1, 2. (a) Bwakinyi we mushinkamishe’shi Yehowa mmufule mwilo waye? (b) Bantu mbapangibwe na lukalo kinyi?

BWAKINYI oshinkamisha’shi Yehowa mmufule bafubi baaye? Kumpala kwa kwaluula luno lukonko, banda kutala bino bileshesho: Munda mwa bipwa bibungi, bakwetu balume na bakashi babaadi banyingishe na kalolo kooso mukwetu Taylene. Babaadi bamulungule bwa kupela kukamba kwikulupila. Akula’shi: “Su Yehowa tabaadi munfule, bano bakwetu tababaadya kutungunuka na kumpa malango nya.” Brigitte, baadi akusha bana babidi bupenka kunyima kwa lufu lwa mulum’aye akula shi: “Kukusha bana mu ndumbulwilo a Satana ndukalakasho lukata, bikishekishe kwi muledi e bupenka. Kadi ne mufikye mu kushinkamisha bi kifulo kya Yehowa mwanda mmunkwashe ku twinyongoshi twande, na tabaadi muntadiile efuku su ndimune bwa’shi mpete myanda ikile kipimo kya bukome bwande.” (1 Beena-Kodinto 10:13) Sandra namu e na mukumbo wibukopo ushaupu. Pabaabadi ku kikongeno, ungi mukwetu mukashi baadi mumuleeshe kalolo. Mulume a Sandra akula’shi: “Sunga tatubaadi atumuuku bibuwa, kalolo kabaadi mwituleeshe, kabetupeele muloo ukata ku mashimba. Nyi bwakinyi, ka mwanda kooso ka kifulo aketukitshina bakwetu balume na bakashi, akandeesha’shi Yehowa mmwitufule ngofu.”

 ² Yehowa mmupangye bantu na lukalo lwa kufula, na kwikala bafudiibwe na bangi namu. Byabya, mbipelepele bwa’shi muntu abofule pa mwanda wa mukumbo, bulanda sunga bwa kukutwa bipeta bibuwa mu bulungudi. Su tubabanga kupusha’shi Yehowa takii mwitufule dingi, abitungu tutentekyeshe’shi twi na muulo ukata kwadi na’shi e kwanka, mmwitukwate ku mboko ibalume na kwete kwitukwasha. Su twi na lulamato kwadi t’etwilwankana efuku su ndimune.​—Yeeshaya 41:13; 49:15.

3. Nkinyi akitushinkamiisha’shi kifulo kya Yehowa kwatudi takii na mpwilo?

³ Bakwetu babaatuleesha ku mbangilo babaadi bashinkamishe’shi Efile Mukulu baadi nabo mu nsaa ya nkalakasho. N’atwe namu, twi balombeene kwikala na lwalwa lukulupilo. (Misambo 118:6, 7) Mu uno mwisambo atukyebe kwakwila bintu binanka abileesha’shi Yehowa mmwitufule: (1) bipangwa, (2) Bible, (3) luteko, na (4) nkuulo. Kunangusheena pa bino bintu bibuwa bitupe Yehowa nkulombeene kwitukwasha bwa kunyisha kwikala na lutumbu bwa kifulo kyaye kishii na mpwilo.​—Badika Misambo 77:11, 12.

4. Bipangwa bya Yehowa abitulongyesha kinyi?

⁴ P’atutala bipangwa bya Yehowa, atumono byadi mwitufule ngofu. (Beena-Looma 1:20) Bu kileshesho, Yehowa bapangile nsenga mu mushindo watudi balombeene kukita ingi myanda kushi penda bwa kwikala na muwa. Mmwitupe bintu byooso byatudi nabyo lukalo bwa kusankila muwa. Twi na lukalo lwa kudya, kadi Yehowa mmwitupe bidibwa bilekenelekene bwatudya kusankila muwa! (Mulungudi 9:7) Catherine ungi mukwetu mukashi asanka pa mwanda wa kumona bipangwa, bikishekishe mu mafuku a kashiposhipo mu Canada. Akula’shi: “Abinkaanyisha pa kumona bipangwa abitungunuka na kwikala kwanka​—mitshi ayibanga kutusha bilongo, toonyi atwaluka mu ma mbalo aato, mpa na tungi tupeela atufiki mu kudiila p’edidishi dya kabwayi kande. Yehowa mmwitufule p’aye kwitupa bintu bibungi abitusankisha.” Nshetu mmufule bipangwa, na akumiina’shi twibisankile n’atwe namu.​—Bikitshino 14:16, 17.

