1-3. (a) Mwanda kinyi wa binyibinyi wabalesha mu Bible? (b) Mushindo kinyi watudi balombeene kusangula bakuuku balombeene kwitutakula mu kukita myanda ibuwa?

BANTU bebungi be nka bu butongo abukakaa mema ooso e mbwipi mwabo; mwanda abambulaa mwikeelo wa bantu be pepi nabo. Mbibofule bwashi muntu kushi’ye kuuka abangye kwata binangu na ngikashi ya bantu baadi nabo bu kuuku.

² Bible alesha wawa mwanda w’eyendo kalolo shi: “Atambuka mu mulongo wa baa-sha-binangu ekala sha-binangu, atembela bapatakane ashaala muntu-mubi.” (Myeele 13:20) Uno mwele tawisambila pabitale penda kwipeteena na bantu mu mpukapuka nya. Bishima “atambuka mu mulongo” abilesha kwikala mu bukuuku. * Pabitale uno verse, ungi mukanda aupatuulaa bishima bya mu Bible awamba shi: “Kutambuka na muntu akulesha kumufula na kwikala naaye mu kipwano.” Tomono shi misango ibungi twi na kiubishi kya kwambula bantu batudi bafule su? Mbyabya, mwanda mashimba etu aekalaa ekwatene na a baaba batudi bafule, byabya mbalombeene kwalulusha mwikeelo wetu—kwiulongamisha sunga kwiulwisha.

³ Bwa kwilama mu kifulo ky’Efile Mukulu, bibuwa tupele kwikala na bakuuku balombeene kwitutakula mu kukita  myanda ibubi. Mushindo kinyi watudi balombeene kwibikita? Mu kwakula kwa kalolo, twi balombeene kwibikita nsaa yatufulu baaba babadi bafule kwi Efile Mukulu, kwibekasha bu bakuuku betu. Ela binangu pabitale uno mwanda. Bantu be na nyikashi yabadi bafule kwi Yehowa mbalombeene kwikala bakuuku betu su? Byabya, tubande kutala abikalaa bantu babadi bafule kwi Efile Mukulu. Su twi na binangu bya Yehowa, atwikala na mushindo wa kusangula bakuuku bebuwa.

4. Bwakinyi Yehowa e na matalwa a kusangula mulombeene kwikala bu kuuku aaye, na bwakinyi Yehowa betamiine Abrahame shi, “kuukw’ande”?

⁴ Pabitale kusangula bakuuku, Yehowa nyi nkileshesho kibuwa. Aye se e na kya kwikala byabya? Binyibinyi, aye nyi Mwanana Nfumu a eyilu na nsenga, na kwikala mu kipwano naaye nkinemo kikata. Byabya, nnanyi aadi mulombeene kusangula bu kuuku? Yehowa efubwilaa pepi na bantu abatuulu lukumiino lwabo na lukulupilo lwabo mwadi. Banda kutala kileshesho kya Abrahame, muntu aukibwa mwanda wa lukumiino lwaye lukata. Ta kwi kitompwanga kikumbeene kwikala bukopo kwi nsha mwana bu kumuteka mwan’aaye bwashi amutuushe bu mulambu. * Kadi, Abrahame, “nkulambula Isaake,” baadi na lukumiino looso shi “sunga Isaake afwa Efile Mukulu mulombeene kumusàngusha.” (Beena-Ebreeyi 11:17-19) Abrahame bu bibaadi muleshe lwalwa lukumiino na kukokyela kwa wawa mushindo, Yehowa bamwitaminanga na kifulo kyooso shi “kuukw’ande.”​—Yeeshaya 41:8; Jaake 2:21-23.

5. Yehowa amonaa baaba abamukokyela na kululama kooso naminyi?

⁵ Yehowa ateyaa kukokyela na muulo ukata. Mufule baaba abakumiina kulesha kululama kwadi mu myanda yooso. (Badika 2 Samwele 22:26.)  Anka bu byatwikalanga bamone mu Shapitre 1 a uno mukanda, Yehowa asangalaa na baaba abakumiina kumukokyela pa mwanda mbamufule. Mukanda wa Myeele 3:32 aulesha shi: “Mmufule penda balulame.” Baaba booso abalombasha myanda ayibatekye Efile Mukulu na kululama kooso abapete lwitamino lwa muulo ukata alufiki kwi Yehowa, mbalombeene kushaala mu “nshibo” yaaye​—ebakuukila bwa kumulangwila na kwela nteko kwadi mu nsaa yooso yabakumiina.​—Misambo 15:1-5.

