Kasha tobokumbile ngofu mu kimpulunkamba? Eyendo’shi su tobokumbile bianka, ouku biabikalaa, mbilombene nkukalakasha mu binangu mpa na nkubofusha na kukudia makuta ebungi. Kilombene nkukuasha bua kunyingiila nkinyi? Mmushindo kinyi odia kukuasha muina kifuko, sunga kuuku oobe kuete kukumba? Sunga biekala’shi Bible ta mmukanda wa ba munganga, muanka mui malango alombene nkukuasha bodia kumona bia kunyingiila mukumbo oobe.

•   Enda kui munganga

   Bible amba bino: “Taa mbe na mbidi bukome be na lukalo lua munganga nya, anka mbaa-sha mikumbo.”​—Mateo 9:12.

   Bia kukita: Kimba bukuashi bua munganga pakudi mushindo.

   Tompa bino: Kimba mushindo wibuwa wa kuibukisha. Mbilombene nkuteka bua’shi wemonene na ba munanga bebungi. (Nkindji 14:15) Lungula ba minganga mianda yoso patooka na okite moobe moso bua kulamina mianda yoso y’abakulungula, na kutala su abauku mianda yoso pabitale mukumbo oobe. (Nkindji 15:22) Longa bia kuuka mianda itale mukumbo oobe na manga aatungu kutoma. Su bouku abifudiila mukumbo oobe, wekala muilumbuule mu binangu bua kunyinga na kuata bitshibilo bibuwa pabitale mushindo wa kuibukisha.

•   Kita mianda ayikukuasha bua kuikala na mbidi bukome

   Bible amba bino: “Kalashishi ka mbidi kebuwa.”​—1 Timote 4:8.

   Bia kukita: Ikala okitshi kalashishi ka mbidi bua kubamba mbidi yoobe.

   Tompa bino: Ikala okitshi kalashishi, odi bidibua abibaka mbidi yoobe, na kulala kalolo. Sunga mbilombene kuteka’shi oshintuule ingi mianda bua mukumbo oodi nao, ba minganga abamba’shi su buetatshisha bua kubamba mbidi yoobe kalolo, opete bukuashi bui bungi. Kushi mpaka, shinguula’shi kioso kiokitshi bua kubamba mbidi yoobe, akikukuasha ngofu, su nkipushene na bukuashi buabakupa kui ba munganga.

•   Teka bangi buabadia nkukuasha

   Bible amba bino: “Kuuku ee noobe kifulo nguba ooso, anka mukuetu ekalaa noobe mu mpombo ngub’oso.”​—Nkindji 17:17.

   Bia kukita: Ba kuuku bobe mbalombene nkukuasha bua kunyinga nsaa yodi mu nkalakashi.

   Tompa bino: Esambe na kuuku a p’eshimba omulungule biokuete kupusha. Su bokitshi biabia abikukuasha bua nkubatamisha eshimba pabitale nkalakashi yodi nayo na nkukuasha bua kuikala na muloo. Mbilombene kuikala’shi ba kuuku sunga bena kifuko be na lukalo lua nkukuasha, anka ta mbalombeene kuiuka kiabadia kukita bua nkukuasha mu’bo banabene nya. Biabia ebalungule patooka mianda yabadia kukita bua nkukuasha. Ikala na nkatshinkatshi pabitale biokulupila’shi bakukitshine, na wekale webatumbula nsaa yoso y’abakukuasha. Tolumbanga’shi sunga ba kuuku boobe abakumina nkukuasha, ingi nsaa be kukita mianda ayikuinyongosha. Paapa we mukumbene kutshiba mikalo kampanda, kileshesho, abitungu bafikie mu nkutala misango bungi kinyi na nsaa bungi kinyi.

•   Ikala na binangu bibuwa

   Bible amba bino: “Muloo wa mwishimba aupashaa muntu, kinyongwa, akinyaanyishaa mbidi.”​—Nkindji 17:22.

   Bia kukita: Binangu bibuwa mbilombene nkukuasha bua kuikala n’eshimba difukame bua kunyingiila nkalakashi yodi nayo.

   Tompa bino: Nsaa yokuete kuiubidishena na nsalelo oobe mupia, tuula binangu biobe ku mianda yodia kukita, tuebitulanga ku mianda yoshii mulombeene koobesha kukita. Tokumbanga kuikala wepuandikisha na bangi sunga kualusha binangu ku nshalelo oboodi naaye kumpala kua kukumba. (Bena-Ngalatea 6:4) Ata mpango yodi mukumbene kulombasha, bino abikukuasha bua kulama binangu bibuwa. (Nkindji 24:10) Kitshina bangi mianda mupunda ngobesha yoobe. Muloo aupetaa muntu p’akuasha bangi, ngulombene nkukuasha bua kupela kutuula binangu biobe ku nkalakashi yodi nayo.​—Bikitshino 20:35.

 Bible amba’shi Yehowa Efile Mukulu a mmulombeene kukuasha muntu buadia kunyingiila mukumbo wadi nao. Sunga tatui bakumbene kukulupila’shi Efile Mukulu etupaashe mu kilengieleshi, mmulombene kukuasha balanguidi baaye mu ino mishindo:

 Butaale. Yehowa mmulombene kutuusha “butaale bw’Efile Mukulu abo butabukile binangu byooso.” (Bena-Fidipe 4:6, 7) Buno butaale mbulombene kukuasha muntu bua’shi tekalanga akishakisha kuinyongola. Efile Mukulu apeyaa baaba abamutekie na abamulungula mianda ayibakalakasha.​—1 Mpyeele 5:7.

 Binangu. Yehowa mmulombene kuitupa binangu bia kuata bitshibilo bibuwa. (Shake 1:5) Muntu mmulombene kupeta bino binangu su kuete kuilongiela Bible na kutumikila mianda imuanka.

 Lukulupilo lua mianda ikumpala aluitunyingisha. Yehowa mmule’shi mu mafuku e kumpala “muntu su ngumune t’amba’shi: ‘Ne na mukumbo.’” (Yeeshaya 33:24) Luno lukulupilo alukuashaa bantu bebungi bua’shi bekale na binangu bibuwa sunga pabakuete kukumba mukumbo wibukopo.​—Yeelemiya 29:11, 12.