1, 2. Bafubi ba Yehowa abatengyela kinyi?

BAFUBI ba Yehowa babaadi batengyele na lwishinko looso kulombana kwa matemuki. Bu kileshesho, Yeelemiya baadi mutengyele kubutudiibwa kwa Yuuda kwi beena Babilone, bino bibaadi bikitshikye mu kipwa kya 607 kumpala kwa bipungo byetu (K.B.B.) (Yeelemiya 25:8-11) Yeeshaya baadi mutemukye’shi Yehowa baadi na kya kwalusha beena Yuuda babaadi mu bupika mu kibundji kyabo p’aye kwakula’shi: “Bee na mwabi mbano booso abakulupila mwadi.” (Yeeshaya 30:18) Mika baadi mutengyele’shi mulayilo wa Yehowa ubaadi na kya kulombana p’aye kwakula’shi: “Ank’ami natengyela Yehowa.” (Mika 7:7) Munda mwa bipwa bibungi, bafubi ba Yehowa babaadi bashinkamishe’shi Mesiya sunga Kidishitu afiki.​Luuka 3:15; 1 Mpyeele 1:10-12. *

² N’atwe namu lelo uno, tukwete kutengyela kulombana kwa matemuki atale Bufumu bwa Yehowa. Bu byadi Nfumu a buno Bufumu, Yesu akyebe kupaasha binobino bafubi b’Efile Mukulu ku uno ndumbulwilo ebubi. Akabutula bantu babi na kupudisha makyenga ooso. (1 Yowano 5:19) Byabya abitungu tutungunukye na kutengyela kufika kw’efuku dya Yehowa nsaa yooso na kukita mwetu mooso bwa kwikala belumbuule.

3. Su tubapu kutengyela kufika kwa nfudiilo munda mwa mafuku ebungi, ndukonko kinyi lwatudi bya kwiyipusha?

 ³ Tukwete kutengyela n’eshimba dyooso apakakitshika kikyebe ky’eshimba dy’Efile Mukulu pa nsenga. (Mateo 6:10) Sunga byekala’shi takudi mafuku ebungi kasha twabanga kutengyela kufika kwa nfudiilo, twi bya kwiyipusha’shi: ‘Bwakinyi abitungu tutungunukye na kutengyela nfudiilo itayidi peepi?’

4. Bwakinyi abitungu tushaale ‘babuule meeso’?

⁴ Yesu baadi mulungule balondji baaye’shi: “Buulaayi meeso” na “shalaayi bapasukye.” Nyi bwakinyi bi na muulo bwa’shi tutungunukye na kutengyela nfudiilo itayidi peepi. (Mateo 24:42; Luuka 21:34-36) Na dingi, ndumbulwilo a Yehowa kwete kwitutentekyesha bwa ‘kutengyela na kukosomosha kufika kw’efuku dya Yehowa’ na kwikala batuule binangu ku mulayilo wa Yehowa wa nsenga ipya.​—Badika 2 Mpyeele 3:11-13.

5. Nkangi kabingilo kinyi aketutakula bwa kushaala batengyele efuku dya Yehowa?

⁵ Bu bibaadi balongi ba Yesu ba mu bipwa lukama na lukalo lwa kutengyela kufika kw’efuku dya Yehowa, lelo uno, bi na muulo ukata bwa’shi twiditengyele. Bwakinyi? Mwanda kitundwilo kibatushishe Yesu akileesha’shi mmubangye kumunana bu Nfumu a Bufumu bw’Efile Mukulu mu kipwa kya 1914 na’shi twi mu mafuku a nfudiilo, sunga ku “nfudiilo aa byaa-pano.” Bu kileshesho, nka bu bibatemukile Yesu, myanda ya mu nsenga ikwete kunyiisha kulwila na mukandu wibuwa wa Bufumu ukwete kulungulwa mu nsenga ishima. (Mateo 24:3, 7-14) Yesu tabaadi muleeshe bula bwa kipungo kya mafuku a ku nfudiilo nya, nyi bwakinyi abitungu twilumbuule mwanda tatuuku nsaa ayifiki nfudiilo.

