1, 2. Yehowa mmwitulongyeshe bya kumufula naminyi?

MUSHINDO ukile buwa ulombeene nshe-bana kulongyesha bana baaye, nyi nkileshesho kyaye’ye nabeene. Nsaa y’ebaleesha kifulo, ebalongyesha byabadi balombeene kwikala nakyo. Ta kwi ungi muntu mwituleeshe kifulo bu Nsheetu Yehowa. Byabya, atulongo bya kwikala na kifulo “mwanda aye ngi baabadidiile kwitufula.”​—1 Yowano 4:19.

² Yehowa mmuleeshe’shi aye “ngi baabadidiile kwitufula” naminyi? Bible akula’shi: “Kidishitu beetufwidiile pabaatudi tukii baa-sha-milwisho.” (Beena-Looma 5:8) Nsheetu a kifulo Yehowa, batushiishe Mwan’aaye bu mulambu bwa kwitupaasha ku mulwisho na ku lufu. Kino kya buntu ki na muulo ukata nkitupe mushindo wa kwifubwila peepi na Yehowa na kumuleesha kifulo. P’aye kutuusha uno mulambu ukata, Yehowa mmwitulekyele kileshesho. Mmwitulongyeshe’shi abitungu tulekye kwifula nka’twe banabeene na kwikala na kalolo bwa kuleesha kifulo.​—1 Yowano 4:10.

3, 4. Twi kuleeshaa’shi twi bafule Efile Mukulu naminyi?

³ Kifulo nyi eyikashi dikata dya Yehowa. Byabya twi bya kupusha bwakinyi Yesu bambile’shi mwiya ukile bukata nguno: Abitungu “ofule Yehowa Efile Mukulu oobe n’eshimba dyoobe dyooso, na kikudi  kyoobe kyooso, na kinangu kyoobe kyooso, mpa na makome oobe ooso.” (Maako 12:30) Yehowa akumiina’shi tumufule ‘n’eshimba dyeetu dyooso.’ Yehowa mmulombeene kwinyongola su twafula ungi muntu sunga kintu kumukila. Anka kifulo kyeetu ta nkilombeene kwikala nka kya mwishimba nya. Yehowa etutekye dingi bwatudya kumufula na ‘kinangu kyeetu kyooso’ na ‘makome eetu ooso.’ Bino abikyebe kuleesha’shi kifulo kyeetu bwa Yehowa akimweneka mu ngyelelo eetu a binangu na mu myanda yatukitshi.​—Badika Mika 6:8.

⁴ Abitungu tufule Yehowa mu byooso byatudi beekale na byooso byatudi naabyo. Su tubamutuulu pa mbalo ya kumpala mu nshaleelo eetu, atumuleesha’shi twi bamufule binyibinyi. Mu mwisambo ushaale twisambile bwa mishindo inanka ayileeshaa Yehowa kifulo kikata kwi bana baaye. Binobino tubandeyi kutala mishindo yatudi balombeene kutamisha kifulo kyeetu bwa Yehowa na kumuleesha’shi twi bamufule.

5. P’atunangusheena ku byooso bitukitshiine Yehowa, atukumiina kukita kinyi?

⁵ Nsaa y’abakupa kya buntu, misusa ibungi oleshaa lutumbu. Na dingi bu bywata kyakya kya buntu na muulo, wekifubisha. Jaake bafundile’shi: “Kya-buntu kyooso kya muulo na bwedi booso bupwidikye abituukila mwiyilu, kwi Yaya sh’etaata; kwadi’ye takwi kwaluluka sunga bu mwesheeshe aushintuluka.” (Jaake 1:17) Twi na lutumbu lukata bu bitupe Yehowa bintu byooso byatudi nabyo lukalo bwa kwikala na muwa na muloo. Atumono mushindo waadi mwitufule, na atukumiina kumuleesha’shi n’atwe namu twi bamufule. Nyi byopushaa su?

6. Bwa’shi Yahowa atungunukye na kwibeelela myabi, bibaadi abitungu’shi beena Isaleele bakite kinyi?

⁶ Beena Isaleele babapetele bintu bibungi bibuwa bibebapeele Yehowa. Munda mwa bipwa nkama, baadi ebakunkusha na miiya yaye na kwibapa byooso bibaabadi nabyo lukalo bwa kwikala na muwa. (Miiya Ikituulwe 4:7, 8) Beena Isaleele babaadya kuleesha lutumbu kwi Yehowa pa kukookyela yaaya miiya. Bu kileshesho, nsaa ibaabadi abalambula Yehowa milambu, babaadi na kya kumupa “bikuba bya kumpalampaalaa” bya mu nsenga yaabo. (Efilu 23:​19) Beena Isaleele babaadi abauku’shi Yehowa atungunuka na kwibelela myabi su abamukokyela na kumupa bintu byaabo bya muulo.​—Badika Miiya Ikituulwe 8:7-11.

