Bakata ba mbulamatadi bebungi mu nsenga ishima mbatekye bantu bwa kwikala kula na bangi na mbakandikye kwibunga bantu bebungi mbalo imune. Ba Temwe ba Yehowa be na kitshibilo kya kuneemeka ino mpango sunga byekala’shi bakwete kutungunuka na kwibunga kushii bilombene kufwisha masaku. Pa mwanda wa byabya, tukongye tukwete kufubisha aplikation a Zoom ebakwasha bwa kutwela mu bisangilo abemonena ku video.

 Bwa kutwela mu bisangilo byetu kalolo kushii lukalakashi, Kasaka ka Bakunkushi-Bakulu kekele kakumine bwa kufubisha makuta a byabuntu bwa kuudila tukongye konte a Zoom. Bino mbimwenekye bu bukwashi bukata kwi tungi tukongye tushii na mushindo wa kutusha ku mweshi ooso 15$-20$ sunga kukila paapa bwa kwikala na konte a Zoom. Tuno tukongye twikeele atufubisha ma aplikation a Zoom a bisumanga e na bungi bwa bantu na minite bitshibibwe, dingi kushii sunga kwikala bakalwilwe nsaa ayikitshika bisangilo. Binobino, tukongye tooso tukwete kufubisha konte a Zoom a ndumbulwilo akwasha bantu bebungi bwabadya kutwela mu bisangilo byoso dingi bakalwilwe kalolo kwi bantu ba ku internete be kutwesha kafutakanyi mu bisangilo. Binobino, takudi tukongye tukile pa 65 000 mu maumbo akile pa 170 tukwete kufubisha uno konte a Zoom a ndumbulwilo.

 Mu Indonésie, Kakongye ka Kairagi mu Manado dya Kuushi kwa Sulawesi, keekele kakatushe konte isatu ya Zoom a buntu bwa kubanga kutwelela bisangilo mu mu konte a Zoom a ndumbulwilo. Mukwetu mulume Hadi Santoso apatuula bino’shi: “Sunga bakwetu bashii bakambe kwiwubidishena na twamo, mbalombene binobino kupeta muloo wa kutwela mu bisangilo, mwanda tabibatungu dingi kutwela misango ibungi munda mwa kisangilo kimune.”

 Mu Équateur, ungi mukulu a mu kakongye ka Guayacanes-Est mu Guayaquil, abetamina bu Lester Jijón, Jr., akula’shi: “Bu bikale’shi bakwetu bebungi ta be na mushindo wa kupeta ekuta mwanda wa kipupa kya corona, bikeele bukopo bwa tungi tukongye bwatudya kuula conte a Zoom bwa’shi kakongye kashima katwele mu bisangilo. Binobino, pamwanda wa konte a Zoom abadi betuwudile e kutwela bantu bebungi, twi na mushindo wa kwitamina mpa na bangi bantu bwabadya kutwela mu bisangilo bu byatushi na bungi butshibibwe.”

 Mu Zambie, ungi mukulu a mu kakongye ka Ngwerere-Nord mu Lusaka abetamina bu Johnson Mwanza, mmufunde’shi: “Bakwetu bebungi mbafikye mu kwakula kebungi bino bishima’shi: ‘Mpango ya kutusha konte a Zoom a ndumbulwilo, ntagitwikashe penda mu kipwano na bwetu nya, kadi ayitushinkamisha binyibinyi’shi Yehowa mmwitufule na kwete kwikalakasha bwetu.’”

 Ino konte ya Zoom a ndumbulwilo bekwete kwiyiwula na makuta a kukwasha nao bantu bapete masaku. Ano makuta aafikaa ku bya buntu bya mudimo wa mu nsenga ishima. Bingi bya ku bino bya buntu abebitushaa ku bukwashi bwa donate.pr418.com. Atwinutumbula bwa bya buntu byenu byanukwete kutusha na muloo oso, abikwasha dingi bwa ingi midimo ya bantu bapete masaku mu nsenga ishima.​—2 Beena-Kodinda 8:14.