Alona akula shi: “Nsaa inapushishe mukungulo wa ma mputu, eshimba dibabangile kunkubuka, ami nkukimba bya kufwama mu bwina. Sunga mbyabya naadi napusha moo. Pa naadi paasha moo ubaadi aunkamina mwanda ntshi naadi na mbalo ya kufwama. Ungi musango, panaadi natambuka mu museese, nabangile kusama na kukutwa bya kuyooka. Kubaadi kukile nsaa ibungi bwandja kwishinka. Mikungulo ya ma mputu ibabangile dingi.”

Ngoshi nyi nsulo ya masaku ebungi. Bu kilesheho, su bakulungula’shi obe sunga muntu oodi mufule e na mukumbo ukata mbilombeene nkutapa kwishimba nka bu abakwasa mputu. Moo wa mafuku aafiki ngulombeene kwinyongosha bangi. Abeyipusha’shi ‘bana baabo na beekulu baabo abakashaala nka mu ino nsenga mwi ngoshi, buntomboshi, kulwisha kwa nsenga, kushintuluka kwa lupapi, na bipupa bya mikumbo?’ Twi balombeene kupudisha tuno twinyongoshi naminyi?

Bu byatuuku shi myanda ibubi ayikitshikaa, “Muntu mudimukye, su baamono bubi eekumbaa.” (Myeele 27:12) Nka bu byatwitatshishaa bwa kukalwila mbidi yeetu, twi balombeene kulama binangu byetu bwa’shi bikale bibuwa. Ma filme na ma jurnale e na bifwanyi abikwatshisha moo abifwimisha twinyongoshi kwatudi na kwi bana beetu. Kupela kumona bifwanyi bya buntomboshi t’akuleesha shi yaaya myanda tayikwanka nya. Efile Mukulu ta mwitupangye bwa kumona myanda ibubi nya. Anka, twi balombeene kutwesha mu binangu byetu “kintu kyooso kya binyibinyi, . . . kilulame, kiselele, kyakya kilombeene  kufudiibwa.” Su tubakitshi byabya, “Efile Mukulu sha-kufukama” etupa butaale bwa mu binangu na mwishimba.​—Beena-Fidipe 4:8, 9.

Lukumiino lunyingye alwitukwasha bwa kukambila twinyongoshi. Nyi bwakinyi Bible etulungula’shi “pasukayi bwa kuteka” (1 Mpyeele 4:7, Kilombeno kipya 2014 ) Twi bya kuteka Efile Mukulu bwa’shi etukwashe na kwitupa binangu na eshimba dinyingye dya kunyingiila mu nshalelo eetu, bashinkamishe’shi “eetuteemesha sunga twamuteka kinyi.”​—1 Yowano 5:15.

Bible aleesha’shi Satana nyi “nfumu a pano pa nsenga” ta Efile Mukulu nya, n’ashi “byaa-pano byooso mbishaale ku matalwa a mubi.” (Yowano 12:31; 1 Yowano 5:19) Bino abileesha shi Satana nyi kwete kumuna, kadi Yehowa namu kwete kwitukalwila. Nyi bwakinyi Yesu bambile bwatudya kuteka Yehowa bwashi “etupaashe kwi mubi.” (Mateo 6:13) Alona akula’shi: “Nsaa ayibanga kudila ma mputu, natekaa Yehowa bwashi ankwashe bwandya kulama binangu byande, na mulum’ande angitanyinaa bwatudya kusambila pamune. Kushi mpaka kwela nteko akunkwashaa ngofu.” Nyi bwakinyi Bible akula’shi: “Yehowa ee peepi na booso abamwididi, bano booso abamwididi mu binyibinyi.”​—Misambo 145:18.

Mu mwisambo waye wa pa mwengye, Yesu baadi mulungule balongi baaye bwabadya kuteka shi: “Bufumu bwobe bufikye.” (Mateo 6:10) Bufumu bw’Efile Mukulu abukakatusha twinyongoshi tooso bwa looso. Ku bukwashi bwa Yesu “Nfumu a butaale,” Efile Mukulu “ayimika ngoshi nyaa na kufudiile nsenga.” (Yeeshaya 9:5; Misambo 46:10) “[Efile Mukulu] Eekala nsushi munkatsh’a miilo iibungi . . . Taabatombola dimo mwele, kisamba takitombokyela kisamba nya, taabayiyi dimo kulwa ngoshi . . . [t’akwikala] muntu su ngumune bwa kwibakalakasha.” (Mika 4:3, 4) Beena bifuko be na muloo “abebaka mashibo, bemushaale; abakunu nfinyo na abadi bikuba byayo.” (Yeeshaya 65:21) Mwina eumbo “sunga umune tamba dimo’shi: ‘Nee na mukumbo.’”​—Yeeshaya 33:24.

Lelo uno, sunga bantu bakita naminyi, tambakumbeene kwimika “nsaa na myanda yabashy’abatengyela” ayitufwilaa sunga kupela kwikala pa mbalo ibubi ayikitshika masaku. (Mulungudi 9:11, NWT) Ngoshi, buntomboshi na maladi bikwete kutungunuka na kwipaa bantu bebuwa nka bu bibaabidi mu bipwa lukama. Ndukulupilo kinyi lwi nalo baaba bashi basoole mwanda?

Efile Mukulu auku bungi bwa midiyo ya bantu bafwe na e na lukalo lwa kwibekasha dingi na muwa. Bwa binobino, mbalaale mu tulo, Efile Mukulu mmwibalame mu binangu byaye bipwidikye, mpa’nka na ‘mu mafuku aakafiki bafwe booso . . . abakatuuku mu mashâma.’ (Yowano 5:28, 29, EEM) Pabitale lukulupilo lwa lusangukilo, Bible etushinkamishi shi: “Lwi bu kishinkamisho kya myuwa yeetu; nkishinkame na bukome.” (Beena-Ebreeyi 6:19) N’Efile Mukulu “mwibishinkamiishe bantu booso pa kusangula [Yesu] ku bafwe.”​—Bikitshino 17:31.

Bwa binobino, sunga mbaaba booso abetatshisha bwa kusankisha Efile Mukulu abekadika nka na twinyongoshi. Paul, Janet na Alona abaadi bakambile twinyongoshi p’abo kutumikila malango a Efile Mukulu, kwifubwila peepi naaye mu luteko, na kutamisha lukumiino lwabo mu milayilo ya mu Bible bwa mafuku e kumpala. Anka bu baaba bantu, “Efile Mukulu winyi apaana lukulupilo enuushe anwe booso na muloo na kufukama kukumbanyinyine na lukumiino lwanudi nalo mwadi.”​—Beena-Looma 15:13.