Eshina dy’Efile Mukulu nyi Yehowa. Adipatuula’ shi “Yawa ayikashaa.” Yehowa ngi Efile Mukulu sha bukome booso, bapangile bintu byoso. E na bukome bwa kukita kyoso kyakumiina kukita.

Mu kina Ebelu, eshina dy’Efile Mukulu mbedifunde na maleta ananka. Ano maleta ananka mbeapatuule bino mu Anglais; YHWH sunga JHVH. Eshina dy’Efile Mukulu di mu bifundwe bya Kina Ebelu kya kala misusa ifikye ku 7 000. Bantu ba mu nsenga ishima abetanyinaa eshina, Yehowa, mu mishindo ilekenelekene, beditemunga muyiile byabadi bawubiile mu ndimi yabo.[1]

▸ Shap. 1, kik. 15

Bible mmukanda w’Efile Mukulu. Baadi mutume bantu bwashi beufunde. Bi nka bu muntu mununu alungula mwan’aye bwashi amukwashe bwa kufunda mukanda. Efile Mukulu namu baadi mupe bafundji kikudi kyaye kiselele bwashi bafunde binangu byaye. Kikudi kiselele kibaadi kibakunkushe mu bipaso bilekenelekene. Ingi misusa, abamonanga bimonwa, sunga kulota, akupu abafundu.

▸ Shap. 2, kik. 5

Nyi ndambukiisho ya myanda ya binyibinyi yatupete mu Bible pabitale kibuwa na kibubi. Kileshesho, eyi dya kulonda adyamba’shi “baakuuku beebubi abalwishaa bwikashi bwibuuwa,” aditulongyesha’shi twi bakumbeene kwambula bwikashi bwibubi sunga bwibuwa bwa bantu batushaala nabo. (1 Beena-Kodinda 15:33) Na dingi eyi dya kulonda adyamba’shi “Akikunu muntu, ngi kyaawumbula,” aditulongyesha’shi myanda yooso yatukitshi i na bipeta byayo.​—Beena-Ngalatea 6:7.

▸ Shap. 2, kik. 12

Nyi mmukandu autuuku kwi Efile Mukulu. Wi kwakwila pabitale kikyebe ky’eshimba dy’Efile Mukulu, dilongyesha kampanda, mwiya sunga kiimu kyaye. Ngulombeene’nyi kwakwila pabitale mwanda kampanda aukalombana mu mafuku aafiki. Mu Bible mwi matemuki ebungi apwe kulombana.

▸ Shap. 2, kik. 13

Yesu ngi baadi mulombashe matemuki ebungi abalesha mu Bible pabitale Mesiya. Tala kashibo akamba’shi “ Matemuki aakwila pabitale Mesiya.”

▸ Shap. 2, kik. 17

Yehowa bapangile nsenga bwashi ikale mpaladiisu bwa bantu bamufule. Mpàngo yaye ta ngyalulukye ooo. Efile Mukulu akatusha myanda yooso ibubi na kupa bantu muwa wa ikalaika binobino.

▸ Shap. 3, kik. 1

Nyi mwikeyilu baadi mubangye kutombokyela Efile Mukulu. Abamwitanyina bu Satana, eshina adipatuula’shi “Mwishikwanyi,” mwanda alwishaa Yehowa. Abamwitanyina dingi bu Diabulu, eshina abipatuula’shi “muntu adimbilaa bantu myanda.” Abamupeele dino eshina mwanda akulaa madimi pabitale Efile Mukulu, na dingi adimbaa bantu.