6. Mushindo kinyi watudi balombeene kulesha shi twi bafule Yesu, na Yehowa apushaa naminyi pabitale baaba bafule Mwan’aaye?

⁶ Yehowa mufule baaba bafule Yesu, Mwan’aaye eeleka. Yesu bambile shi: “Su muntu ee naami kifulo, alama bishima byande; Yaya akeekala nee kifulo, atufiki kwadi, tushaale naaye pamune.” (Yowano 14:23) Mushindo kinyi watudi balombeene kulesha kifulo kyetu bwa Yesu? Binyibinyi patulondo mayi aaye, na mwiya wa kulungula mukandu wibuwa na kwikasha bantu bu balondji. (Mateo 28:19, 20; Yowano 14:15, 21) Atuleesha shi twi bafule Yesu nsaa ‘yatulondo etabula dyaaye,’ na kulonda kileshesho kyaaye mu byatwakula na mu byatukitshi mupunda bukome bwetu bu byatudi bantu bakutwe kupwidika. (1 Mpyeele 2:21) Eshimba dya Yehowa adisangalaa nsaa yamono bantu bafule Mwan’aaye abetatshisha bwa kulonda kileshesho kya Kidishitu mu muuwa wabo mwanda wa kifulo kyabadi nakyo bwaye.

7. Bwakinyi bibuwa kwikala kuuku a bakuuku ba Yehowa?

⁷ Yehowa akuminaa shi baaba abakyebe kufika bu bakuuku Baaye bekale na ngikashi bu lukumiino, bululame, kukokyela na kifulo. Ooso a kwatudi abitungu eyipushe bino: ‘Bakuuku bandi nabo be na ino nyikashi su? Ne mufule baaba babadi bafule kwi Yehowa su?’ Bibuwa kukita byabya. Muntu kwete kulesha nyikashi ya bwin’Efile na alongyesha mukandu wibuwa wa Bufumu na kisumi kyooso mulombeene kwikala kuuku ebuwa, mukumbeene kwitutakula mu kulama kitshibilo kyetu kya kusangasha Efile Mukulu.​—Tala kashibo “ Kuuku e buwa ekalaa naminyi?”

8. NKinyi akikukanyisha pabitale kipwano kibaadi pankatshi pa (a) Naomi na Luuta? (b) bansongwalume basatu beena Ebreeyi? (c) Mpoolo na Timotee?

⁸ Mu Bible mwi bileshesho bibungi bya bantu bapete bukwashi mu kusangula kwa bakuuku bebuwa. We mukumbeene kubadika pabitale kipwano kibaadi pankatshi pa Naomi na Luuta, mukashy’a mwan’aaye, pankatshi pa bansongwalume basatu beena Ebreeyi abaadi mu kipwano ki bukopo mu Babilone, na kipwano kibaadi pankatshi pa Mpoolo na Timotee. (Luuta 1:16; Danyele 3:17, 18; 1 Beena-Kodinto 4:17; Beena-Fidipe 2:20-22) Byabya, tubande kutuula binangu ku kingi kileshesho kikata: kipwano kibaadi pankatshi pa Daavide na Yonatane.

9, 10. Nkinyi kibaadi kikwate bukuuku bwa Daavide na Yonatane?

⁹ Bible alesha shi kunyima kwa Daavide kwipaa Goliate, “Yonatane beelamatshisheene naa Daavide, aye nkumufula buu bibeefulanga’ye nabeene.” (1 Samwele 18:1) Abo nkukita kipwano ki bukopo kishibaadi akitala kwilekena kwa bipwa byabo, abashadile mu kyakya kipwano mpa na ku lufu lwa Yonatane mu ngoshi. * (2 Samwele 1:26) Nkinyi kibaadi kikwate kipwano kikata kibaadi pankatshi pa bano bakuuku babidi?

