1. Twi bashaale mu kipungo ki naminyi?

TWI mu “bipungo biibukopo.” Kubanga mu kipwa kya 1914, kasha “mafuku a ku nfudiilo” abanga, nshalelo mmulwikye mu nsenga byabishekeele dingi. (2 Timotee 3:1-5) Twi balombeene kushinkamisha dingi’shi myanda ibubi ayikatungunuka nka na kwikala kwanka mu nsenga ishima, mwanda butemuki bwa mu Bible abwakula’shi: “Bantu bebubi na ba nsesa mu lukumiino, abayididiila mu bubi.”​—2 Timotee 3:13.

2. Mmyanda kinyi ikwete kusankila bantu bebungi bwa kukisha kapapi? (Tala kifwatulo ki kumbangilo.)

² Bwa kukisha kapapi, bantu bebungi lelo uno bakwete kutala myanda ya buntomboshi sunga i butete na ya malenganyi. Bu kileshesho, ku internet, ku televizion, ma filme, mikanda na ma jurnale aaleesha buntomboshi na myanda ibutete bu ibuwa. Mwikeelo ubaadi bubi kumpala tabeukumiina binobino mu angi ma mbalo mpa na kwi mbulamatadi. Anka, byabya tabileesha’shi Yehowa mmukumiine wawa mwikeelo nya.​—Badika Beena-Looma 1:28-32.

3. Bantu bebungi abamonaa baaba abalondo miiya y’Efile Mukulu naminyi?

³ Mu bipwa lukama, bantu babaadi abatala myanda ya buntomboshi na ibutete bwa kukisha kapapi. Anka balongi ba Yesu tababaadi  abebikitshi mwanda babaadi na nshalelo mwipusheene na miiya y’Efile Mukulu. Bino bibaadi ‘bikaanyishe’ bantu babaadi bebeefunyishe. Nkinyi kibaadi kikitshikye kunyima? Bantu babaadi bakwatshile beena Kidishitu nsungu abo nkubanga kwibakyengyesha. (1 Mpyeele 4:4) Lelo uno, bantu bebungi abamonaa baaba be na nshalelo mwipushene na miiya y’Efile Mukulu bu bapatakane. Nyi bwakinyi, Bible etudimusha’shi baaba booso abalondo kileshesho kya Kidishitu Yesu “abakabingwabingwa.”​—2 Timotee 3:12, Kilombeno kipya 2014.

4. Bwakinyi t’abitungu kwikala na kifulo bwa ino nsenga?

⁴ Su atukyebe kukita abikumiina Efile Mukulu, t’abitungu kwikala na kifulo bwa “nsenga, sunga bintu bi pano pa nsenga.” (Badika 1 Yowano 2:15, 16.) Satana, “efile a pano pa nsenga” nyi kwete kwiyikunkusha. Kwete kutumika na bipwilo, mbulamatadi, myanda ya busunga na myanda ya ku ma televizion bwa kulubisha bantu. (2 Beena-Kodinto 4:4; 1 Yowano 5:19) Atusuuku kwikala mu kipwano na ba kuuku bebubi bu byatushabakumiina kulubishibwa na uno ndumbulwilo. Bible etudimusha patooka’shi: “Tanwidibanga: Ba kuuku beebubi abalwishaa bwikashi bwibuwa.”​—1 Beena-Kodinto 15:33.

5, 6. Mbantu kinyi batushii balombeene kwikala nabo mu kipwano, na bwakinyi?

⁵ Bwatudya kutungunuka na kulama kipwano kibuwa na Yehowa, abitungu tusuukye kwikala mu kipwano na bantu booso abikitshi bibubi. Bino mbitale na bantu abamba’shi abalangwila Yehowa kadi kushi kumukookyela. Su muntu e byabya bakitshi mulwisho kushi kwilanga kwishimba, atwimika kipwano kyetu naaye.​—Beena-Looma 16:17, 18.

⁶ Misango ibungi bantu abakumiinaa kusankisha ba kuuku baabo bwabadya kwibakumiina. Byabya, su twi mu kipwano na baaba bash’abakookyela Efile Mukulu, be kwitusukuma mu kwibambula. Bu kileshesho, su twi mu kipwano na bantu be na mwikeelo wa kutambuka lusandji, twi bya kwambula mwikeelo wabo. Bino mbipwe kufwila bangi bakwetu balume na bakashi. Na baaba bashibaadi belangye ku mashimba babaadi batushibwe mu kakongye. (1 Beena-Kodinto 5:11-13) Su bakutwa kwilanga, mbalombeene kufika’nka bu bantu babadi baleeshe kwi Mpyeele.​—Badika 2 Mpyeele 2:20-22.

