MIISAMBO YA MBANGILOT | AKWIKALAA MUWA KUNYIMA KWA LUFU?
Nkinyi akikushinkamiisha’shi—Lusangukilo alukekala kwanka?
Kukulupila’shi bafwe abakasanguka nkukutwa kwa binangu su? Mpoolo mutumibwa tabaadi anangusheena byabya nya. Baadi mufunde ku bukome bwa kikudi kiselele’shi: “Su twibatuule lukulupilo lwetu munda mwa Kidishitu bwa penda uno muwa, byabya ku bantu booso, bakokole kabi nnaatwe. Anka ta mbyabya! Kidishitu mmusangukye ku bafwe, bu kilombola kya bafwe.” (1 Beena-Kodinto 15:19, 20) Mpoolo baadi amono lusangukilo bu mwanda wa binyibinyi. Kibaadi akimushinkamiisha byanka nyi ndusangukilo lwa Yesu. * (Bikitshino 17:31) Nyi bwakinyi Mpoolo etanyina Yesu bu “kilombola kya bafwe”—mwanda baadi muntu a kumpala baadi musangukye bwa kupeta muwa wa ikalayika. Su Yesu baadi muntu a kumpala, abipushika kalolo’shi kubaadi na kya kwikala bangi abamulondo.
Yoobo bakwile’shi: “Okaabila kummona’mi kipangwa kyobe.”—Yoobo 14:14, 15, EEM
Kwi kingi kintu kilombeene nkushinkamiisha’shi lusangukilo alukeekala kwanka. Yehowa nyi Efile Mukulu a binyibinyi. ‘Efile Mukulu taadimbanaa.’ (Tite 1:2) Kasha Yehowa t’adimbile, na t’anadimbe efuku su ndimune. Mmulombeene kulaa bantu lusangukilo, mpa na kuleesha’shi akelulombasha, akupu akutwe kwilulombasha su? Bino ta mbilombeene kukitshika nya!
Bwakinyi Yehowa mmwate mpàngo ya kusangula bantu mu mafuku e kumpala? Mwanda e na kifulo. Yoobo bayipwishe’shi “Su muntu bâfu mmulombeene kwikala dingi na muwa su?” Bakwile dingi’shi: “Okanyitâmina, nkakwitabe, mwanda okaabila kummona’mi kipangwa kyobe.” (Yoobo 14:14, 15, EEM) Yoobo baadi mushinkamishe’shi Nshaye a mwiyilu akekala na lukalo lua kumubwisha ku bafwe. Efile Mukulu e kwaluluka su? Aaye nabene akula’shi: “Ami Yehowa ntangalulukaa ooo.” (Malakii 3:6) Efile mukulu ki nka na lukalo lwa nkamona bantu abakasanguka, na mbidi bukome na muloo. Bino bi nka bu nambutwile e na kifulo akumina nkamona mwan’aaye kunyima kwa lufu. Kwilekena kwi’shi, Efile Mukulu e na bukome bwa kukita by’akumiina.—Misambo 135:6.
Lufu mmwanda wibukopo, kadi Efile Mukulu akelwimika
Yehowa akapa mwan’aye bukome bwa nkasankisha baaba booso bafwiishe bakwabo ba kifulo. Na Yesu kwete kupusha naminyi bwa kusangula bantu? Kumpala kwa kusangula Lazaare, pabaadi mumone bibaadi binyongole bakwabo na Lazaare, mpa na ba kuuku baye, Yesu nabene “banoshêshe mpolo.” (Yowano 11:35, EEM) Ungi musango, Yesu baadi mufumankane na mukashi-kilele a mu Naine baadi mufwishe mwan’aye umune eeleka. Yesu “bapushiishe lusa pa mwanda waye, nyi aaye nkumulungula’shi: ‘Todilanga dimo.’” Musango umune bamusangwile. (Luuka 7:13) Yesu baadi atapika kwishimba bwa baaba be mu kinyongwa na bwa bafwe. Yesu akapusha muloo nsaa yakamono booso be mu maalo abasanka!
Tobopwile kupusha abikalaa kinyongwa nsaa ayifu muntu? We kupusha’shi lufu nyi nkintu kyatushi balombeene kukambila. Kadi kwi kintu akikelukambila—Efile Mukulu akasangusha bantu ku bukwashi bwa Mwan’aye. Uka’shi Efile Mukulu akumiina’shi okebimone. E na lukalo lwa’shi okemonene dingi na baaba bakwenu ba kifulo bafwe. Banda kunangusheena abikalumbuluka myanda bwa looso mu mafuku ekumpala, kushi nkelekeena nabo dingi!
Lionel, atwikeele besambile mu mwisabo ushaale akula’shi: “Naadi mulongye pabitale lusangukilo. Bibaadi bukopo bwandya kwibikumiina bwa musango wa kumpala, tshinaadi nakumiina sunga muntu andungula wanka nya. Anka, panakimbile mu Bible, naadi mupete’shi mbya binyibinyi! Binobino, nkwete natengyela nkemoneena dingi na nshami-kulu.”
Okumiina kuuka ingi myanda ibungi su? Batemwe ba Yehowa abakumiina nkuleesha mu Bible oobe bwakinyi abashinkamisha’shi akukekala lusangukilo. *
^ par. 3 Bwa kupeta myanda ayishinkamisha’shi Yesu basangukile, tala mukanda wa La Bible : Parole de Dieu ou des hommes ? esaki 78-86, wabadi batuushe kwi Batemwe ba Yehowa.
^ par. 9 Tala shapitre 7 a mukanda wa A nkinyi akilongyesha namu Bible? Wabadi batuushe kwi Batemwe ba Yehowa.
