1, 2. (a) Mmwiya kinyi ukwete kukunkusha balongi ba Yesu mpa na lelo? (b) Mushindo kinyi utompe b’eshikwanyi bwa kushimisha mwilo w’Efile Mukulu, na mbipeta kinyi bituukye?

YESU baadi kumpala kwa Pilato, nfumu mukata a beena Yuuda, na aye nkutuusha eyi dyabakwete kulonda kwi balondji Baaye ba binyibinyi mpa na lelo. Bambile shi: ‘Bufumu bwande ta mbwa pano. Su Bufumu bwande bubaadya kwikala bwa pano, bafubi bande babaadya kulwa ngoshi bwa’shi tala bamfisha kwi Beena-Yuuda. Anka Bufumu bwande ta mbwa pano pa senga nya.’ (Yo. 18:36) Pilato baadi mwipayishe Yesu, kadi bibaadi bwa kapindji kapeela; mwanda Yesu basangukile. Ba Amperere ba mu Ampire mukata a beena Looma abatompele kwipaa balondji ba Kidishitu, anka ta mboobeshe nya. Beena Kidishitu mbapalakashe mukandu wa Bufumu mu nsenga ishima.​—Kol. 1:23.

² Kunyima kwa kutuula Bufumu mu 1914, bangi ba ku bakata ba basalayi baasha bukome bukile mbatompe kushimisha mwilo w’Efile Mukulu. Anka takwi muntu mwitutshokole nya. Ma guvernema na mafumu a politike ebungi ngatompe kwitutwesha mu bilumbu byao. Tamboobeshe kwitwabuula nya. Lelo uno, twi pepi mu miilo yooso ya pa nsenga. Sunga mbyabya, twi mu buumune mu kifuko kya nsenga ishima, atupele na mashimba etu ooso kutwelakana mu myanda ya politike. Buumune bwetu abulesha shi: Bufumu bw’Efile Mukulu bukwete kumunana na shi Nfumu Yesu Kidishitu kwete kutungunuka na kukunkusha, kutoosha, na kukalwila bantu baaye. Banda kutala mushindo waadi mwibikite, na omone byadi mwitukwashe mu kutshokola kwa bilumbu akunyingisha lukumiino lwetu nsaa y’atupele kwikala “baa-pano.”​—Yo. 17:14.

3, 4. (a) Mmyanda kinyi ibaadi ikitshikye pabaadi patandjikye Bufumu? (b) Bafubi b’Efile Mukulu abaadi bapushe kalolo akilesha kutwelakana mu myanda ya politike su? Patuula.

³ Kunyima kwa kutandjika kwa Bufumu, ngoshi ibebwele mwiyilu anka paapa Satana abamwishile pa nsenga. (Badika Kibafumbwilwe 12:7-10, 12.) Ngoshi dingi ibebwele mu nsenga, ibaadi ituule kitshibilo kya mwilo w’Efile Mukulu mu kutompibwa. Abaadi na kitshibilo kya kulonda kileshesho kya Yesu na kupela kutwelakana mu myanda ya pano. Anka bwa mususa wa kumpala tababaadi bapushe akilesha kupela kutwelakana mu myanda ya politike nya.

 ⁴ Bu kileshesho, Volime 6 a L’Aurore du Millénium, * batuukile mu 1904, baadi munyingishe beena Kidishitu bwashi tabendanga mu ngoshi. Byabya, bibaadi bileshibwe shi su mwina Kidishitu atwela busalayi, abitungu apele kukita mudimo kampanda utale kulwa ngoshi. Su ta mbyabya na su abamutumu mu ngoshi, abitungu akite mwaye mooso bwashi tayipanga muntu. Pabaadi akula bibaadi myanda mu aa mafuku, Herbert Senior, baadi mu Grande-Bretagne na baadi mubatshishibwe mu 1905 bambile shi: “Kubaadi kafutakanyi kakata munkatshi mwa bakwetu balume na takubaadi mayi a kulonda pabitale su muntu mulombeene kwikala mu busalayi kadi akitshi mudimo ushii wa kulwa ngoshi.”

