1, 2. Yehowa akyebe kifuko kikale naminyi?

YEHOWA Efile Mukulu babungile ben’eyibakishi ba kumpala. Bible etulungula’shi bapangile mukashi a kumpala, ‘afika n’ê kwi mulume.’ Adame bapushishe muloo na bakwile’shi: “Tala, uno ngi mufufwa wa ku mifufwa yande, na mbidi ya ku mbidi yande.” (Kibangilo 2:22, 23) Bino abitulongyesha’shi Yehowa akyebe ben’eyibakishi bekale na muloo.

² Mbya malwa, bantu bebungi ta mbapete muloo mu nshalelo a mu kifuko nya. Sunga mbyabya, Bible alesha mayi a kulonda alombeene kukwasha bantu booso be mu kifuko bwashi bekale na nshalelo ebuwa na kusankila kwikala pamune.​—Luka 11:28.

3, 4. (a) Mulume mulombeene kukitshina mukash’aye myanda mushindo kinyi? (b) Bwakinyi bi na muulo bwashi mulume na mukashi befwidishene lusa?

³ Bible amba’shi mulume ebuwa abitungu akitshine mukash’aye myanda na kifulo na kanemo. Badika namu Beena-Efeso 5:25-29. Mulume akumiine kukitshina mukash’aye myanda na kifulo misusa yooso. Amulame, amubambe, amukitshine myanda kushii kumwinyongosha.

⁴ Mulume mmulombeene kukita kinyi su mukash’aye amulwishisha? Abalungula balume shi: “Fulaayi bakashi beenu na tanwikalanga bukyelo kwabadi.” (Beena-Kolose 3:19) Balume, tentekyeshayi’shi anwe namu anulwishaa.  Na su okyebe’shi Efile Mukulu akufwile lusa, abikyebe ofwile namu mukash’obe lusa. (Mateo 6:12, 14, 15) Su mulume na mukashi booso babidi befwidishena lusa, abibakwasha bwa kwikala na muloo mwiyibakishi.

5. Bwakinyi mulume mulombeene kupa mukash’aye kinemo?

⁵ Yehowa atekye mulume ape mukash’aye kinemo. Mulume anangusheene bikata pabitale lukalo lwa mukash’aye. Uno mwanda wi na muulo ukata. Su mulume t’akumiina kukitshina mukash’aye myanda na kalolo, Yehowa mmulombeene kupela kupusha luteko lwaye. (1 Mpyeele 3:7) Yehowa ataa bantu bamufule na muulo ukata. Ta mmukumiine balume kukila bakashi nya.

6. “Kwikala mbidi imune” kwi mukashi na mulume akupushisha kinyi”?

⁶ Yesu bakwile’shi mukashi na mulume “tabakii babidi, anka nyi mbidi imunenka.” (Mateo 19:6) Mbekale na lulamato muntu na mukwabo na tabe bya kwilekeena nya. (Nkindji 5:15-21; Beena-Ebelu 13:4) Abitungu mulume na mukashi bapudishe lukalo lwa kwifikena pepi abo banabeene. (1 Beena-Kodinda 7:3-5) Mulume atentekyeshe’shi, “takwi muntu mushikwe mbidi yaaye aye nabeene; anka eyidisha, dingi eeyengyeleka.” Byabya, abitungu mulume afule na kwengyeleka mukash’aye. Kunundu kwa byabya, mukashi akyebe’shi mulum’aye amukitshine myanda na kalolo na kifulo kyoso.​—Beena-Efeso 5:29.

7. Bwakinyi kifuko ki na lukalo na muntu akwikikunkusha?

⁷ Kifuko kyooso ki na lukalo na mutwe wa kifuko; muntu akwikikunkusha bwashi booso batumikye pamune. Mukanda wa 1 Beena-Kodinda 11:3 awamba’shi: “Kidishitu nyi mfumu a muntu ooso; mulume mfumu a mukashi; na mfumu a Kidishitu Efile Mukulu.”

8. Mukashi mulombeene kulesha mulum’aye kanemo mushindo kinyi?

 ⁸ Mulume ooso akitaa bilubilo. Byabya, su mukashi akwatshishena mulum’aye ku bitshibilo byata na kufuba naye pamune mu buumune, kifuko akipete myabi. (1 Mpyeele 3:1-6) Bible amba’shi: “Mukashi namu aneemekye mulunda aaye.” (Beena-Efeso 5:33) Bi kwikala naminyi su mulume te mu kipwilo kimune na mukash’aye? Abitungu mukashi ekale na kanemo kakata kwadi. Bible akula’shi: ‘Anwe bakashi naamu, kookyelayi balume benu, bwa’shi, sunga bangi balume batuna kukumiina eyi dy’Efile, bakumiine pa kumona ngikashi ya bakashi babo, pa kutala bi kanemo kakata ka bwikashi bwenu bwibuwa.’ (1 Mpyeele 3:1, 2) Eyikashi dibuwa dya mukashi ndilombeene kukita bwashi mulume anemekye lukumiino lwaye na kumupushisha.

9. (a) Mukashi e kukita kinyi su kwi kwikakeena pankatshi paye na a-kwaye? (b) Elango kinyi dyabapa bakashi mu mukanda wa Tite 2:4, 5?

⁹ Mukashi e kukita kinyi nsaa y’abekakena na a-kwaye? Abitungu mukashi akule na kanemo kooso bwa  kulesha bi mweneno aye. Kileshesho; dingi efuku Saraa bakwile na Abrahame, anka’ye ta mukumiine nya. Byabya Yehowa bamulungwile shi: “Teemesha...Saraa.” (Kibangilo 21:9-12) Byabya, su mulume mwina Kidishitu baata kitshibilo kya nfudiilo kadi kikutwene na abyamba Bible, paapa mukashi, t’abitungu shi amukookyele nya. (Bikitshino 5:29; Beena-Efeso 5:24) Mukashi ebuwa abambaa kifuko kyaye. (Badika Tite 2:4, 5.) Nsaa i mulum’aye, na bana baye abamono mushindo wakalakala na mudimo wibukopo bwabo, abamukumiina na kumunemeka bikile.—Nkindji 31:10, 28.

