1, 2. (a) Kuuka penda eshina dya muntu mwende nkumo akulesha’shi omuuku kalolo su? Patuula. (b) Bantu abamonaa Yesu naminyi?

KWI bantu bebungi bende nkumo mu nsenga ishima. We mulombeene kuuka eshina dya muntu mwende nkumo, anka kuuka penda eshina dyaye t’akupushisha’shi omuuku kalolo nya. T’abilesha’shi ouuku byadi mukule na kuuka bumuntu bwaye nya.

² We kwikala mupushe abakula pabitale Yesu Kidishitu, sunga mbibakatukile pa nsenga takudi bipwa pepi na 2 000. Bantu bebungi t’abauuku’shi Yesu baadi muntu kinyi nya. Bangi bantu abakula’shi baadi muntu ebuwa, bangi namu shi baadi mutemuki, na bangi namu abakumiina’shi aye nyi Efile Mukulu. Obe namu onangushena naminyi?​—Tala Kikumbashilo 12.

3. Bwakinyi bi na muulo kuuka Yehowa Efile Mukulu na Yesu Kidishitu?

³ Bi na muulo bwashi ouukye bya binyibinyi pabitale Yesu. Bwakinyi? Bible etulungula’shi: “Muuwa wa looso ngi’shi bantu bakuwukye, obe buupenka Efile Mukulu a binyibinyi, na yawa abotumine Yesu Kidishitu.” (Yowano 17:3) Oolo, Su bouuku binyibinyi pabitale Yehowa na Yesu, okashala losoo mu mpaladiisu pa nsenga. (Yowano 14:6) Na dingi, kuuka Yesu akukwasha bikata mwanda mmwitulekyele kileshesho kibuwa pabitale mwikelo watudya kwikala nao na bya kukitshina bangi bantu myanda. (Yowano 13:34, 35) Mu Shapitre 1, twi balongye bya binyibinyi pabitale Efile Mukulu. Binobino atukyebe kulonga akilongyesha Bible pabitale Yesu.

4. Nkinyi akipushisha bishima “Mesiya” na “Kidishitu?”

⁴ Kumpala kwa kutandikwa kwa Yesu, Yehowa balayile ku bukwashi bwa Bible shi akatumu Mesiya, sunga Kidishitu. Kishima “Mesiya” akifiki mu kina Ebelu, na kishima “Kidishitu” akifiki mu kina Ngidiki. Bino bishima bibidi abipatuula’shi Efile Mukulu akasangula Mesiya baadi mulayiibwe na kumupa mwasu wi pabwao. Mesiya akalombasha milayilo yooso y’Efile Mukulu. Aye’nyi mmulombeene nkukwasha kubanga binobino. Anka, kumpala kwa’ye kutandikwa, bantu bebungi babaadi abeyipusha’shi, ‘nnanyi akekala Mesiya?’

5. Balondji ba Yesu abaadi bashinkamishe’shi Yesu nyi Mesiya su?

⁵ Balondji ba Yesu ba kumpala abaadi abauuku’shi Yesu nyi Mesiya baadi mulayibwe. (Yowano 1:41) Kileshesho, Simone Mpyeele balungwile Yesu bino shi: “Obe we Kidishitu.” (Mateo 16:16) Nkipaso kinyi kyatudi balombeene kushinkamisha’shi Yesu nyi Mesiya?

6. Yehowa baadi mukwashe bantu beyishe bwa kutundula Mesiya mu kipaso kinyi?

⁶ Bipwa bibungi kumpala kwa Yesu kutandjikwa, batemuki b’Efile Mukulu abapwile kulesha myanda ibaadi ilombeene kukwasha bantu bwa kutundula Mesiya. Mu kipaso kinyi? Pwandikisha’shi abakutumu bwa kwenda ku parking a myotoka bwa nkaata muntu oshobandile kumona kashaa. Su ungi muntu akupa bituntwilo bya yawa muntu, we mulombeene nkamutundula kalolo. Mu kipaso kimune, Yehowa baadi mutumikye na batemuki baaye bwabadya kwitulungula akikakitshi Mesiya na akikamufikila. Kulombana kwa aa matemuki nkukwashe bantu beyishe bwa kutundula’shi Yesu nyi Mesiya binyibinyi.

