1, 2. (a) Nkinyi kyokulupila nkamona mu Mpaladiiso? (Tala kifwatulo ki ku mbangilo.) (b) Nkinyi akiketupa muloo ukata mu nsenga ipya?

TUKWETE kukulupila binyibinyi “muwa wa ikalaika” mu mafuku e kumpala. Mpoolo mutumibwa baadi mwiwitanyine bu “muwa wa binyibinyi.” (Badika 1 Timotee 6:12, 19.) Bantu bebungi abakapete muwa wa ikalaika pa nsenga ayikaluulwa Mpaladiiso. Bibukopo bwa kupwandikisha byatukekala na mbidi bukome na muloo efuku dyooso. (Yeeshaya 35:5, 6) Banda kunangusheena muloo watukekala nao pa kushaala na kifuko kyeetu, ba kuuku, mpaa na bantu abakasanguka. (Yowano 5:28, 29; Bikitshino 24:15) Okekala na nsaa ya kulonga midimo ipya na kulongamisha kipaso kya kukita bintu byokuminaa. Bu kileshesho, we kulonga myanda ibungi itale siyanse. Sunga kulonga bya kuyimba misambo na byombwanga sunga bya kwibaka nshibo yobe’be nabeene.

² Sunga byekala shi tukwete kukulupila byabya bintu byooso bibuwa, kulangwila Yehowa nyi akuketupa muloo ukata. Banda kunangusheena abikekala nshalelo nsaa ayikekala bantu booso abaata eshina dya Yehowa bu dya kishila na nkamukumiina bu Nfumu aabo. (Mateo 6:9, 10) Atukekala na muloo wibungi wa kumona pa nsenga  mpauule bantu bapwidikye, nka bu bibaadi abikumiina Efile Mukulu. Na dingi banda kunangusheena byabikekala bibofule bwa’shi tutamishe kipwano kyetu na Yehowa p’atwe kwikala bapwidikye!​—Misambo 73:28; Jaake 4:8.

3. Abitungu tukite kinyi bwa kwilumbuula kubanga binobino?

³ Atukulupila’shi Yehowa akalombasha ino myanda yooso ya kukaanya, mwanda kwi “Efile Mukulu, byooso mbilombeene kukitshika.” (Mateo 19:25, 26) Su atukyebe nkapeta muwa wa looso mu nsenga ipya, ino nyi nsaa yatudi balombeene ‘kukwatshiila’ muwa wa ikalayika. Atuuku kalolo’shi nfudiilo ayifiki binobino, byabya abitungu twikale na nshalelo aleesha’shi tukwete kutengyela nfudiilo ayifiki pa nsaa yatushatuuku. Abitungu tukite myanda yooso ayitungu kukita kubanga binobino bwa kulumbuula nshalelo eetu bwashi ekale mwipusheene na a mu nsenga ipya. Tubandeyi kutala mushindo watudi balombeene kwibikita.

4. Twi kwilumbuula naminyi kubanga binobino bwa nshalelo a mu nsenga ipya? Tuusha kileshesho.

⁴ Nkipaso kinyi kyatudi bakumbeene kwilumbuula kubanga binobino bwa mu nsenga ipya? Su atukyebe kwenda mu kushaala mu dingi eumbo, twi kukita ingi myanda ayitungu bwa kwilumbuula bwa nshalelo a mu dyadya eumbo. Bu kileshesho, twi kulonga ludimi na bipikwa bya bantu bemushaale. Twi bya kutompa bingi bidibwa bya mwanka. Mu mushindo umune, twi balombeene kwilumbuula kubanga binobino bwa nshalelo a mu nsenga ipya pa kukita myanda nka bu’twe batabadi bemushaale. Tubande kutaluula byatudi bakumbeene kwibikita.

5, 6. Kulonga bya kukokyela ku bukunkushi abwitupa ndumbulwilo a Yehowa akwitukwasha bwa nkashaala mu nsenga ipya naminyi?

