1, 2. Abitungu mwina Kidishitu ooso ekale na keepatshila kinyi? Tuusha kileshesho.

NKINYI akikimbaa mukashi sha nshibo nsaa yasangula bikuba bikome mu kisalwe? Tasangulaa bikuba mwanda mbitame ngofu na bi muulo wikye nya. Anka, akimbaa byabya bikuba bi n’eshiko dibuwa, bikome, na bipwe kumonga. Akumiinaa bikuba bikome, kwamba’shi bimongye.

² Kunyima kwa muntu kulonga pabitale Yehowa na kwata kitshibilo kya kubatshishibwa, kipwano kyaaye n’Efile Mukulu akitungunukaa na kutama. Keepatshila kaaye nka kufika mwina Kidishitu munyingye. Kuno kunyinga takuleesha kwikala na bipwa bibungi nya. Akuleesha kutama mu kikudi, kwamba’shi kwikala na kipwano kibukopo na Yehowa. Mpoolo mutumiibwa baadi mulungule beena Kidishitu ba mu Efeeze bwabadya kwikala bantu banyingye. Baadi mwibakankamikye bwa kwikala mu buumune mu lukumiino na kutungunuka na kulonga pabitale Yesu bwabadya kufika “bantu bakulu,  muyiile bukata bwa Kidishitu mu kupwidika kwaaye.”​—Beena-Efeeze 4:13.

3. Kakongye ka mu Efeeze ke kwikala mumune na mwilo wa Yehowa wa lelo mushindo kinyi?

³ Kakongye ka beena-Efeeze kabaadi kapwe kwikala kwanka munda mwa bipwa pabaadi Mpoolo mwibafundile uno mukanda. Bebungi mu kaaka kakongye babaadi bapwe kukita mafuku ebungi bu beena Kidishitu banyingye. Anka, bangi babaadi na lukalo lwa kunyiisha kutamisha kipwano kyaabo na Yehowa. Mu mushindo umune lelo uno, bakwetu bebungi mbafubile Yehowa munda mwa mafuku ebungi na mbafikye beena Kidishitu banyingye. Anka, bangi mu tukongye tababandile kunyinga nya. Bu kileshesho, mu bantu binunu bakwete kubatshishibwa ku kipwa kyooso, kwi bangi bakii’nka na lukalo lwa kunyinga mu kikudi. Kadi obe naamu?​—Beena-Kolose 2:6, 7.

4, 5. Beena Kidishitu banyingye mbelekeene naminyi? Be na kinyi ki mumune? (Tala kifwatulo ki kumbangilo.)

⁴ Nsaa yotala bikuba bimongye mu kisalwe, omono’shi byooso tabii’nka mumune nya. Anka, bi na bingi bintu bi mumune abileesha’shi mbimongye. Nyi bi beena Kidishitu banyingye. Ta be’nka mumune nya. Abatuukila mu maumbo elekeene na mbakule mu nshalelo ilekeene. Be na bipwa bilekeene, be na myanda ilekeene yabakuminaa na yabashabakuminaa. Anka, beena Kidishitu booso banyingye be na ngikashi kampanda i mumune ayileesha’shi mbanyingye. Ngikashi kinyi?

⁵ Mwina Kidishitu munyingye ambulaa Yesu na “kulonda mu matabula ê.” (1 Mpyeele 2:21, EEM) Yesu bambile’shi bi na muulo ukata bwa’shi muntu afule Yehowa n’eshimba dyaye dyooso, muuwa waaye, binangu byaaye na kufula muntu naaye bu’ye nabeene. (Mateo 22:37-39) Mwina Kidishitu munyingye etatshishaa bwa kulonda dino elango. Mu nshalelo aaye aleesha’shi kipwano kyaaye na Yehowa na kifulo bwa bangi bi na muulo ukata kwadi.

6, 7. (a) Ingi ngikashi kinyi yatudi balombeene kutundula mwina Kidishitu munyingye? (b) Nkonko kinyi yatudi balombeene kwiyela?