7. Mmatemuki kinyi abidi aaleesha’shi Yesu nyi Mesiya baadi mulayiibwe?

 ⁷ Tubandeyi kutala ano matemuki abidi. Bwa kumpala, bipwa 700 kumpala kwa Yesu kutandjikwa, Mika batemukile’shi Mesiya akatandjikwa mu Beteleema. (Mika 5:2) Ino nyi mbalo ibaadi Yesu mutandjikwe. (Mateo 2:1, 3-9) Bwa kabidi, Ndanyele baadi mutemukye’shi Mesiya akamweka mu kipwa kya 29 B.B. (Ndanyele 9:25) Ano nyi mpenda matemuki abidi a ku matemuki aalesha patooka’shi Yesu nyi Mesiya baadi mulayibwe.​—Tala Kikumbashilo 13.

8, 9. Nkinyi kibakitshikile pa lubatshisho lwa Yesu akishinkamisha’shi nyi Mesiya?

⁸ Yehowa Efile Mukulu baadi muleshe patooka’shi Yesu nyi Mesiya. Balayile bwa kupa Yowano Mubatshishi kitundwilo bwa kuuka Mesiya. Pabayile Yesu kwi Yowano bwa’shi amubatshishe mu mwela wa Yudane mu kipwa kya 29 B.B., Yowano bamwene kyakya kitwindwilo. Bible etulungula kibaadi kikitshikye’shi: ‘Anka kyapu kubatshishibwa, Yesu nkutuuka mu mema. Ngi eyillu nkushituka, na aye nkumona kikudi ky’Efile Mukulu akiyiki bu nkudimba. Eyi nkutuuka mwiyilu adyamaba’shi: “Uno nyi mwan’ande a kifulo, nee na muloo pa mwanda waye.”’ (Mateo 3:16, 17) Nsaa ibaadi Yowano mumone na kupusha kyakya kitundudwilo, baadi mushinguule’shi Yesu nyi Mesiya. (Yowano 1:32-34) Mu dyadya efuku, Yehowa baadi mupongoole kikudi kyaye mwadi, na Yesu bafikile bu Mesiya. Baadi muntu  abadi basangule kwi Efile Mukulu bwa kwikala Mukunkushi na Nfumu.​—Yeeshaya 55:4.

⁹ Matemuki a mu Bible, mayi a Yehowa aye nabeene na kitundwilo kibatuushile pa lubatshisho lwa Yesu, abilesha’shi Yesu nyi Mesiya. Kadi Yesu baadi mufikye kunyi na baadi muntu a kipaso kinyi? Tubande kutala akyakula Bible.

10. Bible alongyesha’shi Yesu baadi kunyi kumpala kwa kufika pa nsenga?

¹⁰ Bible alongyesha’shi Yesu baadi mushaale bipwa bibungi mwiyilu kumpala kwa kufika pano nsenga. Mika baadi muleshe’shi Yesu baadi kwanka kubanga “kala.” (Mika 5:2) Misusa ibungi, Yesu baadi akula’shi baadi mushaale mwiyilu kumpala kwa kufika pa nsenga. (Badika Yowano 3:13; 6:38, 62; 17:4, 5.) Kumpala kwa kufika pa nsenga, Yesu baadi mu kipwano ki pa bwakyo na Yehowa.

11. Bwakinyi Yesu e na kinemo kikata kwi Yehowa?

¹¹ Bwakinyi Yesu e na kinemo kikata kwi Yehowa? Mwanda Yehowa bamupangile kumpala kwa bintu byooso na kwa bantu booso. Nyi pamwanda kinyi Yesu ayitanyinibwa bu “mbedi a bipangwa byooso.” * (Beena-Kolose 1:15) Yesu baadi’nyi na kineemo kwi Yehowa mwanda nkaaye nyi abaabadi bapangye kwi Yehowa nabeene. Nyi bwakinyi abamwitanyina bu “Mwan’aye eeleka.” (Yowano 3:16) Anka penda Yesu nyi abaabadi batumikye naaye kwi Yehowa bwa kupanga bingi bintu byooso. (Beena-Kolose 1:16) Nka penda Yesu nyi abetanyina bu “Eyi,” mwanda Yehowa bamutumine bwa kutuusha mayi aye kwi ba miikeyilu mpa na kwi bantu.​—Yowano 1:14.

12. Atwiuku naminyi’shi Yesu t’e mumune n’Efile Mukulu?

¹² Bangi bantu abambaa’shi Yesu n’Efile Mukulu be mumune. Anka Bible t’alongyesha byabya nya. Bible amba’shi Yesu baadi mupangibwe, abilesha’shi Yesu e  na mbangilo. Anka Yehowa nyi bapangile bintu byooso, aye te na mbangilo. (Misambo 90:2) Bu byadi Mwan’Efile Mukulu, Yesu kashaa ta tompele kunangusheena’shi e kwikala mumune n’Efile Mukulu nya. Bible alongyesha patooka’shi Yaya mmukile Mwana bukata. (Badika Yowano 14:28; 1 Beena-Kodinda 11:3.) Yehowa bupenka bwaye nyi “Efile Mukulu sha bukome booso.” (Kibangilo 17:1) Aye e bukata bwi kashaa na takwi muntu e byadi mwiyilu na pa nsenga, nkaye nyi mukile bukata.​—Tala Kikumbashilo 14.

