1. Mpàngo y’Efile Mukulu ibaadi naminyi bwa bantu?

MPÀNGO y’Efile Mukulu bwa bantu ibuwa bukile. Bapangile mulume na mukashi ba kumpala, Adame na Eeva bwashi bashaale mu lupango lulumbuulwe kalolo. Mpàngo yaye ibaadi’shi, batande bana, bekashe nsenga yooso mpaladiisu mpa na kulama nyema.​—Kibangilo 1:28; 2:8, 9, 15; tala Kikumbashilo 6.

2. (a) Atwiuku naminyi’shi Efile Mukulu akalombasha mpàngo yaaye? (b) Bible namu amba kinyi pabitale muwa wa losoo?

² Opwandjikisha’shi twi kushaala losoo mu mpaladiisu? Yehowa etulungula’shi: “Byabya byantentekyesha kukita abikalombana’nka byabya.” (Yeeshaya 46:9-11; 55:11, EEM) Oolo, Yehowa akalombasha byabya byadi mwakule, takwi kintu sunga nkimune kya kumwimika. Yehowa akula’shi bapangile nsenga na kabingilo. “Ta mupangye nsenga bwa bisumanga nya.” (Yeeshaya 45:18) Mpàngo yaaye ngya’shi bantu bashaale pa nsenga ishima ikalaika. Efile Mukulu akyebe’shi bantu be naminyi bashaale pano pa nsenga, na bwa mafuku bungi kinyi? Bible aluula’shi: “Balulame abapete eumbo [nsenga, NWT], abemushaala losoo.”​—Misambo 37:29; Kibafumbwilwe 21:3, 4.

3. Bu bi bantu bakwete kukumba na kufwa, we kwiyipusha naminyi?

³ Lelo uno, bantu bakwete kukumba na kufwa. Kwi ngoshi na kwiyipayishena ma mbalo ebungi. Aku namu Efile Mukulu tabaadi mulumbuule byabya nya. Nkinyi  kibaadi kikitshikye na mbwakinyi? Nka penda Bible nyi mulombeene kwitulungula kyanka.

4, 5. (a) Nnanyi bakwile na Eeva kukidila kwi nyoka mu lupango lwa Edene? (b) Muntu mululame mulombeene kufika ngifi naminyi?

⁴ Bible etulungula’shi Efile Mukulu e na mwishikwanyi ayitanyinwa bu “Kafilefile na Satana.” Mu lupango lwa Edene, Satana baadi mufubishe nyoka bwa kwakula na Eeva. (Kibafumbwilwe 12:9; Kibangilo 3:1) Aye nkukita bu’shi nyoka nyi baadi kwete kwakula.​—Tala Kikumbashilo 7.

⁵ Byabya, Efile Mukulu bapangile Satana Diabulu su? Nya! Pabaadi Efile Mukulu alumbulwila Adame na Eeva nsenga, umune a ku ba miikeyilu baye baadi panka, ngi aye nkwaluluka bu Diabulu. (Yoobo 38:4, 7) Mbilombeene kukitshika su? Oolo. A muntu mululame e kwaluluka afika ngifi naminyi? Atwiuku’shi muntu t’atandikwa bu ngifi nya. Pabanga kulakila kintu kishi kyaye, na pashaala anangushena ku kyakya kintu, malaka aye ebubi abanyiisha kutama, p’apete mushindo, ekiibi. Baluluka aye nabeene bu ngifi.​—Badika Shake 1:13-15; tala Kikumbashilo 8.

6. Nkipaso kinyi kibaadi yawa mwikeyilu mufikye bu mwishikwanyi a Efile Mukulu?

⁶ Bino nyi bibaadi bikitshikile yawa mwikeyilu. Pa bapwile Yehowa kupanga Adame na Eeva, bebalungwile’shi batande bana na ‘bawushe nsenga.’ (Kibangilo 1:27, 28) Yawa mwikeyilu baadi pangi munangushene’shi, ‘Baabo! Se bano bantu booso mbakumbeene kundangwila’mi pamutwe pa kulangwila Yehowa!’ Aye nkuyididiila na kunangushena byabya, malaka aaye namu bwa kyakya kibaadi kya Yehowa nkunyiisha nkutama. Yawa mwikeyilu baadi akyebe’shi bantu bamulangwile.  Ndjo aye nkudimba Eeva, n’aye namu nkukumiina. (Badika Kibangilo 3:1-5.) Pa kukita byabya, aye nkufika Satana Diabulu; mwishikwanyi a Efile Mukulu.