¹⁰ Daavide na Yonatane abaadi bakuuku pamwanda wa kifulo kyabo bw’Efile Mukulu na lukalo lwabo lukata lwa kushaala bamulamate. Bano bantu babidi abaadi na kipwano ki bukopo mwanda abaadi na lukalo lwa kusangasha Efile Mukulu. Ooso a kwabadi baadi na ngikashi ibaadi isangashe mwinaye. Abimweneka shi kibaadi kikume eshimba dya Yonatane nyi eshimba bukopo dya uno nsongwalume na katshintshi kabaadi muleshe bwa kukalwila kinemo ky’eshina dya Yehowa kushi kutshina. Anka Daavide namu baadi na kanemo bwa uno muntu mukulu baadi muleshe shi anemeka ndumbulwilo a myanda  a Yehowa na baadi akimbi buwa bwa Daavide kushi kukimba bwaye’ye nabeene. Bu kileshesho, tubande kutala kibakitshikile pabaadi Daavide mubofule kwishimba ngofu, nsaa ibaadi kwete kwenda na kusukasukanga mu kabaaka bwashi Nfumu Saule, nshaye na Yonatane, tamwipanga. Yonatane baadi muleshe kifulo kikata, aye nkupeta kinangu kya kwenda ‘mu kumona Daavide . . . nkumukomesha kwishimba mwishina dy’Efile.’ (1 Samwele 23:16) Banda kupwandikisha bibapushile Daavide nsaa  ibafikile kuuku aaye a p’eshimba mu kumunyingisha na kumukwasha! *

11. Kileshesho kya Yonatane na Daavide akitulongyesha kinyi pabitale bakuuku?

¹¹ Kileshesho kya Yonatane na Daavide akitulongyesha kinyi? Tubamono shi kintu kya kumpala akitungu shi bakuuku bekale nakyo pamune nyi muulo wabapa myanda ya mu kikudi. Kwisesela pepi na bakwetu mu lukumino na baaba abalondo miiya imune pabitale mwikelo wibuwa na be na lukalo lwa kushaala balulame kumpala kw’Efile Mukulu nkukumbeene kwitukwasha  bwa kwipeshena binangu, kwilungushena byatupusha na myanda yatufumankana nayo ikumbeene kwitunyingisha ku mashimba. (Badika Beena-Looma 1:11, 12.) Twi balombeene kupeta bantu be na lukalo lwa kushaala balulame kwi Efile Mukulu nka su twi munkatshi mwa bafubi baaye. Kadi, bino abilesha shi muntu ooso afikaa mu bisangilo ku Nshibo ya Bufumu nyi nkuuku sunga loole ebuwa su? Nya, ta mbooso nya.

12, 13. (a) Bwakinyi abitungu tusangule kalolo bakuuku mpa na munkatshi mwa beena Kidishitu? (b) Mwanda kinyi ubaadi ukitshikye mpa na mu tukongye twa beena Kidishitu ba kumpala, Mpoolo baadi mwibadimushe pabitale kinyi?

¹² Mpa na mu kakongye, abitungu tusangule bakuuku kalolo su atukyebe kwikala na bakuuku bakumbeene kwitunyingisha mu kikudi. Uno mwanda ngulombeene kwitukemesha su? Nya. Bwa bangi beena Kidishitu be mu kakongye abitungu mafuku ebungi bwashi bakome mu kikudi, anka abikalaa mutshi ooso na bingi bikuba abipwiyaa mafuku ebungi bwa kumonga. Byabya, mu kakongye kooso, mwi beena Kidishitu bashi bakome mu kikudi mu mushindo umune. (Beena-Ebreeyi 5:12–6:3) Eyendo shi bibuwa twikale na lwishinko na kifulo bwa bano baki beenyi mu kakongye na bano babofule, mwanda twi na lukalo lwa kwibakwasha bwashi bakule mu kikudi.​—Beena-Looma 14:1; 15:1.

¹³ Ingi nsaa, mbikumbeene kwikala abitungu kutaluula bantu batwata bu bakuuku mu kakongye. Bangi bantu mbalombeene kwikala na mwikeelo ushi buwa. Bangi naamu mbakumbeene kwikala na kiubishi kya kwidiladilanga sunga kulamanga nsungu. Uno mwanda ubaadi ukitshikye mu tukongye twa beena Kidishitu ba kumpala. Sunga mbibaadi bebungi ba kwabadi balulame, bangi abaadi na mwikeelo ushi ululame. Mwanda mu kakongye ka mu Kodinto bangi tababaadi bakumine angi malongyesha a bwina Kidishitu, ndjo Mpoolo nkudimusha kakongye shi: “Tanwidimbanga. Baakuuku bebubi abalwishaa bwikashi bwibuwa.” (1 Beena-Kodinto 15:12, 33) Mpoolo baadi mudimushe Timotee shi mpa na munkatshi mwa beena Kidishitu mmukumbeene kwikala bangi bantu be  na mwikeelo ushi ululame. Balungwile Timotee bwa kwikala kula na baaba bantu, kushi kwikala kuuku abo.​—Badika 2 Timotee 2:20-22.