⁶ Kifulo nyi nkimune kya ku ngikashi ayileeshaa mwina Kidishitu munyingye. (Beena-Galate 5:22, 23) Na dingi e na kupopeela, butontshi bwa mbidi, na lwishinko. Ino ngikashi ngilombeene kumukwasha bwa kunyingiila nkalakasho kushii kwinyongola bikilekile na kukambila myanda ayimwinyongosha kushii kushimisha lukulupilo. Mu kwilongyela kwaaye, mwina Kidishitu munyingye atungunukaa na kukimba mayi a kulonda a mu Bible alombeene kumukwasha bwa kushinguula kibuwa na kibubi. Kunyima, nsaa yafubisha kondo kaaye k’eshimba kalongyeshiibwe na Bible, amono bya kwata bitshibilo bya kinangu. Mwina Kidishitu munyingye e na kwiyisha, byabya akumiina’shi bukunkushi na miiya ya Yehowa ibuwa kukila yaaye. * Alungulaa mukandu wibuwa na katshintshi na kukita kyooso kyadi mulombeene kukita bwa kukwasha kakongye bwa’shi keekale mu buumune.

⁷ Sunga tubaapu kukita mafuku ebungi mu mufubo wa Yehowa, ooso a kwatudi mmulombeene kwiyipusha’shi: ‘Kwi myanda yandi mukumbeene kushintuula bwa kunyiisha kwambula Yesu? Kwi mbalo yandi mulombeene kulumbuula?’

8. Nkinyi akileesha’shi Yesu baadi auku na kupusha Bifundwe kalolo?

⁸ Yesu Kidishitu baadi auku na kupusha Bifundwe kalolo. Sunga pabaadi na bipwa 12, baadi afubisha Bifundwe pabaadi esamba na balambukishi mu tempelo. “Booso babaadi abamuteemesha babaadi abakaanya bwa kinangu kyaaye na myaluulo ibatuushanga.” (Luuka 2:46, 47) Kunyima pabaadi alungula mukandu wibuwa, baadi afubisha Eyi dy’Efile Mukulu kalolo bwa  kuuminyisha beeshikwanyi naaye.​—Mateo 22:41-46.

9. (a) Abitungu mwina Kidishitu munyingye ekale na programe kinyi a kwilongyela? (b) Bwakinyi atulongaa Bible?

⁹ Muntu akumiina kufika mwina Kidishitu munyingye abitungu ambule kilesheesho kya Yesu na kwitatshisha bwa kupusha Bible kalolo. Efuku dyooso akimbi bya kushinguula myanda ikata ya mu Bifundwe, mwanda auku’shi bantu “bakulu . . . abadiiyaa kidiibwa kinyingye.” (Beena-Ebreeyi 5:14) Mwina Kidishitu munyingye akimbaa bya kwikala na “kiwukilo” kya binyibinyi kya Bifundwe. (Beena-Efeeze 4:13, Kilombeno kipya 2014) Byabya eyipushe’shi: ‘Nkwete kubadika Bible efuku dyooso su? Ne na programe a kwilongyela su? Nakitaa lulangwilo lwa mu kifuko lubingo looso?’ Nsaa yolongo Bible, kimba mayi a kulonda alombeene nkukwasha bwa kuuka abinangusheenaa Yehowa na byapushaa. Akupu, fubisha aa mayi a kulonda nsaa ywata bitshibilo. Kukita byabya akukukwasha bwa kunyiisha kwifubwila peepi na Yehowa.

10. Mwina Kidishitu munyingye apushaa naminyi pabitale milango na mayi a kulonda a Efile Mukulu?

¹⁰ Mwina Kidishitu munyingye t’emeena’nka penda pa kuuka abyakula Bible nya. Abitungu afule malango na mayi a kulonda a Efile Mukulu. Akupu, aleesha kyakya kifulo p’aye kwikala na lukalo lukata lwa kukita abikumiina Yehowa pamutwe pa byakumiina’ye nabeene. Ashintuula mpa na nshalelo, binangu, na bikitshiino byaaye. Bu kileshesho, ambula Yesu na kufwala bu muntu mupya, yawa “mupangiibwe ku kifwatulo ky’Efile Mukulu, mu bululame na mu bwiselele bya mu binyibinyi.” (Badika Beena-Efeeze 4:22-24.) Bi na muulo bwa kutentekyesha’shi Efile Mukulu bafubile na kikudi ki selele kyaaye  bwa kufundisha Bible. Byabya, nsaa ayilongo mwina Kidishitu Bible, kikudi ki selele ky’Efile Mukulu akimukwasha bwa kukula mu kiukilo, kukula mu kifulo, na kukula mu kipwano kyaaye na Yehowa.

