We mupue kumona’shi bipuilo bibungi mbituule binangu mu kupeta kua makuta ngofu pamutue pa kuibituula mu kukuasha bantu buabadia kulanguila Efile Mukulu su? Abalesha bintu bia kuudisha na kuibiudisha. Bakata ba bipuilo bebungi abebafutu makuta akile bungi na be na nshalelo mukile buwa. Banda kutala bino bileshesho bipeela:

•   Muyile biabadi bakimbuule mbasangane’shi takudi bipua 13, mungi mumpeele a mu Katolike mmufubishe makuta a kipuilo kiaye bua kufuta nyendo 150 mu ndekie mpa na nyendo 200 yadi mukite na mootoka wa muulo wibukopo. Mmufubishe ma dolare akile pa midiyo 4 bua kulumbuula nshibo ya kipuilo yaadi mushaale.

•   Mu dingi eumbo dia mu Afrike, mungi pastere akunkushaa bipuilo biaye na malongiesha aaye aabungu balanguidi bakile bungi. Kipuilo kiaye nyi mbalo ikata yabaudishaa bintu bia mishindo yoso, kubanga ku “muimu wiselele” mpa na bilamba sunga bibuta bi na mpala yaaye. Aye nabene mpeta mukata, anka balanguidi baaye mbalanda ngofu.

•   Mu Chine ku miengie iselele inanka ya bena Buda, ibidi i mu mulongo wa ma sosiete e na makuta. Dingi abakitaa busunga mu ntempelo a Shaolin. Dingi mukata a kipuilo abamuitaminaa kui bantu bebungi bu “mumpeele PDG.”

•   Mu Amerike, bantu abatushaa malango mu mianda ya bipuilo, tabadi na ma sosiete. Ingi rapore ayilesha’shi bakuete kufubisha bipikua bia kipuilo bua kukita bisangilo biselele bua kupa ba kidiya ingi midimo mu mianda y’Efile Mukulu.

 Opuandikisha naminyi pabitale bipuilo biipaane mu busunga? Toodi muiyipushe abipushaa Efile Mukulu pabitale bantu abakimbaa kufika ba mpeta kukidila ku bipuilo su?

 Efile Mukulu ta mmukumine kusanga kipuilo na busunga nya. Bible alesha’shi kala, baadi muinyongole ngofu pa muanda bakata ba bipuilo abaadi abeamba bu abalesha mpala yaaye aku namu abalambukisha “bua kupeta kantu” (Mika 3:11) Efile Mukulu baadi mushikue busunga bui na luabi bubaadi bushintuule mbalo ya lulanguilo bu “kifuamino kia bantomboshi.”​—Yeelemiya 7:11.

 Yesu baadi dingi muleshe abipushaa Efile Mukulu pabitale bantu abakitaa busunga mu kipuilo. Mu mafuku a Yesu, bakata ba bipuilo abaadi abaata makuta kui ba nsunga abaadi abakitshi busunga mu ntempelo. N’eshimba dinyingie, Yesu baadi mubingie ba nsunga baasha luabi mu ntempelo, pabakuile’shi: “Tanwaluulanga nshibo ya nshami bu nshibo ya busunga!”​—Yowano 2:14-16.

 Yesu baadi dingi muleshe bi mueneno a Efile Mukulu mu mushindo ubaadi akitshi mudimo waaye. (Yowano 8:28, 29) Takui efuku sunga dimune dibaadi mutekie bantu makuta pabaadi ebalongiesha mianda y’Efile Mukulu nya. Pabaadi akitshi bilengieleshi tabaadi atekie makuta nya, kileshesho bu kudiisha bantu be na nsala, kupaasha baasha mikumbo, na kubuusha bafue. Yesu tabaadi mufubishe mudimo waaye wa bulungudi bua kupeta makuta nya, na dingi tabaadi sunga na nshibo nya.​—Luka 9:58.

