1. Mmushindo kinyi wikale lukumiino na muulo ukata? (Tala kifwatulo ki kumbangilo.)

TOPWILE kwiyipusha’shi: ‘Yehowa e nkakumiina kumpaasha ku mpombo ikata su?’ Mpoolo mutumiibwa akula’shi lukumiino lwi na muulo ukata bwatudya nkapanda. Akula’shi: “Kushi lukumiino, takwi kipaso kya kulongamina Efile Mukulu.” (Beena-Ebreeyi 11:6) Mu kwakula, abipushika bu bipeelepeele, kadi, abikyebe tuukye’shi bantu “booso tabee na lukumiino” nya. (2 Beena-Tesalonika 3:2) Ino verse ibidi ayitukwasha bwatudya kupusha’shi bi na muulo ukata bwa kunyingisha lukumiino lwetu.

2, 3. (a) Mmushindo kinyi wikale lukumiino lwetu na muulo ukata? (b) Mmyanda kinyi yatukyebe kutaluula?

² Mpyeele mutumiibwa baadi mwakule bwa lukumiino lwetu ‘alukatompiibwa.’ (Badika 1 Mpyeele 1:7.) Mpombo ikata tayidi peepi, akupu, atukumiina kwikala “bantu bakuumiine bwa kupaasha myuwa yeetu.” (Beena-Ebreeyi 10:39) Nyi bwakinyi abitungu tukite mwetu mooso bwa kunyingisha lukumiino lwetu. Atukumiina kwikala munkatshi mwa bantu abakapete efuto apakafiki Nfumwetu Yesu Kidishitu. Byabya, nka bu muntu batekyele Yesu bwa kufiimisha lukumiino lwaye, twi kwakula n’atwe namu’shi: “Fika onkwashe mu lukumiino lwande lulobele!” (Maako 9:24) Sunga bu batumiibwa, twi kwakula dingi’shi: “Fiimisha lukumiino lwetu.”​—Luuka 17:5.

³ Mu uno mwisambo, atukyebe kwisambila byatudya kunyingisha lukumiino lwetu, byatudi balombeene kuleesha’shi lukumiino lwetu  ndunyingye na byatudya kwikala bashinkamishe’shi Efile Mukulu etwaluula su atumutekye bwa kufiimisha lukumiino.

4. Mbileshesho kinyi bi kwitukwasha bwa kunyingisha lukumiino lwetu?

⁴ Bu byabidi’shi lukumiino lwetu lwi na muulo ukata, Yehowa mmwitupe bileshesho bibungi bya bantu baasha lukumiino mu Bible. Babaadi bebifunde bwa “kwitulambukisha.” (Beena-Looma 15:4, EEM) Kileshesho kya Abrahame, Saraa, Isaake, Yaakobo, Moyiise, Rahabe, Gideone, Barake na bingi bileshesho bi kwitukwasha bwa kunyingisha lukumiino lwetu. (Beena-Ebreeyi 11:32-35) Kukatusha byabya bileshesho bya kala, twi na bingi bileshesho bya kukaanya bya bakwetu balume na bakashi baasha lukumiino munkatshi mwetu lelo uno. *

5. Eliya balesheshe’shi e na lukumiino lunyingye mwi Yehowa naminyi? Ooso a kwatudi e kwiyipusha naminyi?

⁵ Kileshesho kya Eliya nkimune kya ku bileshesho bi mu Bible. Tobopwile kunangusheena pa kileshesho kyaye su? Tala bibaadi muleeshe lukumiino lunyingye mwi Yehowa mu ino myanda itaano: (1) Pabaadi Eliya mulungule Nfumu Akabe’shi Yehowa akyebe kwelesha munanga, baadi mwakule kushi kutshiina’shi: “Mwishina dya Yehowa, Efile Mukulu a Isaleele anfubila, taakwikala mund’a bino bipwa lume sunga mpeshi.” (1 Banfumu 17:1) (2) Eliya baadi na lukumiino’shi Yehowa amupa aye na bangi bantu bintu biibaabadi nabyo lukalo mu mafuku a munanga. (1 Banfumu 17:4, 5, 13, 14) (3) Eliya baadi mushinkamishe’shi Yehowa baadi na kya kusangula mwana a mukashi kilele baafwile. (1 Banfumu 17:21) (4) Tabaadi eelesha mpaka’shi Yehowa baadi na kya kushiika mulambu waye ku Mwengye wa Karmele nya. (1 Banfumu 18:24, 37) (5) Kumpala kwa’shi kupone ekopola su ndimune dya mpeshi, Eliya balungwile Akabe na kushinkamisha kooso’shi: “Nda, okadye na kutoma, mwanda yoyo mikungulo ngya mpeshi.” (1 Banfumu 18:41, EEM) Binobino kunyima kwa kutaluula ino myanda, ooso a kwatudi e kwiyipusha’shi: ‘Ne na lukumiino lunyingye bu lwa Eliya su?’

