1. Yowano mutumiibwa etunyinisha bwatudya kunangusheena ku kinyi, na bwakinyi?

YOWANO mutumiibwa etunyingisha bwatudya kunangusheena bikata pabitale bukata bwa kifulo kitufule Yehowa. Mukanda wa 1 Yowano 3:1, awakula’shi: “Talayi mwi bukata bwa kifulo ki neetu Yaya!” Patunangusheena mushindo witufule Yehowa na wakwete kwituleesha kifulo, atwifubwila kwadi na kunyiisha kumufula.

2. Bwakinyi bi bukopo kwi bangi bwabadya kupusha’shi Yehowa mmwibafule?

² Mbya malwa, mwanda bangi t’abapusha bikumbeene kwibafula Efile Mukulu nya. Abamono’shi Efile Mukulu ta kwitatshisha bwa bantu. Be kwikala abakumiina’shi Efile Mukulu kwete penda kukunkusha na kunyooka baaba abapele kumukookyela. Pa mwanda wa aa malongyesha a madimi, bangi be kunangusheena’shi Efile Mukulu e na kifita na’shi ta be bya kumufula nya. Bangi naamu abamono’shi Efile Mukulu mmufule bantu booso sunga beekala abakitshi myanda ibubi. Anka kulonga kwa Bible kubakukwashile bwa kuuka bya binyibinyi pabitale Yehowa. Ouku binobino’shi kifulo nyi eyikashi dikata dya Yehowa na’shi baatushiishe Mwan’aye bwa  nkukuula. (Yowano 3:16; 1 Yowano 4:8) Eyendo’shi, pa mwanda wa nkalakasho yoodi mupete, bi nkwelela bukopo bwa kupusha mushindo ukufule Yehowa.

3. Nkinyi ki bya kwitukwasha bwa kupusha bi kifulo kya Yehowa kwatudi?

³ Bwatudya kupusha bi kifulo kya Yehowa kwatudi, abitungu tubande kupusha’shi Aye nyi betupangile, etupa muwa. (Badika Misambo 100:3-5.) Nyi bwakinyi Bible ayitanyina muntu a kumpala bu “mwan’Efile Mukulu.” (Luuka 3:38) Akupu, Yesu betulogyeeshe bwatudya kwitamina Yehowa bu “Yay’etu ee mwiyilu.” (Mateo 6:9) Byabya, Yehowa nyi Nsheetu, na kifulo kyaye kwatudi ki’nka bu kya nshe bana e buwa kwi bana baaye.

4. (a) Yehowa nyi Nshe bana e naminyi? (b) Nkinyi kyatukyebe kwisambila mu uno mwisambo na mu aulondo?

⁴ Bi bukopo kwi bangi bwabadya kupusha’shi nshee bana muntu e na kifulo. Be kwikala balame mu binangu dikyenga dya ku bukinga pabaabadi abebanyooko bikilekile kwi ba nshaabo. Yehowa takukita byabya kwi bana baaye nya. Nyi Nsheetu ebuwa atudi naaye. (Misambo 27:10) Mmwitufule ngofu na kwete kwitatshisha bwetu mu mishindo ibungi. Patupusha bi kifulo kya Yehowa kwatudi, atukyebe kumufula ngonfu. (Jaake 4:8) Mu uno mwisambo atukyebe kwisambila mishindo inanka ayileesha’shi Yehowa mmwitufule. Mu mwisambo aulondo, atukyebe kumona mishindo inanka yatudi balombeene kuleesha kifulo kyetu kwi Yehowa.

5. Efile Mukulu mmupe bantu booso kinyi?

⁵ Pabaadi Mpoolo mutumiibwa ku Ateene mu Grese, bamwene mankishi ebungi abaadi bantu abakulupila’shi nyi beefile baabo bebape muwa. Nyi aye nkwibalungula pabitale “Efile Mukulu bapangile nsenga na byooso bii-panka.” Bebalungwile’shi Efile Mukulu “ngi apeeyaa [bantu] booso muwa na bukome, na bibaashaala byooso” na’shi “mwadi’ye nyi mwatudi bapetele muuwa, kusaanasaana na kiikeelo kyeetu.” (Bikitshino 17:24, 25, 28) Yehowa etupeyaa bintu byooso byatudi nabyo lukalo bwa kwikala na muwa na bwa kwiusankila. Tentekyesha bintu byaadi mwitupe mwanda wa kifulo kyaadi neetu.