5. Mushindo kinyi ubaadi Kitenta kya mulami kya mu 1/9/1915 kibangye kutoosha mpushisho eetu?

⁵ Anka, Kitenta kya Mulami kya mu 1/9/1915 kibabangile kutoosha mpushisho etu pabitale uno mwanda. Pabitale mayi abaadi mu mukanda wa Études des Écritures, abaadi aalesha shi: “Atwiyipusha su kwikala musalayi kadi kushii kukita mudimo utale kulwa ngoshi ta nkwikutwene na miiya ya Kidishitu.” Mbilombeene kwikala naminyi su bakyengesha mwina Kidishitu sunga kumwasa mwanda bapele kufwala nsukutu sunga kutwela busalayi? Wawa mwisambo ubalesheshe shi: “Mbilombeene kwikala bubi su bakwasa mwanda wa kulamata kwi Nfumu a Butaale na wa kupela kukookyela mwiya waaye pamutwe pa kwashibwa mwanda wa kupela kufubila banfumu ba nsenga na kwibakwasha bilombeene kwikala bu kwikutwena na malongyesha a Nfumu a Mwiyilu su? Pabitale ino mishindo ibidi ya kufwa, twi balombeene kukumiina lufu lwa kumpala—kukumina kufwa mwanda wa kushaala balulame kwi Nfumwetu a Mwiyilu.” Sunga kwekala ano mayi ebuwa, mwisambo aufudiila shi: “T’atutakula bantu pabukopo bwabadya kwata kino kitshibilo nya. Atutuusha penda binangu.”

6. Kileshesho kya mukwetu Herbert Senior akikulongyesha kinyi?

⁶ Bangi bakwetu babaadi bapushe uno mwanda kalolo na abo nkukumiina kyooso kilombeene kufika ku nfudiilo. Herbert Senior atwikalanga besambile kunundu bambile shi: “Bwande’mi, takubaadi kwilekena pankatshi pa kuyisha masashi mu bwato [mudimo ushii wa ngoshi] na kwiela mu Mputu bwashi akaase bantu.” (Luk. 16:10) Pamwanda wa kupela kwaye kwa kutwela busalayi, mukwetu Senior abamwelele mu lukano. Aye na bangi bakwetu 4 babaadi munkatshi mwa bantu 16 babaadi bapele mudimo wa busalayi mwanda wa kondo kaabo k’eshimba, mpa na bangi balume ba mu bingi bipwilo babaadi bakishe ingi nsaa yaabo mu lukano lwa Richmond mu Grande-Bretagne na, kunyima abaadi abebetamina bu ba Richmond 16. Dingi efuku, Herbert na bangi benaaye babaadi bebeele mu masuwa a mema mu bufyebufye bwa kwenda nabo mu ngoshi mu France. Kwakwa, babaadi bebaatshile kitshibilo kya kwibaasa. Aye na benaaye babaadi bebatuule ku mulongo wa kumpala mu ngoshi bwashi bebayipee, anka tababaadi bebayipee nya. Pamutwe pa byabya, kibawo kyabo kibekeele kya kwibeela mu lukano bwa bipwa ekumi.