5. Kifulo kya Yehowa akimweneka naminyi mu kipaso kyadi mupangye bantu?

⁵ Yehowa mmwitupangye na ngobesha ya kukita mudimo wibukopo na kwiusangeela. (Mulungudi 2:24) Mmwitupe mudimo wa kulombasha pa nsenga, kwiyidima kudiisha mishipa, toonyi na bingi bipangwa bi na muwa bi pa nsenga. (Kibangilo 1:26-28) Akupu, mmwitupangye na ngikashi ibuwa bwa’shi tumwambule!​—Beena-Efeeze 5:1.

6. Bwakinyi abitungu tusankile Eyi dy’Efile Mukulu?

⁶ Yehowa mmwitupe Bible pa mwanda wa kifulo kikata kyadi neetu. Etulungula myanda yatudi nayo lukalo bwa kumuuka na byapushaa pabitale bantu. Bu kileshesho, Bible etulungula bibaadi Yehowa mupushe pabaadi beena Isaleele bamutombokyele. Mukanda wa Misambo 78:38 (EEM) awakula’shi: Aye nyi “Efile Mukulu sha lusa, bebalekekyelêle milwisho yâbo kushi kwibalwisha. Misûsa i bungi bádi alama nsungu i bádi n’abo, kushi kwibalêsha bi yaya nsungu yê ikata yoso.” Nsaa y’onangushena pa uno verse, we mukumbeene kumona mushindo ukufule Yehowa. Twi balombeene kushinkamisha’shi Yehowa kwete kwitatshisha ngofu bwetu.​—Badika 1 Mpyeele 5:6, 7.

7. Bwakinyi abitungu Bible ekale na muulo ukata kwatudi?

⁷ Abitungu Bible ekale na muulo ukata kwatudi. Bwakinyi? Mwanda Yehowa kwete kwisamba  neetu ku bukwashi bw’Eyi dyaye. Nsaa i muledi esamba kalolo na mwan’aye, abanyingisha kifulo kyabo na kwikulupishena. Yehowa nyi Nshetu a kifulo. Sunga byekala’shi t’atumumonaa sunga kupusha eyi dyaye, kwete kwisamba neetu ku bukwashi bwa Bible. Abitungu tutungunukye na kumupushiisha! (Yeeshaya 30:20, 21) Nsaa yatubadika Eyi dy’Efile Mukulu, atuuku Yehowa ngofu na kumukulupila aye kwete kwituludika na kwitulama.​—Badika Misambo 19:7-11; Myeele 1:33.

8, 9. Yehowa akyebe’shi twiukye kinyi? Tuusha kileshesho kya mu Bible.

⁸ Yehowa akumiina tuukye’shi mmwitufule na takwete kutala penda bilema byetu nya, mwanda atalaa bibuwa bi mwatudi. (2 Myanda 16:9) Tubande kutala bibaadi Yehowa mumone bibuwa bi mwi Yosafate Nfumu a mu Yuuda. Yosafate baadi mwate kitshibilo ki bubi kya kukwatshishena Nfumu Akabe a mu Isaleele bwadya kulwa na beena Asirii ku Ramote a Galaade. Sunga byekala’shi batemuki ba madimi 400 babaadi batemukye’shi Akabe akatshokola ngoshi, Mika ya mutemuki a binyibinyi a Yehowa baadi mulungule Yosafate na Akabe’shi: Su nubende mu kulwa ngoshi, abakenutshokola. Na byabya nyi bibaadi bikitshikye. Akabe bafwile ku ngoshi, na Yosafate bapandjile lufu. Kunyima kwa ngoshi, Yehowa baadi mutume Yeku bwa’shi alangye Yosafate bwa kilubilo kyaye. Yeku bamulungwile’shi: “We mukite bibuwa.”​—2 Myanda 18:4, 5, 18-22, 33, 34; 19:1-3.