7. (a) Bwakinyi Adame na Eeva abafwile? (b) Bwakinyi tukwete kununupa na kufwa?

⁷ Adame na Eeva abaadi bapele kukookyela Efile Mukulu abo nkudya kikuba. (Kibangilo 2:17; 3:6) Abakitshine mulwisho ku meso kwa Yehowa, kunyima abo nkufwa bu bibebalungwile. (Kibangilo 3:17-19) Atwe namu, bu byatudi bapyane mulwisho wa Adame na Eeva, tukwete’nyi kufwa. (Badika Beena-Looma 5:12.) Twateyi kileshesho akitukwasha bwa kupusha bwakinyi bana ba Adame na Eeva abapyanyine mulwisho. Omono naminyi su kikombola kya matafwadi kibeele mutanta? Matafwadi ooso aatuuku mu kyakya kikombola, nka atuukye na wawa mutanta. Nsaa ibaadi Adame mukutwe kukookyela Efile Mukulu, bafikile nkitshishi a bubi. Bu byatudi bekale bana ba Adame, atwe booso twi ba nkitshishi ba bubi sunga shi twi na wawa “mutanta.” Pamwanda atwe booso twi ba nkitshishi ba bubi, tukwete kununupa na kufwa.​—Beena-Looma 3:23; tala Kikumbashilo 9.

8, 9. (a) Satana baadi akyebe’shi Adame na Eeva bakumiine kinyi? (b) Bwakinyi Yehowa tabaadi mwipe bano ba ntomboshi?

⁸ Satana baadi mwibweshe buntomboshi p’aye kutakula Adame na Eeva mu kutombokyela Yehowa Efile Mukulu. Baadi akyebe bakumiine’shi Yehowa e na madimi, mmukunkushi ebubi shakumiina bapeta muloo. Satana baadi mwakule’shi bantu tabe na lukalo lwa’shi Yehowa ebalungula kya kukita nya. Adame na Eeva abaadi balombeene kwiatshila kitshibilo kya kukita kibuwa sunga kibubi. Byabya, Yehowa baadi mulombeene kukita nkinyi? Badya kwipaa bano ba ntomboshi na kwimika buntomboshi. Anka bino bibadya kulesha namu shi Satana nsha madimi su? Nya, tabibadya kupwa mwanda nya.

 ⁹ Ngi bwakinyi, Yehowa tabaadi mwipee bano ba ntomboshi nya. Kadi balekyeele bantu kipungo bwashi bekunkushe abo banabeene. Bino bibaadi bilombeene kulesha patooka shi Satana nsha madimi na Yehowa awuku ki buwa bwa bantu baye. Atukalongo bibungi pa uno mwanda mu Shapitre 11. Kadi omono namu naminyi pabitale kitshibilo kya Adame na Eeva? Bibaadi buwa  bwashi bakumiine Satana na batombokyele Efile Mukulu su? Yehowa baadi mupe Adame na Eeva bintu byoso bibaabadi nabyo. Aye nkwibapa muwa upwidikye, mbalo ibuwa ya kushala na mudimo ubaadi awibasangasha. Satana tabaadi na kintu kya kwibapa kibuwa sunga nkimune. Su bodya kwikala panka, nkinyi kibodya kukita?

10. Ooso a kwatudi e kumpala kwa kitshibilo kinyi?

¹⁰ Lelo uno, atwe booso twi na kya kwata kitshibilo pabitale muwa wetu. Twi balombeene kusangula bwa kukookyela Yehowa bu Mukunkushi etu na kulesha’shi Satana nsha madimi. Sunga shi twi balombeene kusangula Satana bu mukunkushi etu. (Misambo 73:28; badika Myeele 27:11.) Bantu bapela mu nsenga nyi bakwete kukookyela Efile Mukulu. Kadi, ta nnaaye kwete kukunkusha nsenga nya. Su t’Efile Mukulu, a nnanyi?

11, 12. (a) Twi kulongyela namu kinyi ku bibaadi Satana mulee bwa kupa Yesu? (b) Mbifundwe kinyi abilesha’shi Satana nfumu a ino nsenga?

