Kenyongoshi kakilekile nkalombene kuluisha mbidi ya muntu na biepusha. Nkalombene kutuusha nkalakashi ikile bukopo kukila mpa na winyi muanda awinyonguelanga muntu.

•  Ikala na mikalo pabitale mikandu ibubi yobadika sunga kutala. T’abitungu nka’shi oukie ka muanda koso pabitale muanda kampanda ubatuuku nya. Su oteemesha mikandu ayituala kenyongoshi, wekala na moo ukile na kukutua lukulupilo.

   Eyi dia kulonda dia mu Bible: “Kinyongua akinyanyishaa mbidi.”​—Nkindji 17:22.

   “Mbibofule bua’shi muntu ekale ku bupika bua kukimba mikandu ipia ku Internete, anka uka’shi kino kiubishi nkikile bubi. Tuinyongoshi tuande tubaadi tupeele nsaa inalekiele kutemesha mikandu ipia.”​—John.

   Nangushena bino: Wekalaa na lukalo lua kuuka mikandu yoso ipa su?

•  Nemeka biubishi biobe. Tompa kubuuka, odie, okite mifubo ya mu nshibo na kulala nka pa nsaa itshibibue. Su buata programe, okiebe kumona’shi we na nshalelo ebuwa na tuinyongoshi toobe atupeele.

   Eyi dia kulonda dia mu Bible: “Byooso abipwandikisha muntu e na kisumi abikumbanaa.”​—Nkindji 21:5.

   “Pababangile kipupa kia COVID-19 naadi mulenguule biubishi biande bibuwa ami nkuipaana mu kuasha maasha sunga kukisha kipapai. Nadi na lukalo lua kufuba kalolo na nsaa yande, nyi buakinyi nakitshine programe a kintu kioso kiankumina kukita kuifuku.”​—Joseph.

   Nangushena bino: Ne na kiubishi kibuwa akinkuashaa bua’shi nepushe bu’shi nakitshi kintu ki na muulo kumpuilo ku’efuku su?

•  Tuula binangu ku mianda i na muulo. Su okishaa nsaa ya kuamba’shi, su nadia kuikala muukie sunga kupuandikisha’shi mianda ayikiebe kuluila, okamono’shi wekala wekalakasha bikile. Anka bibuwa wekale otuulu binangu ku mianda ayikupa muloo.

   Eyi dia kulonda dia mu Bible: “Ikalayi na lutumbu.”​—Bena-Kolose 3:15.

   “Pambadikaa Bible, ntantueshaa mianda ibubi mu binangu biande nya, ankuashaa bua’shi ntuule binangu ku mianda ibuwa. Mbilombene kumueneka bu bibofule anka abikuanshaa ngofu!”​—Lisa.

   Nangushena bino: Ne na kiubishi kia kunangushena ku mianda ibubi na kuluba mianda ibuwa ayinfuilaa su?

•  Kimba buwa bua bangi. Nsaa yodi na nkalakashi, we kuikala na lukalo lua kuenda nka mbalo yodi bupenka. Pamutue wa kukita bino, nangushena ku mianda yodi mukumbene kukita bua kukuasha bangi.

   Eyi dia kulonda dia mu Bible: “Tanukimbanga penda buwa buenu, anka kimbayi dingi buwa bua bangi.”​—Bena-Fidipe 2:4.

   “Kukitshina bangi mianda akumpeyaa muloo. Nakitaa mianda ayibasankisha, yaaya nsaa, nkalakshi yande ayipeelaa. Biabia ntangikalaa na nsaa ibungi ya kunangushena ku nkalakashi yandi nayo.”​—Maria.

   Nangushena bino: Ouku muntu e na lukalo lua bukuashi? Nkinyi kiodia kukita bua kumukuasha?

•  Lama mbidi bukome. Ikala okitshi kalashishi ka mbidi na wekale na nsaa ibungi bua kuikisha. Ikala odi bidibua abikuasha mbidi. Su okuete kubaamba mbidi yoobe, wekala na ungi mueneno a mianda na tuekala wekalakasha ngofu nya.

   Eyi dia kulonda dia mu Bible: “Kalashishi ka mbidi ke na muulo.”​—1 Timote 4:8.

   “Ami na muana ande tatui na mushindo wa kukita kalashishi ka mbidi pasha bu biatukumina nya, nyi buakinyi atukitaa kalashishi mu nshibo misango ibungi. Bino abitukuashaa bua kuikala na muloo na kuipusha biya.”​—Catherine.

   Nangushena bino: We na lukalo lua bidibua bibuwa na kukita kalashishi bua kuikala na mbidi bukome su?

 Kukatusha ano malango, bantu bebungi abamonaa’shi bibuwa balongie milayilo i mu Bible pabitale mafuku e kumpala. Tala muisambo awamba’shi: “Bufumu bw’Efile Mukulu abukalombasha myanda kinyi?”