1, 2. Bwakinyi Yesu baadi mufule Maata, kadi nkilubilo kinyi kibaadi mukite kibalesheshe’shi ta mupwidikye?

P’OTENTEKYESHA Maata mukwabo na Lazaare, omumono bu muntu baadi naminyi? Bible aleesha’shi Maata baadi kuuku ebuwa a Yesu, na kwakula’shi Yesu baadi mumufule ngofu. Anka, tabaadi penda bupenka abaabadi bafule na kunemeka kwi Yesu nya. Bu kileshesho, Maariya nkasha’naaye na Maata baadi dingi kuuku a Yesu. Akupu Yesu baadi mufule nyinaaye Maariya. (Yowano 11:5; 19:25-27) Kadi bwakinyi Yesu baadi mufule Maata?

² Yesu baadi mufule Maata mwanda baadi muntu a bantu e na kalolo, akupu baadi mufubi e na kishima. Kukatusha byabya byooso, Yesu baadi mumufule mwanda baadi na lukumiino lunyingye. Baadi akumiina byoso bibaadi abilambukisha Yesu na tabaadi eelesha mpaka’shi baadi Mesiya mulayibwe. (Yowano 11:21-27) Sunga mbyabya, Maata tabaadi mupwidikye nya. Nka bu ooso a kwatudi, baadi mukite bilubilo. Bu kileshesho, ungi musango ubafikile Yesu mu kwibatembela, Maata baadi mufiitshile nkasha’naaye Maariya munda na kulungula Yesu bwadya kumukwasha. Maata balungwile Yesu’shi:  “Mwanana, bino tabikukitshi kintu apandekye mukwetu mukashi bupenka ku mufubo? Byabya mulungule bwa kunkwasha.” (Badika Luuka 10:38-42.) Bwakinyi Maata baakwile byabya na ndilongyesha kinyi dyatudi balombeene kupetala ku lwaluulo lubamupeele Yesu?

3, 4. Nkinyi kibakitshine Maariya kibaadi Yesu mukumiine? Maata baadi mulongyeshwe kinyi? (Tala kifwatulo ki kumbangilo.)

³ Yesu baadi na lutumbu bwa bibaabadi bamwitanyishe kwi Maata na Maariya kwabo ku nshibo, akupu, baakimbile bya kufubisha yaaya nsaa bwa kwibalongyesha bya binyibinyi bi na muulo. Musango umune, Maariya baadi mushaale peepi naaye “ateemeshanga mwisambo waye.” Baadi akumiina kulonga bintu byooso bibaadi abifiki kwi Mulongyeshi Mukata. Maata namu baadya kukimba bya kuteemesha Yesu. Su baakitshiine byabya, Yesu baadya kumukaanyisha mwanda baadi na kya kuleka mifubo yaaye bwadya kumuteemesha namu bu Maariya.

⁴ Anka, Maata baadi mutuule binangu byaye ku ingi myanda. Baadi mutuule binangu mu kutekyela Yesu na kukita ingi midimo bwashi Yesu ekale biiya. Pabamwene’shi Maariya tabaadi amukwasha, baadi mufiite munda aye nkwidila kwi Yesu. Baadi auku’shi Maata basangwile bwa kumukitshiina bintu bibungi, kadi Yesu bamulungwile na kalolo kooso’shi: “Maata, okalakala na wekupilakupila bwa bintu bibungi.” Akupu bamulungwile’shi kidiibwa kipeelepeele pangi elonga dimune ndilombane. Yesu baadi mukaanyishe Maariya bwa kumuteemesha. Bambile’shi: “Maariya basangula kyaakya kikile buwa kyakya kishyaakikamwatshiibwa.” Maariya baadya kuluba bibaadiile na kutoma mu dyadya efuku, anka tabaadya kuluba bintu bibaadi mulongye kwi Yesu na bibaadi mumulungule bwa kukita. Kunyima kwa bipwa 60, Yowano mutumiibwa bafundjile’shi: “Yesu baadi mufule Maata na mukwabo mukashi.” (Yowano 11:5) Byabya bishima abileesha’shi Maata baadi mukumiine elango dya kifulo dibamupeele Yesu, aye nkufubila Yehowa na lulamato munda mwa muwa waye ooso.