6. Atuuku naminyi’shi peepi na nfudiilo myanda ayikanyiisha kulwila?

⁶ “Nfudiilo aa byaa-pano” ayileesha kipungo ki kumpala akikanyiisha kulwila myanda mu nsenga su? Bible akula’shi bantu abakanyiisha kulwila “mu mafuku a nfudiilo.” (2 Timotee 3:1, 13; Mateo 24:21; Bifumbulwe 12:12) Byabya, sunga myanda ngilwile ngofu kano kabidi, atuuku’shi ayiyididiila nka na kulwila.

7. Mukanda wa Mateo 24:37-39 awitulongyesha kinyi pabitale abikekala nshalelo mu mafuku a ku nfundiilo?

⁷ Bangi bantu abanangusheena’shi mu “mpombo ikata,” amukekala ngoshi mu maumbo ooso na bantu bebungi abakekala na mikumbo sunga kwikala na nsala. (Bifumbulwe 7:14) Anka su byakitshika byabya, mbilombeene kumweneka kwi muntu ooso’shi butemuki bwa mu Bible bukwete kulombana. Mbilombeene kumweneka patooka mpa na kwi bantu bash’abakuminaa myanda ayakula Bible. Anka Yesu bambile’shi mu mafuku a ku nfudiilo, bantu bebungi ‘tabakabasuka.’ Abakekala mu nshalelo aabo a mafuku ooso na abakabasamuka nsaa ayifiki efuku dya Yehowa. (Badika Mateo 24:37-39.) Abipushika kalolo’shi tabitungu tutengyele’shi myanda ya mu nsenga ayilwila ngofu kumpala kwa’shi “mpombo ikata” ifikye mwanda byabya bi kwikala bu kukitshisha bantu pa bukopo bwa kuuka’shi nfudiilo tayidi peepi.​—Luuka 17:20; 2 Mpyeele 3:3, 4.

8. Bu byatudi badimushibwe na kitundwilo kya Yesu, twi bashinkamishe kinyi?

⁸ Yesu baadi mutuushe kitundwilo bwa kudimusha balongi baaye pabitale kipungo kyabakekala. Balongi ba Yesu babaadi bapwe kudimushibwa. (Mateo 24:27, 42) Kubanga mu kipwa kya 1914, bipindji bilekeenelekeene bya kitundwilo kya Yesu bibabangile kulombana. Twi bashinkamishe’shi twi mu mafuku a ku nfudiilo, “nfudiilo aa byaa-pano.” Yehowa mmupwe kwata kitshibilo kya nsaa y’akabutula ndumbulwilo mubi a Satana.

9. Bwakinyi abitungu tutungunukye na kutengyela’shi nfudiilo ayifiki binobino?

⁹ Bwakinyi abitungu tutungunukye na kutengyela’shi nfudiilo ayifiki binobino? Mwanda  tukwete kukookyela Yesu Kidishitu. Akupu, tukwete kumona kalolo’shi kitundwilo kibaatushishe Yesu pabitale mafuku a nfudiilo kikwete kulombana. Tukwete kukumina’shi nfudiilo ibefubwila peepi, kushi penda mwanda wa’shi, atukuminaa bintu byoso byatupusha, kadi, mwanda twi bashinkamishe’shi matemuki a mu Bible akwete kulombana. Abitungu tushaale badimukye na belumbuule mwanda nfudiilo tayidi peepi.

10, 11. (a) Bwakinyi Yesu baadi mulungule balondji baaye bwabadya ‘kubuula meeso?’ (b) Yesu balungwile balondji baaye bwa kukita kinyi su babamono nfudilo bu ibayisha? (Tala kifwatulo ki ku mbangilo.)

¹⁰ Bebungi ba kwatudi abaapu kufubila Yehowa na lulamato na kutengyela munda mwa bipwa bibungi kufika kwa efuku dyaye. Abitungu tuyididiile na kutengyela’shi dyadya efuku adifiki binobino sunga tubaapu kwiditengyela munda mwa mafuku ebungi. Abintungu twikale belumbuule bwa nsaa ayikafiki Yesu bwa kubutula ndumbulwilo a Satana. Tutentekyesheyi bibaadi Yesu mulungule balongi baaye’shi: ‘Dimukaayi, shaalayi babuule meeso, mwanda tanuuku’shi nguba kinyi akumbana kyakya kipungo. Bi bu muntu bayiile mu lwendo: balekyele nshibo yaaye, apa bafubi baaye matalwa, ooso muntu ku mufubo waye; baadi mutumine mulami a kiibi eyi dya kwikala mupasukye. Byabya buulayi meeso mwanda tanuuku’shi nguba kinyi akafiki nfumu a nshibo; kyolwa su munkatshi a bufuku; apasama etombole su nnamashika. Kutshiina . . . tala afika kushi kwinuukisha tala enusangana mu tulo. Kyannenulungula, nekilungula booso: buulayi meeso.’​—Maako 13:33-37.

