PANAADI mulombashe bipwa kitema, mbidi yande ibaadi ilekye kukula. Lelo ne na bipwa 43, kadi ne’nka penda bula bwa metre umune. Pabamwene baledi bande’shi ntankulu dingi, babaadi banyingishe bwa kufuba ngofu bwa kupela kwela binangu nsaa yooso pabitale bula bwande. Bwandja kwikala na bya kukita, naadi mutuule kitanda kya kuudisha bikuba kumpala kwa nshibo yeetu na kwibilama kalolo na mankenda. Byabya bibaadi abikaka bakidiya bebungi.

Sunga mbyabya, kufuba ngofu takubaadi kushintuule bintu byoso nya. Naadi’nka mushaale kipiindji, naadi nakalakashwa na bintu bishi su na muulo mu nshaleelo bu bula bwa kitanda kya kuudiisha. Bintu byooso bibaadi abimweneka bula misango ibidi kunkila. Naadi n’epusha lusa ami nabeene, anka bibashintulukile panaadi mulombashe bipwa 14.

Dingi efuku, bana bakashi babidi Batemwe ba Yehowa babangudile bikuba, akupu abo nkubanga kulonga nami Bible. Munda mwa mafuku apeela nabangile kumona’shi Yehowa na mpàngo yaaye ibaadi na muulo ukata kukila bula bwande. Bibaadi binkwashe bikata. Ami nkufula bikata mukanda wa Misambo 73:28. Kipindji kya kumpala kya uno verse akyakula’shi: “Mwabi wande’mi nkwikala peepi n’Efile Mukulu.”

Kifuko kyetu kibakatukile musango umune mu Côte d’Ivoire bwa nkashala mu Burkina Faso, na nshaleelo ande ooso banshintulukile bikata. Mu mbalo ibatudi kumpala, bantu babaadi bapwe kuubiila kummona ku kitanda kya bikuba. Kadi bwa beena mutumba ba mbalo yatudi binobino, naadi namweneka bu mwenyi. Bantu babaadi abantala, naadi mushaale mu nshibo munda mwa mbingo ibungi. Akupu, naadi mutentekyeshe mwabi unaadi nao wa kwifubwila peepi na Yehowa. Naadi mufundjile biro bya filiale bya Batemwe ba Yehowa, abo nkuntumina muntu e na kalolo​—misionere baadi afiki na katukutuku nkinga abetamina bu Nani bafikile mu kuntala.

Eshinda dya mbalo yatubaadi bashaale dibaadi buseene na matekye mwanda wa mafuku a mpeshi. Nani baadi apono misango ibungi na katukutuku kaaye pabaafikanga mu nkutala, anka, tabaadi mukookye nya. Dingi efuku bandungwile bwadya kuntwala ku bisangilo. Namwene’shi abitungu mbande kukatuka ku nshibo yande, nkumiine kupusha buufu bu bibaabadi abantala kwi bantu. Kukatusha byabya, kuntwala kunyima kwa katukutuku kubaadi akutenteka bushito kwi atambusha. Sunga mbyabya, naadi mukumiine na kutentekyesha kipindji  kya kabidi kya verse andi mukumiine akyakula’shi: “Kisuukilo kyande kii kwi Yehowa.”

Ami na Nani tubaadi atupono ingi nsaa mu matekye, anka, bu byatubaadi bafule bisangilo, tabibaadi abitukalakasha nya. Kubaadi kwilekeena kukata pankatshi pa bantu abansepanga paasha na bantu be na kifulo na muloo banaadi mupete ku Nshibo ya Bufumu! Naadi mubatshishiibwe kunyima kwa myeshi kitema.

Kipindji kya kasatu kya verse andi mufule ngofu akyamba bino: “Bwa’shi mmone bya kuukisha byooso byaakitshi.” Naadi nauku’shi bulungudi abukyebe kwikala lukalakasho lukata kwandji. Ntaandubaa musango wa kumpala unaadi mulungule ku nshibo na nshibo. Bakulu na bakinga bababangile kuntala, kundonda na kupwandjikisha byankwete kutambuka. Bibaadi bintape kwishimba, anka naadi natentekyesha’shi be na lukalo na Mpaladiiso nka byandi naye lukalo; nyi bibaadi abinyingisha.

Bwandja kwikala nantambuka kushi lutato, nakimbile nkinga ya bipombo bisatu. Muntu anaadi natuuku naaye mu bulungudi baadi ansukuma mu mwengye, akupu naadi naalaala’mi nabeene mu ngalala. Sunga byekala’shi ku mbangilo bibaadi lukalakasho, bibaadi bimpe muloo ukata kunyima kwa mafuku apeela, ami nkubanga mpa na mudimo wa bumbaala mashinda mu kipwa kya 1998.

Naadi na balongi bebungi ba Bible, na bananka ba kwabadi babaadi batambule. Kukatusha byabya, mukwetu mukashi umune baadi mukumiine bya binyibinyi! Kumona bibaadi byende bangi kumpala bibaadi abinnyingisha mu nsaa inaadi na lukalo lwa kunyingishibwa. Dingi efuku panaadi nakumbu malaria, napetele mukanda aufiki mu Côte d’Ivoire. Naadi mubangye kulonga Bible na mulongi a ku kilongyelo kikata kya mu Burkina Faso, ami nkumupa ungi mukwetu mulume bwa kutungunuka naaye. Kunyima yawa muntu bakatukile eenda mu Côte d’Ivoire. Napushiishe muloo ukata pa kuuka’shi taadi mulungudi shi mubande kubatshishibwa!

Naadi napete bukwashi naminyi? Ungi ndumbulwilo atuushaa bukwashi bwa bantu balemane bandungwile bwa kundongyesha bya kutela. Ungi mulongyeshi bamwene byankwete kufuba bambile’shi: “Abitungu tukulongyeshe bya kukita nsabanga.” Abo nkundongyesha bya kukita nsabanga. Naadi nakitshi nsabanga ya kutumpa bilamba na ya kusuula mu nshibo. Bantu babaadi abakumiina nsabanga yande na kulungula bangi bwabadya kwiyuula. Ami nabeene naadi nende na katuku nkinga kande mu kupa bantu nsabanga.

Mwanda wa malwa mu kipwa kya 2004, naadi na kya kwimika mudimo wa bu mbala-mashinda pa mwanda wa malaadi a mongo. Sunga mbyabya, naadi mutungunukye na kwipaana mu bulungudi.

Bantu babaadi abakula’shi naadi naukiibwa mwanda wa kwibasepesha. Naadi na tubingilo twi bungi bwa kwikala na muloo mwanda mwabi wande’mi nkwikala peepi n’Efile Mukulu.​—Mwisambo wa Sarah Maiga.