11. Yesu bafumankeene na myanda kinyi pabaadi pa nsenga?

¹¹ Yesu baadi muntu mupwidikye. Byabya, pabaadi pa nsenga, baadi munkatshi mwa bantu bakutwe kupwidika. Baledi baaye na bakwabo booso babaadi bakutwe kupwidika. Mpa na balondji ba Yesu babaadi baleeshe ngikashi ibubi bu kwitatula na kwikumiina. Kileshesho, mu bufuku bwa muladilo wa lufu lwaye, balongi baaye bababangile kwikakeena “pa mwanda wa kuuka mukile bukata munkatshi mwabo.” (Luuka 22:24) Sunga mbibaabadi na binangu bya kukutwa kupwidika, Yesu baadi auku’shi kunyima kwa mafuku apeela, balondji baaye abafiki beena Kidishitu banyingye na abakitshi kakongye ke mu buumune. Mu bwabwa bufuku bumune, Yesu baadi mwibatekyele bwa’shi bekale mu buumune. Batekyele Nshaye e mwiyilu bwa’shi bekale buumune, aye nkwamba’shi: “Yayà, bekale mu buumune netu, anka bu byodi mwandji, ami namu modi.” Batungunukile na kwakula’shi: “Kukyeba kwa’shi ba pa nsenga bakumîne’shi nnoobe bantumine.”​—Yowano 17:21, 22, EEM.

12, 13. (a) Atwe beena Kidishitu twi na keepatshila kinyi? (b) Ungi mukwetu mulume balongyele bya kulama buumune naminyi?

¹² Mwina Kidishitu munyingye akimbaa bya kulama buumune mu kakongye. (Badika Beena-Efeeze 4:1-6, 15, 16.) Atwe beena Kidishitu keepatshila keetu nka kwikala “mu kwilonga na kwilunga kalolo,” kwamba’shi, kufuba booso mu buumune. Bwa kwikala mu buno buumune, abitungu mwina Kidishitu ekale na kwiyisha. Sunga bamufitshisha munda pa mwanda wa kukutwa kupwidika kwa bangi, mwina Kidishitu munyingye etatshishaa bwa kulama buumune bwa mu kakongye. Byabya, eyipushe’shi: ‘Nakitaa naminyi nsaa ayinkitshina mukwetu mwanda wibubi? Napushaa naminyi nsaa ayinfiitshisha muntu munda? Nashimbaa yawa muntu miima? Su neetatshishaa bwa kulumbuula kipwano kyeetu?’ Mwina Kidishitu munyingye akuminaa kupudisha myanda pamutwe pa kukimba bangi myanda.

¹³ Tubande kwata kileshesho kya mukwetu Uwe. Kumpala, baadi afiitshi munda pa mwanda wa tu bilubilo twa bakwetu. Kunyima baatshile kitshibilo kya kulonga Bible na mukanda wa Étude perspicace des Écritures bwa kulonga mwikeelo wa Daviide. Bwakinyi basangwile kileshesho kya Daviide? Mwanda Daviide baadi mufumankane na tu bilubilo twa bafubi ba Yehowa. Kileshesho, nfumu Saule baadi akimbi bya kumwipaa, bangi bantu babakyebele kumwasa mabwe, mpa na mukashi aaye baadi mumusepe. (1 Samwele 19:9-11; 30:1-6; 2 Samwele 6:14-22) Anka sunga bano bantu babaadi bamukitshine ino myanda, Daviide baadi nka mufule Yehowa na kukulupila mwadi. Daviide baadi muleeshe’shi e na lusa. Mukwetu Uwe baadi mukumiine’shi abitungu alonde kileshesho kya Daviide. Ku bukwashi bwa kwilongyela Bible, balongyele bya kushintuula binangu byaye pabitale bilubilo bya bakwetu. Bibaadi abitungu alekye kutentekyesha bilubilo byaabo na kukimba bya kulama buumune bwa mu kakongye. Obe namu we na kano keepatshila su?