¹¹ Pabaadi balongi ba Yesu bapushe’shi babanga kumunana mu kipwa kya 1914, babaadi bashinkamishe’shi nfudiilo ayikafiki nsaa yabashabauku. Babaadi belumbuule bwayo p’abo kwipaana ngofu mu mudimo wa bulungudi. Yesu bambile’shi mmulombeene kufika kunyima ‘apasama etombole sunga nnamashika.’ Su dibakalombana, balongi baaye babaadi na kya kukita kinyi? Yesu akula dingi’shi: “Buulayi meeso.” Sunga byekala’shi tubatengyela munda mwa mafuku ebungi, tabileesha’shi nfudiilo ikii kula n’ashi tayifiki patukii na muwa nya.

12. Abakuke baadi mwipushe Yehowa naminyi, n’Efile Mukulu bamulungwile naminyi?

¹² Mutemuki Abakuke baadi mutengyele na lwishinko looso pabaadi alungula mukandu wa kabutu ka Yeelusaleme. Bangi batemuki babaadi balungule wawa mukandu munda mwa bipwa bibungi kumpala kwaye. Abakuke baadi mumone bibaadi bikaamine buntomboshi na kukutwa kwa kululama kukila byabibaadi kumpala. Baadi mutekye Yehowa bwa kumukwasha amba’shi: “Obe Yehowa, kasha nabanga kwidila bukwashi kodi, a okampushîsha pa kipindji kinyi?” Sunga byekala’shi Yehowa tabaadi mmulungule nsaa ayikafiki nfundiilo, bamulayile’shi: “Abikalombana kushi kutentûlwa!” Yehowa balungwile  dingi Abakuke’shi: Tungunuka na ‘kutengyela.’​—Badika Abakuke 1:1-4; 2:3.

13. Abakuke baadi mulombeene kwela binangu kinyi, na bwakinyi bibaadya kumutushisha masaku?

¹³ Banda kunangusheena, su Abakuke baadi mukookye kutengyela kufika kwa nfudiilo p’aye kwakula’shi: ‘Naapu kutengyela kabutu ka Yeelusaleme munda mwa bipwa bibungi. Nfudiilo ikii kula. Ntshi na lukalo dingi lwa kwiyilungula nya. Bangi namu be kukita uno mudimo.’ Nkinyi kibaadya kumufwila? Baadya kushimisha kipwano kyaye na Yehowa. Na su tabaadi mwilumbuule pabafikile nfudiilo, badya kushimisha muwa waye.

14. Bwakinyi atukeekala na lutumbu bwa bikwete kwitudimusha Yehowa bwa kushaala batengyele nfudiilo?

¹⁴ Banda kwimona bu’be e mu nsenga ipya. Myanda yooso ibaabadi batemukye pabitale nfudiilo ibalombana nka bibaadi Yehowa mulee. Lukulupilo loobe mwi Yehowa lubanyingi kukila kumpala, boshinkamisha dingi’shi akalombasha bintu byooso bibashaala byadi mulee. (Badika Yooshwa 23:14.) Wekala na lutumbu lukata kwi Yehowa bwa kufwisha nfudiilo pa nsaa ilombane na bwa kudimusha bafubi baaye bwabadya kutungunuka na kwiyitengyela.​—Bikitshino 1:7; 1 Mpyeele 4:7.

15, 16. Bwakinyi abitungu tukite kyooso akitungu mu mudimo wa bulungudi mu ano mafuku a ku nfudiilo?