7. Mu mafuku ababangile Ngoshi ya kabidi ya nsenga ishima, nkinyi kibafikile kumona bafubi b’Efile Mukulu?

 ⁷ Mu mafuku ababangile Ngoshi ya kabidi ya nsenga ishima, mwilo wa Yehowa ooso ngufikye mu kumona kalolo akilesha kupela kutwelakana mu myanda ya nsenga na kibaadi kitekibwe kwabadi su bakwete kulonda kileshesho kya Yesu. (Mat. 26:51-53; Yo. 17:14-16; 1 Mp. 2:21) Bu kileshesho mu Kitenta kya Mulami kya mu 1/11/1939 mubaadi mwisambo wa muulo ukata wi na mutwe wa mwanda awamba shi: “Kupela kutwelakana mu myanda ya nsenga,” ubaadi uleshe shi: “Mwiya aukunkusha bantu be mu kilombeno na Yehowa binobino abitungu wikale wa kupela kutwelakana mu ngoshi ya maumbo.” Pabitale uno mwisambo, Simon Kraker baadi mufube ku biro byetu bikata bya mu Brooklyn, New York bambile shi: “Naadi mulongye bya kwikala na muloo wa kumona bafubi b’Efile Mukulu be mu kufukama munkatshi mwabo, sunga bekala mu nkalakasho i naminyi.” Bino bidibwa bya mu kikudi bibaadi bitukye pa nsaa ilombane na kukwasha bafubi b’Efile Mukulu bwabadya kwilumbula ku bitompwanga bilombeene kwibafwila pa mwanda wa kululama kwabo ku Bufumu.

8, 9. Yowano mutumibwa baadi mutemukye mwanda kinyi ubaadi ulombane?

⁸ Yowano mutumibwa baadi mutemukye shi: Kunyima kwa kutandjika kwa Bufumu mu 1914, nyoka, mwikale Satana Diabulu, akyebe kutompa kushimisha bantu balamate ku Bufumu bw’Efile Mukulu pa kulasa mwela wa mu kifwanyi. * (Badika  Kibafumbwilwe 12:9, 15.) Mushindo kinyi ubaadi ulombane butemuki bwa Yowano? Kubanga mu bipwa 1920, bafubi b’Efile Mukulu abaadi bebashikwe ngofu. Anka bu bakwetu balume ba mu Amérique a Kunundu mu mafuku a Ngoshi ya kabidi ya nsenga ishima, mukwetu Kraker baadi mwedibwe mu lukano pamwanda wa kulamata kwaye ku Bufumu. Byabya, mu aa mafuku a ngoshi, Batemwe ba Yehowa abaadi bungi bwa misango ibidi pa basatu kukila bantu babaabadi beele mu lukano lwa mu États-Unis pa mwanda wa kupela kutwela mu ngoshi bwa lulangwilo lwabo.

⁹ Diabulu na bantu baaye abaadi na kitshibilo kya kushimisha bululame bwa bana ba Bufumu mbalo yooso yabadi bashale. Mbalo yooso mu Afrique, mu Europe na mu États-unis, abaadi bebatwale ku tumilaadi na kwi kisaka kya bantu abaadi balombeene kwibaatshila kitshibilo. Pa mwanda wa kitshibilo kyabo kya kupela kutwelakana mu myanda ya pa nsenga, abaadi bebeele mu lukano, kwibakupila na kwibatshiba bipindji bya mbidi. Mu Allemagne, bafubi b’Efile Mukulu abaadi bapete nkalakasho i bungi bwa kupela kupa Hitler kinemo sunga kukwatshishena myanda ya ngoshi. Bantu pepi 6 000 abaadi bediibwe mu lukano mu mafuku a ba Nazi, na bangi Batemwe ba Yehowa pepi na 1 600 beena Allemagne na bashi beena Allemagne abaadi bafwe kumaasa kwa baaba babaadi abebakyengesha. Sunga mbyabya, Diabulu tabaadi na mushindo wa kutwesha masaku kampanda mu mwilo w’Efile Mukulu.​—Mak. 8:34, 35.

10. “Nsenga” ayilesha kinyi, na mushindo kinyi wayidi ikwashe mu kwakwila bafubi b’Efile Mukulu?

