1, 2. Kunyi kwatudi balombeene kufwamina lelo uno?

NANGUSHENA shi, okwete kutambuka pasha mwifuku di kipapi ki bukopo. Kwiyilu kubafitshi nka fututu, kubabanga kubadima na kukungula. Kunyima mpeshi babanga kunoka. Bokimbi mbalo ya kufwamina na bweyipete. Wekala na muloo wibungi p’obe kupeta ino mbalo yoshii mukumbeene kutopa!

² Lelo uno, twi mu mafuku e byabya. Myanda i mu nsenga ikwete kwenda na kwilwila. We mulombeene kwiyipusha’shi, ‘Nkunyi kwandi mulombeene kufwamina?’ Mufundji a Misambo bafundjile’shi: “Namba p’abitale Yehowa shi: ‘Aye nyi nkifwamino kyande, kisuukilo kyande; Efile Mukulu ande naakulupila koodi!’” (Misambo 91:2) Oolo, Yehowa mmulombeene kwitukwasha ku myanda yatudi nayo binobino, na etupa lukulupilo bwa mafuku aafiki.

3. Mmushindo kinyi watudi balombeene kwikasha Yehowa bu kifwamino kyetu?

³ Yehowa mmulombeene kwitukalwila naminyi? Mmulombeene kwitukwasha mu mwanda ooso awitukalakasha, na e na bukome bwibungi ngofu kukila bwa bantu balombeene kwitukyengyesha. Sunga malwa etukwata binobino, twi bakumbeene kushinkamisha’shi Yehowa akapudisha makyenga ooso mu mafuku aafiki. Bible etunyingisha bino: “Elameeyi mu kifulo ky’Efile Mukulu.” (Yunda 21, Kilombeeno kipya 2014) Mu bipungo bi bukopo, abitungu tushale pepi na Yehowa bwa kupeta bukwashi bwaye. Mmushindo kinyi watudi balombeene kukita byabya?

4, 5. Yehowa mmuleshe kifulo kyaye kwatudi mushindo kinyi?

⁴ Bwa kushala pepi na Yehowa, abikyebe tubande kunangushena pabitale bukata bwa kifulo kyaye kwatudi. Ela binangu ku byoso bitukitshine Yehowa! Mmwitupe nsenga ilumbulukye, bilongo bibuwa kubandjila na nyema. Mmwitupe’nyi bidibwa bibuwa na mema a kutoma. Ku bukwashi bwa Bible, Yehowa mmwitulongyeshe eshina dyaye na ngikashi yaye ya kukanya. Kunundu kwa byoso, mmwituleshe kifulo p’aye kwitutumina Mwan’aye Yesu pa nsenga bwashi etufwile. (Yowano 3:16) Byabya, pamwanda wa nkuulo ya Yesu, twi na lukulupilo bwa mafuku aafiki.

⁵ Yehowa mmupe Mesiya Bufumu; mbulamatadi a mwiyilu akatusha makyenga ooso binobino. Buno Bufumu abukaluula nsenga ishima bu mpaladisu, amukekala bantu booso mu kufukama na muloo wa ikalaika. (Misambo 37:29) Yehowa mmwituleshe kifulo kyaye mu kingi kipaso; pa kwitulongyesha bya kwikala na nshalelo ebuwa kubanga binobino. Kwete’nyi kwitulungula bwashi tumutekye, na kwete kuteemesha nteko yetu nsaa yooso. Eyendo, Yehowa mmuleshe kifulo kyaye kwi ooso a kwatudi.

6. We kukita kinyi bwa kifulo kyabadi bakuleshe kwi Yehowa?

⁶ We kukita kinyi bwa kifulo kyabadi bakuleshe kwi Yehowa? Mutumbule bwa byoso byadi mukukitshine. Mwanda wa kukanya, Bantu bebungi lelo uno tabe na lutumbu nya. Mpa na bangi bantu ba mu mafuku a Yesu abakutshilwe kwikala na lutumbu. Dingi efuku, Yesu bapashishe bantu ekumi babaadi na nsudi, byabya nka umune ngi balukiile kwadi bwa kumutumbula. (Luka 17:12-17) Twi balombeene kwambula yawa muntu baadi mutumbule Yesu. Atukumiina kwikala na lutumbu kwi Yehowa misusa yooso.

