1. Nnanyi mulombeene kwitulungula pabitale mafuku aafiki?

TOBANDILE kutala bikwete kukidika myanda na weyipusha’shi: ‘Ino myanda ayende nka na kulwila bino su?’ Bibeshi na buntomboshi bikwete kukitshika abitakula bangi bantu mu kukumiina’shi tubefubwila pepi na nfudiilo a byaa-pano. Nnabyo su? Kwi mushindo wa kuuka akikakitshika mu mafuku aafiki su? Oolo. Sunga bantu bakutwa koobesha kulesha myanda ayikafiki, Yehowa Efile Mukulu mmukumbeene kwiyilesha. Kwete kwitulungula ku bukwashi bwa Bible pabitale nshalelo etu a mafuku aafiki na abikakitshika pa nsenga.​—Yeeshaya 46:10; Shake 4:14.

2, 3. Balongi ba Yesu abaadi na lukalo lwa kuuka kinyi, na Yesu bebalulwile naminyi?

² P’atubadika mu Bible pabitale nfudiilo a byaa-pano, t’abipushisha ino nsenga yatudi bashaale nya, anka nyi nfudiilo a bantu bebubi. Yesu baadi mulongyeshe bantu shi, Bufumu bw’Efile Mukulu abukamunana pa nsenga yooso. (Luuka 4:43) Balongi baye abaadi abakyebe kuuka nsaa ayikafiki Bufumu bw’Efile Mukulu, abo nkwipusha Yesu shi: ‘Etulungule kitundwilo kya kufika koobe na kya nfudiilo a byaa-pano?’ (Mateo 24:3) Yesu tabaadi mwibatemwine efuku kampanda nya, anka bebalungwile akikakitshika kumpala kwa nfudiilo a byaa-pano. Bibakwile Yesu shi abikakitshika, bikwete kukitshika binobino.

³ Mu uno shapitre atwisambila bishinkamiisho abilesha shi twi mu mafuku e pepi na nfudiilo a byaa-pano. Byabya, tubandeyi kwakula pabitale ngoshi ibaadi ibwe  mwiyilu bwashi tupushe bwakinyi myanda ngilwile ngofu pa nsenga.

4, 5. (a) Nkinyi kibaadi kikitshikye mwiyilu kunyima kwa Yesu kwikala bu Nfumu? (b) Kibafumbwilwe 12:12, alesha’shi nkinyi kibaadi kikitshikye kunyima kwabo kusumbula Satana pa nsenga?

⁴ Mu shapitre 8, twi balongye’shi Yesu bekeele Nfumu mwiyilu mu 1914. (Ndanyele 7:13, 14) Mukanda wa Kibafumbulwe awitulungula’shi: “Mwiyilu mubatukile ngoshi. Mikayele [alesha, Yesu] na bamwikelu bê abebwelêle kyakya kinyoka [akilesha’shi, Satana] ngoshi. Akyo namu na bamwikeyilu bâkyo abalwile n’abo.” * Yesu baadi mutshokole Satana na ba demo baye, akupu ebasumbula pa nsenga. Banda kupwandikisha muloo ubaadi nao ba miikeyilu! Twi kwamba naminyi pabitale bantu be pa nsenga? Bible amba’shi, abekala mu kipungo kya nkalakashi. Bwakinyi? Mwanda Diabulu e na nsungu ikile, “euku’shi kubamushâlá’nka mafuku apêla.”​—Kibafumbwilwe 12:7, 9, 12, EEM.

⁵ Satana kwete kukita mwaye mooso bwa kufwisha malwa pa nsenga. E na nsungu ibungi mwanda “kubaamushâlá’nka mafuku apêla,” bwashi Efile Mukulu amukatushe. Tubandeyi kutaluula kibakwile Yesu pabitale myanda ayikakitshika mu mafuku a ku nfudiilo.​—Tala Kikumbashilo 24.