13. Bwakinyi Bible akula’shi Yesu nyi “kifwatulo ky’Efile Mukulu shamwekaa?”

¹³ Yehowa na Mwan’aye Yesu abaadi bafube pamune bipwa bikile bungi kumpala kwa kupanga eyilu na nsenga. Abaadi befuleene kifulo ki kashaa! (Yowano 3:35; 14:31) Yesu baadi mwambule ngikashi ya Nshaye, nyi pamwanda kinyi Bible amwitanyina’shi, “kifwatulo ky’Efile Mukulu shamwekaa.”​—Beena-Kolose 1:15.

14. Yehowa bakitshikine kinyi bwashi Yesu atandjikwe bu muntu?

¹⁴ Yesu mwana a kinemo a Yehowa baadi mukumiine kukatuka mwiyilu bwa kufika mu kutandjikwa pa nsenga. Bibaadi bikitshikye naminyi? Yehowa bakitshine kilengyeleshi. Aata muwa wa Mwan’aye ewela munda mwa mwana mukashi baadi kamame ayitanyinibwa bu Madiya. Ngi Madiya nkutanda mwana mupwidikye na nkumuudika bu Yesu. Ngi bwakinyi, Nshaye na Yesu tabaadi muntu a pano pa nsenga nya.​—Luka 1:30-35.

15. Nkinyi kilombeene nkukwasha bwa kuuka Yehowa kalolo?

¹⁵ We mulombeene kulonga bibungi pabitale Yesu, muwa waye na ngikashi yaye nsaa y’obadika Bible, mu mukanda wa Mateo, Maako, Luuka na Yowano. Ino mikanda abeyitanyina bu mukandu wibuwa. Bu bi Yesu  enka bi Nshaye, byabya byobadika abikukwasha n’oobe namu bwa kuuka Yehowa kalolo. Nyi bwakinyi, Yesu bambile’shi: “Bammono’mi bapu kumona Yaya.”​—Yowano 14:9.

16. Yesu baadi alongyesha kinyi? Malongyesha aaye abaadi adikye kunyi?

¹⁶ Bantu bebungi abaadi abetanyina Yesu bu “Mulambukishi.” (Yowano 1:38; 13:13) Umune wa ku myanda i na muulo ibaadi alongyesha nyi, “mukandu wibuwa wa Bufumu.” A buno Bufumu nkinyi? Nyi mbulamatadi a Efile Mukulu e mwiyilu, akamunana pa nsenga ishima na kutwadila bantu abakoomukyela myabi. (Mateo 4:23) Yesu bakwile’shi: “Kulambukisha kwande takufiki kwandi, anka kwi yawa baadi muntume.” (Yowano 7:16) Yesu baadi auuku’shi, Yehowa akyebe bantu bapushe mukandu wibuwa wa Bufumu abukamunana pa nsenga ishima.

17. Yesu baadi alongyesha kunyi? Bwakinyi baadi afubu ngofu bwa kulongyesha bangi??

¹⁷ Yesu baadi alongyesha mu mbalo kinyi? Mbalo yooso ibaadi asangana bantu. Mu misoko ikula, mu bibalo, mu bibundji, mu bisalwe, mu ntempelo na ku mashibo a bantu. Tabaadi atengyela’shi bantu bafikye kwadi. Baadi ende kwabadi. (Maako 6:56; Luka 19:5, 6) Yesu baadi afubu ngofu. Baadi akisha nsaa ibungi na kutuusha bukome bwaye mu kulungula mukandu wibuwa. Bwakinyi? Mwanda baadi auuku’shi Efile Mukulu baadi akyebe’shi akite byabya, na mwanda baadi akookyela misango yooso. (Yowano 8:28, 29) Na dingi, Yesu baadi alambukisha mwanda baadi apusha bantu lusa. (Badika Mateo 9:35, 36.) Baadi mumone’shi bakata ba bipwilo tababaadi abalongyesha bya binyibinyi pabitale Efile Mukulu na Bufumu bwaye. Byabya, baadi akumiina kukwasha bantu bebungi bwa kupusha mukandu wibuwa.

