1, 2. Bwakinyi Bible apwandikisha ngobesha yeetu ya kwakula na kaalo?

MU KIPWA kya 1871, kaalo kababangile kupya mitamba ya Wisconsin mu État-Unis. Kabaadi kapalakane bukidi ako nkushiika mitshi peepi na midiyo ibidi. Kabaadi kayipee bantu bakile pa 1 200. Kashaa takwekeele kangi kaalo kayipee bantu bu kaaka ka mu État-Unis nya. Abimweneka’shi tu ntolontolo atutuukaa nsaa ayikidi mashuwa a ndjandja mu mutamba nyi tubaadi tufwishe kano kaalo kakata. Bino abitutentekyesha mayi a mu Bible aakula’shi: “Talaayi mwi kaalo kapeela mwa kashiikila mutamba ukata!” (Jaake 3:5) Bwakinyi Jaake mufundji a Bible bambile bino?

² Apatuula’shi: “Ludimi naamu nkaalo.” (Jaake 3:6) “Ludimi” aluleesha ngobesha yeetu ya kwakula. Akupu, nka bu kaalo, byatwakula mbilombeene kufwisha masaku akata. Bishima byatwakula bi na bukitshishi bukata kwi bangi. Bible etulungula’shi byatwakula bi kwibapa muwa sunga lufu. (Myeele 18:21) Byabya abikyebe kulesha’shi tabitungu twakula mwanda twi kwisamba myanda ibubi? Ta bi byabya nya. Ta twi balombeene kupela kufuba na kaalo mwanda ke kwitushiika. Anka, atwikalaa na budimu muyiile byatufubu nako. Bu kileshesho, twi kufuba na kaalo bwa kuteeka, bwatudya kupeta kabobo na bwatudya kwikala mwitaata. Mu mushindo umune, su atutaluula kalolo ngakwilo  eetu, twi kufuba na yaaya ngobesha bwa kutumbisha Yehowa na kukwasha bangi.​—Misambo 19:15.

3. Mmyanda kinyi isatu ayitukwasha bwa kukankamika bangi nsaa yatukwete kwakula?

³ Yehowa mwitupe ngobesha ya kulungula bangi byatunangusheena na byatupusha, mu kwisamba sunga mu kuleesha na maasa eetu. Twi kufuba na kino kya buntu kibuwa bwa kunyingisha bangi naminyi? (Badika Jaake 3:9, 10.) Abitungu tuukye nsaa ya kwakula, kyatudya kwakula, na kipaso kilombeene kwakula.

4. Nsaa kinyi ayitungu kuumiina?

⁴ Ingi nsaa bibuwa kuumiina. Bible akula’shi kwi “kipungo bwa kuumiina.” (Mulungudi 3:7) Bu kileshesho, atuumiina nsaa ayakula bangi bwa kwibalesha kaneemo. (Yoobo 6:24) Na dingi, tatwi balombeene kwakula myanda yeetu itutale na yabashii balombeene kwiuka kwi bangi. (Myeele 20:19) Nsaa ayitufitshisha muntu munda, atwikala na binangu su atuumiina na kupela kwakula mwanda.​—Misambo 4:4.

5. Twi kulesha’shi twi na lutumbu kwi Yehowa byadi mwitupe ngobesha ya kwakula naminyi?

⁵ Anka kwi dingi nsaa ibuwa kwakula. (Mulungudi 3:7) Kwi nsaa ya kutumbisha Yehowa, kukankamika bangi, kuleesha byatupusha, na kulungula bangi nkalo yeetu. (Misambo 51:15) Na su tubafubisha ngobesha yetu ya kwakula mu kino kipaso, atulesha’shi twi na lutumbu kwi Yehowa byadi mwitupe kino kya buntu. Akupu, nsaa ayitupa kuukw’etu kyabuntu kibuwa, atukumiinaa kwikifubisha kalolo.

6. Bwakinyi bi na muulo kusangula nsaa ibuwa ya kwakula?

⁶ Bwakinyi bi na muulo kusangula nsaa ibuwa yatudya kwakula? Mukanda wa Myeele 25:11 awakula’shi: “Kishima kyaakudiibwe pa nguba na pa mbalo yaakyo kii buu kintu kipwibwe na oòlò, kyalengyeshwa na kyamo ky’ebàkanyi.” Kintu kipwibwe na oòlo ki buwa bukile, anka ki kwikala buwa bukikilekile nsaa yakidi mu kyamo ky’ebàkanyi. Mu kipaso kimune, twi balombeene kwikala na mwanda wibuwa wa kulungula muntu. Anka su tubasangula nsaa ibuwa ya kwakula, twi balombeene kukwasha dingi yawa muntu ngofu. Twi balombeene kwibikita naminyi?