▸ Shap. 3, kik. 4

Yehowa bapangile ba miikeyilu kumpala kwaye kupanga nsenga. Baadi mwibapangye bwashi bashaale naye mwiyilu. Kwi ba miikeyilu bakile pa midiyo lukama. (Ndanyele 7:10) Be na mashina na ngikashi ilekenelekene, na ba miikeyilu basha lulamato t’abakumiinaa bebalangwila kwi bantu nya. Be mu milongo ilekenelekene na midimo ilekene. Bangi bakwete kufuba kumpala kwa lupuna-sulu lwa Yehowa, kulungula bantu mikandu yaye, kukalwila na kukunkusha bafubi baye be pa nsenga, kulombasha kiimu kyaye, na kukwatshishena mudimo wa bulungudi. (Misambo 34:7; Kibafumbwilwe 14:6; 22:8, 9) Yesu na ba miikeyilu abakafiki bwa kulwa ngoshi ya Armagedone.​—Kibafumbwilwe 16:14, 16; 19:14, 15.

▸ Shap. 3, kik. 5; Shap. 10, kik. 1

Nyi nkintu kyoso kyatupusha, kyatunangushena sunga kyatukitshi kadi kikutwene na Yehowa sunga kikyebe ky’eshimba dyaye. Mulwisho ngulombeene kutshiba kipwano kyetu n’Efile Mukulu, ngi bwakinyi mmwitupe miiya na mayi a kulonda aetukwasha bwa kupela kukita mwanda watwiuku’shi mmulwisho. Ku kibangilo, Yehowa bapangile bintu byoso bipwidikye. Adama na Eeva pababatombokyele, abalwishishe, abo nkufika bantu bashii bapwidikye. Abaadi banunupe na bafwa. Atwe namu tukwete kununupa mpa na kufwa, mwanda twi bapyane mulwisho wa Adama.

▸ Shap. 3, kik. 7; Shap. 5, kik. 3

Nyi ngoshi y’Efile Mukulu ayikabutula ndumbulwilo a Satana na myanda yooso ibubi.

▸ Shap. 3, kik. 13; Shap. 8, kik. 18

Nyi mbulamatadi abadi batuule mwiyilu kwi Yehowa. Yesu Kidishitu ngi Nfumu kwete kukunkusha uno mbulamatadi. Mu mafuku aafiki, Bufumu bw’Efile Mukulu abukakatusha myanda yooso ibubi. Na dingi, abukamunana pa nsenga.

▸ Shap. 3, kik. 14

Efile Mukulu bapangile Yesu kumpala kwa kupanga bintu byoso. Na, amutuma pa nsenga bwashi afwile bantu booso. Kunyima kwabo kwipaa Yesu, Yehowa bamusangwile ku lufu. Binobino, Yesu mmushaale bu Nfumu kwete kukunkusha Bufumu bw’Efile Mukulu.

▸ Shap. 4, kik. 2

Bible batemukile kipungo akikamweneka Mesiya. Alesha’shi; abikekala ku nfudiilo kwa kipungo kyabetanyina bu mbingo 69. Kino kipungo kibabangile mu 455 K.B.B. na kibaadi kifudiile mu kipwa kya 29 B.B.

Atwiuku naminyi shi kibaadi kifudiile mu kipwa kya 29 B.B.? Mbingo 69 ibabangile mu kipwa kya 455 K.B.B. pabafikile Neemiya abanga kwibakuula kibundji kya Yelusalema. (Ndanyele 9:25; Neemiya 2:1, 5-8) Nkabu abyakulaa bantu shi “douzaine” bwa kulesha bintu 12, byabya mwaku “lubingo” aulesha mafuku 7. Anka mbingo yabakwila mu buno butemuki t’ayilesha mbingo ya mafuku musambobidi nya, nyi mbingo ya bipwa musambobidi, bu abilesha butemuki abwamba’shi ‘efuku dyooso adikala bu kipwa.’ (Mbadiko 14:34; Esekyele 4:6) Bino abilesha’shi lubingo looso lwi na bipwa musambobidi na’shi mbingo 69 ayituusha bipwa 483 (69 x 7). Su tubabadika bipwa 483 kubanga mu 455 K.B.B., atufiki mu kipwa kya 29 B.B. Kino ndjo kipwa kibaadi Yesu mubatshishibwe na afika bu Mesiya.​—Luka 3:1, 2, 21, 22.