7. Twi kutumika na ‘bintu byetu’ bya muulo bwa kulesha Yehowa’shi twi bamufule naminyi?

⁷ N’atwe namu, twi kuleesha’shi twi bafule Yehowa p’atwe kumupa ‘bintu byetu’ bya muulo. (Myeele 3:9) Atwibileesha p’atwe kutumika na byooso byatudi nabyo bwa kumupa ntumbo. Bu kileshesho, twi kutuusha bya buntu bwa kukwatshisheena mudimo wa Bufumu mu kakongye keetu na mu nsenga ishima. Byatwikala na bintu bibungi sunga bipeela, ooso a kwatudi e kutuusha muyile ngobesha yaaye bwa kuleesha kifulo kyaye kwi Yehowa. (2 Beena-Kodinto 8:12) Kadi, kwi ingi mishindo yatudi balombeene kuleesha’shi twi bafule Yehowa.

8, 9. Mushindo kini watudya kulesha’shi twi bafule Yehowa? Mike na kifuko kyaye babakitshiine kinyi?

⁸ Yesu mmwitulongyeshe bwatudya kukimba Bufumu kumpala na kupela kwinyongola pabitale bidiibwa na bilamba. Nsheetu mmwitulee bwa kwitupa byooso byatudi nabyo lukalo. (Mateo 6:31-33) Atukulupila mwi Yehowa na kuuka’shi atungunuka na kulombasha byadi mwitulee. Na dingi patufulu muntu, atumukulupila. Byabya, nsaa y’atunyiisha kukulupila mwi Yehowa, atukyebe kuleesha’shi twi bamufule ngofu. (Misambo 143:8) Binobino abitungu weyipushe’shi: ‘Mpàngo yande na mushindo wanfubishaa nsaa na bukome bwande abileesha’shi ne mufule Yehowa su? Nakulupilaa mwi Yehowa efuku dyooso bwa kulombasha nkalo yande su?’

 ⁹ Mike na kifuko kyaaye babaadi bakulupile mwi Yehowa. Pabaadi ki mwana mukinga, Mike baadi’nka akumiina nkalungula mukandu wibuwa mu kingi kibundji. Sunga kunyima kwa’ye kwibakila na kutandisha bana babidi, baadi’nka na lwalwa lukalo. Pabaadi Mike na kifuko kyaye ababadika pabitale bangi bakwetu babaafubile mu mbalo ibaadi na lukalo lukata, babaatshile kitshibilo kya kupeelesha nshaleelo aabo. Babaadi baudishe nshibo yaabo abo nkwenda mu kashibo kapeela. Mike baadi dingi mupeeleshe bungi bwa mafuku abaadi ende ku mudimo waye wa kusuula bintu aye nkulonga bya nkafuba mu dingi eumbo na Internet. Byabya, Mike na kifuko kyaye babamwene bya nkashala mu dingi eumbo na kutamishamudimo wabo wa bulungudi ngofu. Mike akula’shi: “Tubamwene kulombana kwa mayi a binyibinyi a Yesu e mu mukanda wa Mateo 6:33.”

10. Nka bu Nfumu Daviide, bwakinyi bibuwa kunangushena ku byatulongo pabitale Yehowa?

¹⁰ Nfumu Daviide bafundile’shi: “Eyilu adilungulâ ntumbo y’Efile Mukulu, bintu byoso bi mwanka abyakula bi mifubo yê.” Bakumbashile dingi’shi: “Ndambukisho ya Yehowa nyi ngikumbanyinyîne, ayalushâ myuwa yetu bu ipya. Myanda yê ngipwandjikile kukulupilwa, ayipeyâ bashi na lushingulwilo binangu.” Bu bibaadi anangusheena ku miiya ya binangu ya Yehowa na ku bipangwa byaaye bibuwa, Daviide baadi mwifubwile peepi na Yehowa na kukumiina kumuleesha’shi mumufule. Daviide bambile’shi: “Obe Yehowa, mufungushi ande, lubwebwe lwande, byabya binâkula na binatentekyesha bikusangashe namu!”​—Misambo 19:2, 8, 15, EEM.

