Ne mutandikwe mu Acul, kibundji ki kula kuushi kwa Guatemala. Kifuko kyande twi beena Ixil, kimune kya ku bisamba bya ba Maya. Kukasha ludimi lwa Espagnole, nakudile nakula ludimi lwa kino kisamba. Naadi mutandikye mu kipungo ya ngoshi ikata ya bipwa 36 ya mu Guatemala. Mu kino kipungo beena Ixil abafwile.

Panaadi na bipwa binanka, tutu ande baadi na bipwa 7 baadi dingi efuku aasha na grenade a ku maboko, aye nkutanyika. Ano masaku abaadi angipe meso, anka mwanda wa malwa, uno tutu ande baadi mufwe. Kunyima kwa byabya, naadi mukishe bukinga bwande ku kalasa ka bampofu ka mu kibundi kya Guatemala, kunandi mulongye nfundjilo a Braille. Ku kaaka kalasa, beena midimo abaadi bantoshe kwisamba na bangi benami balongi abaadi abansuku, na ntanguku shi mbwakinyi. Naadi nsaa yooso bupenka na kwindjila apafiki myeshi ibidi inaadi mulombeene kwalukiila ku nshibo kunadi mushale na mama, aye baadi na kalolo na lusa. Mwanda wa malwa, bafwile panaadi na bipwa ekumi. Pa kumona shi nashimisha muntu penda umune baadi munfule pano pa nsenga, naadi mukalakashwe ngofu.

Panaadi na bipwa 11, nalukiile ku musoko wetu nakashala na tutu ande atudi naaye nshetu umune na kifuko kyaye. Abaadi abetatshisha bwa kunkwasha bwa kukumbasha nkalo yande ya ku mbidi, anka takwi muntu baadi etatshisha bwa kunkwasha mu binangu nya. Ingi nsaa, naadi nedidi kwi Efile Mukulu shi: “Bwakinyi nyinami mufwe? Bwakinyi ne mufikye mpofu?” Bantu abaadi abandungula shi bino byooso nyi kikyebe k’eshimba dy’Efile Mukulu. Naadi mufikye mu kwela binangu shi Efile Mukulu t’etatshisha bwetu na’shi mmukutwe kululama. Su ntshinaadi mwitundikye nyi mwanda ntshinaadi na mushindo wa kwibikita.

Kwikala mpofu kubaadi kungikashe mubofule ku mbidi mpa na mu binangu. Bu binaadi nsongwalume, abaadi bankitshishe myanda ibutete misango ibungi pa bukopo. Kasha ntshinaadi mubwele ino myanda yooso ibi​—Ntshinaadi namono shi kwi muntu ebyata na muulo. Bantu tababaadi abakamba kwisamba naami, na ntshinaadi n’esamba na muntu su ngumune. Naadi napele kwisamba na bantu na naadi mukalakashibwe mu binangu, na ntshinaadi mukulupile muntu su ngumune.

Panaadi nsongwalume, ba Temwe ba Yehowa babidi (mukashi na mulume beyibakishene), abeseseele pepi nami nsaa ya kwikisha ku kalasa. Mulongyeshi umune a ku kilongyelo kyetu, baadi ekalakasha bwande, baadi mwibalungule bwashi bafikye mu kuntala. Abesambile naami pabitale mulayilo wa mu Bible wa’shi bafwe abasanguka na’shi dingi efuku bampofu abamono dingi. (Yeeshaya 35:5; Yowano 5:28, 29) Naadi musangale na myanda ibabandongyeshe, kadi bibaadi bukopo bwashi ngisambe naabo, mwanda ntshinaadi nakula nya. Kadi, sunga mbinaadi mwilame ngofu, abatungunukile na kufika kushi kukooka mu kuntala bwa kundongyesha Bible. Uno mulume na mukashi aaye abaadi abatambuka bilometele kukila 10 mu myengye bwa kufika mbalo inaadi mushale.

Tutwande bambile shi mbantu bafwale kalolo kadi bashi na bintu bibungi. Kadi, abaadi nsaa yooso abetatshisha bwande, abantwadile tu bwedi. Namwene‘shi nkapenda beena Kidishitu ba binyibinyi nyi balombeene kulesha kino kifulo na kwitatshisha.