6. Twi na lukalo na kinyi kya kwi Yehowa bwa kunyingisha lukumiino lwetu?

⁶ Tatwi balombeene kunyingisha lukumiino lwetu atwe banabeene kushi kuteka Efile Mukulu kikudi kiselele nya. Bwakinyi? Mwanda lukumiino nkimune kya ku bipindji bya kikuba kya kikudi kiselele. (Beena-Galate 5:22) Su atulondo elango dya Yesu na kuteka bwa kwikala na kikudi kiselele atuleesha’shi twi na binangu. Yesu balayile’shi Yehowa akyebe “kupa kikudi kiselele kwi baaba abamutekye kyanka.”​—Luuka 11:13.

7. Leesha byatudi bakumbeene kulama lukumiino lwetu lunyingye.

⁷ Su tubaapu kwikala na lukumiino lunyingye mwi Efile Mukulu, abitungu twilulame kalolo. Twi kupwandjikisha lukumiino na kaalo. Atwe babaapu kutembesha kaalo, akeekalaa na ndjimi ikaamine. Su tatwi bakumbashe nteete na kwiyishisakanya, kaalo akeende na kushima kushaale penda buto. Kadi su tubatungunuka na kukumbasha nteete, ndjimi ya kaalo ayitungunuka na kutemba. Nyi bi lukumiino lwetu. Su tubatungunuka na kubadika Eyi dy’Efile Mukulu na kwidilonga efuku dyooso, kifulo kyetu bwa Bible na bwa Yehowa akitungunuka na kutama. P’atwe kukita byabya, atukyebe kulama na kunyingisha lukumiino lwetu.

8. Nkinyi kilombeene nkukwasha bwa kunyingisha na kulama lukumiino loobe?

⁸ Tabitungu kwimeena nka penda pa myanda ibolongyele kumpala kwa kutambula nya. (Beena-Ebreeyi 6:1, 2) Bu kileshesho, kulonga  matemuki a mu Bible akukukwasha bwa kunyingisha na kulama lukumiino loobe. We kufuba dingi na Eyi dy’Efile Mukulu bwa kumona su lukumiino loobe ndunyingye binyibinyi.​—Badika Jaake 1:25; 2:24, 26.

9, 10. Lukumiino lwetu alunyingishibwa naminyi na (a) ba kuuku bebuwa? (b) bisangilo bya kakongye? (c) bulungudi?

⁹ Mpoolo mutumiibwa bambile’shi beena Kidishitu mbakumbeene ‘kwikankamisheena abo booso pamune’ mu lukumiino. (Beena-Looma 1:12, Kilombeno kipya) Byabya abipushiisha kinyi? Abipushiisha’shi, p’atukisha nsaa na bakwetu, twi balombeene kwinyingisheena mu lukumiino. Bikishekishe su atukisha nsaa na baaba bapwe “kutompwa” mu lukumiino. (Jaake 1:3) Ba kuuku bebubi be kulwisha lukumiino lwetu, kadi bakuuku bebuwa be kwilunyingisha. (1 Beena-Kodinto 15:33) Nyi bwakinyi twibanyingishibwe bwa kutwela mu bisangilo byooso bya ku lunbingo. Patukitshi byabya, twi kutungunuka na “kwinyingisheena.” (Badika Beena-Ebreeyi 10:24, 25.) Kukatusha byabya, malango atupete mu bisangilo aanyingisha lukumiino lwetu. Nyi bwakinyi Bible akula’shi: “Lukumiino alutuukila ku bulambukishi.” (Beena-Looma 10:17) Binobino eyipushe’shi: ‘Nkwete kutwela mu bisangilo byooso bya beena Kidishitu bya ku lubingo su?’

