SHAPITRE 37

Ne kubatshishibua su?

Ela katuduile ku ino mianda ayilondo bua kulesha su eyendo sunga madimi:

Abitungu muina Nkidishitu oso abatshishibue.

□ Eyendo

□ Madimi

Kepatshila kakata ka kubatshishibua nka nkukaluila bua kupela kukita miluisho.

□ Eyendo

□ Madimi

Kubatshishibua akukuasha bua kupashibua.

□ Eyendo

□ Madimi

Su tuemubatshishibue Efile Mukulu tabadika bikitshino biobe.

□ Eyendo

□ Madimi

Su bakuku bobe ababatshishibua, abilesha’shi obe namu bopu kulombana bua kubatshibua.

□ Eyendo

□ Madimi

SU OKUETE kukokiela miya y’Efile Mukulu, na we mu kipuano ki buwa naaye, na okuete kulungula bangi pabitale lukumino lobe, tabi bubi su onangushena bua kubatshishibua. Kadi mbikunyi biodi mulombene kuuka’shi bopu kulombana bua kubatshishibua? Bua nkukuasha bua kualula luno lukonko, tubande kutala mianda ibatuisambila ku nundu.

● Abitungu muina Kidishitu oso abatshishibue.

Eyendo. Yesu baadi muleshe’shi abitungu balongi baaye babatshishibue. (Mateo 28:19, 20) Biabia, Yesu namuinyi baadi mubatshishibue. Bua kulonda kileshesho kia Nkidishitu, abitungu obatshishibue anka su toodi na ngobesha ya kuata kitshibilo na su okumina kuibikita.

● Kepatshila kakata ka kubatshishibua nka nkukaluila bua kupela kukita miluisho.

Madimi. Kubatshishibua nkulesha pabutooka’shi we muilambule kui Efile Mukulu. Kubatshishibua ta kui bu kintu akikukutshishua bua kukita kiakia kiokumina. Anka olambula muwa obe kui Yehowa muanda okumina kuikala na nshalelo muipushene na miya yaaye.

● Kubatshishibua akukuasha bua kupashibua.

Eyendo. Bible akula’shi, kubatshishibua nyi muanda wi na muulo ukata aufikisha muntu mu kupashibua. (1 Mpyeele 3:21) Bino tabilesha’shi kubatshishibua kui bu mukanda wa ansurance aukukuasha nsaa ayituku masaku nya. Obatshishibua muanda wemufule Yehowa na okumina kumulanguila n’eshiba diobe dioso bua looso.​—Mako 12:29, 30.

● Su tuemubatshishibue Efile Mukulu tabadika bikitshino biobe.

Madimi. Shake 4:17 amba’shi: “Byaabya muntu mulombeene kukita mwanda wibuuwa, su akutwa kwiukita baakitshi mulwisho”​—biabikala’shi mubatshibue sunga’shi ntamubatshishibue. Biabia su ouku kukita ki buwa na bopu kunyinga bua kutaluula nshalelo obe kalolo, wekuisamba na baledi boobe sunga na ungi muina Nkidishitu munyingie pabitale uno muanda. Kukita bino akukukuasha bodia kumono bia kuenda kumpala na kubatshishibua.

● Su bakuku bobe ababatshishibua, abilesha’shi obe namu bopu kulombana bua kubatshibua.

Madimi. Kitshibilo kia kubatshishibua abitungu kikatukile muishimba diobe obe nabene. (Misambo 110:3) We kubatshishibua anka su bopusha binyibinyi akilesha kuikala Temue a Yehowa na podi mushinkamishe’shi okalombasha buabua bushito.​—Mulungudi 5:4, 5.

Kubatshishibua akushintuula nshalelo oobe

Kubatshishibua akushintuula nshalelo obe na akufuisha miabi i bungi. Anka kubatshishibua mbushito bukata​—bua kuikala na nshalelo muipushene na mutshipo uboodi mukite kui Yehowa.

Wemupue kuilumbula bua kubatshishibua su? Su mbiabia we na kambingilo ka kuikala na muloo. Okapete kinemo kikile bukata​—kia kufubila Yehowa n’eshimba diobe dioso na kuikala na nshalelo alesha’shi we muilambule binyibinyi kuadi.​—Mateo 22:36, 37.

MU SHAPITRE ALONDO

Longa biodia kuifundila bipatshila buashi ofubishe nshalelo oobe kalolo.

KIFUNDUE KI NA MUULO

‘Lambulayi mbidi yenu bu mulambu wi na muwa, wi selele, ausakisha Efile Mukulu, uno ngi wikale mufubo wenu wa kinangu.’​—Bena-Loma 12:1.

MAYELE

Na bukuashi bua baledi boobe, kimba ungi muntu mu kakongie, mulombene nkukuasha bua kuenda kumpala mu kikudi mpa na ku lubatshisho.​—Bikitshino 16:1-3.

OUKANGA SU . . . ?

Kubatshishibua nkuikale “kitunduilo” kikata bua kipandilo kiobe.​—Esekyele 9:4-6.

MIANDA YANDIA KUKITA!

Buandia kuenda kumpala bua kubatshishibua, nanyingisha mpushisho ande a ano malongiesha a mu Bible aalondo: ․․․․․

Kiandia kuipusha baledi bande pabitale uno muanda ․․․․․

OPUANDIKISHA KINYI?

● Buakinyi kubatshishibua etabula di na muulo ukata?