¹⁰ Butemuki bwa Yowano mutumibwa abulesha shi: “Nsenga”—beena nsenga baasha binangu​—abakyebe kumina “mwela” wa mushikwa, aufiki ku bukwashi bw’Efile Mukulu. Mushindo kinyi ulombane kipindji kya buno butemuki? Mu bipwa makumi kunyima kwa Ngoshi ya kabidi ya nsenga ishima, “nsenga” ngyakwile bantu baasha kululama abakwatshishena Bufumu bwa Mesiya. (Badika Kibafumbwilwe 12:16.) Bu kileshesho, tumilaadi tukata twilekeene ntukalwile matalwa a Batemwe ba Yehowa a kupela kutwela busalayi na kupela kukita bipikwa abikitshika mwiumbo. Kya kumpala, tubande kutaluula penda ndambo ya bilumbu bikata byabadi batshokole kwi mwilo wa Yehowa ku bukwashi bwaye mu mwanda utale kukita mudimo wa busalayi.​—Mis. 68:20.

11, 12. Mukwetu Sicurella na mukwetu Thlimmenos bafumankane na myanda kinyi, na ibaadi ipwe mu mushindo kinyi?

¹¹ États-Unis. Anthony Sicurella baadi umune a ku bana basamombo ba Batemwe ba Yehowa. Baadi mubatshishibwe pabaadi na bipwa 15. Nsaa ibalombeeshe bipwa 21, baadi mwifundjishe ku biro bya basalayi shi, mmufubi a mu kipwilo. Kunyima kwa bipwa bibidi, mu 1950 batekyele bwashi efundjishe bu muntu apele mwanda wa kondo kaaye k’eshimba. Sunga Biro bya ba mpulushi abakimbulaa myanda bibaadi abitompo kwitubingisha, ku Departema a kusambisha babaadi bapele binangu byabo. Kunyima kwa kusamba bilumbu bibungi, Tumilaadi  Tukata twi kunundu twa mu États-Unis tubaadi tuteemeshe kilumbu kya mukwetu Sicurella na kushintuula kitshibilo kya tumilaadi ato nkubingisha mukwetu Sicurella. Kino kitshibilo kibaadi kikwashe bangi beena États-Unis babaadi abapele kutwela busalayi mwanda wa kondo kaabo k’eshimba.

¹² Grèce. Mu 1983, Iakovos Thlimmenos babaadi bamufunde shi kwete kupela kufwala nsukutu na abo nkumutshibila kibawo kya lukano. Kunyima kwa kumutuusha, baadi mutekye bwashi ekale akitshi mudimo wa kushintula makuta kadi abapelele kumukumiina mwanda abaadi abamba shi e na nkumo ya bu ntomboshi. Bayiile na kilumbu ku tumilaadi, kadi kunyima kwa kukutwa kubinga ku tumilaadi twa mu Grèce, batekyele bwashi kilumbu kyende ku Tumilaadi Tukata twa mu Europe atutalaa matalwa a bantu twabetamina bu (Cour européenne des droits de l’homme; CEDH). Mu 2 000, Kadimbo kakata ka ku Tumilaadi twa CEDH, ke na bansushi 17, kabaadi kamubingishe, kitshibilo kibaadi kikwashe bantu bakile bungi mu mwanda utale ntondo. Kumpala kwa kuno kutshiba kwa kilumbu, bakwetu balume kukila 3500 ba mu Grèce abaadi abebamba bu bantomboshi pamwanda wa kwibeela mu lukano mwanda wa kupela kutwelakana mu myanda ya nsenga. Kunyima kwa kino kitshibilo kibuwa, mu Grèce abatuushile mwiya wa kushima bino bilumbu bya bano bakwetu balume. Na dingi mwiya ubaadi aupa beena Grèce matalwa a kukita ungi mudimo ushii wa busalayi ubaadi utuukye bipwa bipeela kumpala, na babaadi beutaluule nsaa ibaabadi bakituule miiya ya mu Grèce.

13, 14. Bilumbu bibaadi bisambe Ivailo Stefanov na Bayatyan mbilombene nkulongyesha kinyi?

