Bible baadi mutemukie’shi mu mafuku etu akuikala ngoshi, kutshinkatshinka kua nsenga, bipupa na “mianda ya kutshiina.” (Luka 21:10, 11) Ano mayi a butemuki ngatungunukie na kulombana mu kipua kia mudimo kia 2022. a Bu kileshesho, ngoshi ya mu Ukraine ngitungunukie, na bino mbikalakashe nshalelo a bantu midiyo. Maumbo ebungi a mu nsenga ekele aatuuku mu kipupa kia COVID-19. Kukatusha biabia, bantu bebungi bekele bapete masaku aatukila ku bintu bipangibue, bu kutshinkatshinka kua nsenga mu Haïti na bipapi biluishe bintu bibungi mu Amérique Centrale, mu Philippines, na mu kipindi kia kuushi kua Afrike a kutunduka nguba. Tumonyi tua Yehowa ntukuashe bantu bapete ano masaku naminyi?

 Mu kipua kia mudimo kia 2022, ndumbuluilo etu ayikalanga mutume bukuashi kui bantu peepi 200 bekele bapete masaku! Mu bioso, tuikele batuushe peepi dolare midiyo 12 bua kutuusha bukuashi. b Banda kutala biabadi bafubishe bia buntu bua kukuasha bantu bekele bapete ano masaku abidi.

 Muifuku dia 14/8/2021, kutshinkatshinka kua nsenga kui bukopo bua 7.2 kubaadi kukitshikie dia kuushi kua Haïti. Muanda wa malua, nkufue Tumonyi tusatu, bakuetu bakashi babidi na mukuetu mulume umune. Boso bekele bapande bekele na nkalakashi ibungi ya ku mbidi na kenyongoshi kabadi bafuishe kui kutshinkatshika kua nsenga. Mungi mukuetu mulume abetamina bu Stephane amba’shi: “Mu kibundi kishima nkufue bantu bakile bungi mu mushindo w’abashiikanga bitanda ku lubingo loso munda mua mieshi ikile pa ibidi.” Mungi mukuetu abetamina bu Éliézer, amba’shi: “Tumonyi tuibungi t’atuikalanga dingi na nshibo, bilamba, bilato, sunga bingi bintu bi na muulo bua kuikuasha. Munda mua mieshi ibungi, bantu bebungi abekalanga nka na moo wa bibaabashala kunyima kua kutshinkatshinka kua nsenga.”

 Ndumbuluilo etu mmufikie luntuluntu mu kukuasha. Filiale a mu Haïti ayikalanga mutuushe ma tone 53 a bidibua, mpa na tushibo tua mapema, mapema, maatela, na ma pano a kuela nao kaalo mu telefone. Na dingi, mu kipua kia mudimo kia 2022, nkuibakiibue sunga kulumbuulua mashibo akile pa 100. Nkutuukie pepi dolare mudiyo umune bua kutuusha bukuashi.

 Bakuetu balume na bakashi be na lutumbu lukata. Lorette amba’shi: “Kutshinkatshinka kua nsenga kuikele kuluishe nshibo yetu yooso na busunga buetu. Tatuikele na kadiibua su nkapeela nya. Anka ndumbuluilo a Yehowa ayikalanga muitukuashe, etupa bintu bioso biatuikele nabio lukalo.” Micheline amba’shi: “Kutshinkatshinka kua nsenga akuikalanga kuluishe nshibo yangikalanga mushaale na bana bande balume babidi. Ntangukanga kingi kia kukita kukatusha penda kuela luteko bua kupeta bukuashi, na Yehowa mmungaluule kukidila kui ndumbuluilo aaye. Binobino tui na nshibo ibakiibue kalolo yatudi bashaale. Ne na kitshibilo kia kukitaa muande mooso bua kulesha lutumbu luande kui Yehowa.”

 Bakata ba mbulamatadi ta mbakutue kumona bioso biatudi bakite bua kutuusha bukuashi nya. Mukunkushi a commune a L’Asile ayikalanga muambe’shi: “Nenutumbula ngofu bua mushindo wanudi bafikie bukidibukidi mu kukuasha. Nenutumbula bikata muanda nui na kanemo kakata kui bakata ba mbulamatadi. Ne na muloo pa kumona’shi tanui batuule binangu bienu mu kupeta kua makuta nya. Anka, anukumiina kukuasha bantu. Anuibikitshi muanda wa kifulo.”

