1, 2. Bantu mbelekeene na nyema ku kinyi?

BONGO bwa muntu bwi na midimo ibungi. Bu kileshesho, bantu be na ngobesha ya kulonga ludimi. Ludimi alwitupa mushindo wa kubadika, kufunda, kwakula na kupusha byatuteemesha. Abwitupa dingi ngobesha ya kwela nteko na kutumbisha Yehowa mu misambo. Ino myanda yooso ayitwikasha belekeene na nyema. Beena siyanse ta mbalombeene kupusha kalolo mushindo aupete bongo bwetu ngobesha ya kukita bino bintu byooso bya kukaanya nya.

² Ngobesha ya kwakula, nkya buntu akifiki kwi Yehowa. (Misambo 139:14; Bifumbulwe 4:11) Mmwitupe kingi kya buntu akitwikasha belekeene na nyema. Bantu babaadi bapangibwe “kwifwanyiko dy’Efile Mukulu”. Twi na bulungantu bwa kwisangwila na bino abitupa ngobesha ya kwiatshila bitshibilo. Twi kusangula byatudi balombeene kufubisha ludimi lwetu bwa kufubila na kutumbisha Yehowa.​—Kibangilo 1:27.

3. Nkinyi kitupe Yehowa akiitwikasha na binangu?

³ Yehowa mmwituleeshe bya kumufubila na kumutumbisha mu Bible. Bible mbamwaluule mushima sunga bipindji mu ndimi ikile ku 2 800. Nsaa yatunangushena ku abyakula Bible, twi kubanga kwela  binangu mu mushindo awelaa Yehowa. (Misambo 40:5; 92:5; 139:17) Akupu, binangu bya Yehowa abikyebe kwitupa kiukilo kibuwa na kwitufisha ku muuwa wa ikalaika.​—Badika 2 Timotee 3:14-17.

4. Kunangushena akuleesha kinyi? Nkonko nkinyi yatukyebe kwaluula?

⁴ Kunangushena akuleesha kutuula binangu ku kintu kampanda na kwela meeshi ngofu pa kyanka. (Misambo 77:12; Myeele 24:1, 2) Atupete bukwashi bukata su atunangushena ku byatulongo pabitale Yehowa na Yesu. (Yowano 17:3) Mu uno mwisambo, atukyebe kwaluula ku ino nkonko ayilondo: Twi kubadika naminyi mu mushindo watudi balombeene kunangushena kalolo? Twi kunangusheena ku kinyi? Na nkinyi kilombeene kwitukwasha bwa kunangushena efuku dyooso na kwikupetela muloo?

5, 6. Nkinyi kilombeene nkukwasha bwa kutentekyesha na kupusha kalolo byobadika?

⁵ Tobopwile kumona’shi kwi bingi bintu byodi mulombeene kukita kushii kwela binagu ku byanka bu kuyooka, kutambuka sunga kusunya nkinga? Mbya malwa, mwanda we kubadika kushii kwela binangu. Pangi we kubanga kwela binangu ku bingi bintu p’okwete kubadika. We kukita kinyi bwashi byabya tabikufikilanga? Bii na muulo ukata bwa kutuula binangu ku byatubadika na kunangushena pabitale kyabikyebe kuleesha. Akupu, p’ofiki ku nfudiilo kwa kikoso sunga kwa ka mutwe ka mwanda ka mukanda obadika, imana kapindji bwa kunangushena ku byokyokatuka mu kubadika. Ela binangu ku myanda ibolongo na kushinkamisha’shi bwebipusha kalolo.

⁶ Beena siyanse mbafikye mu kutundula’shi mbibofule bwa kutentekyesha kintu su wekibadika n’eyi adipushika. Mupangi eetu auku byabya, nyi bwakinyi baadi mulungule Yooshwa bwa kubadika mukanda wa Mwiya “n’eyi diikye” bwadya kwidibadika na lwishinko. (Badika Yooshwa 1:8.) Kubadika Bible n’eyi adipushika akukukwasha bwa kutuula binangu ku byobadika na kwibiteentekyesha dingi.