7. Mba nanyi batudi balombeene kusangula bu ba kuuku?

⁷ Sunga byekala’shi atukumiina kwikala na kalolo kwi muntu ooso, t’abitungu twekala mu bukuuku na baaba bash’abakookyela Efile Mukulu nya. Mbilombeene kwikala bibubi bwa Temwe a Yehowa kwiyileena na muntu shabandile kwikala mufubi a Yehowa mubatshishibwe. Kukuminyibwa n’Efile Mukulu kwi na muulo kukila kwikala mu kipwano na muntu shii mumufule. Abitungu twikale mu kipwano nka penda na baaba abakitshi akikyebe Efile Mukulu. Yesu akula’shi: “Ooso akitshi akikyebe Efile Mukulu, yaawa ngi mukwetu-mulume, mukwetu-mukashi, na nyinaami.”​—Maako 3:35.

8. Ba kuuku bebubi babalwishiishe mwikeelo wa beena Isaleele a kala naminyi?

⁸ Ba kuuku bebubi abatushaa nka masaku. Twate kileshesho, bwa mwanda ubaadi ufikile beena Isaleele. Kumpala kwabadya kutwela mu Nsenga ya Mulayilo, Yehowa baadi mwibadimushe pabitale bantu babaadi mwanka. Bambile’shi: ‘Tolangwilanga b’efile baabo, sunga kwibafubila; tokitanga byaabakitaa kwabo, mwanda wekala na kya kuponesha bano b’efile na kwibatuuta. Nukanfubile nk’ami Yehowa Efile Mukulu eenu.’ (Efilu 23:24, 25) Anka, beena Isaleele bebungi tababaadi balonde malango a Efile Mukulu, abo nkukutwa kumukookyela. (Misambo 106:35-39) Nkinyi kibaadi kikitshikye? Kunyima Yehowa baadi musumbusheene mwilo wa Isaleele aye nkusangula kakongye ka beena Kidishitu bu mwilo waye.​—Mateo 23:38; Bikitshino 2:1-4.

9. Bwakinyi bintu byabakwete kupalakasha mu uno ndumbulwilo bi masaku?

⁹ Bintu bibungi byabakwete kuleesha ku ma televizion, ku Internet na mu mikanda mbilombeene kulwisha kipwano kyetu na Yehowa. Bino bintu ta mbebikite bwa kukwasha beena Kidishitu bwa kwikala na lukumiino mwi Yehowa na mu milayilo yaaye nya. Anka, Abikankamika bantu bwa kukulupila mu ndumbulwilo a Satana ebubi. Nyi bwakinyi abitungu tudimukye ngofu pa kupela kubandjila, kubadika, sunga kuteemesha kintu kyooso kii bya kwitutuma mu kwikala na “lwabi lwa bintu bya pa nsenga.”​—Tite 2:12.

10. Nkinyi akikafwila ino myanda i mu ndumbulwilo a Satana?

¹⁰ Kubashaala mafuku apeela bwa’shi babutule ndumbulwilo mulwile a Satana na bintu byaye bibubi. Bible akula’shi: “Bya pano abikidi, abyo na malaka aabyo; anka yawa akitshi akikyebe Efile Mukulu akeekala na muwa bwa looso.” (1 Yowano 2:17) Mu mushindo umune, mufundji a misambo bayimbile’shi: “Babi abebatuutu.” Akupu bambile’shi: “Beeyishe namu abapyana nsenga, abasangeela mu butaale bw’eyendo.” Bwa mafuku bungi kinyi? “Balulame abapete eumbo, abeemushaala looso.”​—Misambo 37:9, 11, 29.