¹³ Bulgarie. Mu 1994, Ivailo Stefanov baadi na bipwa 19 nsaa ibaabadi bamutweshe busalayi. Bapelele kutwela busalayi na kukita mudimo ushii wa kulwa ngoshi wabakunkusha kwi basalayi. Babaadi bamutshibile kibawo kya kupwa myeshi 18 mu lukano kadi batekyele bwashi batale mwanda waye bu muntu apele kukokyela mwanda wa kondo kaaye k’eshimba. Kilumbu kyaaye kibaadi kyende ku CEDH. Mu 2001, kumpala kwa kuteemesha kilumbu, mukwetu Stefanov kubaadi kumukitshikile mwanda wibuwa. Guvernema a mu Bulgarie tabaadi penda mulekyele mukwetu Stefanov kadi baadi mulekyele beena Bulgarie babaadi abakumiina kukita mudimo ushii wa busalayi. *

¹⁴ Arménie. Vahan Bayatyan babaadi bamulungule shi abitungu atwele mu mudimo wa busalayi mu 2001. * Bapelele kutwela busalayi pa mwanda wa kondo kaaye k’eshimba kadi bakutshile kubinga ku tumilaadi tooso twa mwiumbo. Mu mweshi wa Kitema 2002, babangile kutumikila kibawo kya bipwa bibidi na kipindji kadi abamutushishe kunyima kwa kutumika munda mwa myeshi ekumi na kipindji. Mu aa mafuku, batekyele bwashi kilumbu kyaaye kyende ku CEDH kwakwa, abateemeshe kilumbu kyaaye. Anka, mu 27/10/2009, Tumilaadi Tukata tubapelele kumubingisha. Kyakya kitshibilo kibekeele bu kupona kukata kwi bakwetu ba mu Armenie babaadi mu uno mwanda. Kadi Kadimbo Kakata ka ku CEDH kabaatshile kitshibilo kya  kutaluula kilumbu. Mu 7/7/2011 Tumilaadi tubaadi tubingishe mukwetu Bayatyan. Uno nyi mususa wa kumpala wabakumiina ku CEDH shi, bulungantu bwa kupela kukita mudimo wa busalayi pa mwanda wa kondo k’eshimba kashy’akakumina pa mwanda wa lukumiino lwa kipwilo abitungu kwibukalwila pabitale matalwa a kwikala na bulungantu bwa kwela binangu, bwa kondo k’eshimba na bwa kipwilo. Kino kitshibilo ta nkikalwile penda Batemwe ba Yehowa nya kadi nkikalwile mpa na midiyo ya bantu ba mwiumbo be mu kisaka kyabetamina bu Conseil de l’Europe. *

15. Bwakinyi mwilo wa Yehowa aupelaa kutwelakana mu bipikwa abikitshikaa mwiumbo?

¹⁵ Mwilo wa Yehowa ngushaale ulamate ku Bufumu bwa Mesiya kushii penda mu kupela kwa kukita mudimo wa busalayi kadi dingi mu kupela na kanemo kooso bwa kutwelakana mu bipikwa abikitshika mwiumbo. Bikishekishe kubanga mu Ngoshi ya kabidi ya nsenga ishima bantu ababangile kufula maumbo aabo ngofu mu nsenga ishima. Bantu ba mu maumbo ebungi abamonaa shi bi na muulo bwa kwitshipa bwa eumbo dyabo  dya butandwa p’abo kuyimba loono lw’eumbo sunga kutshibila ebendela dy’eumbo dyabo mpala. Anka, atwe twibepaane nka penda kwi Yehowa. (Efi. 20:4, 5) Pa mwanda wa byabya, twi bapete kubingwabingwa kwi nka bu kyeshi kya mpeshi. Sunga mbyabya, Yehowa mutumikye dingi na “nsenga” bwa kumina ndambo ya uno mushikwa. Banda kutala ndambo ya bilumbu bikata bitutshokwele Yehowa ku bukwashi bwa Yesu pabitale uno mwanda.​—Mis. 3:8.

16, 17. Mwanda kinyi ubaadi ukumiine kukita Lillian na William Gobitas, na kilumbu kyabo akikulongyesha kinyi?

