1-3. Mushindo kinyi ubaadi Yesu mutamishe mudimo wa bulungudi, na abibwesha nkonko kinyi?

YESU baadi mulambukishe mu Ngalileya munda mwa bipwa bibidi. (Badika Mateo 9:35-38.) Baadi mwende mu mpata na mu bibundji bibungi, alongyesha mu sinagoge na kulungula mukandu wibuwa wa Bufumu. Mbalo yooso ibaadi alongyesha, bibumbu bya bantu bibaadi abifiki kwadi. Yesu bamwene shi: “Bya-kunwa [kuumbula] bibungi,” na kwi lukalo lwa bafubi bebungi.

² Yesu baadi mwate mpàngo ya kutamisha mudimo wa bulungudi. Mu mushindo kinyi? Batumine batumibwa baaye 12 “mu kuukisha mukandu wa Bufumu bw’Efile Mukulu.” (Luk. 9:1, 2) Batumibwa abaadi balombeene kwiyipusha mushindo w’abakitshi uno mudimo. Kumpala kwa kwibapalakasha, Yesu na kifulo kyooso bebapeele kintu kibamupeele Nshaaye e mwiyilu​—malongyesha.

³ Binobino twi balombeene kwiyipusha shi: Malongyesha kinyi abaadi Yesu mupete kwi Nshaaye? Yesu baadi mulogyeshe batumibwa baaye kinyi? Na lelo uno​—Mesiya Nfumu mulongyeshe balondji baaye mushindo wa kukita mudimo wabo su? Su nnabyo, mu mushindo kinyi?

4. Nsaa kinyi na mbalo kinyi ibaabadi balongyeshe Yesu kwi Nshaaye?

⁴ Yesu baadi mushinkamishe kalolo shi abaadi bamulogyeshe kwi Nshaaye. Pabaadi akitshi mudimo waaye, Yesu bakwile shi: “Nakula’nka penda byabya by’abandambukishe kwi Yaya.” (Yo. 8:28) Nsaa kinyi na mbalo kinyi ibaabadi balongyeshe Yesu kwi Nshaaye? Ababangile kumulongyesha mwiyilu kunyima kwa kupangibwa kwaye—aye Mwana mbedi a Efile Mukulu. (Kol. 1:15) Pabaadi pepi na Nshaaye mwiyilu, Mwana baadi mukishe bipwa bibungi ateemesha na kutala “Mulambukishi mukata.” (Yesh. 30:20, NW) Pa mwanda wa byabya, Mwana bapetele malongyesha ebungi pabitale ngikashi, midimo, na mpàngo ya Nshaaye.

5. Malongyesha kinyi abaabadi bape mwana kwi Yaya pabitale mudimo ubaadi atungu kukita pa nsenga?

⁵ Yehowa balongyeshe Mwana aaye pa nsaa ilombane pabitale mudimo ubaadi atungu kukita pa nsenga. Banda kutala butemuki abulesha kipwano kibaadi pankatshi pa Mulambukishi  Mukata na Mwana aaye mbedi. (Badika Yeeshaya 50:4, 5, EEM.) Butemuki abulesha shi: Yehowa baadi abuusha Mwana aaye “efuku n’efuku ku namashika.” Bino bishima abilesha mulongyeshi abuusha mulongi ku namashika bwa kumulongyesha. Mu ungi Bible mbaluule shi: “Yehowa . . . amukwata bu ende naaye ku kalasa abikalaa mulongi, na amulongyesha akitungu kulambukisha na mushindo wa kulambukisha.” Mu kaka “kalasa,” ka mwiyilu Yehowa balongyeshe Mwana aaye “kya kwakula, naa kya kuukisha.” (Yo. 12:49) Yehowa bapeele dimo Mwana malango pabitale mushindo wa kulongyesha. * Pabaadi pa nsenga, Yesu baadi mutumikye kalolo na malongyesha abapetele kushii penda mu kukita mudimo waaye kadi mpa na bwa kulongyesha balondji baaye bwashi balombashe mudimo waabo.

6, 7. (a) Yesu baadi mupe balongi baaye malongyesha kinyi, na abaadi ebalumbule bwa kukita kinyi? (b) Mmalonyesha kinyi akite Yesu bwashi balongi baaye bapete mu ano etu mafuku?