¹¹ Kushi mpaka, Yesu baadi auku mukunkushi a nsenga. Ungi mususa, Satana “nkumulesha mafumu ooso a pa nsenga ishima na ntumbo yawo.” Akupu Satana nkulaa Yesu shi: “Byooso byaabya, naakupa byanka su okunama bwa kundangwila.” (Mateo 4:8, 9; Luuka 4:5, 6) Banda kwiyipusha bino, ‘Su aa mafumu taabaadi a Satana, baadi mulombeene kwiapa Yesu?’ Nya. Byabya, mbulamatadi yooso ngya Satana.

¹² We bya kwiyipusha’shi: ‘Satana mmulombeene kwikala mukunkushi a nsenga naminyi? Ta Yehowa Efile Mukulu Sha bukome booso bapangile eyilu na nsenga su?’ (Kibafumbwilwe 4:11) Oolo, Nnaaye. Anka, Yesu bayitanyine Satana bu “nfumu a pano pa nsenga.” (Yowano 12:31; 14:30; 16:11) Mutumibwa Mpoolo bayitanyine  Satana Diabulu bu, “efile a pano pa nsenga.” (2 Beena-Kodinda 4:3, 4) Mutumibwa Yowano namu bafundjile’shi, “bya-pano byooso mbishaale ku matalwa a mubi.”​—1 Yowano 5:19.

13. Bwakinyi twi na lukalo na nsenga ipya?

¹³ Nsenga ikwete kunyisha kulwila. Atumono ngoshi, kutshiba kwa milomo, bunsesa na buntomboshi mbitwifunyishe. Sunga bantu bakita mwabo mooso, ta mbalombeene kupudisha ino myanda yooso nya. Anka Efile Mukulu abutula uno ndumbulwilo ebubi binobino ku ngoshi ya Armagedone na kukita nsenga ipya ya kululama.​—Kibafumbwilwe 16:14-16; tala Kikumbashilo 10.

14. Efile Mukulu mmutuule nanyi bwa kwikala Nfumu a Bufumu bwaye? Bible baadi mwakule naminyi pabitale Yesu?

¹⁴ Yehowa mmutuule Yesu Kidishitu bu Nfumu a mbulamatadi a mwiyilu sunga Bufumu bw’Efile Mukulu. Bipwa binunu na binunu kumpala, Bible baadi mupwe kutemuka’shi, Yesu akamunana bu “Nfumu a butaale,” na mbulamatadi aye te na nfudiilo. (Yeeshaya 9:6, 7) Yesu balongyeeshe balondji baye bwa kuteka kufika kwa uno mbulamatadi nsaa ibaadi mwakule’shi: “Bufumu bwobe bufikye. Kyookyebe kikitshikye pa nsenga mumune na mwiyilu.” (Mateo 6:10) Mu Shapitre 8, atukalongo kipaso kyabakatusha mafumu a bana ba bantu kwi Bufumu bw’Efile Mukulu. (Badika Ndanyele 2:44.) Ngi Bufumu bw’Efile Mukulu bukekashe nsenga yooso mpaladiisu.​—Tala Kikumbashilo 11.

15. “Nsenga ipya” nkinyi?

¹⁵ Bible alaa bino: ‘Twi batengyele eyilu dipya na nsenga ipya, mwamwa amukabikala kululama.’ (2 Mpyeele 3:13; Yeeshaya 65:17) Ingi nsaa, Bible p’akula pabitale  “nsenga,” alesha bantu bashale pa nsenga. (Kibangilo 11:1) Byabya, “nsenga ipya” ya kululama ayilesha bantu abakookyela Efile Mukulu na abakapete myabi yaye.

16. Nkya buntu kinyi kikile buwa akikapete baaba booso abakashaala mu nsenga ipya, na twi balombeene kukita kinyi bwa kwikipeta?

¹⁶ Yesu balayile’shi baaba booso abakashaala mu nsenga ipya y’Efile Mukulu abakapete “muwa wa ikalaika.” (Maako 10:30) Abitungu tukite kinyi bwa kupeta kino kya buntu? Badika namu Yowano 3:16 na 17:3 bwa kupeta lwaluulo. Tutaleyi binobino akilongyesha Bible pabitale nshalelo akekala naye bantu mu mpaladiisu pa nsenga.