14. Mushindo kinyi watudi balombeene kulonda elango adituuku mu mayi abaadi Mpoolo mudimushe nawo beena Kidishitu pabitale bakuuku?

¹⁴ Mushindo kinyi watudi balombeene kulonda elango adituuku mu mayi abaadi Mpoolo mudimushe nawo beena Kidishitu? Abitungu tulekye kwikwatena bukuuku na muntu ooso​—mu kakongye sunga pasha pa kakongye—​mukumbeene kulwisha mwikeelo wetu. (2 Beena-Tesalonike 3:6, 7, 14) Abitungu kulama kipwano kyetu na Yehowa. Tolubanga shi anka bi butongo, atwambulaa nangunangu na ngikashi ya bakuuku betu. Anka bu byatushi balombeene kusabika butongo mu nfinyo isase na kupwandikisha shi abuulu na mema, byabya tatwi balombeene kwibunga na bantu be na mwikeelo wibubi na kupwandikisha shi atulongamisha mwikeelo wetu nya.​—1 Beena-Kodinto 5:6.

15. Mu kakongye, mushindo kinyi oodi mulombeene kupeta bakuuku batuule binangu ku myanda ya mu kikudi?

¹⁵ Mwanda wa muloo, twi balombeene kupeta bakuuku bebuwa munkatshi mwa bakwetu beena Kidishitu. (Misambo 133:1) Mu kakongye, mushindo kinyi oodi mulombeene kupeta bakuuku batuule binangu ku myanda ya mu kikudi? Pwetatshisha bwa kwikala na ngikashi ibuwa na kulonda akikyebe Efile Mukulu, bangi be na binangu bu byoobe abakyebe kwisesela pepi no’be. Na dingi, abitungu kukita myanda ikumbeene nkukwasha bwa kupeta bakuuku bapya. (Tala kashibo “ Mushindo wa kupeta bakuuku bebuwa.”) Kimba baaba be na ngikashi yoodi na lukalo lwa kwikala nayo. Londa elango dya mu Bible dya “kushitula mashimba bwa kwifulena.” Eyendo shi bibuwa tupete bangi bakuuku kushi kutala nkapenda bantu ba bipwa byetu, b’eumbo dyeetu sunga kabila keetu. (2 Beena-Kodinto 6:13; badika 1 Mpyeele 2:17.) Tokimbanga bakuuku nkapenda munkatshi mwa bantu ba mulongo oobe. Tentekyesha shi Yonatane baadi mukulu a Daavide ngofu. Bu byabadi bafumankane na myanda ibungi, bantu bakulu mbalombeene kwikala bakuuku bebuwa na abakukwasha ngofu bwashi wekale na binangu.

16, 17. Su mwina Kidishitu netu betulwishisha mu mushindo kampanda, bwakinyi tabitungu shi tusuukye kakongye?

¹⁶ Bu byabidi shi mu kakongye mwi bantu be na ngikashi ilekeene na bakule mbalo ilekeene, ingi nsaa bantu mbalombeene kwikutwena. Mukwetu mwina Kidishitu mulombeene kwakula sunga kukita mwanda awitutapa kwishimba. (Myeele 12:18) Ingi nsaa kwikutwena akutukaa mwanda twi na ngikashi ilekeene, mwanda wa kukutwa kwa kupusha kalolo kibamba mungi, sunga kwikala na binangu bilekeene. Nsaa yooso ayituuku mwanda, abitungu tusuukye kakongye su? Tatwi balombeene kusuuka kakongye su twi bafule Yehowa na baaba baadi mufule.

¹⁷ Bu byaadi Mupangi etu na Mulami a muuwa wetu, twi na kya kufula Yehowa na kumulangwila nkapend’aye. (Bifumbulwe 4:11) Na dingi, twi na kya kukwatshishena kakongye mwanda Yehowa kwete kutumika nako. (Beena-Ebreeyi 13:17) Byabya su mukwetu mwina Kidishitu betutapa kwishimba sunga  kwitubofusha na mwanda kampanda, tatwi balombeene kusuuka kakongye bwa kulesha shi tatwi basangale nya. Bwakinyi tatwi balombeene kwibikita? Ta Yehowa betulwishisha nya. Kifulo kyatudi nakyo bwa Yehowa ta nkilombeene kwitutadiila bwa kuleka Yehowa na bafubi baaye nya!​—Badika Misambo 119:165.