6. Yehowa mmwitupe kishaleelo ki naminyi? (Tala kifwatulo ki kumbangilo.)

⁶ Kileshesho, Yehowa mmwitupe kishaleelo kibuwa bukile. (Misambo 115:15, 16) Mu ma planete ooso aadi mupangye, nsenga ngilekeene na angi ooso. Beena siyanse mbakimbuule bintu bi mwiyilu abo nkusangana ma planete ebungi, kadi tababandile kusangana ungi planete e na bintu byooso byatudi nabyo lukalo bwa kwikala na muwa. Kunyima kwa kwitupa bintu byooso byatudi nabyo lukalo bwa kwikala na muwa, Yehowa mmwitupe dingi nsenga eyikasha buwa, inyingye, na mbalo yatudi balombeene kushaala mu bulungantu bwa kusankila muwa. (Yeeshaya 45:18) Nsaa y’atunangusheena pa kishaleelo kitupe Nsheetu, Yehowa, atupusha bukata bwa kifulo kyaadi neetu.​—Badika Yoobo 38:4, 7; Misambo 8:3-5.

7. Mushindo witupangye Yehowa auleesha’shi mmwitufule naminyi?

⁷ Ungi mushindo wituleeshe Yehowa kifulo mpa’ye kwitupanga na ngobesha ya kumwambula. (Kibangilo 1:27) Kwamba’shi twi bya kupusha kifulo kyaaye na kumuleesha byatudi bamufule. Auku’shi kukita bino akwitwikasha na muloo ukata. Kya kumpala, bana ebekalaa na muloo wibungi p’abapusha’shi baledi baabo mbebafule. Na dingi, Yesu baadi mwitulambukishe’shi atukeekala na muloo wibungi su tubefubwila peepi na Nsheetu, Yehowa. (Mateo 5:3) Aye “eetupeyaa bintu byooso . . . bwatud’ya kusepeela naabyo.” Abimweneka patooka’shi e na kalolo na mmwitufule ngofu.​—1 Timotee 6:17; Misambo 145:16.

8. Bwakinyi atukumiina’shi Yehowa etulongyeshe?

⁸ Ba nshe-bana abekalaa na kifulo na bana baabo na tabakuminaa bashimina sunga kudimbibwa nya. Anka baledi bebungi lelo uno tabakumiina miiya ya mu Bible ya kusangula kibuwa na kibubi. Nyi bwakinyi ta mbalombeene kuludika bana baabo kalolo, bino abibafikisha mu kushimisha muloo na kabulakanyi. (Myeele 14:12) Byabya, Yehowa kwete kwitupa atwe bana baaye buludiki bwibuwa mwanda aye nyi “Efile Mukulu a biinyibiinyi.” (Misambo 31:6) E na muloo wa kwitulongyesha bya binyibinyi bimutale. Na dingi etulongyesha byatudya kumulangwila akupu etuleesha byatudya kwikala na nshaleelo ebuwa. (Badika Misambo 43:3.) Byabya, nkinyi kitulongyeshe Yehowa akileesha mushindo wadi mwitufule?

9, 10. (a) Bwakinyi Yehowa etulungulaa myanda imutale? (b) Mmwitulongyeshe kinyi pabitale mpàngo yaaye bweetu?

⁹ Kya kumpala, Yehowa mmwitulongyeshe pa bimutale’ye nabeene. Akumiina’shi tumuukye kalolo. (Jaake 4:8) Byabya etulungula eshina dyaaye. Mu Bible atwimupete eshina dyaye misango ibungi kukila angi mashina ooso. Yehowa etulungula dingi bi Bumuntu bwaye. Nsaa yatutala bintu byaadi mupangye, atulongo’shi e na bukome na binangu. (Beena-Looma 1:20) Nsaa yatubadika Bible, atulongo byaadi mululame na byadi mwitufule. Patushinguula bumuntu bwibuwa bwa Yehowa, atwifubwila peepi naaye.