18. Yesu baadi na ngikashi kinyi ayikusangashaa?

 ¹⁸ Yesu baadi mufule bantu na kwibasamba. Baadi na kalolo, baadi’nyi muntu a bantu. Bana abaadi abasankila kwikala paadi. (Maako 10:13-16) Yesu baadi muntu mululame. Baadi mushikwe myanda ibubi na kukutwa kwa kululama. (Mateo 21:12, 13) Mu mafuku a Yesu, abaadi abaata bana bakashi na muulo upeela na tababaadi abebanemeka nya. Anka Yesu baadi aata bana bakashi na muulo na kwibanemeka. (Yowano 4:9, 27) Yesu baadi’nyi mwiyishe. Kileshesho; dingi efuku ku kyolwa, batumpile balondji baye mema ku ngwa, kintu kibaadi akikitshi bapika.​—Yowano 13:2-5, 12-17.

19. Nkileshesho kinyi akilesha’shi Yesu baadi auuku nkalo ya bantu na baadi akumiina kwibakwasha?

¹⁹ Yesu baadi auuku nkalo ya bantu na baadi akumiina kwibakwasha. Bibaadi bimwenekye patooka nsaa ibaadi mupashe bantu ku bukome bwa kikudi ky’Efile Mukulu mu kilengyeleshi. (Mateo 14:14) Kileshesho; ungi muntu baadi na nsudi bafikile kwi Yesu, aye nkumulungula’shi: “Su okumiina we mulombeene kumpasha.” Yesu baadi mwituule pa mbalo ya uno muntu baadi akyengye. Aye nkumupushisha lusa na nkukimba bya kumukwasha. Byabya Yesu nkoola mboko yaye, nkukuma yawa muntu, aye nkwamba’shi: “Naakumiina! Ikala mupashibwe.” Na yawa muntu nkupashibwa! (Maako 1:40-42) Banda kupwandjikisha muloo ubapushishe yawa muntu!

20, 21. Yesu nyi kileshesho kibuwa pabitale kukookyela Efile Mukulu naminyi?

²⁰ Yesu nyi nkileshesho kikile buwa pabitale kukookyela Efile Mukulu. Sunga mbibaabadi bamukyengyeshe kwi beshikwanyi, baadi nka mulamate kwi Nshaye.  Kileshesho, Yesu tabaadi mukite mulwisho nsaa ibaadi Satana mumutompe nya. (Mateo 4:1-11) Beena kifuko naye tabaadi abakumiina’shi nyi Mesiya nya. Abaadi abamwamba’shi, “baashimisha kinangu.” Anka Yesu baadi muyididiile nka na kukita mudimo w’Efile Mukulu. (Maako 3:21) Pabaadi beshikwanyi naye abamukyengyesha, Yesu baadi mushale nka mulamate kwi Efile Mukulu na t’abaadi mwibalwishe ooo.​—1 Mpyeele 2:21-23.

²¹ Yesu baadi mushaale nka mulamate kwi Nshaye mpa na pabafwile lufu lwa makyenga. (Badika Beena-Fidipe 2:8.) Banda kunangushena misusa bungi ibaadi mukyengye kumpala kwaye kufwa! Abaadi bamukwate, tumonyi twa madimi nkumufunda, ba nsushi bebubi nkumushibila kiimu. Bibumbu bya bantu nkumusepa.  Basalayi nkumukookola ku mutshi wa makyenga na misumadi. Aye taadi atuulu eshimba, baadi mwele musase’shi: “Byooso bibaalombana!” (Yowano 19:30) Mafuku asatu kunyima kwa lufu lwaye, Yehowa nkumusangula, aye nkumupa mbidi ya mu kikudi. (1 Mpyeele 3:18) Kunyima kwa mbingo ipeela, Yesu balukiile mwiyilu. “Bashikamiine bwa looso ku mboko ibalume y’Efile Mukulu,” na kwindjila bwashi Efile Mukulu amwikashe Nfumu.​—Beena-Ebelu 10:12, 13.

22. Lulamato lwa Yesu kwi Nshaye ndwitupe lukulupilo lwa kupeta kinyi binobino?

²² Bu bibaashele Yesu na lulamato kwi Nshaye, binobino twi na lukulupilo lwa kushaala mu mpaladiisu pa nsenga bwa ikalaika, bu bibaadi mpàngo ya Yehowa. Mu shapitre alondo, atukesambila pabitale kipaso akitukwasha lufu lwa Yesu bwa kupeta muwa wa ikalaika..