6, 7. Nkinyi kyatudi balombeene kwakula pabitale ngoshi na bipupa bya nsala lelo uno?

⁶ Ngoshi. Yesu bambile’shi: “Mwilo na ungi mwilo ayiketukeena ngoshi, bufumu abukakolomona bungi  bufumu.” (Mateo 24:7) Bungi bwa bantu bafwe mu ngoshi ya ano mafuku etu mbukile bwa bipwa byooso bishaale. Ungi ndumbulwilo (The Worldwatch Institute) atuusha lwapolo na kulesha’shi kubanga mu 1914, ngoshi ngiipe bantu bakile pa midiyo 100. Bantu bafwe mu ngoshi ya kino kipungo [1901-2000] mbakile baaba abaadi bafwe mu ngoshi yooso ibaadi ikitshikye kubanga mu siekele a kumpala mpa na ku siekele a 19 misusa isatu. Banda kupwandikisha malwa na kinyongwa kipushe midiyo ya bantu mwanda wa ngoshi!

⁷ Bipupa bya nsala. Yesu bambile’shi: “Akukekala bipupa bia sala.” (Mateo 24:7, EEM) Sunga byekala shi binobino kwi bidibwa bibungi kukila kumpala, bantu bebungi tabe na byakudia bilombane nya. Bwakinyi? Mwanda tabe na makuta a kuula bya kudya sunga bipindji bya nsenga byabadi balombeene kukuna bidibwa. Bantu bakile pa mudiyo umune bakwete kuula bidibwa na tukuta tupeela kwifuku dyooso mwanda wa bulanda. Ndumbulwilo atalaa myanda ya mbidi bukome (OMS) alesha’shi midiyo ya bana ikwete kufwa ku  kipwa kyooso, mwanda wa kukutwa bidibwa bilombane.

8, 9. Nkinyi akilesha’shi butemuki bwa Yesu pabitale kutshinkatshinka kwa nsenga na mikumbo mbulombane?

⁸ Kutshinkatshinka kwa nsenga. Yesu batemukile’shi: “Akwikala kutshinkatshinka kwa nsenga kukata.” (Luuka 21:11) Lelo uno, kukwete kukitshika kutshinkatshinka kwa nsenga kipwa kyooso. Kubanga mu 1900, bantu bakile pa midiyo ibidi mbafwe mwanda wa kutshinkatshinka kwa nsenga. Sunga byekala shi, myanda ya bu sendwe ngikwashe bwa kudimusha bantu pabitale kutshinkatshinka kwa nsenga, bantu bebungi bakwete nka kufwa.

⁹ Mikumbo. Yesu bakwile’shi: ‘Akwikala bipupa bya mikumbo.’ Mikumbo i bukopo ikwete kupalakana lubilolubilo na kwipa bantu bebungi. (Luuka 21:11) Sunga byekala shi ba munganga mbalongye kipaso kibuwa kya kubuka mikumbo ibungi, kwi ingi mikumbo yabashii bakumbeene kupasha. Lwapolo kampanda alulesha’shi ku kipwa kyooso, midiyo ya bantu ikwete kufwa ku mikumbo bu; kikoolo kya nfwenkye, malaria na kolera.  Na dingi, ba munganga mbafikye mu kutundula mikumbo 30 ipya, ingi tayii bya kubukibwa.

10. Lelo uno, 2 Timotee 3:1-5 kwete kulombana naminyi?

¹⁰ Mu 2 Timotee 3:1-5, (Kilombeeno kipya 2014) Bible amba’shi: ‘Mu mafuku a ku nfudiilo akufiki bipungo bibukopo.’ Mutumibwa Mpoolo bakwile kantu pa kantu kipaso akikekala bantu bebungi mu mafuku a ku nfudiilo. Bambile’shi bantu abakekala