7. Nsaa kinyi ibuwa yatudi balombeene kunangushena ku byatubadika mu Bible? (Tala kifwatulo ki kumbangilo.)

⁷ Abitungu kwitatshisha bikata bwa kunangushena na kutuula binangu ku byatukwete kulonga. Nyi bwakinyi bi buwa kunangushena p’oshii mukookye na pa mbalo ishii tuleo, ikutwe bintu bilombeene kukumbakasha binangu byobe. Mufundji a misambo baadi anangushena pabaadi abuuku ku lusala bufuku. (Misambo 63:6) Yesu baadi muntu mupwidikye, baadi mukimbe mbalo ishii tuleo bwa kunangushena na kwela nteko.—Luuka 6:12.

8. (a) Twi balombeene kunangushena pa myanda kinyi? (b) Yehowa apushaa naminyi nsaa yatulungula bangi pa bimutale?

⁸ Kukatusha byabya byobadika mu Bible, kwi bintu byodi mulombeene kunangushena. Bu kileshesho, nsaa yomono bipangwa bya Yehowa abikusankisha, imana kapindi, akupu, weyipushe’shi: ‘Abindongyesha kinyi pabitale Yehowa?’ Kwela binangu mu wawa mushindo akukutakula bwa kutumbula Yehowa mu luteko. Na dingi su we na bangi bantu, okumiina kwibalungula bii moodi. (Misambo 104:24; Bikitshino 14:17) Yehowa ateemesha na kupusha muloo patunangushena, pa twele nteko na patulungula bangi pa bimutale. Bible etushinkamisha’shi: ‘Mukanda ubafundjilwe kumpala kwaye, bwa kutentekyesha baaba abatshiinyi Yehowa na [abanangushena] p’eshina dyaye.’​—Malakii 3:16.

9. (a) Mpoolo balungwile Timotee bwa kunangushena ku myanda kinyi? (b) Nsaa yatwilumbuula bwa kwenda mu bulungudi twi bya kunangushena ku myanda kinyi?

⁹ Mpoolo mutumibwa balungwile Timotee bwa’shi anangusheene pa bitale ngakwilo, mwikeelo, na pa malongyesha aaye tala akalakasha bangi. (Badika 1 Timotee 4:12-16.) N’obe naamu we kunangushena pa ino myanda. Bu kileshesho,  abitungu wate nsaa ya kunangushena pwelumbuula bwa muntu olongaa naye Bible. Nangushena bwa mulongi oobe na kukimba lukonko sunga kileshesho kilombeene kumukwasha bwa kwenda kumpala. Nsaa ywelumbuula bwa mulongi a Bible mu uno mushindo, lukumiino loobe alunyingi na wekala mulongyeshi a Bible ebuwa na sha kibobo. Na dingi okapete muloo nsaa yonanangushena kumpala kwa kwenda mu bulungudi. (Badika Esdrase 7:10.) Pangi we kubadika shapitre a mukanda wa Bikitshino e bya nkukwasha bwa kunyiisha kwikala na katshintshi mu bulungudi. We kunangushena dingi ku maverse a mu Bible oodi mulumbuule bwa’shi otumikye nao bwa kupa bantu mikanda. (2 Timotee 1:6) Nangushena pabitale bantu ba mu teritware na myanda yodya kwakula ilombeene kwibakuma. Nsaa ywelumbuula mu uno mushindo, wekala na mushindo wa kufuba na Bible kalolo bwa kulungula bangi mukandu wibuwa.​—1 Beena-Kodinto 2:4.

10. Mmyanda kinyi dingi ibuwa yatudi balombeene kunangushena?

¹⁰ Ngimo myanda kinyi yoodi mulombeene kunangushena? Su ofundaa myanda nsaa yabakitshi mwisambo wa bantu booso, na mu bikongeeno, kimba nsaa ya kutaluula yaaya myanda. Nsaa yokitshi byabya, eyipushe’shi: ‘Ndilongyesha kinyi dinapete pabitale Efile Mukulu na pabitale ndumbulwilo aaye?’ Na dingi we kunangushena pa myanda i mu jurnale a Kitenta kya Mulami na Réveillez-vous! a mweshi ooso na i mu mukanda upya utuukye ku kikongeeno. Nsaa yoobadika Annuaire, kunyima kwa kubadika mwanda kampanda imana kapindji, nangushena pa wanka, bwashi ukukume kwishimba. Nsaa yobadika mikanda yeetu, we mulombeene kushimika kasele pa mwanda kampanda na kufunda tu myanda mbwipi. Kukita bino akukyebe nkukwasha nsaa ywelumbuula bwa kwalukiila mu kutala bantu, bwa nkatembela mikooko, sunga nsaa yolumbuula mwisambo. Mwanda wi  na muulo, nsaa youmiina na kunangushena pa myanda yobadika, olekye nsaa ya’shi myanda ibolongo ikukume kwishimba na kuleka dingi nsaa ya kutumbula Yehowa bwa myanda ibuwa ibolongo.