11. Efile Mukulu etukwashaa naminyi bwa kushaala na lulamato kwadi?

¹¹ Mu kwilekeena na ndumbulwilo a Satana, ndumbulwilo a Yehowa etukwasha bwa kwikala na nshalelo aketupetesha muwa wa looso. Yesu batekyele Yehowa bino: “Muuwa wa looso naamu ngi’shi bantu bakuwukye, obe buupenka Efile a biinyibiinyi, na yaawa abotumine Yesu Kidishitu.” (Yowano 17:3) Yehowa atumika na ndumbulwilo aaye bwa kwitupa bintu byooso byatudi nabyo lukalo bwa kumuuka kalolo. Bu kileshesho, twi na ma jurnale, ma broshire, mikanda, ma video, na site a Internet abitukwasha bwa kutungunuka na kufubila Efile Mukulu. Ndumbulwilo aaye kwete kulumbuula dingi bisangilo abikitshika mu tukongye tukile pa 110 000 twi mu nsenga ishima. Myanda ya mu Bible yatulongo mu bino bisangilo na ku bikongeno bikata ayinyingisha lukumiino lwetu mwi Yehowa na mu milayilo yaaye.​—Beena-Ebreeyi 10:24, 25.

12. Patuula akileesha mwiya wa mu Bible wa kwiyibakishene “nka penda mu Mwanana.”

¹² Abitungu beena Kidishitu abakumiina kwibakila bataluule kalolo muntu abakumiina kwiyibakishena naaye. Eyi dy’Efile Mukulu aditudimusha’shi: “Tanwianyînanga mu kilombêno na bashi bêna kukumîna. A kukôkyela kw’Efile Mukulu nkulombêne kwekala mulongo na kumubindwila su? Mufito n’etâta mbilombêne kupwana su?” (2 Beena-Kodinto 6:14, EEM) Bible alungula bafubi b’Efile Mukulu bwabadya kwiyibakishena “nka penda mu Mwanana,” nkwamba’shi, kwiyibakishena nka penda na muntu mwilambule na mubatshishibwe na aneemeka miiya ya Yehowa. (1 Beena-Kodinto 7:39, NWT) Su bweyibakishena na muntu mufule Yehowa, wekala na mwina bulunda akukwasha bwa kwikala na lulamato kwi Efile Mukulu.

13. Mmwiya kinyi utale eyibakishi ubabapeele beena Isaleele kwi Efile Mululu?

¹³ Yehowa auku bintu bilombeene kwitwikasha bibuwa, na mwiya waye wa kwiyibakishena “nka penda mu Mwanana” ta ngupya nya. Bu kileshesho, banda kutala bibaadi Yehowa mulungule beena Isaleele pabitale bantu bashibaadi abamulangwila. Ku bukwashi bwa Moyiise, bebalungwile’shi: “Tanwiyibakishenanga nabo, topanga mwan’abo mulume mwan’obe mukashi, twatshilanga mwan’obe mulume mwan’abo mukashi, mwanda byabya mbilombeene kukutshisha mwan’obe mulume kundonda, na mmulombeene kufubila bangi b’efile; nsungu ya Yehowa ngilombeene kwinutembela kaalo, dingi mmulombeene kwinutuuta nka paapa.”​—Miiya Ikituulwe 7:3, 4.

14, 15. Nkinyi kibaadi kikitshikile Salomone pabaadi mukutwe kufubila mwiya wa Yehowa?

 ¹⁴ Mafuku apeela kunyima kwa Salomone kwikala nfumu a Isaleele, batekyele kinangu, na Yehowa nkwaluula luteko lwaye. Nyi bwakinyi Salomone baadi mwende nkumo bu nfumu sha binangu a mwilo ukata. Abimweneka’shi, ndala-mumba a ku Sheba baadi mukaanye bikile pa mwanda wa binangu bya Salomone aye nkwamba’shi: “Kinangu kyoobe na kipaso akikuyîla myanda kumpala mbikile yaya nkumo yobe yooso inaadi mupushe.” (1 Banfumu 10:7, EEM) Kadi kileshesho kya Salomone akitulongyesha dingi kilombeene kukitshikila muntu abepuula mwiya w’Efile Mukulu na kwiyibakishena na muntu sh’afubila Yehowa.​—Mulungudi 4:13.

¹⁵ Sunga mbibaadi Yehowa mumwelele myabi, Salomone bakutshilwe kukookyela mwiya w’Efile Mukulu. Salomone “bekeele mufule bakashi beenyi” bashibaadi abafubila Yehowa, na bekeele na bakashi 700 na makupi 300. Nkinyi kibaadi kimufikile? Pabaadi Salomone taadi mununu, bakashi baaye “babamulubiishe, atadiila kwi bangi b’efile, . . . Salomone bakitshiine bubi ku meeso a Yehowa.” (1 Banfumu 11:1-6) Ba kuuku bebubi babaadi bamutakule mu kukita bibubi, aye nkukutwa kushaala na lulamato kwi Yehowa. Su uno mwanda ubaadi ukitshikile Salomone, ngulombeene kwitukitshikila natwe lelo uno. Nyi bwakinyi tatukumaa su nkwela binangu bya kwiyibakishena na muntu shii mufule Yehowa!