7. Abitungu tufule Yehowa naminyi?

⁷ Na dingi, abitungu tuleshe Yehowa kifulo. Yesu balungwile Balondji baye shi abitungu bafule Yehowa n’eshimba  dyabo dyooso, na muwa wabo ooso, na kinangu kyabo kyooso. (Badika Mateo 22:37.) A bino abipatuula kinyi?

8, 9. Twi kulesha Yehowa shi twi bamufule mushindo kinyi?

⁸ Kwamba penda shi twi bafule Yehowa nyi nkupwa kwa mwanda su? Nya. Su twibafule Yehowa n’eshimba dyetu dyooso, na muwa wetu ooso, na kinangu kyetu kyooso, atukamulesha kyakya kifulo mu bikitshino byetu. (Mateo 7:16-20) Bible akula kalolo shi, su twibafule Efile Mukulu, atukakookyela miiya yaye. Bi bukopo su? Ooo. Mwanda “Miiya yaaye [Yehowa] nta mbushito bwitutentekwe nya.”​—Badika 1 Yowano 5:3.

⁹ Nsaa y’atukokyela Yehowa, atwikala na muloo na nshalelo ebuwa. (Yeeshaya 48:17, 18) Byabya, nkinyi kilombeene kwitukwasha bwa kushala pepi na Yehowa? Tubande kutala.

10. Bwakinyi abitungu’shi otungunukye na kulonga pabitale Yehowa?

¹⁰ We mufikye mu kwikala kuuku a Yehowa naminyi? Ku bukwashi bwa kulonga koobe kwa Bible, Bofiki mu kwiwuka Yehowa kalolo na kutamisha naye bukuuku. Buno bukuuku bwi nka bu kaalo kokyebe’shi katungunukye na kutemba. Nka abikalaa kaalo na lukalo na nteete bwashi katembe, obe namu we na lukalo lwa kutungunuka na kulonga pabitale Yehowa bwa kunyingisha bukuuku bwenu.​—Nkindji 2:1-5.

11. Malongyesha a mu Bible aakakukwasha naminyi?

¹¹ Bu byoyididiila na kulonga Bible, okapusha myanda ayikakukumu kwishimba. Banda kutala bibaadi bipushe balondji ba Yesu babidi, pabaadi Yesu kwete kwibapatuulwila matemuki a mu Bible. Babakwile’shi: “Mashimba eetu taaekalanga bu aatembe kaalo munda mwetu, peekalanga eesamba neetu mwishinda, naa peetupushishanga Bifundwe?”​—Luka 24:32.

12, 13. (a) Kifulo kyobe bw’Efile Mukulu ki kwikala naminyi? (b) Twi balombeene kukita kinyi bwashi kifulo kyetu bwa Yehowa takitaalanga mashika?

 ¹² Nka bu bibaabidi bikume balondji ku mashimba nsaa ibaabapushishe Bifundwe, noobe namu we kwikala mupushe disanka nsaa ibobanga kupusha Bible. Bino mbikukwashe bwa kwiuka Yehowa na kumufula. Tokumina’shi kino kifulo kitaale mashika nya.​—Mateo 24:12.

¹³ Bu bibwekala kuuku’Efile Mukulu, abikyebe ofube bikata bwa kunyingisha bukuuku boobe naye. Abitungu oyididiile na kulonga pabitale Yehowa na Yesu na kunangushena ku myanda yokwete kulonga na bya kwiyifubisha mu nshalel’obe. (Yowano 17:3) Nsaa y’obadika sunga y’olongo Bible, eyipushe’shi: ‘A bino abindongyesha kinyi pabitale Yehowa Efile Mukulu? Bwakinyi abitungu’shi mmufule n’eshimba dyande dyooso na muwa wande ooso?’​—1 Timote 4:15.