⁵ Mu uno ndumbulwilo, Satana akumiina’shi bantu banangusheene’shi mbalombeene kukita kyooso kyabakumiina. Bantu bebungi abakuminaa kwikala mu bulungantu na ta be na lukalo lwa kukokyela Efile Mukulu nya. Mbipeta kinyi bituukye? Mbituushe makyenga ebungi na kukutwa kwa muloo. (Yeelemiya 10:23) Anka Yehowa Nfumu a kifulo. Mu ndumbulwilo mupya nshaleelo akalumbuluka ngofu mwanda muntu ooso akamukookyela!

⁶ Mu nsenga ipya, atukasankila kulonda buludiki abuketupa ndumbulwilo a Yehowa bwa kwaluula nsenga bu mpaladiiso na kulongyesha booso abakasanguka. Atukekala na midimo ibungi ayiketupa Yehowa. Byabya atukitaa naminyi su baaba abetukunkusha abetupa mudimo watush’atukumiinaa kukita? Atukokyelaa su? Atukitaa bukopo bwetu booso bwa kwiulombasha na muloo? Bwa kwilumbuula bwa muwa wa  ikalaika mu ndumbulwilo mupya, abitungu tukookyele bukunkushi abwitupa ndumbulwilo a Yehowa kubanga binobino.

7, 8. (a) Bwakinyi abitungu twikwatshisheene na baaba abetukunkusha? (b) Bangi beena Kidishitu mbapete kushintuluka kinyi? (c) Twi balombeene kushinguula kinyi pabitale nshaleelo a mu nsenga ipya?

⁷ Su atukyebe kwikala beelumbuule bwa nshaleelo a mu ndumbulwilo mupya, abitungu tulongye bya kwikala na muloo na kufuba pamune na ndumbulwilo a Yehowa mpa na bakwetu. Bu kileshesho, nsaa yabetupa ungi mufubo, tukumine kufuba na bakwetu na kukita byooso abitungu bwa’shi twiukite na muloo. Su atulongo bya kwikwatshisheena na baaba abetukunkusha kubanga binobino, abikekala bipelepele bwa kwibikita mu ndumbulwilo mupya. (Badika Beena-Ebreeyi 13:17.) Pabaadi beena Isaleele batwele mu Nsenga ya mulayilo, babaadi bebatshibile bipindji bya nsenga bya kushaala. (Mbadiko 26:52-56; Yooshwa 14:1, 2) Tatuuku mbalo yabakapa muntu ooso a kwatudi bwa kushaala mu nsenga ipya. Byabya su twi bapwe kulonga bya kwikwatshisheena na bakwetu, atukekala na muloo wa kukita kikyebe ky’eshimba dya Yehowa mbalo yooso yatukashaala.

⁸ Banda kunangusheena kineemo kyatukekala nakyo kya kufuba mu ndumbulwilo mupya a Efile Mukulu mu Bufumu bwaye! Nyi bwakinyi, twi na muloo wa kufuba mu buumune na ndumbulwilo a Yehowa kubanga binobino na kukita mudimo ooso wabadi beetupe. Byabya, ingi nsaa mbalombeene kwitupa ungi mudimo. Bu kileshesho, bangi beena Betele ba mu États-Unies babaadi bebatume mu angi ma mbalo bwa kulungula mukandu wibuwa. Na dingi pa mwanda wa bununu sunga ingi myanda, bangi bakunkushi ba bifunda mbebatume bu ba mbala-mashinda ba nsaa yooso. Be na muloo mu mifubo yabo ipya, na Yehowa kwete kwibelela myabi. Su atutekye bwa’shi Yehowa etukwashe na kwitwelela myabi, abitungu twitatshishe bwa kumufubila, kulonga bya kusankila mudimo ooso wabetupa na kwikala na muloo. (Badika Myeele 10:22.) Patukekala mu ndumbulwilo mupya, atukakitshi naminyi su ndumbulwilo a Yehowa etuteka bwa nkashaala mu ingi mbalo? Yaaya nsaa, tatukenyongola bwa mbalo yatudi bashaale sunga bwa mudimo w’abaketupa. Atukekala na lutumbu lwa kwikala mu nsenga ipya.​—Neemi 8:10.

9, 10. (a) Bwakinyi abiketutekye kwikala na lwishinko mu nsenga ipya? (b) Twi kuleesha naminyi’shi twi na lwishinko kubanga binobino?