 Mu buno butemuki’nyi, abalayile lungi lubingo, alulesha bipwa musambobidi bya panundu. Na mu kino kipungo ndjo mubaabadi balombeene kwipaa Mesiya, mu kipwa kya 33 B.B., na kubanga mu kipwa kya 36 B.B., mukandu wibuwa wa Bufumu bw’Efile Mukulu ubabangile kulungulwa mu bisamba byoso kushii penda kwi beena Yunda.​—Ndanyele 9:24-27.

▸ Shap. 4, kik. 7

Bible alongyesha’shi Yehowa Efile Mukulu ngi Mupangi. Bapangile Yesu kumpala kwa bingi bintu byoso. (Beena-Kolose 1:15, 16) Yesu ta nnaye Efile Mukulu Sha bukome booso nya. Kashaa, tapetele kinangu kya kwikala mumune n’Efile Mukulu nya, mwanda bambile’shi: ‘Yaya, mmunkile ku bukata.’ (Yowano 14:28; 1 Beena-Kodinda 15:28) Bingi bipwilo abilongyeshaa’shi, kwi Efile Mukulu umune e mbasatu: Yaya, Mwana, na kikudi e selele. Aku namu mwaku “busatu bwiselele” tawi mu Bible nya. Byabya, dino dilongyesha ndya madimi.

Kikudi kiselele nyi mbukome bukitshishi bw’Efile Mukulu, bush’abumwenekaa kadi bwafubishaa bwa kulombasha akikyeb’eshimba dyaye. Ta mmuntu ooo. Kileshesho, Beena Kidishitu ba kwibedi, ‘babaawudile booso na kikudi kiselele’ na Yehowa bambile’shi: ‘Naakasukumuna kikudi kyande pa bipangwa byooso.’​—Bikitshino 2:1-4, 17.

▸ Shap. 4, kik. 12; Shap. 15, kik. 17

Beena Kidishitu ba binyibinyi pabalangwila Efile Mukulu, t’abafubaa na nkuluse nya. Bwakinyi?

1.  Nkuluse abaadi abafubu naye kwi balangwidi ba madimi munda mwa bipwa bibungi. Mu mafuku a kala, ba mpangano abaadi abafubu na nkuluse mu lulangwilo lwa bipangwa na mu bipikwa byabo bya kulesha bipindji bya mbidi bya butandwa. Mu siekele 3 kunyima kwa lufu lwa Yesu, beena Kidishitu tabaadi abafubu na nkuluse mu lulangwilo lwabo ooo. Bipwa bibungi kunyima, nfumu Constantin bakitshine bwashi nkuluse ekale bu kitundwilo kya Beena Kidishitu. Ngi bwakinyi, abaadi abafubu na nkuluse bwashi bantu bebungi batwele mu bwina Kidishitu. Anka nkuluse ta mmwipushene na lufu lwa Yesu su nkapeela nya. Mukanda wa (New Catholic Encyclopedia) aupatuula’shi: “Lulangwilo lwa nkuluse atwilupete mu  bipikwa bya bantu ba kumpala kwa Kidishitu na bantu bashiibaadi beena Kidishitu.”

2.  Yesu tabaadi mufwe ku nkuluse nya. Kishima kya mu kina Ngidiki kyabadi baluule bu “nkuluse” akilesha “Mutshi ululame,” “kibayi” sunga “kiluu.” Ungi Bible (The Companion Bible) apatuula’shi: “Takwi mbalo su ngimune yabadi bafunde mu kina Ngidiki kishima akilesha bipindji bibidi bya mitshi mu [Kilombeeno kipya].” Yesu bafwile ku mutshi umune ululame.

3.  Yehowa t’akumiina’shi tufube na bifwatulo sunga ma nkishi bwa kumulangwila nya.​—Efilu 20:4, 5; 1 Beena-Kodinda 10:14.