10. Bible akula naminyi pabitale kwilekeena na kwipeleena?

¹⁰ Ingi nsaa, mulume na mukashi be kwata kitshibilo kya kwilekeena sunga kwipeleena. Anka, Bible amba’shi, “Mukashi teelekeenanga na mulund’ê.” Na “mulume namu tapelanga mpyan’ê.” (1 Beena-Kodinda 7:10, 11, EEM) Kwi kumweneka myanda ikumbeene kufisha mulume na mukashi mu kwilekena, anka kino nyi nkitshibilo kya kutaluula kalolo. Kadi pabitale kwipeleena? Bible alesha’shi mulume na mukashi mbalombeene kwipeleena nka su umune a kwabadi batambuka lusandji.​—Mateo 19:9.

11. Bana be na lukalo na kinyi kukila kingi kintu kyooso?

¹¹ Anwe ba nambutwile, ikalayi anukisha nsaa ibungi na bana benu. Abo, be nenu lukalo kukila kingi kintu kyooso, abakumiina shi nwibalongyeshe pabitale Yehowa.​—Miiya Ikituulwe 6:4-9.

12. Ba nambutwile abitungu shi bakite kinyi bwa kulama bana baabo?

¹² Ndumbulwilo a satana kwete kwenda na kulwila ngofu, na kwi bantu abakyebe kulwisha bana betu, mpa na kwibapa binangu bya kutambuka lusandji. Bangi  ba nambutwile bakwete kupusha buufu bwa kwisamba uno mwanda. Byabya, abitungu ba nambutwile badimushe bana babo pabitale bano bantu na kwibalongyesha bya kwibesuuka. Ba nambutwile, lamayi bana beenu. *​—1 Mpyeele 5:8.

13. Ba nambutwile abitungu balongyeshe bana babo mushindo nkinyi?

¹³ Ba nambutwile be na bushito bwa kulongyesha bana baabo kipaso kya kwikala. Mushindo kinyi oodi mulombeene kulongyesha bana boobe? Abitungu bana  boobe webaleshe, webanyookye mu kululama kushi bukyelo sunga na nsungu. (Yeelemiya 30:11) Byabya, tokumanga kunyooka bana boobe poodi na nsungu. Twakulanga bishima abitapa bu ‘mwele wa ngoshi’ nya. (Nkindji 12:18) Longyesha bana boobe bwabadya kupusha bwakinyi bibuwa kukookyela.​—Beena-Efeso 6:4; Beena-Ebelu 12:9-11; Tala Kikumbashilo 30.

14, 15. Bwakinyi abitungu bana bakookyele bebatande?

¹⁴ Yesu baadi akookyela Nshaye efuku dyoso mpa na nsaa ibabidi bukopo. (Luka 22:42; Yowano 8:28, 29) Yehowa namu atekye bana bwa kukookyela bebatande.​—Beena-Efeso 6:1-3.

¹⁵ Anwe bana, su nubamono shi bii bukopo kukookyela benutande, tentekyeshayi shi nsaa y’anukookyela, Yehowa na benutande abasanka. *​—Nkindji 1:8; 6:20; 23:22-25.

16. (a) Diabulu mmukumbeene kutumika na bantu kinyi bwa nkutakula mu kukita myanda ibubi? (b) Bwakinyi bi na muulo kusangula ba kuuku sunga balole bakumiine Yehowa?

¹⁶ Diabulu mmukumbeene kutumika na ba kuuku bobe na bangi bansongwa bwa nkutakula mu kukita myanda ibubi. Auku’shi twe mulombeene kwibakambila nya. Kileshesho; Yakobo baadi na mwan’aye nsongwakashi ababadi abetanyina bu Dina. Uno lole baadi na balole bashibaadi bakumiine Yehowa. Baadi mupete nkalakashi aye nabeene mpa na mu kifuko kyabo. (Kibangilo 34:1, 2) Su ba kuuku sunga balole boobe ta mbakumiine Yehowa, be bya nkutakula bwa kukita kintu kish’akimusankisha. Mbikumbeene nkutwadila  makyenga ebungi, mu kifuko kyenu, na kwinyongosha Efile Mukulu. (Nkindji 17:21, 25) Ngi bwakinyi, bi na muulo ukata bwa kukimba ba kuuku sunga balole bakumiine Yehowa.​—1 Beena-Kodinda 15:33.

17. Muntu ooso e mu kifuko abitungu akite kinyi?

¹⁷ Su bena kifuko boso abalondo malango a Efile Mukulu, mbalombeene kusuuka nkalakashi na myanda i bungi. Obe mulume, kumiina mukash’obe na mukitshine myanda na kifulo. Obe mukashi, nemeka mulum’obe, mukookyele na ambula kileshesho kya mukashi mufundjibwe mu mukanda wa Nkindji 31:10-31. Obe, nambutwile, longyesha bana boobe bwabadya kufula Efile Mukulu. (Nkindji 22:6) Obe she bana, kunkusha kifuko “kalolo.” (1 Timote 3:4, 5; 5:8) Anwe bana, nemekayi benutande. (Beena-Kolose 3:20) Tentekyeshayi shi muntu ooso mu kifuko akitaa bilubilo, byabya, ikalayi beyishe na kwitekeena lusa. Oolo, Bible apa muntu ooso e mu kifuko bukunkushi bwibuwa.