¹⁶ Étas-Unis. Mu 1940, ku Tumilaadi tukata twi kunundu twa mu États-Unis bansushi 8 abaadi bakumiine nkapenda nsushi 1 ndjo baadi mupele kubingisha Batemwe ba Yehowa mu kilumbu kyabetamina bu Secteur scolaire de Minersville contre Gobitis. Lillian Gobitas, * baadi na bipwa 12 na mukwabo William, baadi na bipwa 10, baadi mukumiine kushaala mulamate kwi Yehowa, abo nkupela kutshibila ebendela dy’eumbo mpala na kuyimba loono lw’eumbo. Pa mwanda wa byabya, abaadi bebabingye ku kalasa. Kilumbu kyabo kibayiile ku Tumilaadi tukata twi kunundu, na Tumilaadi tubambile shi, kitshibilo kya ku kalasa kibaadi kipushene na miiya ya mu États-Unis mwanda kibaadi kitale “buumune bw’eumbo.” Kino kitshibilo kibaadi kitembeshe kaalo ka mushikwa. Bana ba Batemwe bebungi babaadi bebabingye ku kalasa, Batemwe bapwe kukula abashimiishe midimo yaabo, na Batemwe bebungi abaadi bakyenge na bitompwanga bikile bungi. Mukanda wa (The Lustre of Our Country) aulesha shi: “Kubingwabingwa kwa Batemwe kubanga mu 1941 na mu 1943 nyi nkukyengesha kipwilo kukile bukata kubaaadi mu siekele a makumi abidi mu Amérique.”

¹⁷ Kutshokola kwa beshikwanyi b’Efile Mukulu kubaadi kwa kapindji kapeela. Mu 1943, Tumilaadi tukata twi kunundu tubaadi tutaluule kingi kilumbu ki mumune na kya ba Gobitis. Kyabetamina bu Académie de Virginie occidentale contre Barnette. Bwa uno mususa, Tumilaadi tukata twi kunundu tubaadi tubingishe Batemwe ba Yehowa. Bibaadi bu mususa wa kumpala mu États-Unis w’abashintuula kilumbu ku Tumilaadi tukata twi kunundu munda mwa mafuku apeela. Kunyima kwa kutshiba byabya, kubingwabingwa kwa mwilo wa Yehowa mu États-Unis kubabangile kupeela. Mu aa mafuku, matalwa a beena États-Unis abanyingile.

18, 19. Pablo Barros bakwile shi nkinyi kibaadi kimukwashe bwa kunyingiila, na mushindo kinyi ulombeene bangi bafubi ba Yehowa kulonda kileshesho kyaye?

¹⁸ Argentine. Pablo na Hugo Barros, balombeene kwikala au na bipwa mwanda au na bipwa musambobidi, babaadi bebabingye ku kalasa mu 1976 pamwanda wa kupela kutshibila ebendela mpala. Ungi mususa mukunkushi a kalasa baadi mutakule Pablo na aye nkumukupila ku mutwe. Baadi mushaale na bano bansongwalume kunyima kwa kalasa munda mwa nsaa mushima, ebakitshisha pa bukopo bwashi bakite myanda ya bipikwa abikitshika mwiumbo. Pabaadi atentekyesha dyadya dikyenga, Pablo balesheshe shi: “Kushi bukwashi bwa Yehowa, ntshinaadi mulombeene kunyingiila bwa kukambila bantu abaadi abantakula bwa kulwisha bululame bwande.”

 ¹⁹ Kilumbu pakibayiile ku tumilaadi, nsushi baadi mukumiine kitshibilo kya ku kalasa kya kubinga Pablo na Hugo. Anka, kilumbu kyabo kibayiile ku Tumilaadi tukata twi kunundu twa mu Argentine. Mu 1979 tumilaadi tukata tubaadi tuponeshe kitshibilo kya ku tumilaadi tupeela pa kwamba shi: “Dinyoka [kubinga] nkwikutwene na miiya y’eumbo itale bulungantu bwa kulonga (Artikle 14) na kitungo ky’Eumbo kya nkulongyesha bantu (Artikle 5).” Kwakwa kutshokola nkukwashe bana ba Batemwe pepi 1 000. Bangi abaadi balekye kwibabinga na bangi namu bu bansongwalume Pablo na Hugo, abaadi bebalushe mu kalasa.