⁹ Kumpala kwa’ye kukita byabya, Yosafate balungwile banfumu, beena Leevi na ba tshiite-mwakwidi bwabadya kwenda mu bibundji byooso bya Yuuda bwa kulongyesha bantu Mwiya wa Yehowa. Babaadi boobeshe  kwibikita mwanda mpa na bantu ba ingi miilo babaadi bafikye mu kuuka Yehowa. (2 Myanda 17:3-10) Sunga byekala’shi Yosafate baatshile kitshibilo ki bubi kunyima, Yehowa tabaadi mulube myanda ibuwa ibaakitshine kumpala nya. Kino kileshesho akitunyingisha mwanda ingi nsaa atukitaa bilema. Byabya, su atukitshi mwetu mooso bwa kufubila Yehowa, ayididiila na kwitufula na ta mulombeene kuluba bibuwa byatudi bakite nya.

10, 11. (a) Bwakinyi luteko nkya-buntu kitupe Yehowa? (b) Efile Mukulu mmulombeene kwaluula nteko yeetu naminyi? (Tala kifwatulo ki kumbangilo.)

¹⁰ Nshe bana e na kifulo ateemeshaa bana baaye nsaa yabamulungula mwanda. Akumiinaa kwiuka abipusha bana baaye mwanda kwete kwikalakasha bwabo. Yehowa Nshetu a kifulo e nka byabya. Etuteemeshaa nsaa y’atumutekye. Kwisamba na Nsheetu nkineemo kikata!

¹¹ Twi balombeene kuteka Yehowa nsaa yooso. Nyi nkuuku eetu, na akumiina kupusha nteko yeetu nsaa yooso. Taylene atwikeele besambile kumbangilo akula’shi: “We mukumbeene kumulungula myanda yooso.” Nsaa yatulungula Yehowa myanda i mu mashimba eetu, mmulombeene kwitwaluula ku bukwashi bwa Bible, bwa miisambo i mu mikanda yeetu sunga kunyingishibwa akufiki kwi bakwetu balume na bakashi. Sunga kwakutwa muntu etupushiisha, Yehowa kwete kupusha nteko yeetu. Myaluulo yaaye ku nteko yetu ayituleesha’shi kifulo kyadi neetu takii na mpwilo.

12. Bwakinyi abitungu tulongye nteko yatupete mu Bible? Tuusha kileshesho.

¹² Twi balombeene kulonga malongyesha akata mu nteko i mu Bible. Ingi nsaa, kulonga ingi ya ku yaaya nteko mu lulangwilo lwa mu kifuko akwitukwasha. Atulumbuula nteko yeetu nsaa yatunangusheena ku nteko ya bafubi ba Yehowa ba kala. Bu kileshesho, we kulonga luteko lwa kwiyisha lwa Yoona pabaadi munda mwa mushipa ukata. (Yoona 1:17–2:10) We kutaluula luteko lwa kwishimba lubakitshiine Salomone pabaadi mulambule Yehowa ntempelo. (1 Banfumu 8:22-53) We kunangusheena dingi pa luteko lwa kileshesho lwa Yesu. (Mateo 6:9-13) Mwanda wi na muulo ukata, ngwa ‘kuukisha Efile Mukulu nkalo yoobe.’ Pa kukita byabya, “butaale bw’Efile Mukulu, abo butabukile binangu byooso, abulama mashimba eenu na binangu byenu.” Lutumbu lwetu bwa kifulo kya Yehowa kishii na mpwilo aluyididiila na kutama.​—Beena-Fidipe 4:6, 7.

13. Mulambu wa nkuulo awitukwasha naminyi?

¹³ Yehowa mmwitupe kya-buntu kya nkuulo bwa’shi “twikeele na muwa mwadi.” (1 Yowano 4:9) P’aye kutaluula bibaadi Yehowa muleeshe kifulo kyaye, Mpoolo mutumiibwa bafundile’shi: “Kidishitu, mu kipungo kifundwe, bafwile bwa babi. Ta mbibofule bwa muntu kufwila mululame nya; pangi muntu e biiya, kwi kipaso kya kukumiina kumufwila. Anka, Efile Mukulu betulesheeshe kifulo kyaye mu bino’shi: Kidishitu betufwidiile pabatudi tukii ba-sha-milwisho.” (Beena-Looma 5:6-8) Nkuulo nyi nkileshesho kikata kya kifulo kya Yehowa, na dingi, ayipa bantu mushindo wa kutamisha kipwano kyabo naaye.