16. Elango kinyi adituusha Bible bwa baaba beyibakisheene na bashii-beena kukumiina?

¹⁶ Nkinyi kilombeene kukitshika su muntu mwiyibakisheene na shii mwina kukumiina afika mulangwidi a Yehowa? Bible akula’shi: “Anwe bakashi naamu, kookyelayi balume beenu bwa’shi, sunga bangi balume baatuna kukumiina eyi dy’Efile Mukulu, bakumiine pa kumona ngikashi ya bakashi baabo.” (1 Mpyeele 3:1) Byabya, ano mayi ngalombeene kukwasha mpa na mulume su  mukashi aaye talangwila Yehowa. Eyi dy’Efile Mukulu aditulungula’shi: Ikala mulume sunga mukashi ebuwa, na ikala otumikila miiya y’Efile Mukulu itale eyibakishi. Kunyima, apakamono mwina dibaka mwikeelo wibuwa koodi, n’aye namu mmulombeene kukumiina kufubila Yehowa. Beena mabaka bebungi mbapete bukwashi pa kutumikila ano malango.

17, 18. Nkinyi kibaadi kikwashe Nowa bwa kupanda ku Mpeshi a kabutu? Nkinyi kibakwashishe Beena Kidishitu ba bipwa lukama bwa kupanda ku kabutu ka Yeelusaleme?

¹⁷ Ba kuuku bebubi mbalombeene kwitutakula mu kukutwa kukookyela Yehowa, kadi ba kuuku bebuwa be kwitukwasha bwatudya kwikala na lulamato kwadi. Nowa nkileshesho kibuwa kwatudi. Baadi mushaale mu mafuku abaadi ‘bubi bwa bantu abwende na kufiimanga pa nsenga’ na “ngub’oso, mashimba aabo abaadi anemeene’nka ku milwisho.” (Kibangilo 6:5) Bantu babaadi na mwikeelo wibubi nyi bwakinyi Yehowa baatshile kitshibilo kya kwibabutula. Anka Nowa baadi mwilekeene nabo. Bible amwitanyina bu “muntu mululame” baadi “alondo mashind’Efile Mukulu.”​—Kibangilo 6:7-9.

¹⁸ Nowa tabaadi mu kipwano na bantu bashii bafule Yehowa nya. Aye na kifuko kyaye babaadi bepaane mu kukita bwato, na dingi “balambukishanga bantu mwanda wa bululame.” (2 Mpyeele 2:5) Nowa, mukashi’aye, bana baye basatu na bakashi baabo babaadi mu kipwano kibuwa. Abaadi bepaane mu kukita myanda ayisankisha Efile Mukulu, na abaadi bapande ku Mpeshi a kabutu. Ooso a kwatudi lelo uno, mmutukiile ku baaba bantu, nyi bwakinyi twi balombeene kwikala na lutumbu kwi Nowa na kifuko kyaye babaadi bakookyele Yehowa na kupeela kwikala mu kipwano na bantu babi. Mu mushindo umune, beena Kidishitu ba mu bipwa lukama t’ababaadi mu kipwano na bantu bashii bafule Yehowa. Abaadi bamukookyele na abaadi bapande pabababutwile Yeelusaleme mu kipwa kya 70 mu bipungo byetu (B.B).​—Luuka 21:20-22.

19. Nkinyi akitukwasha bwa kushaala na lulamato kwi Yehowa?

¹⁹ Nka bu Nowa na kifuko kyaye, na beene Kidishitu ba mu bipwa lukama, n’atwe namu ta twibalombeene kwikala mu kipwano na muntu shii mufule Yehowa. Twi na midiyo ya bakwetu balume na bakashi be na lulamato batudi balombeene kwikwateena nabo bukuuku. Balombeene kwitukwasha bwa kushaala “banyingye mu lukumiino” mu ano mafuku ebukopo. (1 Beena-Kodinto 16:13; Myeele 13:20) Banda kunangusheena muloo watukekala nao kunyima kwa kupanda ku nfudiilo a uno ndumbulwilo ebubi na kushaala mu ndumbulwilo mupya a Yehowa! Bi na muulo bwa’shi tulekye ba kuuku bebubi kubanga binobino!