⁶ Yesu baadi mulongyeshe balongi baaye kinyi bu byabidi bileshibwe kunundu? Muyiile Mateo shapitre 10, bebapeele malango alombane bwa mudimo, mpa na ano dingi: Kwa nkalungula (verse 5, 6), mukandu wa kulungula (verse 7), lukalo lwa kukulupila mwi Yehowa (verse 9, 10), mushindo wa kulungula ku nshibo na nshibo (verse 11-13), mushindo wa kukita su abapele kuteemesha (verse 14, 15), na kya kukita nsaa yabebakyengesha (verse 16-23). * Malongyesha aapushika kalolo abaadi Yesu mupe balondji baaye abaadi ebalumbuule bwabadya kwenda kumpala mu mudimo wa kulungula mukandu wibuwa mu siekele a kumpala kunyima kwa Yesu Kidishitu (B.B.).

⁷ Twi kwamba naminye bwetu lelo uno? Yesu, Nfumu a Bufumu bw’Efile Mukulu, mmupe balongi baaye mudimo wi na muulo ukata, mudimo wa kulungula “uno mukandu wibuwa wa Bufumu . . . pa nsenga yoso ishaadibwe bwa kulesha bu kamonyi kwi maumbo ooso.” (Mat. 24:14, Kilombeno kipya 2009) Nfumu mwitulongyeshe bya kukita uno mudimo wa muulo ukata su? Oolo! Mwiyilu mwadi, Nfumu mukite bwashi balongi baaye bapete malongyesha pabitale mushindo wa kulungula paasha pa kakongye na mushindo wa kulombasha midimo ikata ya mu kakongye.

8, 9. (a) Kalasa ka mudimo wa teokrasi kabaadi kwanka bwa kinyi? (b) Mushindo kinyi ukukwashe Bisangilo bya munkatshi mwa lubingo bwa kulombasha kalolo mudimo wa bulungudi?

⁸ Ndumbulwilo a Yehowa mutumikye na bikongeno bya kifunda, by’efuku dimune, bya mafuku asatu na bisangilo bya kakongye​—kileshesho bu Kisangilo kya mudimo​—bwa kulongyesha mwilo w’Efile Mukulu bya kukita mudimo. Byabya, kubanga mu 1940, bakwetu balume abakunkusha biro byetu bikata ababangile kwata mpàngo ya kulongyesha ku bukwashi bwa tulasa twilekeene.

⁹ Kalasa ka Mudimo wa Teokrasi. Anka bu byatumwene mu shapitre mushaale, kano kalasa ababangile kwikakunkusha mu 1943. Mudimo wa kano kalasa ubaadi penda kulongyesha balongi mushindo wa kukita miisambo ibuwa mu bisangilo bya kakongye su? Nya. Mudimo wa kumpala wa kano kalasa  ubaadi nka umune, kulongyesha mwilo w’Efile Mukulu mushindo waudya kutumika na kyabuntu kyabo kya kwakula bwa kutumbisha Yehowa mu bulungudi. (Mis. 150:6) Kalasa kabaadi kalumbuule bakwetu balume na bakashi booso babaadi abemutwele bwabadya kwikala balungudi ba Bufumu balombane. Binobino aa malongyesha tukwete kwiapetela mu bisangilo bya munkatshi mwa lubingo

10, 11. Nnanyi mulombeene kutwela binobino mu Kalasa ka Gileade, na malongyesha a mu kano kalasa e na mudimo kinyi?

¹⁰ Kalasa ka Gileade ka Watchtower. Kano kalasa kabetamina binobino bu Kalasa ka Bible ka Gileade ka Watchtower kababangile mu Dimune 1/2/1943. Ku mbangilo kano kalasa abaadi bekakite bwa kulongyesha ba mbala-mashinda na bangi bafubi ba nsaa yooso bwa kwenda mu kukita mudimo wa bu misionere mu angi maumbo. Anka kubanga mu mweshi w’Ekumi 2011, balombeene kutwela mwanka nka penda baaba bapwe kwikala mu mudimo kampanda wa nsaa yooso wi pabwao​—bu ba mbala-mashinda ba pa bwabo, bakunkushi ba bifunda na bakashi baabo, beena Betele, na ba misionere bashibaadi babande kutwela mu kano kalasa.