▸ Shap. 5, kik. 12

Yesu baadi mwelele balongi baye mwiya wa kukita Kitentekyesho kya lufu lwaye. Ku kipwa kyoso, abakitaa bino mwifuku 14 dya mweshi wa Nisane. Dino ngi efuku dibakitshine beena Isaleele musangeelo wa pasaka. Abakishaa mukate na nfinyo, bintu abilesha mbidi na mase a Yesu kwi muntu ooso mufikye mu Kitentekyesho. Baaba abakamunana na Yesu mwiyilu abadiyaa mukate na kutoma nfinyo. Baaba namu abakulupila kushaala pa nsenga bwa ikalaika, abatwele mu Kitentekyesho na kanemo kooso kadi tabadi mukate sunga kutoma nfinyo nya.

▸ Shap. 5, kik. 21

Mu Bible a Les Saintes Écritures—Traduction du monde nouveau, mwaku wabadi bapatuule bu “anyima” aulesha (1) muntu, (2) nyema, sunga (3) muwa wa muntu sunga wa nyema. Tala bino bileshesho:

• Muntu. ‘Mu mafuku a Nowa, mubapandjile bantu bapeela ku mema, bantu mwanda.’ (1 Mpyeele 3:20) Pano, mbapatuule mwaku “anyima” bu bantu​—Nowa na mukash’aye, bana baabo basatu na bakashi baabo.

•  Nyema. “Efile Mukulu nkwamba’shi: ‘Mema awule na tunyema atutala, dingi toonyi tupapame kunundw’a nsenga, twibwe mwiyilu.’” Akupu Efile Mukulu bambile’shi: “Nsenga ituushe, bintu abitala muyiile mafuko aabyo: Nyema ya pasha, tunyema tupeela, na nyema ya kisuku muyiile mafuko aabyo! abyo nkukitshika byabya.”​—Kibangilo 1:20, 24.

• Muwa wa muntu sunga wa nyema. Yehowa balungwile Mosesa shi: ‘Booso abakyebanga nkwipa tabapwile kufwa.’ (Efilu 4:19) Pabaadi Yesu pa nsenga, bambile’shi: “Nee mulami eebuuwa: mulami a mikooko eebuuwa apaanaa muuwa waye bwa mikooko yaaye.”—Yowano 10:11.

  Na dingi, su muntu bakitshi mwanda kampanda na ‘mûwa sunga anyima aye oso,’ abipatuula’shi beukitshi n’eshimba dimune na bukome bwaye booso. (Mateo 22:37; Miiya Ikituulwe 6:5, EEM) Muntu mufwe sunga kitanda mbalombeene kwikitanyina bu anyima mufwe.​—Mbadiko 6:6; Nkindji 23:2; Yeeshaya 56:11; Angai 2:13.

▸ Shap. 6, kik. 5; Shap. 15, kik. 17

Mwaku wa mu kina Ebelu na wa kina Ngidiki wabadi bapatuule bu “kikudi” mu Bible a Les Saintes Écritures—Traduction du monde nouveau, ngulombeene kulesha bintu bilekene. Anka byoso abilesha kintu kish’akimwenekaa. Kileshesho, lupunga sunga muwa wa bantu na nyema. Ino myaku ngilombeene’nyi kulesha bipangwa bya mu kikudi na kikudi kiselele, kikale bukome bukitshishi bw’Efile Mukulu. Bible t’alongyesha’shi muntu e na kintu kampanda munda mwaye akitungunukaa na kwikala kwanka su bafu nya.​—Misambo 104:29; Mateo 12:43; Luka 11:13.

▸ Shap. 6, kik. 5; Shap. 15, kik. 17

Ngeena nyi eshina dya kibunduulu kibaadi pasha pa Yelusalema. Mu ino mbalo abaadi abemusumbwila  butshafu akupu abebushiiki kaalo. Takwi kintu su nkimune akilesha’shi mu mafuku a Yesu, abaadi abayipa bantu, bebelanga kaalo mu kino kibunduulu ooo. Byabya, Ngeena tayilesha mbalo ish’ayimweneka kadi yabayipeyaa na kushiika bantu bapwe kufwa kaalo ka ikalaika nya. Pabakwile Yesu pabitale bantu abedibwa mu Ngeena, baadi akula bwa kabutu ka ikalaika.​—Mateo 5:22; 10:28.

