipwa kyooso! Twi na dingi lutumbu bwa malongyesha atukwete kupeta ku tulasa twa Bible twibungi. Abimweneka kalolo shi, mu kwakwa kulumbuluka kooso, Yehowa nyi kwete kuludika ndumbulwilo aaye na kunyisha kulumbuula mpaladiiso a mu kikudi!

18, 19. Twi kukwasha bwa kunyisha kulumbuula mpaladiiso a mu kikudi naminyi?

¹⁸ Yehowa mwitupe kineemo kya kukwasha bwa kunyisha kulumbuula mpaladiiso eetu a mu kikudi. Twi kwibikita naminyi? P’atwe kulungula mukandu wibuwa wa Bufumu na katshintshi na kwikasha bantu bu balongi. Nsaa yooso yatukwasha muntu bwa kufika mufubi a Efile Mukulu, atukwasha bwashi mpaladiiso a mu kikudi atame.​—Yeeshaya 26:15; 54:2.

¹⁹ Tukwete kukwasha dingi bwa kulongamisha mpaladiiso a mu kikudi nsaa yatufubu bwa kulumbuula mwikeelo wetu wa bwina Kidishitu. Bino abinyisha kukaka bangi mu mpaladiiso a mu kikudi. Misango ibungi, nta nkyukilo kyetu kya Bible kikwete kukaka bantu kwi Yehowa na Yesu nya, anka, bwiselele bwetu na mwikeelo wetu wa butaale nyi abibangaa kwibakaka.

20. Abitungu twikale na lukalo lwa kukita kinyi muyiile Myeele 14:35?

²⁰ Yehowa na Yesu be na kya kwikala na muloo ukata pabakwete kumona mpaladiiso eetu ebuwa a mu kikudi. Muloo wa tukwete pusha pa kunyisha kumulumbuula winka bu kapindji kapeela ka muloo watukapusha pa’tukafubu bwa kwaluula nsenga bu mpaladiiso. Abitungu twikale atutentekyesha mukanda wa Myeele 14:35 awakula’shi: “Nfumu akaanyaa mufubi mupatulukye.” Byabya, twikaleyi na kinangu patukwete kwitatshisha bwa kulumbuula mpaladiiso eetu a mu kikudi!