• bekumiine’bo banabene

• basha lwabi lwa fwalanga

• basha-bakookyela bebatande

• bashii na bwin’Efile Mukulu

• bashii na kifulo kya butandwa

• bashabaposhwa

• be bukyelo

• bakumiine bisepelwa kukila bukuuku n’Efile Mukulu

• be na mwikeelo wa bwin’Efile Mukulu anka bakwete kutuna bukome bwabo

11. Muyiile Misambo 92:7, nkinyi akikakitshikila bantu babi?

 ¹¹ Bantu bebungi be na ino ngikashi mbalo yoodi mushaale su? Mu nsenga ishima, bebungi be byabya. Anka Efile Mukulu akitshi kintu kampanda pa uno mwanda binobino. Alaa’shi: ‘Sunga bantu babi baatshimpuka bu lubishi, sunga bankitshishy’a bubi booso beela bilongo, mbwa kubutuudibwa bwa losoo.’​—Misambo 92:7.

12, 13. Yehowa mmwitulongyeshe myanda kinyi ano mafuku a ku nfudiilo?

¹² Bible balayile’shi mu mafuku a ku nfudiilo, bantu abakekala mu malwa na makyenga ebungi. Na dingi, Bible bambile’shi akukekala’nyi myanda ibuwa.

¹³ Kupusha akyamba Bible. Mutemuki Ndanyele bafundjile pabitale mafuku a ku nfudiilo, amba’shi: “Kuuka [kwa binyibinyi] akukatama.” (Ndanyele 12:4) Efile Mukulu akapa bantu baye bukome bwa kupusha Bible kalolo kukila biabaadi abapusha kumpala. Yehowa mmukite byabya bikishekishe kubanga mu 1914. Kileshesho; mmwitulongyeshe muulo w’eshina dyaye, mpàngo yaye pabitale nsenga, bya binyibinyi pabitale nkuulo, akikitshikaa su tubafu, na lusangukilo. Twi balongye‘nyi shi nkapenda Bufumu bw’Efile Mukulu nyi bulombeene kupudisha makyenga etu ooso. Twi balongye kipaso kya kwikala na muloo na nshalelo asangasha Efile Mukulu. Kadi bafubi b’Efile Mukulu abakitaa kinyi na byabya byabadi balongye? Bungi butemuki abwitupa lwalulo.​—Tala Kikumbashilo 21 na 25.

14. Bakwete kulungula mukandu wibuwa wa Bufumu mbalo kinyi, na mbananyi bakwete kwiulungula?

¹⁴ Kulungula mukandu wibuwa mu nsenga ishima. Pabaadi akula bwa mafuku a ku nfudiilo, Yesu bambile’shi: “Uno mukandu wibuwa wa Bufumu aukalungulwa pa nsenga yooso ishaadibwe.” (Mateo 24:3, 14, Kilombeeno  kipya 2014) Bakwete kulungula mukandu wibuwa wa Bufumu mu maumbo akile pa 230 mu ndimi ikile pa 700. Eyendo, Batemwe ba Yehowa ba “kwiumbo dyooso na kisamba kyooso” bakwete kukwasha bantu bwabadya kupusha akipatuula Bufumu bw’Efile Mukulu na kyabukyebe nkakitshina bantu. (Kibafumbwilwe 7:9) Bakwete kukita byabya kushii kuteka makuta. Sunga mbyabadi bebashikwe na byabebakyengyesha kwi bantu bebungi, takwi kintu kilombeene kwimika mudimo wa bulungudi, nka bu bibakwile Yesu.​—Luka 21:17.

15. (a) Okumiina namu shi twi mafuku a ku nfudiilo su? A mbwakinyi? (b) Nkinyi akikakitshikila baaba booso abakookyela Yehowa na booso abapele kumukookyela?