14. Luteko alwitukwasha bwa kunyingisha kifulo kyetu na Yehowa naminyi?

 ¹⁴ Poodi na kuuku a p’eshimba, wekala na kiubishi kya kwisamba naye, na bukuuku bwenu abutama. Mu mushindo umune, kwikala na kiubishi kya kuteka Yehowa, atutamisha kifulo kyetu naye. (Badika 1 Beena-Tesalonika 5:17.) Luteko nkya buntu kikata kitupe Nshetu e mwiyilu. Twi balombeene kumulungula bi mwishimba dyetu misusa yooso. (Misambo 62:9) T’abitungu kwambuula myanda imune imune mu nteko yetu nya, kadi byatwakula bikatukile mwishimba. Oolo, su tubatungunuka na kulonga Bible na kuteka myanda ayituukila mwishimba, atunyingisha kifulo kyetu na Yehowa.

15, 16. Omonaa mufubo wa kulungula mukandu wibuwa naminyi?

¹⁵ Su atukyebe kushala pepi na Yehowa, abitungu dingi tulungule bangi pabitale lukumiino lwetu. Kulungula bangi pabitale Yehowa nyi mwabi ukata. (Luka 1:74) Nyi mbushito bukata bwabadi bape beena Kidishitu ba binyibinyi booso kwi Yesu. Ooso a kwatudi, abitungu alungule mukandu wibuwa wa Bufumu bw’Efile Mukulu. Tobangile kukita uno mufubo su?​—Mateo 24:14; 28:19, 20.

¹⁶ Mutumiibwa Mpoolo bamwene’shi mufubo wa kulungula mukandu wibuwa wi na muulo ukata; aye nkwiwitanyina bu “bupeta.” (2 Beena-Kodinda 4:7, EEM) Kulungula bangi pabitale Yehowa na mpàngo yaye nyi mufubo wi na muulo ukata odi mulombeene kukita. Nyi mushindo wa kufubila Yehowa, na asangeela mufubo oobe. (Beena-Ebelu 6:10) Kulungula mukandu wibuwa nkulombeene nkukwasha obe nabene na baaba abakuteemesha bwa kwifubwila pepi na Yehowa na kupeta muwa wa ikalaika. (Badika 1 Beena-Kodinda 15:58.) Kwi ungi mufubo ulombeene nkupa muloo kukila uno su?

17. Bwakinyi abitungu kulungula mukandu wibuwa bukidibukidi?

 ¹⁷ Lelo uno, mufubo wa kulungula mukandu wibuwa autungu’shi ukitshibwe bukidibukidi. Abitungu ‘kuukisha eyi dy’Efile Mukulu,’ na ‘kushishikila.’ (2 Timote 4:2) Bantu be na lukalo lwa kupusha mukandu wibuwa wa Bufumu bw’Efile Mukulu. Bible amba’shi: “Efuku dikata dya Yehowa; dii peepi, adifiki bukidi bibi.” Nfudiilo ‘tayinyengakana nya!’ (Sefanya 1:14; Abakuke 2:3) Oolo, Yehowa abutula uno ndumbulwilo ebubi a Satana binobino. Kumpala kwashi bikitshikye, abitungu kudimusha bantu bwashi baate kitshibilo kya kufubila Yehowa.

18. Bwakinyi abitungu tulangwile Yehowa pamune na beena Kidishitu ba binyibinyi?

¹⁸ Yehowa akyebe’shi tumulangwile pamune na bangi beena Kidishitu ba binyibinyi. Bible amba’shi: ‘Twilameneeyi ku muntu na muntu pa kwipasusheena bwa kwikala na kifulo na mifubo ibuwa, kushii kuleka kwibunga kwetu atwe banabene, bu bitabidi bangi na kiubishi kia kwibikita, anka twikankamisheene [muntu na muntu], bikishekishe patumono’shi efuku dibefubwila pepi.’ (Beena-Ebelu 10:24, 25, Kilombeeno kipya 2014) Tukiteeyi mwetu mooso bwatudya kwikala atutwele mu bisangilo byoso. Bisangilo abitukwasha bwa kwikankamishena ku muntu na mukwabo.