Naadi mulongye Bible ku bukwasha bwa mikanda ya nfundjilo a Braille. Sunga byekala shi mu mutwe naadi nakwata myanda inaadi nalongo, mwishimba ingi myanda ibaadi bukopo kukumiina. Bu kileshesho, bibaadi bukopo bwashi nkumiine shi Efile Mukulu baadi eyendo etatshisha bwande na dingi shi bangi mbalombeene kupusha abipushaa Efile Mukulu bwande. Naadi mupushe bwakinyi Yehowa mutaadile bubi munda mwa mafuku, bibaadi bukopo bwashi mmone shi nyi Nshetu sha kifulo. *

Kapela kapela, myanda inandongyele mu Bifundwe ibaadi inkwashe bwa kushintuula mweneneno ande. Bu kileshesho, naadi mulongye shi Efile Mukulu ekalakashaa ngofu bwa bano abakyengye. Pabitale balangwidi baaye babaabadi abakyengyesha, Efile Mukulu bambile shi: “Naamono mombo ya mwilo wande . . . nawuku kufwambuka kwabo.” (Efilu 3:7) Panabangile kusangeela ngikashi ibuwa ya Yehowa, naadi mwate kitshibilo kya kulambula muwa wande kwadi. Mu 1998, naadi mubatshishibwe bu umune a ku ba Temwe ba Yehowa.

Pepi na kipwa kunyima kwa’mi kubatshishibwa, naadi mutwele mu kalasa ka bampofu pepi na kibundji kya Escuintla. Mukulu umune a mu kakongye bamwene nkalakashi inaadi naayo bwa kutwela mu bisangilo panaadi mushale mu kibundji kyetu. Kakongye ke pepi kabaadi kula, kukila yaaya myengye ibaadi bano ba Temwe abasabuka bwa kufika mu kulonga naami, na bibaadi bukopo bwa’mi kukita luno lwendo. Bwa kunkwasha, yawa mukulu besambile na kifuko kimune kya ba Temwe mu Escuintla babaadi bakumiine bwashi nshale ku nshibo yabo bwandya kutwelanga mu bisangilo. Mpa na bu lelo bakwete kumbamba nka bu’mi mwina kifuko kyabo.

Ne kulonda myanda ibungi itale kifulo ky’eyendo kindeshe beena kakongye. Ino myanda yooso nginkuminyishe shi byandi Temwe a Yehowa, ne munkatshi mwa beena Kidishitu b’eyendo.​—Yowano 13:34, 35.

Ntanepusha dingi shi ne mukutwe kapu sunga lukulupilo nya. Binobino nshalelo ande e na keatshila. Bu byandi mufubi a nsaa yooso mu mudimo wa ba Temwe ba Yehowa wa kulongyesha bantu Bible, natuulu binangu byande mu kulongyesha bantu bya binyibinyi bya mu Bible pamutwe pa kwibituula ku kilema kyanda. Na dingi, ne na mwabi wa kufuba bu mukulu mu kakongye na kukita miisambo ya bantu booso mu tukongye. Ne mupete mpa na mwabi wa kukita miisambo ya mu Bible ku bikongeno bya mafuku asatu kumpala kwa bantu binunu.

Mu 2010, naadi mupudishe mu kalasa ka Ecole de formation Ministérielle (katwitanyina lelo bu Kalasa ka balungudi ba Bufumu) kabaadi kakitshikye mu El Salvador. Kano kalasa kabaadi kandumbuule bwa kukumbasha mashito ande mu kakongye kalolo. Kutwela mu kano kalasa kubaadi kunkwashe bwashi mpushe shi ne mufudibwe ngofu na Yehowa Efile Mukulu, mukumbeene kupa muntu ooso ngobesha bwashi amufubile.

Yesu bambile shi: “Mwabi wa kupana ngukile wa kupeebwa.” (Bikitshino 20:35) Lelo uno, ne kwamba eyendo’shi ne na muloo, sunga byekala‘shi kumpala ntshi naadi napwandikisha’shi bi kukitshika, binobino namono’shi ne mulombeene kukwasha bangi.