¹⁵ Okumiina namu shi twi mafuku a ku nfudiilo su? Matemuki ebungi a mu Bible pabitale mafuku a ku nfudiilo akwete kulombana. Binobino, Yehowa aata kitshibilo kya kwimika bulungudi bwa mukandu wibuwa, na kunyima “nfudiilo” ifikye. (Mateo 24:14) Nfudiilo nkinyi? Nyi Armagedone, nsaa y’abakakatusha bubi booso kwi Efile Mukulu. Yehowa akatumu Yesu na ba miikeyilu be bukome bwa kubutula bantu booso bapele kukookyela Yehowa na Mwan’aye. (2 Beena-Tesalonika 1:6-9) Kunyima, Satana na ba demo baye t’abakadimbi’nyi bantu. Baaba booso bakumiine kukookyela Efile Mukulu na kukumiina Bufumu bwaye abakamono kulombana kwa butemuki booso bw’Efile Mukulu.​—Kibafumbwilwe 20:1-3; 21:3-5.

16. Bikale’shi nfudiilo tayidi pepi ngofu, nkinyi akitungu shi okite?

¹⁶ Uno ndumbulwilo abakunkusha kwi Satana afiki ku nfudiilo binobino. Byabya, bi na muulo ukata bwa kwiyipusha’shi, ‘Nkinyi kyandi mulombeene kukita?’ Yehowa akumiina’shi olongye myanda ibungi mu Bible, na weyilongye na katshintshi. (Yowano 17:3) Batemwe ba Yehowa abatwelaa mu bisangilo ku lubingo looso bwa kukwasha  bantu bwashi bapushe Bible. Ikala na kyubishi kya kutwela mu byabya bisangilo. (Badika Beena-Ebelu 10:24, 25.) Su bomono’shi we na myanda ayitungu kushintuula, topushanga moo wa kwiyishintuula. Su bokitshi byabya, Onyingisha bukuuku boobe na Yehowa.​—Shake 4:8.

17. Bwakinyi nfudiilo ayifwila bantu bebungi bu mu kabasamushi?

¹⁷ Mutumibwa Mpoolo baadi mupatuule’shi, kabutu ka bantomboshi akakafiki nsaa ishayipwandikisha bantu, nka “bu ngifi afiki bufuku.” (1 Beena-Tesalonika 5:2) Yesu batemukile’shi bantu bebungi abakabepuula bitundwilo abilesha’shi twi mu mafuku a ku nfudiilo. Aye nkwamba’shi: ‘Nka bu bibaadi mu mafuku a Nowa, byabya ngi abikekala pa kufika kwa Mwan’a-muntu [sunga mafuku a ku nfudiilo]. Mwanda, bu bibaadi mu mafuku a kumpala kwa mpeshi a kabutu, abaadi abadi, abaadi abatomo, abaadi abeyibakisheena, nyaa na kwifuku dibaatwelele Nowa mu bwato; t’aabaady’ababasuka kintu, nyaa na pabaanokyele mpeshi a kabutu aye nkwibatuta booso. Byabya ngi abikala pa kufika kwa Mwan’a-muntu.’​—Mateo 24:37-39.

18. Yesu baadi mwitudimushe naminyi?

¹⁸ Yesu baadi mwitudimushe bwa kupela kwikala bepaane ‘ku budiaafu na bunkolwenkolwe na kwi biongwa bia muwa [wa pano pa nsenga].’ Akupu bakwile’shi, nfudiilo ayifiki bu “bukondja pe baba booso bashaale panundu pa nsenga yoso yishima.” Na’shi: “Pasukaayi, nwatekanga mu nsaa yoso, bwa’shi nwikale balombeene kupanduka ku biabia bintu bioso abikyebe kufika, na kwimana kumpala kwa Mwana a muntu.” (Luuka 21:34-36, Kilombeeno kipya 2014) Bwakinyi bi na muulo ukata kutemesha kudimusha kwa Yesu? Mwanda uno ndumbulwilo ebubi a Satana abutudibwa binobino. Anka penda baaba bakuminyibwe kwi Yehowa na Yesu nyi abakapanda ku kano kabutu na kushaala ikalaika mu ndumbulwilo mupya.​—Yowano 3:16; 2 Mpyeele 3:13.