 Yesu balunguile balondji baaye’shi tabakumanga kuteka makuta pabitale mianda ya lulanguilo. Bambile’shi: “Nui bapete buntu, panaayi buntu.” (Mateo 10:8) Bano balondji ba kumpala, bafikie mu kuikala bu bena Kidishitu, abalondele bukunkushi bua Yesu. Tala bino bileshesho bipeela:

•   Mpiele mutumibua baadi ende na Yesu mu bulungudi, abaadi bamupe makuta kui mungi muntu abetamina bu Simone, baadi atekie bua’shi apete namu matalua na bukome. Musango umune Mpiele bapelele kutambula makuta a Simone na aye nkumusaashila’shi: “Mfwalanga yobe ishimine, n’obe nabeene pamune naayo, poodi mukumiine’shi we mulombeene kuula na mfwalanga, kipeebwa kya buntu ky’Efile Mukulu.”​—Bikitshino 8:18-20.

•   Mpoolo mutumibua baadi muukibue bu mulungudi endaa mu nyendo. Sunga bibaadi mufube ngofu munda mua bipua bibungi mu tukongie tua bena Kidishitu, takui efuku su ndimune dibaadi mukimbe kupeta buedi pa bukopo. Aye na bena Kidishitu naaye tababaadi “abakitshi busunga n’Eyi di’Efile Mukulu bu abikitshi bangi.” (2 Bena-Kodinda 2:17) Anka Mpoolo bafundjile bino: “Tubaadi atufubu bufuku na kaanya, bua kupela kutenteka muntu a kuanudi bushito, patubaadi atuinulungula mukandu wibuwa w’Efile Mukulu.”​—1 Bena-Tesalonika 2:9.

 Eyendo’shi, baaba bena Kidhsitu ba kumpala abaadi na lukalo lua ndambo ya makuta bua kulombasha mudimo waabo wa bulungudi na kukuasha bantu be mu makienga. Anka tababaadi abatekie muntu makuta bua midimo ya lulanguilo ibaabadi abakitshi nya. Bantu abaadi abakumina kuibapa mu kukumina kuabo, mu kuipushena na ano malango:

•   2 Bena-Kodinda 8:12: “Payikale’shi kinangu kia kalolo ki kuanka, mbikuminyibue bikishekishe muyile kumona kua muntu, kushi muyile kiakia kiashi nakio.”

   Kiabipatuula: Kinangu akitakulaa muntu bua kupaana ki na muulo kukila bungi bua bintu biatuusha.

•   2 Bena-Kodinda 9:7: “Ooso muntu atuushe muyile kitshibilo kya mwishimba dyaaye, kushii kinyongwa sunga ku bukopo, mwanda Efile Mukulu mmufule apaanaa na mulòo.”

   Kiabipatuula: Efile Mukulu t’akuminaa’shi muntu akitshishue pa bukopo bua kutuusha nya. Asangalaa p’amono muntu aata kitshibo kia kupaana mu kukumina kuaye.

 Bible alesha patooka’shi Efile Mukulu t’akuminaa bipuilo bioso sunga mishindo yooso ya lulanguilo nya. (Mateo 7:21-23) Mu bungi butemuki bukata, Bible apuandikisha bipuilo bioso bia madimi na mukashi ndumba muanda mbipushene na mbulamatadi bua kupeta makuta sunga kukita ingi mianda, bua kudimba bantu ba miilo yooso. (Kibafumbwilwe 17:1-3; 18:3) Buno butemuki abulesha’shi kubashaala mafuku apeela Efile Mukulu atshibile bipuilo bia madimi kiimu.​—Kibafumbwilwe 17:15-17; 18:7.

 Bua bino bino, Efile Mukulu ta mmukumine kumona bikitshino bibubi bia bipuilo abiluisha bantu sunga kuibekasha kula naaye nya. (Mateo 24:11, 12) Kuete kuteka bantu baasha mashimba alulame buabadia kulonga bia kumufubila mu kipaso kiakumina na kukatuka mu bipuilo bia madimi.​—2 Bena-Kodinda 6:16, 17.