19. Nkinyi kilombeene kwitukwasha bwa kufula beena Kidishitu neetu bakashi na balume?

¹⁹ P’otwele mu bisangilo, okapete bakuuku bebuwa abakakukwasha bwa kulangwila Yehowa. Okapete bakwenu bakashi na balume bakwete kwipaana bwa kulangwila Yehowa nka bu’be. N’abo namu nyi mbantu bashii bapwidikye na abakitaa bilubilo nka bu’be. Su bakulwishisha, kumiina kwibafwila lusa. (Badika Beena-Kolose 3:13.) Ikala otala ngikashi ibuwa ya bakwenu bakashi na balume beena Kidishitu, na bino abikakukwasha bwa kwi bafula na kunyiisha kwifubwila pepi na Yehowa.

20, 21. “Muwa wa binyibinyi” nkinyi?

²⁰ Yehowa akumiina’shi bakuuku baye bekale na nshalelo ebuwa. Bible etulungula’shi mu mafuku aafiki atwikala na nshalelo mwilekene ngofu na uno atudi naye lelo uno.

²¹ Mu mafuku aafiki, atukashala ikalaika, kushii penda bipwa 70 sunga 80. Atukasangeela “muwa wa ikalayika,” mbidi ipwidikye, butaale, na muloo mu mpaladisu. Bino ngi byabetanyina mu Bible bu “muwa wa binyibinyi.” Yehowa mmwitulee uno muwa wa binyibinyi, byabya abitungu kukita mwetu mooso kubanga binobino bwa ‘kukwatshiila’ uno muwa.​—1 Timote 6:12, 19, Kilombeeno kipya 2014.

22. (a) Twi balombeene ‘kukwatshiila ku muwa wa binyibinyi’ naminyi? (b) Bwakinyi tatwi balombeene kuula muwa wa ikalaika?

²² Mmushindo kinyi watudya ‘kukwatshiila ku muwa wa binyibinyi?’ Abitungu ‘tukite bibuwa’ na ‘twikale ba-mpeta mu bikitshino bi buwa.’ (1 Timote 6:18, Kilombeeno kipya 2014) Bino abilesha’shi abitungu tufubishe myanda ya mu Bible yatudi balongye. Anka, muwa wa binyibinyi tautukila ku bukome bwetu ooo. Tatwi balombeene kuula muwa wa ikalaika nya. Nyi Yehowa apa bafubi baye basha lulamato kino kya buntu bwa kwibalesha “kalolo kaaye.” (Beena-Looma 5:15) Eyendo, Nshetu a binyibinyi e mwiyilu akumiina kupa bafubi baye basha lulamato kino kya buntu.

23. Bwakinyi abitungu’shi wate kitshibilo kya kukita myanda ibuwa kubanga binobino?

²³ Eyipushe obe nabene’shi, ‘Nkwete kulangwilanga Yehowa mu kipaso kyadi mukumiine su?’ Byabya, su bosangana’shi abikutungu kushintuula ingi myanda, abitungu’shi okite byabya kushii kunyengakana. P’atukitshi mwetu mooso bwa kukookyela Yehowa na kumukulupila, ekala kifwamino kyetu. Akalwila bafubi baye booso basha lulamato pakabutula ndumbulwilo ebubi a Satana. Na bwa  kulombasha mulayilo waye, Yehowa akitshi bwashi tushale mu mpaladiisu bwa losoo. Oolo, we mukumbeene kupeta muwa wa binyibinyi su bwata kitshibilo kya kukita myanda ibuwa kubanga binobino!