5. Bwakinyi bi lutato lelo uno bwa kushaala bepaane ku myanda i na muulo ukata? Ndukonko kinyi lwatukyebe kupeta lwaluulo?

⁵ Atuuku shi lelo uno kwi myanda ibungi ikumbeene kukatusha binangu byetu mu kufubila Yehowa kukila bibaabidi mu mafuku a kala. Kitenta kya Mulami kya mu 15/9/1958 (mu Fwalanse) kibaadi kidimushe bakwetu balume na bakashi bwabadya kupela kutadiila myanda ya teknoloji bwayidya kukatusha binangu byabo mu kufubila Yehowa. Sunga mu aa mafuku, bibaadi abimweneka’shi efuku dyooso kubaadi akutuuku bintu bipya. Bintu bu ma jurnale, bisaashi, ma filme na televizion bibaadi bipalakane mbalo yooso. Kyakya Kitenta kya Mulami kibambile’shi bu byatukwete kwifubwila peepi na mafuku a ku nfudiilo a uno ndumbulwilo, “myanda ya kukumbakasha binangu byetu ayende na kufwima.” Lelo uno kukila bibaabidi kumpala, kwi bintu bibungi bilombeene kukumbakasha binangu byetu. Nkinyi kyatudi balombeene kukita bu bibakitshiine Maariya na kushaala bepaane mu kulangwila Yehowa?

6. Bafubi ba Yehowa bakwete kufuba na teknoloji naminyi?

⁶ Bafubi ba Yehowa bakwete kufuba na teknoloji bwa kulungula mukandu wibuwa. Bu kileshesho, kumpala na mu mafuku a ngoshi ya kumpala ya nsenga ishima, babaaleesheshe “Photo-Drame de la Création.” P’abo kutumika na bifwatulo abisana na ma filme eepi e na malangi na mayi mu mushindo ubaabadi na kya kulambukisha midiyo ya bantu mu bibundji bibungi. Ku nfudiilo kwa “Photo-Drame” babaadi abaleesha nsaa ya kufukama apakeekala Yesu Kidishitu na kya kumunana pa nsenga yooso ishima. Kunyima kwa mafuku, bafubi ba Yehowa babaadi batumikye na bisaashi bwa kupalakasha mukandu wa Bufumu kwi midiyo ya bantu  mu nsenga ishima. Lelo uno, tukwete kufuba na ma ordinatere na Internet bwa kulungula bantu booso mbalo yabadi beekale mukandu wibuwa sunga mu ma mbalo e kula.

7. (a) Mmasaku kinyi e kwanka mu kunemeena ku bintu bya pa nsenga? (b) Nkinyi kyatudi balombeene kudimukila? (Tala mayi e kuushi kwesaki.)

⁷ Bible etudimusha bwatudya kupela kunemeena ku bintu bya pa nsenga. Mu bino bintu mwi kukisha nsaa ibungi ku bintu abituusha uno ndumbulwilo. (Badika 1 Beena-Kodinto 7:29-31.) Bingi bya ku byabya bintu t’abibubi nya, anka mbilombeene kulwisha nsaa yeetu. Bu kileshesho, twi kusangeela kukisha kapapi, kubadika mikanda, kutala televizion, kukatala mbalo ibuwa, kwenda mu kuula bintu na kupeta kaamo kapya ka muulo kabaakatuka mu kutuuka. Bantu bebungi abakumiinaa kwisamba ku Internet, kwitumisheena mesaje sunga kukimba kuuka bipeta bipya pabitale maasha kampanda. Kadi, kwi bangi mbalombeene mpa’na kufika bapika mu kwipaana ku byabya bintu. * (Mulungudi 3:1, 6) Su atukisha nsaa yeetu ibungi ku bintu bishi na muulo, twi balombeene kukutwa kutuula binangu byetu ku mwanda wi na muulo ukata, lulangwilo lwetu kwi Yehowa.​—Badika Beena-Efeeze 5:15-17.