11. Mmukanda kinyi wi na muulo ngofu watudi balombeene kunangushena pa myanda i mwanka, na kukita bino akwitukwasha naminyi? (Tala na mayi e kuushi kw’esaki.)

¹¹ Byabya, Bible nyi mukanda wi na muulo ukata watudi balombeene kunangushena pa myanda i mwanka. Kadi we kukita naminyi su dingi efuku bakukandjika kwikala na Bible? * Muntu su ngumune ta mmulombeene nkunyenga mushindo wa kunangushena pa myanda yoodi mulamiine, bu verse oodi mufule ngofu, sunga misambo ya Bufumu. (Bikitshino 16:25) Na kikudi ky’Efile Mukulu akikutentekyesha myanda yoodi mulongye, ayikukwasha bwa kushaala na lulamato.​—Yowano 14:26.

12. Mmushindo kinyi oodi mulombeene kulumbuula kwibadikila koobe kwa Bible?

¹² Mmushindo kinyi oodi mulombeene kulumbuula bwa kwibadikila Bible efuku dyooso? Mu angi mafuku a mu lubingo, pangi we kubadika na kunangushena pa kipindji kya kubadika kwa Bible kwa mu Kalasa ka mudimo wa Teokrasi kwa mu lwalwa lubingo. Angi mafuku we mulombeene kubadika ma Evanjile a Mateo, Maako, Luuka, na a Yowano na kunangushena pabitale myanda ibakwile na ibakitshine Yesu. (Beena-Looma 10:17; Beena-Ebreeyi 12:2; 1 Mpyeele 2:21) Na dingi twi na mukanda auleesha mu mulongo myanda ibakitshikile mu muwa wa Yesu. Uno mukanda ngulombeene nkukwasha bwa kushinguula myanda ibungi nsaa yobadika mu ma Evanjile.​—Yowano 14:6.

13, 14. Bwakinyi bi na muulo bwa’shi tutungunukye na kunangushena pabitale Yehowa na Yesu, na bino abikyebe kwitusukuma mu kukita kinyi?

¹³ Kunangushena pabitale Yehowa na Yesu kwi bya kukwasha muntu bwa kufika mwina Kidishitu munyingye na kulama lukumiino lunyingye. (Beena-Ebreeyi 5:14; 6:1) Muntu akisha penda nsaa ipeela mu kunangushena pabitale Efile Mukulu akashimisha ku kapeelakapeela kipwano kyaaye na Yehowa sunga kutshiba kyanka musango umune. (Beena-Ebreeyi 2:1; 3:12) Yesu baadi mwitudimushe’shi su twakutwa kuteemesha, sunga kukumiina Eyi dy’Efile Mukulu “na mashimba awule kalolo na bululame,” ‘taatwidilama’ nya. Anka, pa mwanda wa ‘kafumbakanyi, lwabi lwa mmono, na miloo ya pa nsenga abitwanyiina ku mashimba.’​—Luuka 8:14, 15.

¹⁴ Byabya tutungunukyeyi na kunangushena pa myanda i mu Bible na kushinguula Yehowa kalolo. Kukita bino nkulombeene kwitutakula mu kwambula ngikashi yaaye na bumuntu bwaye ngofu. (2 Beena-Kodinto 3:18) Tutungunukyeyi na kulonga myanda ibungi pabitale Nsheetu e mwiyilu na kumwambula bwa looso. Uno nyi mmwanda wa kineemo kikata!​—Mulungudi 3:11.

15, 16. (a) We mupete muloo pa kunangushena pabitale Yehowa na Yesu naminyi? (b) Bwakinyi ingi nsaa bi kwikala bukopo bwa kunangushena, anka bwakinyi abitungu twikale atwikitshisha?