11. Twi kufuba na kyukilo akiitupa Yehowa bwa kuleesha’shi twi bamufule naminyi? (Tala kifwatulo ki kumbangilo.)

¹¹ Lelo uno, Yehowa kwete kwitulongyesha myanda ibungi imutale, mpàngo yaaye, bipangwa byaaye na pabitale Eyi dyaaye. Uno ndumbulwilo anyingisha bantu bwabadya kulonga ngofu, anka, tulasa tukata atwibatakula mu kushimisha kifulo kyabo n’Efile Mukulu. Mu kwilekeena na byabya, Yehowa takumiina bwatudya kupeta penda kyukilo nya, kadi kwete kwitukwasha dingi bwa kwikala na binangu. Akumiina bwatudya kufubila byatulongo bwa buwa bwetu na bwa kukwasha bangi. (Myeele 4:5-7) Bu kileshesho, Yehowa akumiina bwatudya kulungula bangi “kyuukilo kya biinyibiinyi” bwa kwibakwasha bwabadya nkapanda. (1 Timotee 2:4) Atuleesha kifulo kyetu kwi Yehowa na kwi bantu neetu p’atwe kwibalongyesha muyiile ngobesha yeetu pabitale Bufumu bw’Efile Mukulu na byabukakitshiina bantu.​—Badika Misambo 66:​16, 17.

12. Ungi mukwetu mukashi baadi mwakule naminyi bwa kya buntu kya Yehowa?

¹² Ba nsongwa mbalombeene kunangusheena pabitale byooso biibape na biibalongyeshe Yehowa.  Shannon kyatentekyeshaa bibapushiishe mu kikongeeno kibabatwelele pabaadi na bipwa 11 na mwina’ye mukashi baadi na bipwa 10. Mu kipindji kya kikongeeno kya mafuku asatu kibaadi akyakula’shi “L’attachement à Dieu,” babalungwile bansongwa booso mpa na Shannon na mukwabo mukashi bwabadya nkashaala pa mbalo ibaabadi beebalumbulwile. Kumpala baadi mufiite munda. Akupu, baadi mukaanye pa kumona kwabapa nsongwa ooso mukanda wa Les jeunes s’interrogent—Réponses pratiques. Nkinyi kibaadi mupushe pabitale Yehowa bwa kino kya buntu? Akula’shi: “Nyi panaadi mumone kalolo’shi Yehowa mmuntu a binyibinyi na’shi munfule bikata. Twi na muloo ukata bu bi Efile Mukulu eetu Yehowa kwete kwitupa bino bya-buntu bipwiidikye!”

13, 14. Nsaa ayitunyooko Yehowa abitungu tukite naminyi, bwakinyi?

¹³ Bible etutentekyesha’shi: “Yehowa asaashilaa muntu aadi mufule, anka bu nshe-mwana na mwana aadi mufule.” (Myeele 3:12) Nsaa y’atukumiina dinyooka dya Yehowa na kumutadiila bwa’shi etulongyeshe, atulongo bya kukita bibuwa na atupete butaale. Byabya, “kunyookiibwa kooso, pa kipungo kyako, taakumwenekaa bu mwanda wa muloo nya, anka bu wa kinyongwa.” (Beena-Ebreeyi 12:11) Sunga mbyabya, twi kukita naminyi su Yehowa betunyooko? Tatulubanga elango adiitupa Yehowa sunga kutungunuka na kufiita munda su tatusankila myanda yabetulungula. Twi bafule Yehowa, nyi bwakinyi atumuteemesha na kukita myanda yakumiina.

¹⁴ Mu mafuku a Malakii, beena Yuuda bebungi babakutshilwe kuteemesha Yehowa. Tababaadi abapasukila milambu yabatuusha bwa’shi imusankishe nya. Nyi bwakinyi Yehowa baadi mwibape elango dibukopo bwa uno mwanda. (Badika Malakii 1:12, 13.) Byabya, Yehowa baadi mwibalangye misango ibungi, abo nkupela kumupushiisha. Nyi aye nkwibalungula’shi: “Nakenwele mulwâ bilombêne malwa âpyana myabi yenu.” (Malakii 2:1, 2, EEM) Abimweneka kalolo’shi su tubayididiila na kupela kuteemesha elango dya Yehowa sunga kupusha’shi tadii na muulo, atushimisha kipwano kyeetu naaye.