¹⁰ Atunyingisha dingi lukumiino lwetu patulungula na kulongyesha bangi mukandu wibuwa wi mu Bible. Nka bu beena Kidishitu ba kumpala, atulongaa bya kukulupila mwi Yehowa na bya kwakula na katshintshi mu myanda yooso.​—Bikitshino 4:17-20; 13:46.

11. Bwakinyi Kalebe na Yooshwa babaadi na lukumiino lunyingye? Twi kwibambula naminyi?

¹¹ Lukumiino lwetu mwi Yehowa alunyingi nsaa yatumono byetukwasha na byaluula ku nteko yeetu. Nyi bibaadi bifwile Yooshwa na Kalebe. Babaadi baleeshe lukumiino mwi Yehowa pababayiile mu kupuupa Nsenga ya Mulayilo. Pabaakidile mafuku, babafikile na lukumiino lunyigye nsaa yooso ibaabadi abamono bukwashi bwa Yehowa kwabadi. Nyi bwakinyi Yooshwa balungwile beena Isaleele na kushinkamisha kooso’shi: “Eyi su ndimunenka ntandishaale kushii kipeta, ku bishima byooso bikile buwa bibaadi byambe Yehowa, Efile Mukulu eenu pa mwanda wenu.” Akupu bambile dingi’shi: “Tshinaayi Yehowa, dingi mufubileeyi n’eshimba dyeenu dyooso, na bulamate.” Baadi mukumbashe dingi’shi: “Ami na kifuko kyande  atufubila Yehowa.” (Yooshwa 23:14; 24:14, 15) Patukulupila mwi Yehowa na kumona byakwete kwitukwasha pa bwetu, lukumiino lwetu alukyebe kunyinga.​—Misambo 34:8.

12. Twi kuleesha naminyi’shi twi na lukumiino lunyingye?

¹² Twi kuleesha naminyi’shi twi na lukumiino lunyingye? Jaake mulongi a Yesu bambile’shi: “Mmu bikitshiino byande mwandeesheesha lukumiino lwande.” (Jaake 2:18) Bikitshiino byetu abileesha’shi twi na lukumiino. Tubande kutala akitushinkamiisha byanka.

13. Twi kuleesha lukumiino lwetu naminyi patulungula mukandu wibuwa?

¹³ Kulungula mukandu wibuwa nyi mushindo ukile buwa wa kuleesha lukumiino lwetu. Bwakinyi? Mwanda patulungula, atuleesha lukumiino lwetu’shi nfudiilo tayidi peepi n’ashi ayikafiki kushi “kutentuula efuku!” (Abakuke 2:3) Bwatudya kuuka su lukumiino lwetu ndunyingye, twi bakumbeene kwiyipusha’shi: ‘Mudimo wa bulungudi wi na muulo kinyi kwandji? Nakitaa mwande mooso bwa kulungula bangi pabitale Efile Mukulu su? Nakimbaa mishindo yandi mulombeene kukita bibungi mu mudimo wa Yehowa su?’ (2 Beena-Kodinto 13:5) Byabya, twikaleeyi atuleesha kunyinga kwa lukumiino lwetu p’atwe “kubwela mukanwa . . . lukumiino alufishana ku kipandjilo,” na p’atwe kulungula mukandu wibuwa.​—Badika Beena-Looma 10:10.

14, 15. (a) Twi kuleesha lukumiino naminyi bwa kidiibwa kyetu kyefuku dyoso? (b) Tuusha kileshesho akileesha lukumiino mu bikitshiino.

¹⁴ Atuleesha dingi lukumiino lwetu mwi Yehowa patunyingiila mu nkalakasho ya uno ndumbulwilo. Patudi na bulanda, mukumbo, kubofula kwishimba, myanda itutabukile sunga ingi myanda, abitungu twikale na lukumiino’shi Yehowa akyebe kwitukwasha n’ashi Yesu ‘etukwasha apakumbana kipungo.’ (Beena-Ebreeyi 4:16) Atuleesha lukumiino mwi Yehowa patumutekye bukwashi. Yesu bambile’shi twi kuteka Yehowa bwadya kwitupa “byakudya byatudi nabyo lukalo efuku dyooso.” (Luuka 11:3) Myanda i mu Bible ayileesha’shi Yehowa e kwitupa kyooso kyatudi nakyo lukalo. Bu kileshesho, mu mafuku a munanga mu Isaleele, Yehowa bapeele Eliya bidiibwa na meema. Bible akula’shi: “Biminyi bibaamutwadilanga byakudya na mwita ku kyolwa; dingi baantomanga meema ku mwela.”  (1 Banfumu 17:3-6) Twi na lukumiino’shi Yehowa mulombeene kwitupa namu byatudi nabyo lukalo.