⁹ Mu nsenga ipya, ingi nsaa abiketutekye bwa kwikala na lwishinko. Bu kileshesho, twi kupusha’shi bangi bantu be na muloo ukata pa mwanda wa bakwabo na bakuuku babo babasanguka. Pangi, abitungu’shi tutengyele kapindji  bwa kumona bakwetu kwabasanguka namu. Su byakitshika byabya, atukasanka pamune na bangi patukyatutengyela su? (Beena-Looma 12:15) Su atulongo bya kwikala na lwishinko bwa kutengyela kulombana kwa matemuki a Yehowa kubanga binobino, abiketukwasha bwa kwikala na lwishinko mu mafuku aafiki.​—Mulungudi 7:8.

¹⁰ Twi balombeene dingi kwilumbuula bwa mu nsenga ipya pa kwikala na lwishinko p’atupete kulumbuluka mu mpushisho eetu a bya binyibinyi bya mu Bible. Tukwete kulonga ino mikanda ipya, na su tatwibapushe kalolo mwanda kampanda atutengyelaa na lwishinko su? Su mbyabya, mu nsenga ipya, abikekala bibofule bwatudya kwikala na lwishinko nsaa yooso ayitupa Yehowa buludiki bwa kulonda.​—Myeele 4:18; Yowano 16:12.

11. Bwakinyi abitungu tulongye bya kufwila bangi lusa kubanga binobino, na bino abiketukwasha naminyi mu nsenga ipya?

¹¹ Ungi mushindo watudi balombeene kwilumbuula bwa mu nsenga ipya nkulonga bya kwifwilena lusa. Mu bipwa kinunu bya Bufumu bwa Kidishitu, akukakidi mafuku bwa’shi bantu bekale bapwidikye. (Bikitshino 24:15) Atukefuleena na kwifwileena lusa? Su tubalongo bya kufwila bangi lusa na kwikala na kipwano munkatshi mwetu kubanga binobino, abiketubofwila bwa nkebikita mu nsenga ipya.—Badika Beena-Kolose 3:12-14.

12. Bwakinyi abitungu twilumbuule kubanga binobino bwa nkashaala mu nsenga ipya?

¹² Mu nsenga ipya, pangi tatukapete’nka bintu byooso byatukumiinaa sunga byatutengyelaa. Abiketutungu kwikala na lutumbu na kusangeela nshalelo ooso atukekala naye. Byabya, abiketutekye kwikala na ngikashi i mumune na ino ikwete kwitulongyesha Yehowa binobino. P’atwe kulonga bya kuleesha yaaya ngikashi binobino, atuleesha’shi nsenga ipya mmwanda w’eyendo kwatudi na tukwete kwilumbuula bwa muwa wa ikalaika. (Beena-Ebreeyi 2:5; 11:1) Atuleesha dingi’shi atukumiina nkashaala mu nsenga ipya amukeekala bantu booso abakookyela Yehowa.

13. Mu nsenga ipya, nkinyi kyatukatuulu pa mbalo ya kumpala mu nshalelo eetu?

¹³ Mu nsenga ipya, atukekala na bintu byooso byatudi nabyo lukalo bwa kusankiila muwa. Kadi muloo wetu ukata aukatuukila ku kipwano kyetu na Yehowa. (Mateo 5:3) Atukekala bepaane mu mudimo wa Yehowa, na atukamufubila na muloo. (Misambo 37:4) Byabya, nsaa yatutuulu Yehowa pa mbalo ya kumpala mu nshalelo eetu kubanga binobino, tukwete kwilumbuula bwa nkashaala mu nsenga ipya.​—Badika Mateo 6:19-21.

14. Bansongwa be kwata biipatshila kinyi mu mudimo wa Yehowa?

¹⁴ Twi kuleesha’shi tukwete kusankila kufubila Yehowa ngofu naminyi? Mushindo wa kwibikita ngwa kwiatshila bipatshila. Su we nsongwa, nangusheena kalolo byokwete kufubisha muwa oobe bwa kufubila Yehowa. We mulombeene kutala mu mikanda yeetu midimo ilekeenelekeene ya nsaa yooso. We kutala kimune kya ku bino bipatshila. * Esambe na baaba bapwe kufubila Yehowa mu mudimo wa nsaa yooso munda mwa bipwa bibungi. Su okwete kufubila Yehowa, okapete malongyesha e na muulo. Byabya byolongo abikakukwasha bwa nkafubila Yehowa mu nsenga ipya.