17, 18. Atwiuku naminyi’shi akukekala kufukama mbalo yooso pa nsenga, na’shi atukekala mu kufukama?

¹⁷ Bubi, ngoshi, kwipayishena na buntomboshi abikapu. T’akukekala dingi bantu babi pa nsenga nya. (Misambo 37:10, 11) Efile Mukulu ayimika ‘ngoshi nyaa na kufudiile nsenga.’ (Misambo 46:10; Yeeshaya 2:4) Nsenga ayikaulu na bantu bafule Efile Mukulu na abamukookyela. Butaale abukekala kwanka ikalaika.​—Misambo 72:7.

¹⁸ Mwilo wa Yehowa aukashaala kushii kutshina. Mu mafuku a kala, pabaadi beena Isalele abakookyela Efile Mukulu, abaadi bashaale mu kufukama mwanda baadi ebakalwila. (Beena-Levi 25:18, 19) Mu mpaladiisu, t’atukatshinyishwa na muntu sunga kintu kampanda. Atukekala mu kufukama!​—Badika Yeeshaya 32:18; Mika 4:4.

19. Bwakinyi atukulupila’shi mu nsenga ipya y’Efile Mukulu amukekala bidibwa bibungi?

¹⁹ Akukekala bidibwa bibungi. “Akukekala ntete ibungi pa nsenga, ku nsongw’a myengye ayikekala ikilekile.” (Misambo 72:16, NWT) Yehowa ‘Efile Mukulu etu etusamba’ na ‘nsenga ayituusha byakudya byayo.’​—Misambo 67:7.

20. Atwiuku naminyi’shi nsenga ishima ayikekala mpaladiisu?

²⁰ Nsenga ishima ayikekala mpaladiisu. Bantu abakekala na mpango na mashibo ebuwa. (Badika  Yeeshaya 65:21-24; Kibafumbwilwe 11:18.) Nsenga ishima ayikekala buwa nka bibaadi lupango lwa Edene. Yehowa aketupa bintu byooso byatudi nabyo lukalo. Bible akula pabimutale shi: ‘Obuul’eyaasa dyoobe na kwikutshisha byooso bi na muwa.’​—Misambo 145:16.

21. Atwiuku naminyi’shi akukekala kufukama pankatshi pa nyema na bantu?

²¹ Akukekala kufukama pankatshi pa nyema na bantu. Nyema tayikekala’nyi bukyelo kwi bantu nya. Bana bakinga t’abakapusha’nyi moo watudi nao ano mafuku nsaa y’abakekala ku lupese lwa nyema i bukyelo.​—Badika Yeeshaya 11:6-9; 65:25.

22. Yesu akakitshiina baaba abakumbu kinyi?

²² Muntu su ngumune takakumbu nya. Pabaadi Yesu pa nsenga, baadi mupaashe bantu bebungi. (Mateo 9:35; Maako 1:40-42; Yowano 5:5-9) Byabya, bu byadi Nfumu a Bufumu bw’Efile Mukulu, Yesu akapasha bantu booso. Takwi muntu sunga ngumune akamba’shi: “Nee na mukumbo.”​—Yeeshaya 33:24; 35:5, 6.

23. Baaba bapwe kufwa Efile Mukulu ebakitshina kinyi?

²³ Bafwe abakasanguka. Efile Mukulu mulee’shi, akasangula binunu na binunu bya bantu bapwe kufwa. Eyendo, “akwikala kusanguka kwa balulame na kwa bashii-balulame.”​—Badika Yowano 5:28, 29; Bikitshino 24:15.

24. Opusha namu naminyi pabitale kushaala mu mpaladiisu?

²⁴ Atwe booso twi kumpala kwa kitshibilo; kya kulonga pabitale Yehowa na kumufubila, sunga kukita nka byatukyebe’twe banabeene. Su twasangula bwa kufubila Yehowa, atukapete muloo mu mafuku aafiki. Pabaadi ungi nkitshishi a bubi mutekye Yesu bwashi akamutentekyeshe kunyima kwa lufu lwaye, Yesu bamulayile’shi: ‘Okekala naami mu Mpaladiisu.’ (Luka 23:43) Tulongyeyi bibungi pabitale Yesu Kidishitu na kipaso kyakalombasha milayilo ikile buwa y’Efile Mukulu.