8. Bwakinyi bi na muulo bwatudya kupela kwikala na kifulo kya bintu bya uno ndumbulwilo?

⁸ Satana kwete kukita mwaye mooso bwa kukaka binangu byetu ku bintu bya uno ndumbulwilo na kukumba binangu byetu mu kufubila Yehowa. Nka bu bibaadi mwibikite mu siekele a kumpala, kwete kunyiisha kwibikita kano kabidi. (2 Timotee 4:10) Nyi bwakinyi abitungu twikale atwitaluula nsaa yooso bwa kuuka byatukwete kupusha pabitale bintu bya uno ndumbulwilo na kushintuula mweneno eetu. Bible etulungula bwa kupela kufula bintu bya pa nsenga. Pamutwe pa kwibifula, abitungu twikale na kifulo kikata bwa Yehowa. Su tubakitshi byabya, abiikala bipeelepeele kwatudi bwa kukookyela Yehowa na kushaala befubwile peepi naaye.​—1 Yowano 2:15-17.

9. Yesu balongyeshe balongi baaye bwabadya kwipaana ku kinyi? Mmwitulekyele kileshesho naminyi?

⁹ Kunyima kw’aye kulongyesha Maata na kalolo kooso bwa kupela kwikala mutuule binangu ku bintu bibungi, Yesu baadi mulongyeshe dingi balongi baaye dyadya dilongyesha dimune. Baadi mwibanyingishe bwabadya kwipaana mu kufubila Yehowa na Bufumu bwaye. (Badika Mateo 6:22, 33.) Yesu nabeene balekyele kileshesho kibuwa bwa kukita byabya. Tabaadi na bintu bibungi nya, tabaadi na nshibo yaaye sunga kibundji nya.​—Luuka 9:58; 19:33-35.

10. Nkileshesho kinyi kibuwa kitulekyele Yesu?

¹⁰ Yesu tabaadi mulekye kintu su nkimune bwakidya kukumba binangu byaye ku mudimo wa bulungudi nya. Bu kileshesho, kumbangilo kwa mudimo waye wa bulungudi, bibumbu bya bantu mu Kapernaume babakimbile kumukishiisha nsaa ibungi mu kibundji kyabo. Baakitshiine  kinyi? Baashadile mutuule binangu ku mudimo waye. Bambile’shi: “Ne na kya kulungula mukandu wibuwa wa Bufumu bw’Efile Mukulu [mu bingi bibundji], mwanda nyi kyabadi bantumine.” (Luuka 4:42-44) Yesu batambukile kipindji kila bwa kulungula mukandu wibuwa na kulongyesha bantu bebungi. Baadi muntu mupwidikye, anka baadi akooko na kukimba bwa kwikisha mwanda baadi afubu ngofu.​—Luuka 8:23; Yowano 4:6.

11. Nkinyi kibakitshiine Yesu pabamulungwile muntu bwa myanda yaaye’ye nabeene? Yesu baadi mulongyeshe balongi baaye dilongyesha kinyi?

¹¹ Kunyima, pabaadi Yesu alambukisha balongi baaye mwanda wi na muulo ukata, ungi muntu baamutshibile mwisambo na kwakula’shi: “Mulambukishi, lungula mukwetu mulume bw’ashi twiabeene bintu byetu bya bupyanyi.” Yesu t’abakimbile bwa kupudisha wawa mwanda wa muntu umune nya. Tabaadi mukumbakashe binangu byaye bwa kulongyesha balongi baaye nya. Anka, bakimbile bya kwibalongyesha’shi su bepaana mu kukimba bintu bibungi, abakyebe kukumbakasha binangu byabo mu kufubila Efile Mukulu.​—Luuka 12:13-15.

