P’OBADIKA jurnale kampanda, kubandjila télévision, sunga kuteemesha ku kisashi, we mulombeene kumona sunga kupusha myanda ibungi ya buntomboshi, ngoshi, na tufutakanyi. Pangi mmukumbo sunga lufu lwa muntu oodi mufule bikwete nkushidisha eshimba.

We kwiyipusha’shi:

• Bino ngi abikumiina Efile Mukulu bwande’mi na bwa kifuko kyande su?

• Nkunyi kwandya kupeta bukwashi bwa kukambila nkalakashi?

• Butaale bwa binyibinyi bwan’ekale kwanka su?

Bible atuusha ngaluulo ibuwa ku ino nkonko.

• Bantu t’abakakyengye’nyi, t’abakanunupa’nyi, sunga kufwa.​—Kibafumbwilwe 21:4

• ‘Mulemane aketumbu bu ntengu.’​—Yeeshaya 35:6

• “Bampofu abakamono.”​—Yeeshaya 35:5, EEM

•  Bafwe abakasanguka.​—Yowano 5:28, 29

• T’akukekala muntu akumbu.​—Yeeshaya 33:24

• Muntu ooso akekala na bya kudya bibungi.​—Misambo 72:16

We mulombeene kumona ino myanda ibobadika mu masaki abashala bu bilotwa. Anka, Efile Mukulu mmulee shi alombasha ino myanda pa nsenga binobino, na Bible alesha kipaso kyeyilombasha.

Bible alesha’nyi ingi myanda ibungi. Etulungula kyatudi balombeene kukita bwa kwikala na muloo na nshalelo ebuwa kubanga binobino. Banda kwela binangu pabitale myanda ayikwinyongosha. Mu yaya myanda mwi kukutwa kwa makuta, maladi, sunga lufu lwa muntu oodi mufule. Bible mmulombeene nkukwasha na nkunyingisha bwa kukambila yaya nkalakashi, kumwanda kwete kwalula ku ino nkonko:

• Bwakinyi tukwete kukyenga?

• Twi kukita naminyi bwa kukambila nkalakashi?

• Twi kukita kinyi bwa kupeta muloo mu kifuko?

• Nkinyi akikitshikaa su muntu baafu?

• Atukemonena dingi na bakwetu bapwe kufwa su?

• Bwakinyi twi balombeene kukulupila’shi Efile Mukulu akalombasha myanda yadi mulee??

 Bu byokwete kubadika uno mukanda, olesha’shi okyebe kuuka akilongyesha Bible. Uno mukanda aukukwasha. Ngutshibulwe mu bikoso bi na nkonko yabyo kuushi kw’esaki, bwa nkukwasha bwa kupusha Bible kalolo. Binunu na binunu bya bantu mbapete muloo wa kulonga Bible na Batemwe ba Yehowa. Atukulupila’shi noobe namu opete muloo. Efile Mukulu akwelela mwabi bu byokwete kwenda na kutundula akilongyesha Bible!