7, 8. Bakwetu ba mu Japon mbambule kileshesho kya Yesu naminyi?

⁷ Su twakula mu nsaa ibubi, bantu ta mbalombeene kwitupusha sunga kukumiina kyatwakula nya. (Badika Myeele 15:23.) Bu kileshesho, mu mweshi wa Kasatu mu kipwa kya 2011, kubaadi kutshinka kwa nsenga na kipapi kikata kya tsunami bibalwishile bibundji bibungi bya kutunduka nguba kw’eumbo dya Japon. Bantu bakile pa 15 000 babafwile. Sunga byekala’shi Batemwe bebungi babaadi bashimishe bifuko na ba kuuku baabo, babaadi bakumiine kufuba na Bible bwa kukwasha bangi babaabadi nabo mu wawa mwanda umune. Kadi babaadi abauku’shi bebungi ba ku baaba bantu babaadi beena Bouddha bashabauku bibungi pabitale Bible. Byabya, pa mutwe pa kwibalungula pabitale lusangukilo, bakwetu babaadi bebanyingishe p’abo kwibapatulwila bwakinyi yaaya myanda ibubi ayifwila bantu bebuwa.

⁸ Baaba bakwetu babaadi bambule kileshesho kya Yesu. Baadi auku nsaa ya kuumiina kadi, auku dingi nsaa ya kwakula. (Yowano 18:33-37; 19:8-11) Akupu, Yesu baadi atengyela nsaa ibuwa ya kulongyesha balongi baaye bingi bintu. (Yowano 16:12) Bakwetu ba mu Japon babaukile nsaa ibuwa ya kulungula bantu pabitale lusangukilo. Bipwa bibidi na kipindji kunyima kwa tsunami, babaadi bape baaba bantu trakte akula’shi: “Bafwe be kwikala dingi na muwa?” Bantu bebungi babaatshile trakte abo kunyingishibwa na myanda ibaabadi babadikye mwanka. Abitungu twikale atunangusheena pabitale bipikwa na myanda ayikumiina bantu ba mu teritoire eetu bwatudya kumona nsaa ibuwa ya kwisamba nabo.

9. Mmu myanda kinyi ingi mwatudi balombeene kutengyela nsaa ibuwa ya kwakula?

 ⁹ Mmu myanda kinyi ingi amutungu’shi tutengyele nsaa ibuwa ya kwakula? Pangi babakwakula mwanda ubakufiitshisha munda. Pamutwe pa kwaluula musango umune na kwakula myanda ipatakane, atuleesha binangu su atwimana kapindji na kwela binangu kalolo pa kwiyipusha’shi: ‘Bakutwa kuleesha kalolo su? Abitungu’nka nesambe naaye pabitale bibaakula?’ Abikala buwa su atuumiina kushii kwakula. Kadi, su kwi tubingilo twibuwa twa kwisamba naaye, abitutungu tutengyele na apetupu nsungu. (Badika Myeele 15:28.) Pangi namu atukimbi kunyingisha beena kifuko neetu bashii Batemwe bwa kuuka Yehowa. Abitungu twikale na lwishinko pa kunangusheena kalolo ku byatukyebe kwakula na kukimba nsaa yabadi balombeene kwituteemesha.

10. (a) Bwakinyi abitungu twikale atusangula bishima bya kwakula? (b) Abitungu tusumbule ngakwilo kinyi?

¹⁰ Byatudi balombeene kwakula bi kwikasha bangi bibuwa sunga kwibatapa ku mashimba. (Badika Myeele 12:18.) Bantu bebungi mu uno ndumbulwilo a Satana “mbasambule ludimi lwabo bu mwele” sunga’shi “bishima byabo bii na lulengo” mwanda abakimbi penda bya kutapa bangi ku mashimba na kwibafiitshisha munda. (Misambo 64:3) Bebungi abambula ngakwilo abatala mu ma filme na ku televizion. Anka, tabitungu’shi beena Kidishitu beekale abaakula bintu bibubi, sunga mu miseku. Miseku ibuwa na ngilombeene kukitshisha bwa’shi bantu banyiishe kusankila myanda yatwakula. Anka tabitungu kwakulanga myanda ikutwene, kwamba’shi kwakula myanda ilombeene kufiitshisha bangi munda sunga kukaa muntu bwa kusepesha bangi. Bible mmupeleshe beena Kidishitu bwa kwikala na bishima “bya kukaana mulomo.” Akula dingi’shi: “Kishima kii bubi su nkimune takya kutuuka mukanwa mwenu; anka su byatungiibwa, nutuushe bishima bii buuwa, bilombeene kukwasha mu lukumiino na kutwadila abeebipusha mwabi.”​—Beena-Efeeze 4:29, 31.