20, 21. Kilumbu kya Roel na Emily Embralinag nkilombene kunyingisha lukumiino loobe mu mushindo kinyi?

²⁰ Philipines. Mu 1990, Roel Embralinag, * e na bipwa 9, na mukwabo mukashi Emily e na bipwa 10, pamune na bakwabo balongi Batemwe pepi 66, babaadi bebabingye ku kalasa mwanda wa kupela kutshibila ebendela mpala. Leonardo, nshaaye na Roel na Emily batompele kunangushena na bakata ba kalasa, kadi kushii koobesha. Kilumbu pakibaadi akyende na kutama, Leonardo bafundjile mukanda aye nkwiutuma ku Tumilaadi tukata twi kunundu. Leonardo tabaadi na makuta sunga avocat a  kumwimena. Kifuko kyaaye kibelele nteko ngofu kwi Yehowa bwashi ebape binangu. Munda mwa aa mafuku ooso, bana abaadi abasengibwa na kukayibwa. Leonardo bamwene shi te na mushindo wa kubinga kilumbu mwanda ta mulongye miiya nya.

²¹ Myanda ibashintulukile kunyima, Felino Ganal, avocat baadi afubu ku biro byende nkumo mwiumbo baadi mwende mu kwibasambila. Mu aa mafuku a kyakya kilumbu, mukwetu Ganal baadi mupwe kuleka mudimo waaye ubaadi aumupa makuta ebungi aye nkufika Temwe a Yehowa. Kilumbu pakibafikile ku Tumilaadi tukata twi kunundu, bansushi ba ku Tumilaadi booso abaadi batshibe kilumbu shi Batemwe mbabingye abo nkuponesha kitshibilo kya kubinga bana ku kalasa. Bwa uno mususa dingi, baaba babaadi abatompo kulwisha kululama kwa mwilo w’Efile Mukulu ta mboobeshe.

22, 23. (a) Bwakinyi twi babingye bilumbu bikata bi bungi bino? (b) Kwikala kwetu kwa mu kufukama mu nsenga ishima akulesha kinyi?

²² Bwakinyi bafubi ba Yehowa mbabingye bilumbu bikata bi bungi bino? Tatwi na bukome kampanda mu myanda ya politike nya. Anka, mu maumbo elekeene na ku tumilaadi twilekeene, bansushi bashii na ntondo mbetukalwile ku ngoshi ya beshikwanyi bebubi bukile, na mu kukita kwa byabya, mbalekye bitundwilo bikata mu miiya y’eumbo. Kushii mpaka, Kidishitu mmukwashe byooso byatudi bakite bwa kubinga bilumbu. (Badika Kibafumbwilwe 6:2.) Bwakinyi tukwete kusamba bino bilumbu byooso? Lukalo lwetu ta ndwa kushintuula miiya nya. Anka, ndwa kutungunuka na kufubila Nfumwetu, Yesu Kidishitu kushii kintu akitushikiila.​—Bik. 4:29.

²³ Mu uno ndumbulwilo mwitshibuule na myanda ya politike na muwule na mushikwa, Nfumwetu kwete kumunana, Yesu Kidishitu, mwelele bafubi baaye mwabi mu nsenga ishima ku byooso byabakwete kukita bwa kupela kutwelakana mu myanda ya nsenga. Satana ta moobeshe byooso byadi mukite bwa kwitutshibuula nya. Bufumu mbubungye midiyo ya bantu abapele ‘kuyiya dimo bya kulwa ngoshi.’ Kwikala kwetu kwa mu kufukama mu nsenga ishima nyi nkipaso—akulesha kushii mpaka shi, Bufumu bw’Efile Mukulu bukwete kumunana!​—Yesh. 2:4.