▸ Shap. 7, kik. 20

Yesu baadi mwele luno luteko bwa kulongyesha balongi baye mushindo wa kusambila. Abelwitanyinaa bu luteko lwa Yay’eetu. Yesu balongyeshe bwa kuteka bino:

• “Eshina dyoobe dyende ntumbo”

  Atutekye Yehowa bwashi atooshe eshina dyaye ku madimi ooso abakwete kumudimbiila, bwashi dikale na nkumo ibuwa. Apakitshi Efile Mukulu bino, booso be mwiyilu na be pa nsenga abeditumbisha na kwidinemeka.

• “Bufumu boobe bufikye”

  Atutekye bwashi Bufumu bw’Efile Mukulu bubutule ndumbulwilo a Satana, bumunane pa nsenga na kwiyikasha yooso bu mpaladiisu.

• “kyookyebe kikitshikye pa . . . nsenga”

  Atutekye bwashi mpàngo y’Efile Mukulu pabitale nsenga ilombane. Bantu basha kukookyela na bapwidikye bashaale mu mpaladiisu ikalaika, bu bibaadi bikumiine Yehowa pabapangile bantu.

▸ Shap. 8, kik. 2

Yehowa baadi mutuushe nkuulo bwa kupasha bantu ku mulwisho na ku lufu. Nkuulo nyi kintu kibaadi akitungu bwa kukombola kyakya kibaabadi bashimishe kwi Adama, kwamba’shi, muwa upwidikye. Na kwalusha kipwano kibaadi kitshibikye pankatshi pa bantu na Yehowa. Efile Mukulu batumine Yesu pa nsenga bwa kufwila bantu  booso basha milwisho. Lufu lwa Yesu ndupe bantu booso lukulupilo lwa kwikala na muwa wa ikalaika na mbidi bukome.

▸ Shap. 8, kik. 21; Shap. 9, kik. 13

Butemuki bwi mu mukanda wa Ndanyele shap 4, abwitulongyesha’shi Efile Mukulu baadi mutuule Bufumu bwaye mu 1914.

Butemuki: Yehowa baadi muleshe Nfumu Nabukodonozore kilotwa pabitale mutshi ukata ubaabadi bashinde, bewanyina lukano lwa kyamo na lwa munyinga-usangwe ku kishishi kyao, bwashi taumonanga bya kukula mpa na apakalombana “bipungo musambobidi.”​—Ndanyele 4:1, 10-13.

Akipatuula buno butemuki kwatudi: Mutshi aulesha bukunkushi bw’Efile Mukulu. Munda mwa bipwa bibungi, Yehowa baadi mutuule ba nfumu mu Yelusalema bwa kukunkusha mwilo wa Isaleele. (1 Myanda 29:23) Anka, baaba ba nfumu abaadi bakutwe lulamato, na bukunkushi bwabo bubayimene. Yelusalema baadi mubutulwe mu kipwa kya 607 K.B.B., kipwa akilesha mbangilo a “bipungo musambobidi.” (2 Banfumu 25:1, 8-10; Esekyele 21:30-31, EEM) Pabakwile Yesu shi, “Yelushalema akaashinwa muushi mwa ngao kwi [beena] maumbo mpaa na apakalombeena mafuku a [beena] maumbo,” baadi akwila pabitale bino “bipungo musambobidi.” (Luka 21:24) Byabya, “bipungo musambobidi” tabibaadi bifudiile pabaadi Yesu pa nsenga nya. Yehowa balayile’shi, akatuulu Nfumu ku nfudiilo kwa “bipunga musambobidi.” Uno Nfumu mupya, Yesu, akatwadila bantu b’Efile Mukulu myabi ibungi pa nsenga bwa ikalaika.​—Luka 1:30-33.