¹⁵ Kunangushena pabitale Yehowa na Yesu akukukwasha bwa kushaala na katshintshi bwa bya binyibinyi. Katshintshi koobe akakyebe kukankamika bakwetu na bangi bantu bofumankana naabo mu bulungudi. Nsaa yonangushena pa bikukitshine Yehowa p’aye kutuusha mulambu wa nkuulo wa Yesu, otungunuka na kwata na muulo kipwano kyoobe n’Efile Mukulu. (Beena-Looma 3:24; Jaake 4:8) Mark, ungi mukwetu a mu Afrique du Sud baadi mukite bipwa bisatu mu lukano pa mwanda wa lukumiino  lwaye, bambile’shi: “Kunangushena kwi nka bu mushindo wibuwa wa kukisha kapapi. Su atunangushena ngofu ku myanda ya mu kikudi, atukanyiisha kutundula myanda ipya pabitale Efile Mukulu eetu Yehowa. Ingi nsaa pambofula sunga kwinyongola pabitale mafuku e kumpala, naata Bible na kubanga kunangushena pa maverse e mwanka. Napusha abintaadisha eshimba ngofu.”

¹⁶ Mu uno ndumbulwilo mwi myanda ibungi ilombeene kwitulubisha mu mushindo wabidi bikale bukopo bwa kupeta nsaa ya kunangushena pa myanda ya mu Bible. Patrick, ungi mukwetu a mu Afrique du Sud, akula’shi: “Binangu byande bi nka bu kasheete ka mikanda kauule na myanda ibungi, yokumiina na yoshookumiina, byabya abitungu kwiyilonga efuku dyooso. Pantala myanda i mu binangu byande, misusa ibungi nemusanganaa ‘myanda ishii buwa,’ nakitaa luteko kwi Yehowa bwa’shi ikatukye mmone bya kunangushena na binangu bibuwa. Sunga kukita bino nkulombeene kwata nsaa ipeela kumpala kwa’shi mbangye kunangushena ku myanda ya mu kikudi, n’epushaa peepi ngofu na Yehowa. Kukita bino akufungulaa binangu byande bwa kupusha bya binyibinyi kalolo.” (Misambo 94:19) Oolo, mu mishindo yooso, atupetaa miloo ibungi nsaa yatubadika na kunangushena pa myanda i mu Bible efuku dyooso.​—Bikitshino 17:11.

17. We kupeta nsaa ya kunangushena naminyi?

¹⁷ Bamo ababukaa ku namashika ngofu bwa kubadika, kunangushena, na kuteka. Bangi abebikitaa kumpala kwa kudya mu midi. Pangi namu bwo’be nsaa ibuwa bwa kubadika Bible nkukyoolwa sunga kumpala kwa kulaala. Bangi namu abakuminaa kubadi Bible kunakashika na kumpala kwa kulaala. (Yooshwa 1:8) Mwanda wi na muulo nkwikasha yaaya nsaa bu “kipindji kyooso kibuwa,” kwamba’shi kukatusha myanda ishii na muulo bwa kumona bya kunangushena ku Eyi dy’Efile Mukulu efuku dyooso.​—Beena-Efeeze 5:15, 16.

18. Bible mmulee kinyi kwi bantu booso abanangushena mu Eyi dy’Efile Mukulu efuku dyooso na abatumikila myanda yabalongo?

¹⁸ Bible etulaa’shi Yehowa akeelela bantu booso abanangushena mu Eyi dyaye na abetatshisha bwa kutumikila myanda yabalongo myabi. (Badika Misambo 1:1-3.) Yesu bambile’shi: “Baa-sha-mwabi mbano abateemesha Eyi dy’Efile Mukulu na abeedilama!” (Luuka 11:28) Anka, mwanda wi na muulo ukata ngwa kunangushena mu Eyi dya Yehowa efuku dyooso, mwanda akwitukwasha bwa kukita myanda mu mushindo aumutumbisha. Nsaa yatukitshi byabya, Yehowa etufutu na muloo kubanga binobino na muwa wa ikalaika mu ndumbulwilo aaye mupya.​—Jaake 1:25; Bifumbulwe 1:3.