15. Abitungu tusukye binangu kinyi?

¹⁵ Ndumbulwilo a Satana atakula bantu mu kwitatula na kwifula abo banabeene. Bebungi t’abakumiinaa dinyooka sunga kulambukishwa. Bangi abatumikilaa malango nka pa bukopo. Ta twibambulanga nya. Bible etulungula’shi: “tanwambulanga mwikêlo wa ba pano pa nsenga.” Bilekeene na byabya, abitungu tupushe akitutekye Yehowa na kukita myanda ayimusankisha. (Beena-Looma 12:2, EEM)  Afubu na ndumbulwilo aaye bwa kwitulanga pa nsaa ilombane. Bu kileshesho, bakwete kwitulongyesha mushindo wa kushaala na muntu shii mwina dibaka neetu, bya tudya kusangula ba kuuku, na mushindo wa kusangula mishindo ya kwikisha sunga kukisha kapapi. Nsaa y’atukumiina na muloo dinyooka dya Yehowa na kushintuluka bwa kumusankisha, atumuleesha lutumbu bwa bukunkushi bwaye na’shi twi bamufule binyibinyi.​—Yowano 14:​31; Beena-Looma 6:17.

16, 17. (a) Bwakinyi abitungu twikale atukimbi binangu bya Yehowa kumpala kwa kwata bitshibilo? (b) Pamutwe pa kukulupila mwi Yehowa beena Isalele babakitshiine kinyi?

¹⁶ Bana bakinga abakulupilaa kwi baledi baabo bwa kupeta bukwashi na kwibakalwila. Mpa na bantu bakulu abatekaa bukwashi kwi baledi baabo. Abauku’shi sunga bekala na mushindo wa kwiatshila bitshibilo, baledi baabo mbalombeene kwibapa malango ebuwa. Nsheetu a kifulo Yehowa, etutadilaa bwa’shi twiatshile bitshibilo. Kadi bu byatudi bakulupile kwadi na kumufula, misango ibungi atutekaa bukwashi bwaaye na kukita bukopo bwetu booso bwa kupeta binangu byaaye kumpala kwa kwata kitshibilo. Su twibakulupile mwi Yehowa, akyebe kwitupa kikudi kyaaye kiselele bwa’shi kitukwashe bwa kukita myanda ibuwa.​—Beena-Fidipe 2:13.

¹⁷ Mu mafuku a Samwele, babaadi batshokole beena Isaleele kwi beena Filistine. Pamutwe pa kwipusha Yehowa kya kukita, babambile’shi: “Twendeyi mu kukimba musheete wa kilombeeno kya Yehowa ku Silo: Ufikye munkatshi mwetu, byaabya witupaashe kwiyaasa dya balwishi beetu.” Mbipeta kinyi bibatuukile ku kino kitshibilo? “Kutshokolwa kubekeele kukata bibi: kubafwile, munkatshi mwa beena Isaleele basalaayi ba ngoshi ya paashi 30 000. Musheete w’Efile Mukulu ubakwatshilwe.” (1 Samwele 4:2-4, 10, 11) Beena Isalele babamwene’shi su babatwala musheete munkatshi mwabo, Yehowa mmulombeene kwibakwasha na kwibakalwila. Anka ta mbatekye bukwashi bwa Yehowa sunga kukimba binangu byaaye nya. Pamutwe pa byabya, babakitshiine byabya bibaabamwene buwa, abo nkukyenga ngofu.​—Badika Myeele 14:​12.

18. Bible akulongyesha kinyi pabitale kukulupila mwi Yehowa?

¹⁸ Mufundi a misambo baadi mufule Yehowa ngofu na kukulupila mwadi bafundile’shi: “Kulupila kwi Efile Mukulu, oolo, naamusaamuna dimo, aye mupaashi ande n’Efile ande. Eshimba dyande ndifudiile Efile ande. Nyi bwakinyi eshimba dyande dii koodi.” (Misambo 42:​5, 6) Nyi byopushaa pabitale Yehowa su? Wepushaa peepi naaye na kumukulupila su? We mulombeene kulonga bya kumukulupila ngofu. Bible etulungula’shi: “Kulupila kwi Yehowa n’eshimba dyoobe dyooso, olekye kulonda binangu byoobe’be nabeene. Mu mwikeelo oobe ooso, omutentekyeshe, aye alumbuula mashinda oobe ooso.”​—Myeele 3:5, 6.

19. Oleesha Yehowa’shi we mumufule naminyi?

¹⁹ P’aye kwitufula kumpala, Yehowa mmwitulongyeshe bya kumufula. Byabya twikaleyi’nka atunangusheena pa byadi mwitukitshiine na byaadi mwitufule. Na dingi Tumuleesheyi’shi twi bamufule n’eshimba dyeetu dyooso, na muwa weetu ooso, na binangu byeetu byooso mpa na bukome bwetu booso.​—Maako 12:30.