 Bula bwa “bipungo musambobidi”: “Bipungo musambobidi” bibaadi biishe bipwa 2 520. Su tubabadika bipwa 2 520 kubanga mu kipwa kya 607 K.B.B., atufiki mu kipwa kya 1914. Kino ngi kipwa kibaabadi batuule Yesu Mesiya bu Nfumu a Bufumu bw’Efile Mukulu mwiyilu.

Twi bapete bipwa 2 520 naminyi? Bible amba’shi bipungo bisatu na kipindji abituusha mafuku 1 260. (Kibafumbwilwe 12:6, 14) Byabya, patwata mafuku 1260 misusa ibidi atupete mafuku 2 520, bikale bu “bipungo musambobidi.” Mafuku 2 520 aatuusha bipwa 2 520 muyiile butemuki abwamba’shi: ‘efuku dimune bwa kipwa kimune.’​—Mbadiko 14:34; Esekyele 4:6.

▸ Shap. 8, kik. 23

Kishima “mukata a ba miikeyilu” akilesha “mwikeyilu e panundu.” Uno mwikeyilu, mbamutemune mu Bible penda mususa umune. Eshina dyaye nyi Mikayele.​—Ndanyele 12:1; Yunda 9, Kilombeeno kipya 2014.

Mikayele ngi Mukunkushi a kilwilo kya ba miikeyilu basha lulamato. Kibafumbwilwe 12:7, (EEM) amba’shi: ‘Mikayele na bamwikeyilu bê abebwelele kyakya kinyoka ngoshi . . . na bamwikeyilu bakyo.’ Kumbi, Mikayele nyi ndingi eshina dya Yesu mwanda mukanda wa Kibifumbwilwe awamba’shi, Mukunkushi a kilwilo ky’Efile Mukulu nyi Yesu.​—Kibafumbwilwe 19:14-16.

▸ Shap. 9, kik. 4

Uno ngakwilo alesha kipungo akikakitshika myanda ikata pa nsenga kumpala kwashi Bufumu bw’Efile Mukulu bukatushe ndumbulwilo a Satana. Ungi ngakwilo bu “Nfudiilo a bya pano” na “kufika kwa mwana a muntu” atumupete mu Bible, na alesha’nyi kino kipungo kimune. (Mateo  24:3, 27, 37) Ano “Mafuku a nfudiilo” ababangile nsaa ibaabadi batuule Bufumu bw’Efile Mukulu mwiyilu mu 1914, na aakafudiila p’ababutula ndumbulwilo a Satana ku Armagedone.​—2 Timote 3:1; 2 Mpyeele 3:3.

▸ Shap. 9, kik. 5

Efile Mukulu p’abuusha muntu mufwe, abetanyina uno mwanda bu lusangukilo. Bible akula pabitale kusanguka kwa bantu kitema. Eliya, Elisha, Yesu, Mpyeele, na Mpoolo ngi abaadi basangule bano bantu. Abaadi bakite bino bilengyeleshi penda ku bukwashi bwa bukome bw’Efile Mukulu. Yehowa mmulee’shi, akwikala kusanguka kwa “balulame naa kwa bashii-balulame.” (Bikitshino 24:15) Bible akwila’nyi pabitale kusanguka bwa kwenda mwiyilu. Luno nyi ndusangukilo lwa baaba basangulwe n’Efile Mukulu sunga bedibwe mwimu bwashi bakashaale mwiyilu na Yesu.​—Yowano 5:28, 29; 11:25; Beena-Fidipe 3:11; Kibafumbwilwe 20:5, 6.