¹⁰ Yehowa etulongyesha dingi bi mpàngo yaaye. Etulungula’shi twi beena kifuko kyaaye. Etulungula dingi kyetutekye bwa’shi tumone  bya kufuba mu buumune na mu butaale na muntu ooso e mu kifuko kyaaye. Bible etulungula’shi Efile Mukulu ta mwitupangye na matalwa a kutshiba kibuwa na kibubi nya. (Yeelemiya 10:23) Yehowa auku byatudi balombeene kwikala bibuwa. Na dingi bwa kupeta butaale na nshaleelo a muloo, abitungu tukumiine matalwa aaye na kumukookyela. Yehowa mmwitulongyeshe bino bya binyibinyi bi na muulo mwanda mmwitufule.

11. Nsheetu a kifulo mmwitulee kinyi bwa mafuku aafiki?

¹¹ Nambutwile e na kifulo anangushenaa ngofu pabitale nshaleelo akekala na bana baaye. Akuminaa’shi bakekale na nshalelo ebuwa. Mbya malwa mwanda bantu bebungi lelo uno bakwete kwikalakasha pabitale mafuku e kumpala, na kukisha nsaa yaabo mu kukita myanda ya kapindji kapeela. (Misambo 90:10) Twi na lutumbu lukata kwi Nsheetu Yehowa bu byashii mwitulongyeshe penda bya kwikala na nshaleelo ebuwa binobino, kadi mmwitulee myanda ibuwa bukile mu mafuku aafiki!

12. Yehowa bakitshiine kinyi bwa kukwasha Kaayine na Baruke?

¹² Pabamwene Yehowa Kaayine e mu masaku a kukita mwanda ukile bubi, bakimbile bya kumukwasha p’aye kumwipush’shi: “A mwanda kinyi bofîtshi munda na kunyenga mpala? Su okita bibuwa, tankakutambula su?” (Kibangilo 4:6, 7, EEM) Kaayine bapelele bukwashi bwa Yehowa, aye nkukyenga ngofu. (Kibangilo 4:11-13) Ungi musango, Yehowa bamwene’shi binangu bibubi bya Baruke abimukookyesha na kumubofusha. Yehowa balungwile Baruke’shi abitungu akatushe binangu bibubi. Baruke baapushiishe elango dya Yehowa aye nkupaasha muwa waye.​—Yeelemiya 45:2-5.

13. Bafubi ba Yehowa basha lulamato babalongyele kinyi mu mpombo?

¹³ Yehowa kwete kwituludika na kwitunyooka mwanda mmwitufule. T’etuludika’nka penda mu nsaa yatudi na mwanda nya, kadi etulongyesha dingi bya kwikala. (Beena-Ebreeyi 12:6) Mu Bible, atubadikaa miisambo ya bafubi ba sha lulamato babaadi Yehowa mulongyeshe bwabadya kufika bebuwa. Kileshesho, Yoosefe, Moyiise na Daviide babaadi bapete nkalakasho ibukopo. Mu mpombo yaabo, Yehowa baadi naabo. Myanda ibaabalongyele mu yaaya nsaa ya mpombo ibeebakwatshile pabaadi Yehowa mwibape mashito akata. Patubadika mu Bible bibaadi Yehowa mukwatshisheene na kulongyesha bafubi baaye, atupusha’shi mmwitufule binyibinyi.​—Badika Myeele 3:11, 12.

14. Yehowa etuleeshaa kifulo naminyi su tubakitshi mwanda wibubi?

¹⁴ Sunga nsaa yatukitshi mwanda wibubi, Yehowa atungunukaa na kwituleesha kifulo. Su tubakumiina dinyoka dyaye na kwilanga, etufwila lusa mu “byooso.” (Yeeshaya 55:7) Byabya abileesha kinyi? Bishima bya Daviide pabitale kulekyeela kwa Yehowa abituleesha lusa lwa Nsheetu atudi naye p’aleesha’shi: “Akubwikiila bito byoobe byooso, na akupaasha ku mikumbo yooso. Apaasha muuwa wobe ku lufu, akufwadika bulamate na kifulo buu lùbàngo. Biikale kutunduka-nguba kula naa kutwela-nguba ngi byaadi mutuule kutupakana kwetu kula.” (Misambo 103:3, 4, 12) Yehowa etunyookaa na kwituludika mu mishindo ilekeene. Oshintulukaa musango umune su? Tolubanga’shi Yehowa etunyooko pa mwanda wa kifulo kyadi neetu.​—Misambo 30:5.

