Ba kuuku, abesambaa kalolo na kwikala mu kipwano kibuwa. Mu mushindo umune, Efile Mukulu etutekye bwatudya kwisamba naaye, etupa mushindo wa kwikala naaye mu kipwano. Akula’shi: “Anungitaanyina, nukite nyendo ya nteko; anungyele nteko yeenu, ami naamu neenwaluula.” (Yeelemiya 29:12) Nsaa ywesamba n’Efile Mukulu, ‘wefubwila kwadi, aye namu efubwila peepi noobe.’ (Jaake 4:8) Bible etushinkamiisha’shi: “Yehowa e peepi na booso abamwididi.” (Misambo 145:18) Su atutekye Efile Mukulu ngofu, kipwano kyeetu naaye akinyiisha kutama.

Yesu bambile’shi: “Nnaanyi, munkatshi mwenu, su mwana aaye amuteka mukate, e kumupa ebwe? Sunga amuteka mushipa, aye byamupa nyoka? Byabya, su anwe bee bubi, anuuku kupa bana beenu bintu biibuuwa, mbikunyi bilombeene Nshenu e mwiyilu kukutwa kupa baaba abamutekye bintu [bibuwa]!” (Mateo 7:9-11) Eyendo, Efile Mukulu akumiina bwa’shi omutekye mwanda ‘kwete nkulama’ na e na lukalo lwa nkukwasha. (1 Mpyeele 5:7) Na dingi kwete nkwitanyina bwa kumusumbwila myanda yoobe. Bible etulungula’shi: “Tanwikalanga mashimba kwiyilu pa kintu su nkimune, anka, nguba ooso, mu nteko, mu kwiyaaya na mu ntumbu, ukishayi Efile Mukulu nkalo yeenu.”—Beena-Fidipe 4:6.

Bantu balongye ngofo mwikeelo wa muntu mbamone’shi bantu midiyo nkama bakwete kupusha lukalo lwa kwela nteko. Mpa nka na bangi abapelaa’shi Efile Mukulu te kwanka na abakulaa’shi tatwi bakumbeene kwiuka Efile Mukulu be na lwalwa lukalo. * Bino abileesha’shi bantu babaadi bapangibwe na lukalo lwa myanda ya mu kikudi. Yesu bambile’shi: “Baasha muloo anka balanda ku kikudi.” (Mateo 5:3, NWT) Twi kulombasha lwalwa lukalo p’atwe kwisamba n’Efile Mukulu nsaa yooso.

Mbukwashi kinyi bwatudi balombeene kupeta su atukumina lwitamino lw’Efile Mukulu lwa kumuteka?