12, 13. (a) Nkinyi kibakitshiine Yesu kibaadi kikaanyishe bangi beena Greke mu Yeelusaleme? (b) Yesu baakitshiine kinyi pabamwipwishe Fidipe bwabadya kumukwatshisheena kwi beena Greke?

¹² Mafuku apeela abaadi Yesu bu muntu pa nsenga abaadi na twinyongoshi twibungi. (Mateo 26:38; Yowano 12:27) Baadi auku’shi akyebe kukyengeshwa bikata na kwipayibwa. Baukanga dingi’shi e na mudimo ukata wa kukita kumpala kwadya kufwa. Bu kileshesho, mu Dyalubingo mwifuku dya 9 dya mweshi wa Nisane, Yesu baatwelele mu Yeelusaleme mukaamine pa mwana a mpunda. Bibumbu bya bantu babaafikile mu kumukuukila bu Nfumwabo. (Luuka 19:38) Efuku dibalondele, Yesu basumbwile bintu bya bantu babaadi abaudisha bintu muulo ukaamine na kuyiba bantu mu ntempelo kushi moo.​—Luuka 19:45, 46.

¹³ Bangi beena Greke babaafikile ku Yeelusaleme mu kusankila Pasaka, babakemene pakumona bibaakitshine Yesu. Babaadi beepushe Fidipe mutumiibwa su babaadya kumukwatshisheena. Anka Yesu tabaadi na lukalo lwa bantu ba kumukalwila kwi beshikwanyi naaye nya. Baadi auku mwanda wi na muulo ukata. Baadi mutungunukye na kwipaana ku kikyebe ky’eshimba dya Yehowa pabimutale bwa kutuusha muwa waye bu mulambu. Nyi bwakinyi baadi mukumbushe balongi baaye’shi baadi na kya kufwa n’ashi baaba booso abamulondo abikyebe bakumiine kulambula myuwa yaabo. Bambile’shi: “Yaawa eena kifulo bwa muuwa waye eeushimisha, anka yaawa shyeeukalwila, akeekala na muwa wa looso.” Akupu Yesu baadi dingi mwibalee’shi: Nshaye akapa balongi baaye “kineemo” na kwibapa muuwa wa ikalaika. Fidipe baadi na kya kunyingisha baaba beena Greke na uno mukandu awibanyingisha ku mashimba​—Yowano 12:20-26.

14. Sunga byekala’shi Yesu baadi mutuule mudimo wa bulungudi pa mbalo ya kumpala, nkinyi kibaadi akitshi ki na muulo?

¹⁴ Pabaadi Yesu pa nsenga, mudimo wa kulungula mukandu wibuwa nyi ubaadi na muulo ukata. Sunga byekala’shi baadi mwipaane mu kulungula mukandu wibuwa, tabaadi’nka anangusheena pabitale mudimo nya. Bu kileshesho, bayiile ku musangeelo wa dibaka kubaadi mukaaluule meema bu nfinyo ibuwa. (Yowano 2:2, 6-10) Baadiile dingi bidiibwa ku mashibo a bakuuku baaye na kwa bangi babaadi abasangeela mukandu wibuwa. (Luuka 5:29; Yowano 12:2) Mwanda wi na muulo, Yesu baadi aata nsaa ya kwela nteko, kunangusheena na ya kwikisha.​—Mateo 14:23; Maako 1:35; 6:31, 32.

15. Nkinyi kibaambile Mpoolo mutumiibwa kilombeene beena Kidishitu kukita? Mushindo kinyi wadi mulekye kileshesho kibuwa?