 Muifuku dia 24/1/2022, Kipapi kibukopo kiabetamina bu Ana kikele kipukie muiumbo dia Mozambique na akupu akio nkuenda dia kupona nguba mu Malawi. Kiakia kipapi kikele kituale mpeshi e bukopo na lupapi mu lubilo lua bilometre 100 mu nsaa umune. Kikele kitshibe nshinga ya kaalo, nkuenda na bitala, na nkufuisha kuula kua miela.

 Kino kipapi kikele na bukitshi buibubi kui Tumonyi tukile pa 30000 mu Malawi na mu Mozambique. Mungi mukuetu mulume abetamina bu Charles, afubanga mu mudimo wa kutuusha bukuashi amba’shi: “Nsaa yangikalanga mumone makienga a bakuetu na bintu bungi biabekele bashimishe, nayikalanga mupushe kinyongua kibukopo na mukutue kia kukita bua kukuasha.” Bikele bikile bukopo, muanda inyi ndambo ya bidibua biabo na bikunuanga biabo bioso bikele biende na mema. Bebungi bekele bashimishe mashibo aabo. Muanda ukile bubi, mungi mukuetu mulume ayikalanga mufuishe mukashi aaye na bana baaye bakashi babidi, bekele beyine na buato mu meema.

 Kipapi kikele moo ukile. Mu 1:00 kumpala kua midi mu Nchalo, mu Malawi, kifuko kia Sengeredo kikele kipushe kituumo kikile bukopo kia meema. Miela ibidi nkuwula! Mukuetu Sengeredo nkuata kitshibilo kia kukatuka mu nshibo. Kibaadi kitshibilo kikile buwa muanda mu kapindi kapeela mema abaluishishe nshibo yoso ishima. Bintu biabo bibaadi biluile bingi nkuenda na mema. Kifuko nkuata kitshibilo kia kuenda ku Nshibo ya Bufumu, i mu minite 30 na kuabo lua ngua. Anka bua uno musango, mbibaate nsaa ibidi bua nkekufika. Abakekufikile batope ngofu na bakookie, kadi be na muwa.

 Musango umune ma filiale a Malawi na Mozambique nkubanga kulumbuula bukuashi. Abo nkuteka bakunkushi ba bifunda na bakulu buabadia kutaluula lukalo lui kuanka bua bakuetu bapete masaku na kuibanyingisha mu kikudi na mu binangu. Ma Komite a kutuusha bukuashi (DRC) bekele beatuule bua kukunkusha mudimo wa kutuusha bukuashi, na musango umune ano ma komite nkubanga kukuasha bakuetu buabadia kupeta bidibua na bingi bintu biabadi nabio lukalo. Nkutuukie dolare 33000 bua kukuasha bantu na dolare ikile pa 300000 bua kulumbuula na kuibakuula mashibo.

 Ma DRC ngafubishe makuta kalolo, bikele buwa bukile muanda wa bintu bikaamine muulo ngofu. Kileshesho, mieshi musambo ya kumpala ya kutuusha bukuashi, mmulo wa bukula bua mebele kidibua kikata kia mu Malawi wikele ukaamine misuusa pepi 70 pa lukama. Muulo wa kasolonyi dingi wikele ukaamine. Bua kulama makuta, bakuetu bekele baule bintu nka muamua muiumbo na bibungi musango umune. Bekele bebayishiishe muulo na basuuka muulo wa kutuala bintu ku dingi eumbo na ku dingi.

 Mudimo wa kutuusha bukuashi wikele ukume mashimba a muilo wa Yehowa. Felisberto, mungi mukuetu a mu Mozambique, amba’shi: “Kasha ntamuene ndumbuluilo mutuushe bintu bibungi bino: bintu bia luibako, kuibituala, bafubi ba luibako, bidibua, na bukunkushi bua kifulo. Buno bukuashi buikele bu kileshesho kikata kia kifulo kia bana na bana kibaadi Yesu muisambile mu Yowano 13:34, 35.” Ester, mukashi kilele a mu Malawi sha nshibo ikele iluile amba’shi: “Ntshikele dingi na lukulupilo muanda nayikalanga penda n’ekuta dipeela bua kuibaka ingi nshibo. Biabia nsaa ifikile bakuetu bangibakila nshibo, nayikalanga mupushe’shi napu kutuela mu Mpaladiso.”

 Bu biatukuete kuifubuila peepi na nsenga ipia yabadi balee, atukulupila’shi akukitshika kafutakanyi kakile bukopo. (Mateo 24:7, 8) Sunga mbiabia, atuinutumbula bua bia buntu bienu bia kalolo, atushinkamisha’shi muilo wa Yehowa aupete bukuashi buaudi nabo lukalo. Mbaleshe mushindo wa kutuusha bia buntu pa donate.pr418.com. Tubenutumbulayi bua kalolo kenu.