¹¹ Malongyesha a mu Kalasa ka Gileade e na muulo kinyi? Ungi mulongyeshi a kala amba shi: “Mbwa kunyingisha lukumiino lwa balongi ku bukwashi bwa kulonga Eyi dy’Efile Mukulu ngofu na kwibakwasha bwa kutamisha ngikashi ya mu kikudi yabadi nayo lukalo bwa kupudisha nkalakasho ya mu midimo yaabo. Na dingi, mudimo ukata wa malongyesha e mwanka ngwa kukuna mu mashimba a balongi muloo ukata bwa kwipaana mu mudimo wa bulambukishi.”​—Ef. 4:11.

12, 13. Kalasa ka Gileade nkatuushe bipeta kinyi mu mudimo wa bulungudi bwa mu nsenga ishima? Tusha kileshesho.

¹² Kalasa ka Gileade nkatuushe bipeta kinyi mu mudimo wa bulungudi bwa mu nsenga ishima? Kubanga mu 1943, bantu bakile pa 8500 mbalongyeshibwe mu kano kalasa, * na ba misionere batuukye ku Gileade mbafube mu maumbo akile pa 170 mu nsenga ishima. Ba misionere abatumika kalolo na malongyesha abadi bapete, abatusha kileshesho kya kukita bulungudi na kisumi na kulongyesha bangi bwashi bakite nka byabya. Mu myanda ibungi, ba misionere mbayiishe mudimo kumpala mu ma mbalo abaadi balungudi ba Bufumu bapeela.

¹³ Banda kutala bibaadi bikitshikye mu Japon, pabaadi mpàngo ya kulumbuula kwa bulungudi bwa pa mbalo i bantu bebungi imane mu mafuku a Ngoshi ya kabidi ya nsenga ishima. Mu mweshi wa Mwanda 1949, kubaadi balungudi bashadile p’ekumi mu Japon. Byabya, ku nfudiilo kwa kyakya kipwa, ba misionere 13 batuukye ku kalasa ka Gileade abaadi bepaane mu kulungula mukandu wibuwa mu Japon. Bangi ba misionere bebungi abalondele. Bwa mususa wa kumpala, ba misionere abaadi bepaane mu bibundji bikata; kunyima abo nkwenda mu bibundji bipeela. Ba misionere abaadi banyingishe na muloo ooso bantu babaabadi abalongo nabo mpa na bangi bwabadya kukita mudimo wa bu mbala-mashinda. Byooso bibaadi abikitshi ba misionere na kisumi kyooso bibaadi bituushe bipeta bibuwa. Binobino mu Japon mwi balungudi ba Bufumu bakile pa 216 000  na pepi bantu 40 pa lukama bakwete kukita mudimo wa bu mbala-mashinda! *

14. Tulasa twa teokrasi atushinkamisha kinyi? (Tala dingi kashibo akamba shi: “ Tulasa tukwete kulonga bafubi ba Bufumu mw’isaki 188.”)

¹⁴ Tungi tulasa twa teokrasi. Kalasa ka ba mbala-mashinda, Kalasa ka beena Kidishitu beyibakishene, na Kalasa ka Bible bwa beena Kidishitu bashi bebakile tukwete kukwasha baaba abemutwele bwabadya kunyinga mu kikudi bwa kukunkusha na kisumi kyooso mudimo wa bulungudi. * Tuno tulasa tooso twa eokrasi atushinkamisha kalolo shi Nfumwetu mulumbuule balongi baaye bwabadya kulombasha mudimo wabo.​—2 Tim. 4:5.

15. Mu kulonda kileshesho

¹⁵ Tentekyesha butemuki bwa Yeeshaya abwakula pabitale Yesu shi abaadi bamulongyeshe kwi Efile Mukulu. Mu kaka “kalasa” ka mwiyilu, Mwana balongyele “bya kusamba babofule na bishima bibuwa.” (Yesh. 50:4, NW) Yesu baadi mutumikye na ano malongyesha; pabaadi pa nsenga; baadi musambe baaba abaadi “bafwambukye na bushito.” (Mat. 11:28-30) Mu kulonda kwa kileshesho kya Yesu, balume be na bushito kampanda  mu kakongye abitungu bekale bu nsulo ya kusamba bakwabo balume na bakashi. Pa mwanda wa byabya, kwi tulasa twilekene twabadi bakite bwa kukwasha balume balombashe myanda itekibwe bwabadya koobesha mudimo wabo wa kukwasha beena Kidishitu nabo.

16, 17. Kalasa ka Mudimo wa Bufumu ke kwanka bwakinyi (Tala dingi eyi di mushi mw’esaki.)