¹⁵ Mpoolo mutumiibwa bambile’shi beena Kidishitu be’nka bu bantu abasuuku bwa nkafika ku mbalo ibula, n’ashi bwa kupudisha lubilo lwabo, abitungu bakatushe bintu byoso bilombeene kupeelesha lubilo lwabo sunga kwibaponesha. (Badika Beena-Ebreeyi 12:1.) Mpoolo  nabeene balekyele kileshesho kibuwa. Baadya kukimba kwenda nkumo bu bibaadi bakata ba bipwilo bya beena Yuuda, anka baadi mwipaane ku bintu ‘bikile byoso ku buwa.’ Baafubile ngofu mu mudimo wa bulungudi na kutambuka mu ma mbalo e bungi mpa na mu Aasiiri, mu Asie Mineure, mu Masedwane na mu Yudea. Mpoolo baadi amono kumpala efuto dyaye dya muwa wa ikalaika mwiyilu. Bambile’shi: Ami “nkuluba bi kumongo, bwa kwenda ami ooso mutadiile kumpala. Nende mwilondeene na kyankimbi.” (Beena-Fidipe 1:10; 3:8, 13, 14) Mpoolo tabaadi mwibakile nya, na byabya bibaadi bimukwashe bwa ‘kwikala mulamate Mwanana kushi kwialasheena.’​—1 Beena-Kodinto 7:32-35.

16, 17. Byatwikala bebakile sunga be bukupi twi kulonda kileshesho kya Mpoolo naminyi? Mark na Claire babakitshiine bino naminyi?

¹⁶ Nka bu Mpoolo, bamo bafubi ba Yehowa lelo uno basangule bwa kupela kwibakila bwabadya kwikala bepaane ngofu mu mudimo wa Yehowa. (Mateo 19:11, 12) Muntu shi mwibakile e na mashito apeela a kifuko pe muntu mwibakile. Anka, byatwikala beebakile sunga be bukupi, “tukatusheeyi mashito ooso” alombeene kukumba binangu byetu mu kufubila Yehowa. Abitungu tushintuule bikitshino byetu bwatudya kupela kushimisha nsaa yatudi balombeene kwikala na mushindo wa kukita bibungi mu mudimo wa Yehowa.

¹⁷ Twi na kileshesho kya Mark na Claire babaadi bakudile mwiumbo dya Galles, babaabangile mudimo wa bu mbaala-mashinda abo babaapu kalasa. Kunyima kwa’bo kwibakisheena, babaadi batungunukye na kufuba bu ba mbaala-mashinda. Anka babakimbile bya kutamisha mudimo wabo. Mark apatuula’shi: “Tubaadi banyiishe kupelepeesha nshalelo eetu p’atwe kuleka nshibo yeetu ya tudimbo tusatu na mufubo watufubanga nsaa ipeela bwa kutwela mu mudimo wa kwibaka mu nsenga ishima.” Mu bipwa 20 bishaale, mbatambukye mu ma mbalo e bungi a mu Afrique bwa kwibaka Mashibo a Bufumu. Ingi nsaa babaadi na makuta akile bupeela, anka Yehowa baadi’nka ebakwasha. Claire akula’shi: “Wawa mudimo ngwitupe muloo ukata wa kukisha efuku dyoso mu kufubila Yehowa. Twi bapete ba kuuku bebungi mu nyendo yeetu na tatwi bakutwe kintu su nkimune nya. Tu bintu tupeela tubaatudi balekye tatwi balombeene kwitupwandikisha na muloo watukwete kupeta mu kufubila Yehowa mu mudimo wa nsaa yooso nya.” Bafubi bebungi ba nsaa yooso bakwete kupusha nka byabya. *

18. Nkonko kiyi yatudi balombeene kwiyela?

¹⁸ Okwete kupusha’shi we kwikala na muloo wibungi mu mudimo oobe ofubila Yehowa su? Kwi bintu bikwete kulubisha binangu byobe ku byabya bikile byoso ku buwa su? Su mbyabya, we kukita kinyi? Pangi we kulumbuula kipaso kyobe kya kubadika na kulonga Bible. Mwisambo aulondo aukyebe kupatuula byodi mulombeene kukita byabya.