Naadi mufule bipangwa kubanga ku bukinga. Kifuko kyetu tubaadi na kiubishi kya kwendanga mu mitamba na kubandila mashiba ebuwa e pepi na kibundji kyetu kya Jyväskylä, mu Finlande a munkatshi. Ne mufule dingi nyema. Panaadi nki mukinga, naadi nakumiina kukwata kaushi na mbwa ooso a namono! Panakudile, bibaadi abinkalakasha kumona bibaadi bantu bebungi abakyengyesha nyema. Paapa, naadi mutwele mu ndumbulwilo umune a kukalwila matalwa a nyema, munaadi mufumankane na bantu be na binangu bu binandi nabyo.

Tubakitshine ma kampanye bwa kukalwila matalwa a nyema. Tubaadi babile tukanda atwisambila ino myanda na kutambuka mu mashinda mu bibumbu bwa kupela makashinyi aapana misokya na ma laboratoire mwabatompo manga ku nyema. Tubaadi dingi bakite ungi ndumbulwilo bwa kukalwila nyema. Bu bibatudi baate bitshibilo bi bukopo bwa kupeta kibatudi atukimbi, misango ibungi bakata ba mbulamatadi abaadi abetukalakasha. Nadi mukwatshibwe na musambishibwe ku tumiladi misango ibungi.

Kukasha lusa lunandi nalo bwa nyema, myanda ayikitshika mu nsenga ishima ibaadi ayinkalakasha ngofu. Akupu, nabangile kufuba pamune na ingi ndumbulwilo, bu kileshesho Amnesty International na Greenpeace. Nadi mwipane ngofu na bukome bwande booso bwa kukwatshishena midimo yayo. Naadi nesambila balanda, bano be na nsala, na bangi booso bashi na nshalelo ebuwa.

Kapelakapela namwene shi ntshi mulombeene kushintuula ino nsenga nya. Sunga byekala shi ino ndumbulwilo ngyobeshe kupudisha ingi myanda ipeela, myanda ikata ikwete kwenda na kulwila. Bibaadi nka bu’shi makome a bubi ngamine nsenga ishima na takwi muntu etatshisha bwa byooso byabya nya. Namwene shi nafudiila.

Panapushishe kinyongwa mwanda takwi muntu a kunkwasha, nabangile kwela binangu pabitale Efile Mukulu na Bible. Kala naadi mulongye Bible na ba Temwe ba Yehowa. Sunga byekala shi naadi musangale mushindo ubaadi ba Temwe bandeshe kalolo na kwitatshisha bwande, ntshi naadi mukumiine kushintuula nshalelo ande aa mafuku nya. Uno musango, myanda ngilekeene.

Natshile Bible ande nabanga kubadika. Bibaadi bu bwanga abutadisha malonda ande. Namwene verse ibungi ya Bible ayitulongyesha bya kwikala kalolo na nyema. Bu kileshesho, mu Nkindji 12:10 abamba “muntu e buwa alamwinâ nyema yê kalolo.” (EEM) Namwene shi myanda i mu nsenga ta Efile Mukulu mwiyituushe nya. Na dingi, myanda yetu ayende na kutama mwanda bantu bebungi tabakwete kulonda bukunkushi bwaye. Eshimba dyande dibaadi dinkume ngofu pakulonga bi kifulo kya Yehowa na lusa lwaye.​—Misambo 103:8-14.

Mu aa mafuku, namwene kasaki ka kutuma bwa kupeta mukanda A nkinyi akilongyesha namu Bible? ami nkwikatuma. Kunyima kwa mafuku, ba Temwe babidi, mulume umune na mukashi aaye, abafikile bangipusha su nakumiina kulonga Bible, ami nkukumiina. Nabangile dingi kwenda ku bisangilo bya beena Kidishitu ku Nshibo ya Bufumu. Bu kipeta, bya binyibinyi bya mu Bible bibabangile kumena mishi mwishimba dyande.

Ku bukwashi bwa Bible, ne mobesha kushintuula myanda ibungi mu nshalelo ande. Nalekyele kutoma nfwanka na bunkolwenkolwe. Naadi mulumbuule nfwadilo ande na ngakwilo. Na naadi mushintuule mweneno ande a bakata ba mbulamatadi. (Bena-Loma 13:1) Naadi dingi mulekye mwikeelo wibutete, mwikeelo unaadi namono shi ngulombane.

Mwanda ubaadi bukopo kushintuula bwande ubaadi utale kwikala na mweneno ebuwa a ndumbulwilo ayikalwila matalwa a bantu. Tabibaadi bishintulukye musango umune nya. Ku mbangilo, namwene shi nalwishisha ino ndumbulwilo su nemukatuka. Anka, nafikile mu kushinkamisha shi Bufumu bw’Efile Mukulu nyi lukulupilo lw’eyendo penda lumune lwa ino nsenga yetu. Natshile kitshibilo kya kupana bukome bwande booso bwa kukwatshishena buno Bufumu na kwibulongyesha bangi.​—Mateo 6:33.

Panadi netatshisha bwa kulumbuula nshalelo ya bantu, naadi nabuula bantu mu bisaka bibidi​—kya bebuwa na kya bebubi​—na naadi mwikutwene na bano banaadi namono shi bebubi. Kadi ku bukwashi bwa Bible, ntshi kii dingi na mushikwa wa bangi nya. Pamutwe pa byabya, netatshisha bwa kulesha bantu booso kifulo kya bwina Kidishitu. (Mateo 5:44) Ku ingi myanda yankitaa bwa kulesha kino kifulo, nalungulaa mukanda wibuwa wa Bufumu bw’Efile Mukulu. Ne na muloo wa kumona bi uno mudimo wa buntu autusha butaale na muloo na kupa bantu lukulupilo.

Ne mupete butaale mwishimba pakutuula byooso mu maasa a Yehowa. Ne mushinkamishe shi aye, bu byadi Mupangi, tatadiila bwashi bakyengyeshe nyema na bantu bwa looso sunga kutadiila bwashi nsenga yaaye ibuwa ilwishibwe. Anka, ku bukwashi bwa Bufumu bwaye, akyebe binobino kulumbuula byooso byabadi balwishe. (Yeeshaya 11:1-9) Abimpa muloo ukata kushi penda mwanda nanguku bino bya binyibinyi kadi mwanda nakwasha bangi bwashi bekale na lukumiino mu byanka. Ntamonaa dingi shi ne na kya kushintuula bya pano nya.