14, 15. Ku bukwashi bwa nkuulo nkinyi akikapete (a) Beena Kidishitu bashingwe mwimu? (b) Baaba be na lukulupilo lwa kushala pa nsenga?

¹⁴ Yehowa mmuleeshe kifulo kyaye kishii na mpwilo mu mushindo wi pabwao kwi kasaka kapeela ka beena Kidishitu. (Yowano 1:12, 13; 3:5-7) Efile Mukulu mmwibashingye mwimu wa kikudi kiselele, na pa mwanda wa byabya, mbekale  bana b’Efile Mukulu. (Beena-Looma 8:15, 16) Bu byabidi’shi bangi ba kwabadi bakii pa nsenga, bwakinyi Mpoolo akula’shi mbashaale “pamune na winyi Kidishitu mwiyilu”? (Beena-Efeeze 2:6) Mwanda Yehowa mmwibape lukulupilo lwa kwikala na muwa wa ikalaika mwiyilu.​—Beena-Efeeze 1:13, 14; Beena-Kolose 1:5.

¹⁵ Bantu booso bashii bashingwe mwimu mbalombeene kwikala ba kuuku b’Efile Mukulu su abaleesha lukumiino mu nkuulo. N’abo namu be na mushindo wa kukuminyibwa bu bana b’Efile Mukulu na kwikala na muwa wa ikalaika mu mpaladiiso pa nsenga. Nkuulo ayileesha kifulo kya Yehowa bwa bantu booso. (Yowano 3:16) Twi na muloo ukata wa kuuka’shi su atufubila Efile Mukulu na lulamato, aketupa nshalelo e buwa mu nsenga ipya! Byabya, tutungunukyeyi na kuleesha’shi tukwete kwata nkuulo na muulo ukata, ayo ikale kileshesho kya kifulo kishii na mpwilo kya Yehowa.

16. Twi kukita kinyi kunyima kwa kunangusheena ku kifulo ky’Efile Mukulu?

¹⁶ Tatwi bakumbeene kubadika mishindo yooso ikwete kwituleesha Yehowa kifulo nya. Nfumu Daavide bayimbile’shi: “Tanshingula bi bukata bwa binangu bibwelele obe Efile Mukulu pa mwanda wande. A bungi bwâbyo bwi naminyi! Su natompa kwibibadika, mbikile bungi bwa misengyeya.” (Misambo 139:17, 18, Ñono na malango) Kunangusheena mu mishindo ibungi ya kifulo kituleeshe Yehowa akwitusukuma bwatudya kumufula na kumupa bintu byetu bya muulo.

17, 18. Mmishindo kinyi yatudi balombeene kuleesha’shi twi bafule Efile Mukulu?

¹⁷ Kwi mishindo ibungi yatudi balombeene kuleesha’shi twi bafule Yehowa. Bu kileshesho, twi kuleesha kifulo kyetu pa twipaana na kisumi bwa kulungula bangi mukandu wibuwa wa Bufumu. (Mateo 24:14; 28:19, 20) Twi bakumbeene dingi kuleesha kifulo pa’twe kushaala na lulamato patudi mu bitompwanga. (Badika Misambo 84:11; Jaake 1:2-5.) Sunga bitompwanga byeetu byekala bibukopo, abitungu tushinkamishe’shi Yehowa kwete kumona makyenga eetu na etukwasha mwanda twi na muulo ku meso kwaaye.​—Misambo 56:8.

¹⁸ Kifulo kyetu bwa Yehowa akitutakula bwa kunangusheena ku bintu byoso bipangye Yehowa. Nsaa yatudi na kyubishi kya kulonga Eyi dyaye, atuleesha’shi twi bafule Yehowa na Eyi dyaye. Atutekaa Yehowa efuku dyooso mwanda twi bamufule na atukumiina kunyingisha kipwano kyetu naye. Na dingi nsaa yatunangusheena pa kya-buntu kya nkuulo, kifulo kyetu naye akinyisha kutama. (1 Yowano 2:1, 2) Ino ngimune ya ku mishindo ibungi yatudi balombeene kuleesha’shi atwata kifulo kya Yehowa kishii na mpwilo na muulo.