14. Yesu baadi musangule ba kuuku baaye naminyi?

¹⁴ Yesu Kidishitu baadi na kalolo na bantu. Balume na bakashi, bakulu na bakinga, mpaa na baana, babaadi abakumiina kushaala pe Yesu. Anka baadi musangule bakuuku baaye kalolo. Balungwile batumiibwa baaye’shi: “Nwi ba kuuku bande su anukitshi kyaneenutumina eyi.” (Yowano 15:14) Yesu baadi musangule ba kuuku baaye munkatshi mwa bantu babaadi abamulondo na lulamato, bafule na abafubila Yehowa. Osangulaa ba kuuku bafule Yehowa n’eshimba dimune su? Bwakinyi kukita bino kwi na muulo?

15. Ba nsongwa mbalombeene kupeta kaa pa kwikala mu kipwano na beena Kidishitu banyingye naminyi?

 ¹⁵ Bikuba bibungi abikomaa kalolo p’abipete kaanya. Mu mushindo umune, kufula bakwetu ngofu nkulombeene kwitukwasha bwa kufika beena Kidishitu banyingye. We nsongwa kwete kukimba bya kwata kitshibilo kya bya kukita mu muwa oobe? Su mbyabya, abitungu osangule ba kuuku babaapu kukita mafuku mu kufubila Yehowa na abalama buumune bwa mu kakongye. Mbalombeene kwikala bapwe kupeta myanda na bakambile nkalakasho mu mufubo wa Yehowa. Mbalombeene nkukwasha bwa kusangula nshalelo ebuwa. Nsaa y’anushaala pamune, mbalombeene nkukwasha bwa kwata bishibilo bibuwa na kukula mu kikudi.​—Badika Beena-Ebreeyi 5:14.

16. Bantu bakulu ba mu kakongye babaadi bakwashe ungi mukwetu nsongwakashi naminyi?

¹⁶ Helga atentekyesha’shi mu kipwa kyaaye kya nfudiilo kya kulonga, beena kalasa naaye babaadi abesamba pabitale bipatshila byabo bya mafuku aafiki. Bebungi ba kwabadi babaadi na lukalo lwa kwenda ku tulasa tukata bwa kupeta midimo ikata. Byabya, Helga besambile na baloole baaye banyingye ba mu kakongye kaabo. Aakula’shi: “Bebungi ba kwabadi babaadi bakulu bande, na babaadi bankwashe ngofu. Babaadi bankankamikye bwa kwata mudimo wa bu mbala-mashinda. Kunyima, naadi mufube bu mbala-mashinda munda mwa bipwa bitaano. Binobino, kunyima kwa bipwa, ne na muloo bu binaadi mukishe bipwa bibungi bya bu nsongwa mu mudimo wa Yehowa. Ntshi na mwanda su ngumune wa kwidila bwa nsaa inaadi mukite uno mufubo nya.”

17, 18. Mmushindo kinyi watudi balombeene kufubila Yehowa kalolo?

¹⁷ Su tubambula Yesu, atukakulu bwa kufika beena Kidishitu banyingye. Atukanyiisha kwifubwila peepi na Yehowa, na lukalo lwetu lwa kumufubila alutama. Muntu mmulombeene kufubila Yehowa kalolo nka su mmunyingye. Yesu baadi mukankamikye balondji baaye’shi: “Abitungu’shi etaata dyenu diileeshe kwi bantu, bwa’shi, pabamono bikitshiino byenu bibuwa, batumbishe Nshenu e mwiyilu.”​—Mateo 5:16.

¹⁸ Tubakatuka mu kulonga bilombeene mwina Kidishitu munyingye kukwatshisheena kakongye. Mwina Kidishitu mmulombeene dingi kuleesha’shi mmunyingye mu mushindo wafubu na kondo k’eshimba kaaye. Kondo keetu k’eshimba nkalombeene kwitukwasha bwa kwata bishibilo bibuwa naminyi? Na mmushindo kinyi watudi balombeene kuneemeka kondo k’eshimba ka bangi? Atukyebe kwaluula ino nkonko mu mwisambo aulondo.