Naadi mutandikwe na kukula mbwipi mwa kibundji kya Rome, mbalo ishale bantu be na bulanda. Nshalelo baadi bukopo. Ntanguku nyinami nya, na ntshinaadi na kipwano kibuwa na nshami nya. Nakudile na kulonga myanda ya mu kilayi.

Panadi na bipwa ekumi, nabangile kuyiba. Na bipwa 12, nasukile ku nshibo musango wa kumpala. Misango ibungi, nshami baadi ende mu kungata kwi bampulushi bwa kungalusha ku nshibo. Naadi nsaa yooso nalee na bantu​—naadi n’etombo na kukwatshila bantu booso nsungu. Panakumbeeshe bipwa 14, nakatukile ku nshibo bwa looso. Nabangile kutoma kabangi na kulala mu kilayi. Bu byanshi naadi na mbalo ya kulala, naadi nantwele mu myotoka na kwimulala mpa na ku nakashika. Akupu nende mbalo i mulonda wa mema bwa kwitumpa.

Nafikile ngifi mukata​—kubanga kuyiba kwa kutubulanga bibuta bya bantu mpa na kutwelela bantu mu mashibo bufuku. Naadi mwende nkumo ibubi na naadi musango umune mwitaminwe bwa kutwela mu kisaka kikata kya ba bantomboshi, kibaadi kimpe “mushindo” wa kubanga kuyibanga mu ma banque. Bu binaadi n’etombo dikile, nafikile muntu abanemeka ngofu mu kino kisaka. Ntshi naadi nende mbalo su ngimune kushi kamputu kande; nyi kwamba shi, naadi nalala nako mushi mwa mbalo yandi mutuule mutwe. Buntomboshi, kabangi, bungifi, ngakwilo mubi, na lusandji bibaadi bu nshalelo ande. Ba mpulushi abaadi abelondeena nami nsaa yooso. Abaadi bankwate misago ibungi, na naadi mukishe bipwa bibungi mafuku mu lukano mafuku pasha.

Ungi musango, panaadi mutukye mu lukano, natshile kitshibilo kya nkatala umune a ku bena ba mama. Kushi’mi kuuka, uno mwina a mama na bana baye babidi abaadi bapwe kufika ba Temwe ba Yehowa. Babaadi bangitanyishe ku bisangilo bya ba Temwe. Penda bwa kumona byabikitshikaa, nayile naabo. Pabatufikile ku Nshibo ya Bufumu, naadi mutekye bwashi nshale pepi na kiibi bwa komona ooso atwele na kutuuka. Mwanda naadi na kamputu kande.

Kino kisangilo kibaadi kishintuule nshalelo ange. Natentekyesha binamwene nka bu’mi shi dingi mu ino nsenga. Abaadi banseme na muloo kwi bantu be na tusepo twa binyibinyi. Nkwete kutentekyesha mu binangu byande meso a kalolo na kifulo kya binyibinyi abaadi antale nao ba Temwe. Bibaadi nka bu myanda ya ku midiyo ya bilometele kula na nsenga inaadi mushaale!

Nabangile kulonga Bible na ba Temwe. Panaadi nalongo, namwene patooka shi ne na kya kushintuula nshalelo ande. Naadi mwate na muulo mayi e mu mukanda wa Nkindji 13:20: “Su otemba na basha binangu obe namu okekala nabyo, anka su otembâ na balôtakane, okamono malwa.” Namwene shi abitungu kutuuka mu kino kisaka kya bantomboshi. Tabibaadi bibofule nya, kadi ku bukwashi bwa Yehowa, naadi mobeshe.

Naadi dingi mwitoshe ku mbidi. Na kwitatshisha kooso, naadi mobeshe kuleka kutoma nfwanka na kabangi. Natshibile nyene, nasumbula tudibu tunaadi nafwala, na kuleka ngakwilo ebubi. Bwa musango wa kumpala mu nshalelo ande, nabangile kukunkusha myanda yankitshi na lwishinko.

Kasha nta nsangelaa kubadika sunga kulonga nya, byabya tabibaadi bibofule bwa kushala na kutuula binangu pamune bwa kulonga Bible nya. Anka, bu binaadi nakitshi mwande mooso, kapela kapela nafikile mu kufula Yehowa, na kwi kintu kibabangile kushintuluka mwandi​—kondo kande k’eshimba kababangile kunkalashena. Naadi nsaa na nsaa na binangu bibubi pabitale ami nabeene, naadi na mpaka shi Yehowa ta mmulombeene kunfwila lusa bwa ino myanda yooso ibubi inaadi mukite. Mu ino nsaa naadi nanyingishibwa kwishimba pa kubadika mushindo ubaadi Yehowa mufwile Nfumu Daavide lusa kunyima kwa’ye kukita milwisho ikata.​—2 Samwele 11:1–12:13.

Kingi kintu kibaadi bukopo nyi nkulungula bangi bi lukumiino lwande mu mudimo wa ku nshibo na nshibo. (Mateo 28:19, 20) Naadi natshinyi shi ne kufumankana na muntu anadi pangi mutape sunga mulwishishe kala! Kadi kapela kapela naadi mupudishe uno moo. Naadi mupete muloo ukata wa kukwasha bantu balongye pabitale Nshetu e mwiyilu, sha lusa lukata.

Kulonga pabitale Yehowa kubaadi kupashe muwa wande! Bena’mi bebungi banaadi naabo mbapwe kufwa sunga shi be mu lukano, kadi ami ne na nshalelo ebuwa a muloo na lukulupilo bwa mafuku e kumpala. Ne mulongye bya kwikala na kwiyisha na kukokyela na bya kukambila nsungu inaadi nayo bwa kwishinka. Nyi bwakinyi, ne na kipwano kibuwa na bantu be pepi na’mi. Ne mupete mwabi wa kwibakila mukashi ande ebuwa, Carmen. Twi na muloo wa kukumika pamune bwa kulongyesha bantu Bible.

Oh, na binobino nakitshi mudimo na kululama​—ingi nsaa abitungu nkafuba mu ma banque, kadi pamutwe pa kuyiba mwanka, nemukombo!