15. Mbingi bipatshila kinyi byatudi balombeene kwata bwa kufubila Yehowa?

¹⁵ Kwi biipatshila bibungi byatudi balombeene kwata bwa kufubila Yehowa. Bu kileshesho, twi bya kwata kitshibilo kya kulonga mayele apya a mu bulungudi. Sunga kutompa kukimba bya kupusha kalolo mayi a kulonda a mu Bible na byatudi balombeene kwiafubila mu nshalelo eetu. Twi balombeene dingi kulongamisha mbadikilo  eetu a kumpala kwa bantu sunga bya kwela miisambo na kwaluula mu bisangilo. Ki na muulo nkino: kwata biipatshila bwa kutamisha mudimo wa Yehowa, akukukwasha bwa kwikala na katshintshi na olumbuula nshalelo oobe a mu nsenga ipya.

16. Bwakinyi kufubila Yehowa nyi nshalelo mukile buwa?

¹⁶ Patufubisha nsaa yetu bwa kwilumbuula bwa ndumbulwilo mupya a Efile Mukulu, tukwete kukisha nsaa ya kulumbuula nshalelo eetu a ano mafuku? Nya! Kufubila Yehowa nyi nshalelo ebuwa bukile. Tatukwete kumufubila mwanda abetukitshisha pa bukopo sunga bwa kupashiibwa ku mpombo ikata nya. Patudi mu kipwano kibuwa na Yehowa, nshalelo eetu alongama na atunyisha kwikala na muloo. Baadi mwitupangye bwa kwikala na nshalelo ebino. Kwikala na kifulo n’Efile Mukulu na kulonda buludiki bwaye mu nshalelo eetu kwi na muulo kukila ingi myanda yooso. (Badika Misambo 63:1-3.) Twi bya kupusha muloo autuukila mu kulangwila Yehowa n’eshimba dyeetu dyooso. Bangi bantu bamufubile munda mwa bipwa bibungi mbaakule’shi uno nyi nshalelo mukile buwa.​—Misambo 1:1-3; Yeeshaya 58:13, 14.

17. Bwakinyi kwikala na muloo na kukisha kapapi abikekala mu Mpaladiiso?

¹⁷ Mu Mpaladiiso, atukekala na muloo wa kupeta nsaa ya kukita myanda yeetu na ya kwisankisha. Mwanda, Yehowa nyi mwitupangye na lukalo lwa kusangala, na mmwitulee’shi ‘akeekutshisha bi na muuwa byooso.’ (Misambo 145:16; Mulungudi 2:24) Atukuminaa kukisha kapapi na kwikisha, kadi atupete bino bintu nsaa yatutuulu kipwano kyetu na Yehowa pa mbalo ya kumpala. Na mu nsenga ipya amukekala nka byabya. Nyi bwakinyi, abitungu ‘tunkimbe Bufumu bw’Efile Mukulu kumpala’ na kutuula binangu byetu ku myabi yatupete mu kufubila Yehowa.​—Mateo 6:33.

18. Twi kuleesha’shi tukwete kwilumbuula bwa nkashaala mu Mpaladiiso naminyi?

¹⁸ Mu nsenga ipya, nshalelo akekala buwa bukile. Tulesheeyi kubanga binobino’shi atukumiina kwimutwela pa kwilumbuula bwa “muuwa wa binyibinyi.” Tuleesheyi ngikashi ikwete kwitulongyesha Yehowa na tulunguleyi mukandu wibuwa na katshintshi. Twi bya kupeta muloo wa kutuula lulangwilo lwa Yehowa pa mbalo ya kumpala mu nshalelo eetu. Twi bakulupile’shi mu nsenga ipya, Yehowa akalombasha myanda yooso yaadi mulee. Byabya, twikaleyi na nshalelo bu a bantu bapwe kutwela mu nsenga ipya!