¹⁵ Ndumbulwilo a Yehowa akatungunuka na kwitutentekyesha bwatudya kwipaana mu kufubila Yehowa. Kwakwa kudimushibwa akwitukwasha kushi penda bwa kwikala bepaane mu mudimo w’Efile Mukulu nya, kadi bwa kumona kalolo’shi abitungu kulungula mukandu wetu bukidibukidi. Twi bashinkamishe’shi kitundwilo kibaatushishe Yesu kikwete kulombana na’shi nfudiilo ayifiki binobino. Nyi bwakinyi, tukwete kutuula Yehowa pa mbalo ya kumpala mu muwa wetu na kutungunuka na kulungula mukandu wibuwa wa Bufumu.​—Mateo 6:33; Maako 13:10.

¹⁶ Nsaa yatulambukisha bangi mukandu wibuwa, atwibakwasha bwabadya kupanda ku kabutu ka uno ndumbulwilo a Satana akafiki binobino. Mu kipwa kya 1945 kubaadi kukitshikye masaku pabaadi mashuwa a Wilhelm Gustloff eyine mu meema. Bantu binunu babaadi bafwe. Ungi mukwetu mukashi na mulum’aye babaadi  bapande ku aa masaku. Yawa mukwetu mukashi akula’shi nsaa ibaadi mashuwa aeyinyi, ungi mwana mukashi baadi adidi’shi: “A kibuta kyande! A kibuta kyande! Bikano byande baabo! Bikano byande byooso bibashaala kumpala. Nashimisha bintu byande byooso!” Kadi bangi beena lwendo babaamwene’shi mwanda wi na muulo ngwa kukimba bya kupaasha myuwa ya bantu. Mu mushindo umune lelo uno. Myuwa ya bantu i mu masaku. Nka bibaadi baaba beena lwendo, nyi bi mudimo wetu wa bulungudi autungu kulungulwa bukidibukidi. Abitungu tukite mwetu mooso bwa kukwasha bantu bwabadya kupanda ku nfudiilo a uno ndumbulwilo.

17. Bwakinyi twi bya kukumina’shi nfudiilo ayifiki binobino?

¹⁷ Twi balombeene kumona’shi butemuki bwa mu Bible bukwete kulombana na’shi nfundiilo ibefubwila peepi. Tukwete kutengyela “nsengwa ekumi” na “nyema” p’ayikashikwa bipwilo bya madimi, Babilone mukata. (Bifumbulwe 17:16) Tatukulupilanga’shi kukii mafuku ebungi bwa’shi ino myanda ilombane. Na dingi, tatulubanga’shi Efile mukulu ‘akatuulu mu mashimba aabo’ binangu bya kubutula bipwilo bya madimi na bino abikitshika bukidibukidi na mu nsaa ipeela! (Bifumbulwe 17:17, Kilombeno kipya 2014) Nfudiilo a ndumbulwilo mubi a Satana taadi peepi. Byabya abitungu tutumikile kuno kudimusha kwa Yesu: “Ikalayi beelame, tala mashimba eenu aneemeena ku kukwatshika kwa malofu, ku bukitekite na ku twanda-twanda twa pano pa nsenga bwa’shi tala dyaady’efuku dyakeenupulukila kushii’nwe kuuka bu bukondja.” (Luuka 21:34, 35; Bifumbulwe 16:15) Tushaaleyi badimukye na bepaane mu mufubo wa Yehowa, bashinkamishe’shi: ‘Akafiki mu kukwasha baaba abasangêlâ kumukokyela.’​—Yeeshaya 64:4, EEM.

18. Ndukonko kinyi lwatukapete lwaluulo mu mwisambo aulondo?

¹⁸ Nsaa yatukwete kutengyela, abitungu tutumikile dino elango dya mutumiibwa Yuude bambile’shi: “Anwe bakuuku bande, nyingilayi mu lukumiino lwenu lupwidikye; tekayi mwishina dya kikudi kiselele. Kankameenayi mu kifulo ky’Efile Mukulu, nwikale batengyele lusa lwa Nfumwetu Yesu Kidishitu bwa kutambula muwa wa ikalaika.” (Yuude 20, 21) Byabya, mmushindo kinyi watudi balombeene kuleesha’shi tukwete kutengyela ndumbulwilo mupya a Efile Mukulu taadi peepi na’shi tukwete kumumona mu binangu? Atukyebe kwisambila uno mwanda mu mwisambo aulondo.