15. Ngungi mushindo kinyi awituleshaa Yehowa kifulo?

¹⁵ Nshe-bana ebuwa akalwilaa kifuko kyaye ku masaku. Nyi abikitaa Nsheetu Yehowa bweetu. Mufundji a misambo bafundile pabitale Yehowa’shi: “Alama muuwa wa bamulamate, pa kwibakuula kwiyaasa dya babi.” (Misambo 97:10) Lamiina’shi: Nka byokalwilaa meeso oobe bukidibukidi mwanda e na muulo ukata koodi, nyi abikalwilaa Yehowa bafubi  baaye mwanda be na muulo ukata kwaadi.​—Badika Zakarii 2:8.

16, 17. Yehowa akalwilaa bafubi baaye ba kala na ba binobino naminyi?

¹⁶ Umune wa ku mishindo ayikalwilaa Yehowa bafubi baaye, ba kala na ba binobino, nku bukwashi bwa ba mwikeyilu. (Misambo 91:11) Mwikeyilu umune bayipayile basalayi ba beena Asirii 185 000 mu bufuku bumune aye nkupaasha mwilo w’Efile Mukulu. (2 Bamfumu 19:35) Mu bipwa lukama, ba mwikeyilu babatushiishe Mpyeele, Mpoolo, na bangi mu lukano. (Bikitshino 5:18-20; 12:6-11) Mu mafuku ashaale, akwikalanga ngoshi ibukopo mu dingi eumbo dya mu Afrique. Eumbo dibaadi mu kafuutakanyi pa mwanda wa ngoshi, bu ngifi, kulwisha bakashi, na kwipayisheena. Sunga ta nkufwe mukwetu su ngumune, bebungi babaadi bashimishe bintu byaabo byooso. Kadi booso babaapushiishe kifulo kya Yehowa abo nkushinkamisha’shi kwete kwibapasukila. Sunga mbibaabadi bakyengye na ino myanda, babaadi nka na muloo. Pabafikile mukwetu abaabadi batume kwi biro byetu bikata bya nsenga ishima mu kwibatala ebayipusha byabadi, babambile’shi: “Booso bweetu twi biiya, atutumbula Yehowa ngofu!”

¹⁷ Byabya, bangi bafubi ba Yehowa, nka bu Etshyene mulongi a Yesu na bangi, mbayipayibwe pa mwanda wa lukumiino lwabo. Misango yooso Yehowa tashikilaa bwa’shi ino myanda ikutwe kukitshika nya. Anka akalwilaa mwilo waye mu kibungi pa kwibadimusha pabitale mishindo ilekeene ayikimbaa Satana bwa kwibalwisha. (Beena-Efeeze 6:10-12) Atusangana ano malango mu Bible mpa na mu mikanda ya ndumbulwilo a Yehowa. Bu kileshesho, tukwete kulonga masaku aatuukila ku Internet, kifulo kya makuta, ku lusandji na ku ma filme, mikanda, sunga maasha a bu ntomboshi. Abimweneka patooka’shi Yehowa mmwitufule na kwete kwitukalwila.

18. Opusha naminyi pabitale kifulo kii noobe Yehowa?

¹⁸ Pabaadi Moyiise atentekyesha bipwa byooso bibaadi mufubile Yehowa, baadi mushinkamishe’shi Yehowa mmufule. Moyiise bambile’shi: “Byatshiile ku namashika, wetuwushe na kalolo koobe, mund’a mafuku a muwa wetu ooso.” (Misambo 90:14) Yehowa mmwitwelele mwabi wa kwikala na ngobesha ya kushinguula na kupusha kifulo kyadi neetu. Kwikala bantu bafudiibwe na Yehowa nkineemo kikata! Atwipusha’nka bu Yowano mutumiibwa, bambile’shi: “Talayi mwi bukata bwa kifulo ki neetu Yaya!”—1 Yowano 3:1.