▸ Shap. 9, par. 13

Malenganyi nyi kwisamba na bikudi bibi atwe banabeene sunga ku bukwashi bwa ungi muntu, bu nganga sunga mpaki. Kukita bino kwibubi. Bantu abakitaa malenganyi mbalamate ku dilongyesha dya’shi bantu be na kintu kampanda kish’akifwiyaa kadi akyalulukaa bu kikudi ki na bukome. Na dingi, ba demo abatakuula bantu mu kutombokyela Efile Mukulu. Kutaluula nyenyenyi, lubuko, manga, masende, myanda yakutshinyisha nayo bantu, lumonyi, byoso bi munkatshi mwa myanda ya malenganyi. Ino myanda mbeyituushe mu mikanda, majurnale, ma filme, mu bifwatulo, sunga mu misambo. Bantu abamonaa’shi kutumika na bino bintu bya malenganyi takwi masaku. Bipikwa bibungi bya pa maalo, bu kulambula bafwe bintu,  kudya na kutoma pa maalo, misangeelo ya kutentekyesha bafwe, kipikwa kyabakitaa bwa mulume sunga mukashi mufwishe, na kulala pa maalo; bino byooso abilesha kutwela mu kipwano na ba demo. Misusa ibungi, bantu abatomaa bintu abikolwanaa bwa kufubisha bukome bwa ba demo.​—Beena-Ngalatea 5:20; Kibafumbwilwe 21:8.

▸ Shap. 10, par. 10; Shap. 16, par. 4

Yehowa nyi Efile Mukulu Sha bukome booso bapangile eyilu na nsenga. (Kibafumbwilwe 15:3) Ngi bwakinyi nnaye Sha bintu byooso na bu byadi Nfumu e panundu pa byooso, e na matalwa a kukunkusha bipangwa byaye byooso. (Misambo 24:1; Yeeshaya 40:21-23; Kibafumbwilwe 4:11) Bintu byooso byadi mupangye mmwibyelele miiya. Dingi’nyi, Yehowa e na matalwa a kutuula bantu bwashi bekale ba nfumu. Atukwatshishena Efile Mukulu bu nfumu e panundu pa byooso nsaa y’atumulesha kifulo na kumukookyela.​—1 Myanda 29:11.

▸ Chap. 11, par. 10

Kukatusha eyimi pa bukopo nyi nkwipa mwana ki munda, kushii pa mwanda wa masaku sunga kwikatukila dinabeene. Kubanga nsaa ayimita mwana mukashi, yawa mwana e munda mwaye te bu kingi kipindji kya mbidi yaye nya. Nyi muntu pa bula.

▸ Shap. 13, kik. 5

Ba munganga abaata mase sunga kantu kamune ka ku tuntu tunanka twi mu mase bwa kwikela mu mbidi ya muntu. Be kwata’nyi mase abadi balamine mu kyamo. Tuntu tunanka  twi mu mase nyi globile monga, globile tooka, plakete na plasma.

▸ Chap. 13, par. 13

Mu Bible, mwaku “elango” taulesha penda kunyoka nya. P’abetulanga, abetulambukisha, kwitulesha, na kwituludika. Yehowa t’apeyaa bantu elango di bukopo sunga na sungu nya. (Nkindji 4:1, 2) Yehowa nyi nkileshesho kibuwa kwi banambutwile. Elango dyaye dibuwa mu kipaso akitakula mpa na muntu mu kwidifula. (Nkindji 12:1) Yehowa mmufule bantu baye, na akumiina kwibalongyesha. Ebapeyaa malango aebakwasha bwa kukatusha binangu bibubi na kukita myanda ayimusankisha. Banambutwile namu, abitungu balangye bana baabo pa kwibakwasha bwashi beukye muulo wa kukokyela elango. Na dingi, abitungu balambukishe bana bwa kufula Yehowa, kufula Eyi dyaye Bible, na kupusha kyadilongyesha.

▸ Shap. 14, kik. 13

Nyi mba miikeyilu bebubi, bash’abamwenekaa na be na bukome bwitutabukile. Abaadi batombokyele Efile Mukulu, bapela kumukookyela ndjo bafika bu ba demo. (Kibangilo 6:2; Yunda 6) Abaadi bakwatshishene Satana mu kutombokyela Efile Mukulu.​—Miiya Ikituulwe 32:17; Luka 8:30; Bikitshino 16:16; Shake 2:19.

▸ Shap. 16, kik. 4