11. Nkinyi kilombeene kwitukwasha bwa kusangula bishima bibuwa?

¹¹ Yesu balongyeshe’shi: “Akyamba mukanwa, nkino akituukila mwishimba.” (Mateo 12:34) Bino abikyebe kwamba’shi myanda yatwakula ngilombeene kuleesha bi munda mwetu. Byabya su twi na kifulo na bantu na atwituulu pa mbalo yaabo, atukimbi kalolo bishima byatudi balombeene kwibalungula. Atwakula’nka myanda ibuwa na ayikankamika.

12. Nkinyi dingi kilombeene kwitukwasha bwa kusangula bishima bibuwa?

¹² Abitungu kwitatshisha ngofu bwa kwikala na ngakwilo ebuwa. Sunga Nfumu Salomone baadi na binangu, ‘bakitshine mwaye mooso bwa kupeta myaaku ibuwa’ bwa’shi myanda ibaadi mufunde ikale ilombane ibuwa kubadika. (Mulungudi 12:9, 10) Nkinyi kilombeene kwitukwasha bwa kushinguula myanda yatwakula? Twi bya kutala mu Bible na mu mikanda yeetu bwa kuuka ingi mishindo ya kwakula. Twi balombeene kukimba akipushisha bishima byatushabauku kyabileesha. Twi balombeene kulonga kileshesho kya Yesu bwa kuuka bya kwakula mu mushindo aukwasha bangi. Baadi auku kalolo kyadya kwakula mwanda Yehowa baadi “mumulambukishe bya kwakula byadya kumona bya kusamba mubofule.” (Yeeshaya 50:4) Bi na muulo dingi bwa kunangusheena pabitale bukitshishi bwi na myaku yeetu kwi bangi. (Jaake 1:19) Twi balombeene kwiyipusha’shi: ‘Su nakula mwanda kapanda muntu e kupusha kyankyebe kumulungula su? Apusha naminyi?’

13. Bwakinyi abitungu twikale na ngakwilo mupeelepeele kupusha?

¹³ Mu Isaleele abaadi abeele mpungi bwa kudimusha bantu. Kwi mpungi ibadi ayilesha’shi abitungu bantu bebungye. Ingi namu ibaadi ayilesha’shi abitungu basalayi bende mu ngoshi.  Banda kwela binangu su mpungi tangipushikye kalolo, basalayi babadya kukita naminyi? Bible apwandikisha mpungi ayipushika kalolo na bishima bipeelepeele kupusha. Su tatupatuula myanda kalolo, byatwakula bi kutwesha bantu mu kabulakanyi sunga kwibatakula bwa kukumiina myanda ishii ya binyibinyi. Nyi bwakinyi atukumiina kwikala na ngakwilo apushika kalolo anka abitungu twikale na budimu bwa’shi tala twakutwa bukalanga sunga kaneemo mu ngakwilo eetu.​—Badika 1 Beena-Kodinto 14:8, 9.

14. Nkinyi akileesha’shi Yesu baadi na ngakwilo mupelepeele kupusha?

¹⁴ Mu Mateo shapitre 5 na ku 7 mwi bileshesho abilesha mushindo ubaadi Yesu musangule bishima bipeelepeele kupusha. Mu mwisambo waye, tamukimbe bya kukaanyisha bantu pa kwakula bishima bibukopo sunga bishii na muulo nya. Na dingi tabaadi akula myanda ayitapa bantu ku mashimba. Yesu baadi mulongyeshe myanda i na muulo ukata, anka bishima bibaadi mwakule bibaadi bibofule kupusha. Kileshesho, Yesu baadi akyebe kushinkamiisha balongi baaye’shi tabekalakashanga pa mwanda wa byakudya efuku dyooso. Aye nkwibapatulwila’shi misusa yooso Yehowa adishaa tonyi. Akupu, aye nkwibayipusha’shi: “Anwe ta nwi na kinêmo kikilekile pe kya tonyi?” (Mateo 6:26, EEM) Na penda ano mayi apeelepeele, Yesu bakwashile balongi baaye bwabadya kunyingishibwa na kupusha dilongyesha dikata.

