MUNTU mmulombeene kushaala na lulamato sunga nsaa yadi mu kutompibua kui bukopo na su kukookiela nkulombene kumukutshishua bintu bia ku mbidi? Luno lukonko abaadi beluele​—na kuilualuula—​pabitale muana mulume abetamina bu Yoobo.

Yoobo baadi mukuabo na Abalahama na baadi mushale mu Arabi mu kipungo kibaadi bena Isalele mu bupika mu mu Ejipitu. Mu aa mafuku, ba mikeyilu abaadi bebungie kumpala ku’Efile Mukulu, na Satana ntomboshi baadi munkatshi muabo. Kumpala kua kakongie kabaadi kebungie muiyilu, Yehowa baadi muleshe biadi mukulupile mufubi aaye Yoobo. Biabia, Yehowa bambile’shi, takui mungi muntu e na lulamato bu lua Yoobo. Anka Satana bambile’shi Yoobo afubila Efile Mukulu muanda mmumuelele muabi na amukaluila. Satana baadi mupuandikishe’shi su Yoobo ashimisha bintu biaye bioso, apele Efile Mukulu.

Efile Mukulu baadi mutadiile Satana buadia kushimisha bupeta bua Yoobo na bana baaye mpa na bukome buaye bua mbidi. Kushi’ye kuuka mudimo wi nao Satana mu bino bioso, Yoobo tabaadi mulombeene kuuka buakinyi Efile Mukulu baadi mutadiile bua’shi apete bino bitompuanga. Anka Yoobo ta mmupele Efile Mukulu nya.

Ba kuuku ba madimi basatu ba Yoobo abafikile. Na miisambo ibungi ifundibue mu mukanda wa Yoobo, bano bantu abatompele mu mushindo wibubi bua kukuminyisha Yoobo’shi Efile Mukulu baadi amunyoko bua miluisho yadi mufuamishe. Abaadi mpa na bambe’shi Efile Mukulu t’asangalaa na bafubi baaye sunga kuibakulupila. Yoobo baadi mupele binangu biabo bibubi. Na lukumiino looso, Yoobo bambile’shi alama lulamato luaye mpa na ku lufu!

Anka Yoobo bakitshine kilema pa kukishakisha kukimba kuibingisha. Mungi nsongualume abetamina bu Elihu, baadi ateemesha muisambo kalolo, bakuile bua kutopeka Yoobo na ba kuuku baaye ba madimi. Elihu batopekiele Yoobo pa kukutua kubingisha Bufumu bua Yehowa Efile Mukulu’shi e na muulo kukila kuibingisha kua muntu kampanda. Elihu dingi baadi mutopekie ngofu ba kuuku baaye.

Akupu Efile Mukulu besambile na Yoobo, aludika mmueneno aabo. Pabaadi esambila bipangua biaye bibungi bia kukaanya, Yehowa bapeele Yoobo dilongiesha dia’shi muntu mmushaadile ngofu ku bukata bu’Efile Mukulu. Yoobo na kuiyisha kooso baadi mukumiine elango di’Efile Mukulu. Yehowa aye muikale “muwule ndaa na kifulo na lusa,” bapeele dingi Yoobo mbidi bukome, amualuisha bupeta buaye misusa ibidi, na amuelela muabi aye nkutanda bana ekumi. (Shake 5:11) Pa kushala na lulamato kui Yehowa nsaa ibaadi mu kitompuanga ki bukopo, Yoobo baadi moobeshe kualuula ku mpaka ya Satana ya’shi muntu ta mmulombeene kushala na lulamato kui Efile Mukulu su atompibua.

​—Muyile mukanda wa Yobo.