● Nkinyi kilombene kutakula nsongua bua kuata kitshibilo kia kubatshishibua binobino?

● Nkinyi kilombene kubofusha nsongua bua kuata kitshibilo kia kuilambula na kubatshishibua?

[Eyi dya kukaka nadyo binangu bya bantu]

“Kuuka’shi nadi mubatshishibue kubaadi kunkuashe bua kuata bitshibilo bi buwa, na kupela kukita mianda ilombene kutuusha bipeta bi bubi.”​—Holly

[Kashibo/​Foto]

Nkonko yabakamba kuela pabitale lubatshisho

Kubatshishibua akulesha kinyi? Pabakuinyi obe oso mu meema na kukubusha, abilesha’shi, bofu pabitale nshalelo wekalanga naaye akukimba penda buwa bobe, na binobino buekashua na muwa bua kukita kikiebe ki’eshimba dia Yehowa.

Kulambula muwa oobe kui Yehowa akulesha kinyi? Akulesha’shi, bolekie kukita mianda ayikusankisha nka penda obe nabene, na bolaa bua kukita kikiebe ki’eshimba di’Efile Mukulu kumpala kua mianda yobe yoso. (Mateo 16:24) Bi na muulo buashi welambule kui Yehowa mu luteko kumpala kodia kubatshishibua.

Mianda kinyi ayitungu’shi okite kumpala kodia kubatshishibua? Abitungushi wekale na nshalelo muipushene na miiya y’Efile Mukulu na kulungula bangi pabitale lukumiino lobe. We kunyingisha bukuuku bobe n’Efile Mukulu, ku bukuashi bua luteko na kulonga Eyi diaye. Abitungu ofubile Yehowa muanda okumiina kumufubila​—kadi tabitungu webikite penda muanda washi bangi abakutakula.

Muntu ekubatshishibua na bipua bungi kinyi? Bipua tabina muanda nya. Anka abitungu wekale na bipua abikukuasha bua kuikala munyingie​—buashi opushe akilesha kuilambula kui Efile Mukulu.

Wekukita kinyi su okumina kubatshishibua, kadi baledi bobe abakutekie bua kutengiela? Pangi abakumiina’shi obande kuiwubidishena na nshalelo a bena Nkidishitu. Ata elango diabo na muulo, na fubisha ino nsaa bua kunyingisha kipuano kiobe na Yehowa.​—1 Samwele 2:26.

[Kashibo]

Esaki dia kulonga nadio

Okuete kuela binangu bua kubatshishibua su?

Buakumona biokuete kuenda kumpala, taluula nkonko na mianda ayilondo. Obadikie bifundue biabadi baleshe kumpala kodia kufunda ngalulo yobe.

Mu mishindo kinyi mokuete kulesha’shi we mukulupile kui Yehowa?​—Misambo 71:5. ․․․․․

Mbikunyi biodi muleshe’shi ofubishaa ngobesha yobe ya kushingula mianda i buwa na i bubi?​—Bena-Ebelu 5:14. ․․․․․

Otekaa misango bungi kinyi kuifuku? ․․․․․

Otekaa mianda ayikatukila muishimba diobe, na yaya nteko ayilesha kinyi pabitale kifulo kiobe bua Yehowa?​—Misambo 17:6. ․․․․․

Funda kuushi bipatshila biokiebe kuifundila pabitale nteko yobe. ․․․․․

Welongielaa Bible pa kiubishi su?​—Yooshwa 1:8. ․․․․․

Mmianda kinyi yuelongielaa? ․․․․․

Funda kuushi bipatshila biokiebe kuifundila pabitale kuilongiela kobe. ․․․․․

Olungulaa mukandu wi buwa mu mushindo wi buwa su? (Bu kileshesho: Wekupatuluila bangi malongieha a kitako a mu Bible su? Walukilaa mu kutala bantu bekeele baleshe lukalo? Okunkushaa kulonga kua Bible?)

□ Oolo □ Nya

Wenda mu bulungudi sunga baledi boobe ntambende su?​—Bikitshino 5:42.

□ Oolo □ Nya

Funda kuushi bipatshila biokiebe kuifundila pabitale mudimo obe wa bulungudi.​—2 Timote 2:15. ․․․․․

Otuela mu bisangilo bioso bia bena Nkidishitu pa kiubishi su?​—Bena-Ebelu 10:25. ․․․․․

Otushaa ngalulo mu bisangilo? ․․․․․

Wendaa mu bisangilo sunga baledi bobe ntambende (su mbakupe matalua a kuimuenda)?

□ Oolo □ Nya

Wekuamba’shi okuminaa binyibinyi kukita kikiebe ki’eshimba di’Efile Mukulu?​—Misambo 40:8.

□ Oolo □ Nya

Wekulesha misango bungi kampanda yodi mupele kulonda binangu bia bakuuku bobe su?​—Bena-Loma 12:2. ․․․․․

Nkinyi kiodia kukita buashi kifulo kiobe bua Yehowa kishale kinyingie?​—Yunda 20, 21. ․․․․․

Okatungungunuka na kufubila Yehowa sunga baledi na ba kuuku bobe baleka ku mufubila su?​—Mateo 10:36, 37.

□ Oolo □ Nya

[Foto]

Nka bu dibaka, kubatshishibua akushintuula nshalelo a muntu​—nta muanda wa kuata na muulo upela nya