15. Bwakinyi abitungu twikale na ngakwilo a kalolo?

¹⁵ Kipaso kyatwisamba na bangi ki kwikala na muulo ukata kukila byatwibalungula. Bantu babaadi abakumiina kupusha Yesu mwanda baadi akula “mayi a kalolo” sunga ngakwilo ebuwa. (Luuka 4:22) Nsaa yatudi na ngakwilo a kalolo, bantu abanyiisha kusankila kwituteemesha na kukumiina byatwakula. (Myeele 25:15) Su atuneemeka bangi na kwituula pa mbalo yaabo atwikala na ngakwilo a kalolo kwabadi. Nyi bibakitshiine Yesu. Bu kileshesho, pabamwene bibaadi abikitshi kibumbu kya bantu bwa kumuteemesha, baadi na muloo wa kushala nabo bwa  kwibalongyesha. (Maako 6:34) Sunga pabaabadi abamukaa kwi bantu, Yesu tabaadi ebaalwisha nya.​—1 Mpyeele 2:23.

16, 17. (a) Twi kwambula kileshesho kya Yesu patwisamba na beena kifuko na ba kuuku beetu naminyi? (b) Ungi nyina mwana balesheshe kalolo mu ngakwilo aaye naminyi? (Tala kifwatulo ki kumbangilo.)

¹⁶ Sunga byekala’shi twi bafule beena kifuko na ba kuuku beetu, twi balombeene kwikala na ngakwilo e bubi mwanda atwibauku kalolo. Twi kunangusheena’shi tabitungu kwikala bapasukye patwisamba. Anka, Yesu tabaadi na ngakwilo e bubi pabaadi esamba na ba kuuku baaye nya. Pabaabadi abekakeena munkatshi mwabo bwa kuuka baadi mukile bakwabo, Yesu baadi mwibaludikye na mayi a kalolo aye nkwibapa kileshesho kya mwana mukinga bwa kwibakwasha bwa’shi bashintuule binangu byabo. (Maako 9:33-37) Bakulu mbalombeene kwambula kileshesho kya Yesu pa kulanga bangi na kalolo.​—Beena-Galate 6:1.

¹⁷ Sunga apakula muntu mwanda awitufiitshisha munda, bibuwa twisambe naaye na kalolo. (Myeele 15:1) Bu kileshesho, mwana e mu bipwa ekumi a ungi mukashi mufwishe mulume baadi amba’shi afubila Yehowa aku namu akitanga myanda ibubi. Bino bibaadi bikalakashe ungi mukwetu mukashi mu kakongye aye nkulungula nyinaye’shi: “We mukushe mwan’obe bibubi.” Nyina mwana baadi muumiine kapindji aye nkumwaluula’shi: “Eyendo’shi kulongyesha mwana takumushintuula musango umune nya, kadi mu kumulongyeshanga ende na kushintuluka kapeelakapeela. Ongipushe uno mwanda kunyima kwa Harmagedone; yaaya nsaa atukashinkamisha byandi mumukushe.” Bu bibaadi nyina mwana muleeshe lwishinko na ngakwilo a kalolo kwi mukwetu mukashi, kipwano kyabo kibaadi kitungunukye. Akupu, mwana’ye bapushile bibambile nyinaaye, aye nkumona’shi nyinaaye kya mukulupila bwa kushintuluka. Aye nkwimika kipwano na ba kuuku bebubi, aye nkubatshishiibwa, akupu kunyima kwa mafuku, babangile kufuba ku Betele. Bino abileesha’shi mwanda ooso watwisamba na bakwetu, beena kifuko sunga bantu batusha’bauku, abitungu’shi bishima byetu biikale’nka “biibuwa, bii mwenyi.”​—Beena-Kolose 4:6.

18. Twi kulonda kileshesho kya Yesu mu ngakwilo naminyi?

¹⁸ Ngobesha ya kulungula bangi byatunangushena na byatupusha ngikale binyibinyi kya buntu akifiki kwi Yehowa. Su atulondo kileshesho kya Yesu, atwikala atusangula nsaa yatudi balombeene kwakula, kupasukila kyatukyebe kwakula na kwikala’nka na ngakwilo a kalolo. Byabya, twikaleyi na bishima abinyingisha bangi na abisangasha Yehowa.