¹⁵ Twi bakulupile’shi patutumikila mayi a kulonda e mu Bible, atwikala na mushindo wa kupudisha nkalo ya kifuko kyetu. Rebecca ungi mukashi mwibakilwe a mu Asie apatuula bibaadi mutumikile na kifuko kyaye mayi a kulonda e mu mukanda wa Mateo 6:33 na Myeele 10:4. Akula’shi mulum’aye bamwene’shi mudimo waye autuulu kipwano kyabo na Yehowa mu masaku. Baakatukile ku wawa mudimo. Bu bibabaadi na bana bananka, bababangile kuteeka bidiibwa bya kuudisha. Bu kipeta kya mudimo wabo wibukopo, tababaadi abakutwa makuta a kupudisha nkalo ya kifuko kyabo nya. Rebecca akula’shi: “Tubapushiishe’shi Yehowa tabaadi mwitulekyeele nya. Tatubakutshilwe kidiibwa efuku su ndimune.” Tobopetekyelwe na mwanda wi byabya aunyingisha lukumiino loobe su?

16. Nkinyi akikitshika su atukulupila mwi Efile Mukulu?

¹⁶ Tatulubanga efuku su ndimune’shi su atulondo bukunkushi bwa Yehowa, akyebe kwitukwasha. Mpoolo baakwile mayi a Abakuke pabafundjile’shi: “Yaawa mululamine ku lukumiino ngi akatambula muuwa.” (Beena-Galate 3:11; Abakuke 2:4) Nyi bwakinyi abitungu twikale na lukumiino lunyingye kwi Yaawa mulombeene kwitukwasha. Mpoolo etutentekyesha’shi Efile Mukulu nyi “Yaawa mulombeene, ku bukome abufubu munda mwetu, kukita bikile pa byaabya byaatutekye na byatupwandjikisha.” (Beena-Efeeze 3:20) Bafubi ba Yehowa abakitaa kyoso akitungu bwa kukita abikumiina Yehowa, anka abauku’shi be na mikalo. Nyi bwakinyi twi na lutumbu lukata kwi Yehowa byadi mwikale neetu na kwitwelala myabi mu kwitatshisha kwetu.

17. (a) Yesu baadi mwaluule batumiibwa baaye naminyi? (b) Bwakinyi twi kwikala bakulupile’shi Yehowa etwaluula mu kuteka kwetu kwa lukumiino lufiime?

¹⁷ Muyile byatubakatuka mu kulonga, twi kupusha nka bibapushiishe batumiibwa pababatekyele kwi Yesu bino’shi: “Fiimisha lukumiino lwetu.” (Luuka 17:5) Yesu baalulwile batumiibwa baaye mu mushindo wi pabwao mu kipwa kya 33 pabaabadi bapete kikudi kiselele na ngobesha ya kupusha myanda ikata ya pàngo y’Efile Mukulu. Bino bibaadi binyingishe lukumiino lwabo. Nkinyi kibaadi kikitshikye? Babaabangile nka paapa mudimo ukata wa bulungudi. (Beena-Kolose 1:23) Atutengyelaa namu lwaluulo mu kuteka kwetu kwa lukumiino lufiime su? Yehowa etulaa’shi twi balombeene kutengyela lwaluulo su atutekye “muyiile kukumiina kwaye.”​—1 Yowano 5:14.

18. Yehowa eelelaa baaba abanyingisha lukumiino lwabo myabi naminyi?

¹⁸ Su twi batuule lukulupilo lwetu looso mwi Yehowa, atukyebe kumusangasha bikata. Akyebe kwitwaluula patumutekye bwa kufiimisha lukumiino lwetu, lukumiino lwetu alufiki lunyingye, akupu, atukyebe kufika bantu “balombeene kutambula Bufumu bw’Efile Mukulu.”​—2 Beena-Tesalonika 1:3, 5.