BIBLE ALUULA’SHI: “Akufiki nguba aabapusha eyi dya [Yesu] kwi booso balaale mu nyembo, . . . abeemutuuku.”​—Yowano 5:28, 29.

Yesu baadi mutemukye’shi mu mafuku e kumpala pakeekala mu Bufumu bwaye, mu Nyembo amukekala bisumanga. Fernando e mu mwisambo ubashaala atentekyesha’shi: “Naadi mukaanye p’ami kubadika bwa musango wa kumpala mukanda wa Yowano 5:28, 29, naadi mupete lukulupilo lwa binyibinyi na kubanga kunangusheena bwa myabi i kumpala na muloo.”

Mu mafuku a kala, Yoobo mufubi a lulamato baadi akulupila’shi kunyima kwa lufu lwaye, Efile Mukulu baadi na kya kumubuusha ku lufu. Yoobo baadi mwipushe’shi: “Su muntu bafu, mmulombêne kwikala dingi na mûwa su?” Akupu baadi mwaluule na lukulupilo’shi: “Ami nakatengyela mafuku oso a mûwa wande wi bu mufubo wa pa bukopo, [mu nyembo] mpâ na p’abakankombola ku wanka. Penyipapa, okanyitâmina, nkakwitabe.”​—Yoobo 14:14, 15, EEM.

Lusangukilo talubaadi mwanda upya kwi Maata mukwabo na Lazaare nya. Kunyima kwa Lazaare kufwa, Yesu bambile’shi: “Ndumyanobe akasanguka.” Maata bamulungwile’shi: “Nanguuku’shi akasanguka ku kipindji kya lusangukilo, kwifuku dia nfudiilo.” Yesu bamulungwile dingi’shi: “Ami, ne lusangukilo na muwa: Yawa akumiina mwandji, sunga ayikala dimo mufwe, akeekala na muwa.” (Yowano 11:23-25, Kilombeno kipya 2014) Kunyima, Yesu baadi musangule Lazaare! Wawa mwanda wa muloo awitupa lukulupilo bwa mafuku e kumpala. Banda kupwandjikisha apakasanguka bantu mu nsenga yooso ishima!

BIBLE ALUULA’SHI: Lusangukilo lwa Yesu ndwilekeene na ingi nsangukilo mwanda yabadi baleeshe mu Bible. Baaba bantu mwanda babaadi basangukye kadi, bashaala na muwa pano pa nsenga. Anka, pabitale lusangukilo lwa Yesu atubadika’shi: ‘Yesu Kidishitu . . . mmwende mwiyilu, e ku mboko ilume y’Efile Mukulu.’ (1 Mpyeele 3:21, 22) Nka penda Yesu nyi baadi musangudiibwe bwa kwenda mwiyilu su? Yesu baadi mulungule balondji baaye’shi: “Su neende nakenulumbulwila mbalo, nankaaluka, na nakenwata nwikale kwandji; bwa’shi kwakwa kwandji, anwe, nwikale namu.”​—Yowano 14:3, Kilombeno kipya 2014.

Kidishitu bayiile mwiyilu bwa kulumbuula mbalo bwa bangi ba ku balondji baaye. Baaba abakasanguka bwa kwenda mwiyilu abekala bantu 144 000. (Bifumbulwe 14:1, 3) Kadi nkinyi kyabakyebe nkakita mwiyilu?

 Abakeekala na mudimo ukata! Bifundwe abitulungula’shi: “Baa-sha-mwabi na be selele mbano be na mbalo ku kusanguka kwa kumpala. Abo, lufu lwa kabidi talwibakumu: Abaikala ba tshiite-mwakwidi b’Efile Mukulu na ba Kidishitu; abadi bufumu pamune naaye munda mwa bipwa kinunu.” (Bifumbulwe 20:6) Baaba abakasanguka bwa kwenda mwiyilu, abakamunana mwiyilu na Kidishitu bu banfumu na bu batshiite-mwakwidi bwa looso pa nsenga.

BIBLE ALUULA’SHI: Ku bukwashi bwa kikudi kiselele, Mpoolo mutumiibwa bafundile ano mayi: “Nee na lukulupilo mw’Efile Mukulu, bu byabadi abo bakulupile’shi akwikala kusanguka kwa balulame na bashii-balulame.”​—Bikitshino 24:15.

Mba nanyi be mu kisaka kya “balulame” akileesha Mpoolo? Banda kutala kino kileshesho. Abalungwile Danyele muntu sha lulamato ku nfudiilo kwa muwa waye’shi: “Okekala mwikishe. Anka, okabûku dimo p’efuku dya nfudîlo, mwanda wa kutambula bwedi.” (Danyele 12:13, EEM) Danyele akeekala kunyi pakabuuku mu tulo twa lufu? “Balulame abakapyana nsenga, na abakemushala bwa looso.” (Misambo 37:29, NWT) Akupu, Yesu bambile’shi: “Basha muloo anka beyishe, mwanda banapiane nsenga.” (Mateo 5:5, Kilombeno kipya 2014) Danyele na bangi balume na bakashi basha lulamato, abakasanguka bwa kwikala dingi na muwa pa nsenga bwa looso.

Mba nanyi be mu kisaka kya “bashii-balulame” akileesha Mpoolo? Midiyala ya bantu babafwile kushi kupeta mushindo wa kupusha na kutumikila bya binyibinyi bya mu Bible. Kunyima kwa lusangukilo lwabo, abakeekala na mushindo wa kulonga na kuuka Yehowa * na Yesu. (Yowano 17:3) Baaba booso abakakumiina nkafubila Efile Mukulu, abakeekala na lukulupilo lwa kwikala na muwa nka bu Yehowa​—bwa looso.

BIBLE ALUULA’SHI: Efile Mukulu “Akumuna mpolo yooso ku meeso aabo. Lufu taalwikala kwanka dimo. Taakwikala dimo sunga maalo, sunga kwidila, sunga mukumbo.” (Bifumbulwe 21:4) “Abeebaka mashibo, beemushaale; abakunu nfinyo na abadi bikuba byayo.”​—Yeeshaya 65:21.

Banda kwimona bu’be e mu nsenga i na myanda i byabya pamune na bakwenu ba kifulo abakasanguka! Anka kwi lukonko lubashaala, We kushinkamisha naminyi’shi lusangukilo alukekala kwanka?