Muifuku dia 24/02/2022, Russie mmubangie kulua ngoshi na Ukraine, bino mbituule nshalelo a bantu mu masaku na bino bikuete kutakula bantu buabadia kutuuka muiumbo bukidi bukidi a

 “Kutanyikile ma bombe. Bikeele moo wanshii mulombene kupatuula. Patupushishe’shi kui train kuete kutuala bantu buashi batuukie, tubaatshile kitshibilo kia kukatuka. Tui balekie bintu bioso muanda abitunganga’shi muntu oso atuale penda kibuta kimune kia mu mongo. Tuikele baate penda mikanda, manga, mema, na bidibua bipeela. Tui balekie bintu bioso tuenda ku train nsaa ayiponanga ma bombe.”​—Nataliia, a mu Kharkiv, Ukraine.

 “Mpa na mu nsaa ya nfudiilo tatuikele atupuandikisha’shi akuikala ngoshi nya. Ku lungi lupese lua kibundi nayikalanga mupushe kintu akipono, na madidishi abaadi aatanyika. Natshile kitshibilo kia kusuuka, naata penda bintu bilombene kukuasha. Natuukile mu nshibo mu 8:00 a nakashika naata train bua kuenda ku Lviv akupu naata mootoka bua kuenda mu Pologne.”​—Nadija, a mu Kharkiv, Ukraine.

Mu uno muisambo

•  Nkinyi kibatakula bantu buabadia kufiluka bino?

•  Bantu abafiluka mbalombene kukulupila kui nanyi?

•  Bible e kukuasha bantu bafilukie lelo uno?

 Nkinyi kibatakula bantu buabadia kufiluka bino?

 Kufiluka kua bantu mu Ukraine nkubangie pa muanda wa’shi bena Russie mbatuukie bena Ukraine ngoshi. Anka, Bible apatuula kalolo, akifuisha kuno kufiluka kua bantu:

•   Mbulamatadi ya bana ba bantu mu nsenga ishima, ta ngiobeshe kupa bantu bintu biabadi nabio lukalo. Bakata ba mbulamatadi bakuete kufubisha matalua aabo bua kukiengiesha bantu.​—Mulungudi 4:1; 8:9.

•   Satana Diabulu, ‘nfumu a nsenga,’ e na bukitshishi bui bubi mui bantu nka bu abiakula Bible’shi: ‘Nsenga yoso ngimunyibue na mubi.’​—Yowano 14:30; 1 Yowano 5:19.

•   Kukatusha nkalakashi inayo bantu takudi bipua nkama, binobino tui mu kipungo kibaadi Bible mupue kuakula’shi: ‘Ku mafuku a ku nfudiilo akukafiki bipungo bibukopo.’ (2 Timote 3:1) Kukila paapa, mu ano mafuku amuikala, ngoshi, masaku aatukila ku bintu bipangibue, nsala, na bipupa​—mianda ayitakula bantu bua kufiluka.​—Luka 21:10, 11.

 Bantu abafiluka mbalombene kukulupila kui nanyi?

 Bible alesha’shi Mupangi etu Yehowa, b nyi Efile Mukulu sha kifulo na lusa bua bantu abafiluka na bantu abalekie mashibo aabo. (Miiya Ikituulwe 10:18) Mmulee kupudisha nkalakshi ya bantu abasuuku kukiila ku bukuashi bua mbulamatadi aaye a muiyilu, abetanyina bu Bufumu bu’Efile Mukulu, abukapiana mbulamatadi ya bana ba bantu. (Ndanyele 2:44; Mateo 6:10) Yehowa akafubisha Bufumu buaye bua kukatusha Satana Diabulu. (Bena-Loma 16:20) Buno Bufumu abukamunana pa nsenga ishima, abukakatusha kuitshibuula akutuukila ku mikalo ya maumbo. Mu nsenga ishima bantu abakekala mu kifuko ki mu buumune. Takui muntu akekala dingi na lukalo lua kufiluka mu nshibo muaye, muanda Bible mmulee’shi: “Muntu na muntu akashâla ku matwi talala mûshi mwa milundo yê ya nfinyo na mitshi yê ya nfingiye, kushi muntu akamukwatshisha mô. Nyi Yehowa nabêne, sha matalwa oso, balâ byabya.”​—Mika 4:4, EEM.

 Anka penda Bufumu bu’Efile Mukulu nyi bulombene kupudisha kufiluka kua bantu kuatukuete kumona lelo uno. Yehowa akafubisha Bufumu buaye, bua kukatusha nkalakashi ayitakula bantu bua kufiluka. Banda kutala bileshesho bipeela:

•   Ngoshi. “[Yehowa] ayimika ngoshi.” (Misambo 46:9) Bua kuuka mushindo wabakapudisha ngoshi kui Efile Mukulu tala muisambo awamba’shi: “La paix dans le monde: Comment sera-t-elle établie?”

•   Kukiengieshibua, n’etombo. “[Yehowa] ebafungushe kui baba abebamwesha malwa.” (Misambo 72:14, EEM) Bua kuuka mushindo aukakatusha bantu binangu bibubi bi muabadi takudi mafuku ebungi, badika muisambo awamba’shi: “Tui balombene kukambila mushikua.”

•   Bulanda. “[Yehowa] apaasha mulanda ele musaase kwadi.” (Misambo 72:12) Bua kuuka mushindo wabakapudisha bulanda kui Efile Mukulu, badika muisambo awamba’shi: “Kui efuku adikala kululama mu mianda ya makuta su?”

•   Nsala. “Bia kudia abikelala bibungi pa nsenga.” (Misambo 72:16, NWT) Bua kuuka mushindo aukashinkamisha Efile Mukulu’shi, takui muntu su ngumune e na nsala, badika muisambo awamba’shi: “Plus jamais la faim dans le monde?”

 Bible e kukuasha bantu bafilukie lelo uno?

 Olo. Kukatusha kupa bantu bafilukie lukulupilo bua mafuku e kumpala, Bible mmulombene kuibakuasha buabadia koobesha nkalakashi yabadi nayo binobino.

 Eyi dia kulonda dia mu Bible: “Tanwikalanga mashimba kwiyilu, pa kintu su nkimune anka, nguba ooso, mu nteko, mu kwiyaaya na mu ntumbu, uukishayi Efile Mukulu nkalo yeenu; na butaale bw’Efile Mukulu abo butabukile binangu byooso abulama mashimba eenu na binangu byenu.”​—Bena-Fidipe 4:6, 7.

 Kiabipatuula: Teka Efile Mukulu butaale bua mu binangu na muishimba p’ofumankana na muanda oso waawa. Badika muisambo awamba’shi: “Philippiens 4:6, 7​—‘Ne vous inquiétez de rien.’”