Bakuetu balume na bakashi:

Kifulo bu’Efile Mukulu na bua bantu akitutakula bua ‘kuenda mu kuikasha bantu . . . bu balongi na kuibabatshisha.’ (Mat. 28:19, 20; Mak 12:28-31) Kifulo kishi na bu nsesa ki na bukome. Kifulo ki bino, nkilombene kukuma “baaba boso [be na] mashimba alumbuulue bua muwa wa loso.”​—Bikitshino 13:48.

Kala, tubaadi atukitshi muetu moso bua kulamiina mishindo ya kubanga muisambo na kupa bantu mikanda. Anka binobino, abitungu tukite muetu moso bua kulumbuula mushindo wetu wa kuisamba na bantu. Atulesha bantu kifulo pa kuisamba nabo mianda ayibasankisha. Kuamba’shi, abintungu tushintule muisambo na tutaluule kalolo lukalo lua muntu. Uno broshire etukuasha bua kuibikita naminyi?

Uno broshire e na malongiesha 12 aetukuasha bua kudima nyikashi ayitungu’shi tuikale nayo bua kulesha bantu kifulo na kuibekasha bu balongi. Dilongiesha dioso ndimene pa muisambo wa mu Bible aulesha eyikashi dibaadi Yesu sunga balungudi ba mu siekele a kumpala baleshe mu mudimo wa bulungudi. Kepatshila ka uno broshire, ta nka kulamiina mushindo wa kubanga muisambo, kadi nka kukimba mishindo ya kulesha bantu kifulo. Sunga biabidi’shi eyikashi dioso di na muulo mu mishindo yoso yatukitaa bulungudi, atutaluula mushindo wi ingi nyikashi na muulo bikishekishe nsaa y’atubanga muisambo, kualukiila muntu sunga nsaa y’atulongo na muntu Bible.

P’otaluula dilongiesha dioso, nangushena kalolo mushindo odi mulombene kulesha diadia eyikashi nsaa yokuete kuisamba na bantu mbalo yodi mushale. Ekitshishe bua kunyingisha kifulo kiobe bua Yehowa na bua bantu. Kino kifulo kikile mayele oso atudia kufubisha, akikukuasha bua kukumbasha kepatshila kobe ka kuikasha bantu bu balongi.

Atuataa na muulo kinemo kikata kia kufuba nobe pamune. (Sef. 3:9) Yehowa akuelele miabi ibungi p’otungunuka na kufula bantu na kuibekasha bu balongi!