Banda kupwandikisha’shi bwende mu kutemba mu eumbo dyenyi bwa musango wa kumpala. Bofumankana na bantu, bipikwa, byakudya, na makuta byoshii mwiubidisheene nabyo. Mbilombeene nkukalakasha.

We bya kupusha byabya nsaa yobadika Bible bwa musango wa kumpala. Bobanda kwaluka mu ndumbulwilo a kala moodi nka bu muntu mwenyi. Mwamwa, ofumankana na bantu babayitanyina bu beena Filistine, na bipikwa byenyi bu ‘kusaana kwa bilamba,’ sunga kuuka bidibwa byabayitanyina bu mana na makuta a bitshele abaabadi abayitanyina bu ndalakume. (Efilu 16:31; Yooshwa 13:2; 2 Samwele 3:31; Luuka 15:9) Bino bintu byooso mbilombeene nkukalakasha. Nka bu muntu bende mu kutemba mu eumbo dyenyi, twe mulombeene kupusha muloo su kwi muntu akumiina nkukwasha na nkupatulwila myanda su?

Kubanga mu mafuku abaabadi babangye kufunda bifundwe biselele mu siekele a 16 K.B.B., babaadi abakwasha bantu bwa kupusha bifundwe kalolo. Bu kileshesho, Moyiise mukunkushi a kumpala a mwilo wa Isaleele, “babangile kwibapatulwila” bifundwe.​—Miiya Ikituulwe 1:5, EEM.

Balongyeshi balombanyiine ba Bifundwe babaadi kwanka mpa na kunyima kwa siekele ekumi. Mu kipwa kya 455 K.B.B., kisaka kikata kya beena Yuuda, mpa na bana bakinga, babaadi bebungye pamune mu kibundji kya Yeelusaleme. Balongyeshi ba Bible babaadi paapa “bababalanga mu mukanda wa Miiya y’Efile Mukulu, abipushika.” Kadi babaadi abakitshi kingi kintu. Babaadi ‘abapatuula na kupushisha [mwilo] byooso bibaabadiibwanga.’​—Neemi 8:1-8.

Kunyima kwa siekele itano, Yesu Kidishitu baadi mwipaane mu uno mudimo wa kulambukisha. Nyi bwakinyi babaadi abamuuku kwi bantu bu mulongyeshi. (Yowano 13:13) Baadi mulongyeshe bisaka bya bantu, na bantu pa bupenka. Ungi musango, baadi mulongyeshe kumpala kwa kibumbu kikata kya bantu, pabakitshine mwisambo wa kumwengye wende nkumo, na “bantu babaadi na kukaanya kukata bwa kulambukisha kwaye.” (Mateo 5:1, 2; 7:28) Mu kashiposhipo ka mu kipwa kya 33 B.B., Yesu baadi mwisambe na balongi baaye babidi pabaabadi mwishinda abende ku musoko wi peepi na Yeelusaleme, “aye nkwibapatulwila [bifundwe] byooso.”​—Luuka 24:13-15, 27, 32.

Balongi ba Yesu namu babaadi balambukishi ba Eyi dy’Efile Mukulu. Ungi musuusa, ungi mukata a mu Etshopi baadi abadika verse kampanda a mu Bifundwe. Mulongi a Yesu abayitanyina bu Fidipe baadi mwifubwile peepi naye amwipusha’shi: ‘Okwete kushinguula binyibinyi byokwete kubala su?’ Mwina Etshopi bamwalulwile’shi: “A nemulombeene kwibishinguula naminyi, su ntshi na mukunkushi?” Nka papa Fidipe nkubanga kumupatulwila bifundwe.​—Bikitshino 8:27-35.

Nka bu balambukishi na balongyeshi ba Bible ba mu mafuku a kala, Batemwe ba Yehowa lelo uno mbepaane mu mudimo wa kulongyesha Bible mu maumbo 239 mu nsenga ishima. (Mateo 28:19, 20) Ku lubingo looso, bakwete kukwasha bantu bakile pa midiyo kitema bwa kupusha Bible. Bebungi ba ku bantu baabalongo nabo Bible tababaadi bena Kidishitu kumpala nya. Kuno kulonga akukitshikaa buntu na nkulombeene kukitshikila ku nshibo yoobe sunga ku ingi mbalo yanudi bepusheene. Bangi bantu bakwete kulonga ku ma telefone sunga ku ma video, ku bukwashi bwa ordinatere sunga byamo bya ku maasa.

We kwisamba na umune a ku ba Temwe ba Yehowa bwa kuuka ingi myanda pabitale mushindo oodi mulombeene kupeta buno bukwashi. Okatundula’shi Bible ta mukanda ushaupushika nya, kadi “mmupwandjikiile bwa kulambukisha, bwa kukuminyisha, bwa kulumbuula, bwa kuludika mu kululama, bwa’shi muntw’Efile Mukulu akumbane na akumbanyinyiine bwa mufubo ooso wibuwa.”​—2 Timotee 3:16, 17.