¹⁶ Kalasa ka Mudimo wa Bufumu. Kalasa ka kumpala kababangile mu 9/3/1959 mu Lansing a kuushi mu New York. Bakunkushi ba bifunda na bafubi ba kakongye abaadi bebetamine bwa kutwela mu kano kalasa munda mwa mweshi ushima. Kunyima abaadi baluule kukatukila mu Anglais na mu ingi ndimi, na baaba abapwile kaaka kalasa ababangile kulongyesha bangi mu nsega ishima. *

¹⁷ Pabitale lukalo lwa Kalasa ka Mudimo wa Bufumu, Annuaire des Témoins de Jéhovah a mu 1962 baadi muleshe shi: “Mu uno ndumbulwilo e na myanda ibungi, mukunkushi a kakongye ka Batemwe ba Yehowa abitungu ekale mulume mulombeene kulumbuula nshalelo aaye mu mushindo wadya kutuula binangu bi buwa kwi booso be mu kakongye na kwikala bu mwabi kwabadi. Anka ta mulombeene kwikala mulume alenguula ba mu nshibo yaaye bwa kukwasha kakongye nya, kadi  abitungu ekale na binangu bibuwa. Uno nyi mushindo wi buwa bwikashaa ubaabadi bape bafubi ba kakongye mu nsenga ishima wa kufika pamune mu Kalasa ka mudimo wa Bufumu bwa kupeta malonyesha aebakwasha bwa kukita kyakya kilombeene kulombasha mukunkushi kyabadi baleshe mu Bible!”​—1 Tim. 3:1-7; Tt. 1:5-9.

18. Bafubi b’Efile Mukulu booso mbapete bukwashi bwa Kalasa ka Mudimo wa Bufumu mu mushindo kinyi?

¹⁸ Bafubi b’Efile Mukulu booso mbapete bukwashi bwa Kalasa ka mudimo wa Bufumu. Mu mushindo kinyi? Nsaa i bakulu na bafubi ba midimo abatumikila myanda yabadi balongye ku kaka kalasa, nka bu Yesu, mbekale bu nsulo ya kusambibwa kwi beena Kidishitu nabo. Osangeelaa bishima bibuwa, kuteemeshibwa, sunga kunyingishibwa nsaa yabakutembela kwi mukulu sunga mufubi a midimo sha kalolo su? (1 Tes. 5:11) Bano balume balombashe myanda itekibwe nyi mwabi ukata kwi tukongye twabo!

19. Ntulasa kinyi dingi tukwete kukunkusha Komite a malongyesha a Kasaka ka Bakunkushi-Bakulu, na mba naanyi balombeene kutwela mu tuno tulasa?

¹⁹ Tungi tulasa twa teokrasi. Komite a malongyesha a Kasaka ka Bakunkushi-Bakulu akunkushaa tungi tulasa atulongyesha bakwetu be na mashito mu ndumbulwilo. Tuno tulasa twi kwanka bwa kukwasha bakwetu balume be na mashito​—bakulu mu kakongye, bakunkushi ba bifunda, beena komite a filiale​—bwabadya kulombasha kalolo mashito aabo ebungi. Malongyesha aatukila mu Bible aanyingisha bakwetu balume bwabadya kulama kipwano kyabo na Yehowa na kulonda miiya ya mu Bifundwe mu myanda itale mikooko yaabadi bebape kwi Yehowa.​—1 Mp. 5:1-3.

20. Bwakinyi Yesu baadi mulombeene kwakula shi atwe booso twi “balongi ba Yehowa,” na nkitshibilo kinyi kyoodi nakyo?

²⁰ Eyendo, Mesiya Nfumu mukite bwashi balongi baaye balongyeshibwe kalolo. Malongyesha ooso ngabangile mwiyilu: Yehowa balongyeshe Mwana aaye, na Mwana namu alongyesha balongi baaye. Byabya, Yesu baadi mulombeene kwamba shi atwe booso twi “balongi ba Yehowa.” (Yo. 6:45; Yesh. 54:13) Twateyi kitshibilo kya kupeta bukwashi bwibungi bwa malongyesha abadi betulumbulwile kwi Nfumwetu. Na tutentekyesheyi shi lukalo lukata lwa ano malongyesha ndwa kwitukwasha bwa kushaala banyingye mu kikudi bwashi tulombashe kalolo mudimo wetu wa bulungudi.