18. (a) Abitungu tukite kinyi bwa kutwesha kufukama mu kakongye? (b) Myabi kinyi ayimweneka nsaa yanwifwilena lusa pakudi bilumbu munkatshi mwenu?

¹⁸ Kifulo kyatudi nakyo bwa beena Kidishitu netu akitutakula mu kutwesha kufukama mu kakongye. Yehowa tatekaa bantu baadi mufule bwashi bekale bapwidikye nya, natwe naamu tatwi balombeene kuteka benetu bwashi bekale byabya nya. Kifulo akitukwasha bwa kupela kutala tu bilema tupeela, na kutentekyesha shi atwe booso twi bakutwe kupwidika na atukitaa milwisho. (Myeele 17:9; 1 Mpyeele 4:8) Kifulo akitukwasha bwatudya kutungunuka na ‘kwifwilena lusa.’ (Beena-Kolose 3:13) Kutumikila dino elango ta nkubofule nya. Su tubatadiila binangu bibubi abitunemeena, twi bakumbeene kubanga kulamina bantu nsungu, pangi kwikala atupwandikisha shi kukwata kwa nsungu nyi mushindo wa kunyoka yawa betulwishisha. Byabya, mu kwakula kwa kalolo, su atulamina bantu nsungu tukwete kwilwishisha atwe banabeene. Kukumina kufwila bantu lusa pakudi lukalo lwa kwibikita akutwalaa myabi ibungi. (Luuka 17:3, 4) Akwitupa binangu n’eshimba difukame, akulama butaale mu kakongye na dingi, akubamba kipwano kyetu na Yehowa.​—Mateo 6:14, 15; Beena-Looma 14:19.

19. Mwanda kinyi ulombeene kutuuka ukumbeene kwitutakula bwa kwitshiba kipwano na muntu kampanda?

¹⁹ Ingi nsaa nkulombeene kutuuka mwanda autungu shi tutshibe bukuuku bwetu na muntu ayikalanga mu kakongye ketu. Uno mwanda aumwenekaa nsaa yabatusha muntu mu kakongye mwanda batupilwa mwiya w’Efile Mukulu kushii kutonda mulwisho, na nsaa i muntu basumbula lukumino paaye kubanga kulongyesha myanda ya madimi sunga nsaa y’etuusha aye nabeene mu kakongye. Eyi dy’Efile Mukulu aditulesha patooka byatudya  “kuleka kwipusheena” na yawa muntu. * (Badika 1 Beena-Kodinto 5:11-13; 2 Yowano 9-11) Mbikumbeene kwikala bukopo bwa kutshiba kipwano na muntu ayikalanga kuuku oobe a p’eshimba sunga mwina kifuko noobe. Twi balombeene kunying’eshimba, mu kulesha shi atutuulu kululama kwetu kwi Yehowa na ku miiya yaaye ya kululama pa mbalo ya kumpala su? Tentekyesha shi kululama na kukokyela kwi na muulo ukata ku meso a Yehowa.

20, 21. (a) Bwakinyi kutuusha muntu mu kakongye nyi mmwanda aulesha kifulo kya Yehowa? (b) Bwakinyi abitungu tusangule bakuuku betu kalolo?

²⁰ Kutuusha kwa muntu mu kakongye, nyi mwanda umune aulesha kifulo kya Yehowa. Mu mushindo kinyi? Kutuusha kwa muntu mu kakongye mwanda shi bakitshi mulwisho kushii kwilanga kwishimba akulesha kifulo bw’eshina dya Yehowa na bwa kyadilesha. (1 Mpyeele 1:15, 16) Kutuusha kwa yawa muntu mu kakongye akukalwila kakongye. Beena Kidishitu basha kululama abakalwilwa ku bubi bwa yawa muntu bakitshi mulwisho na mbalombeene kulangwila n’eshimba difukame abauku shi uno muntu mukite mulwisho ta mukumbeene kulwisha kakongye nya. (1 Beena-Kodinto 5:7; Beena-Ebreeyi 12:15, 16) Dinyoka dikata adilesha kifulo kwi yawa bakitshi mulwisho. Ndilombeene kwikala nka bi kankutu akatungu kufina muntu bwashi alushe binangu na kukita myanda ayitungu kukita bwa kwalukiila kwi Yehowa.​—Beena-Ebreeyi 12:11.

²¹ Ta twi balombeene kwilwankana shi bakuuku betu mbalombeene kulwisha sunga kulongamisha binangu byetu nya. Byabya abitungu tusangule bakuuku betu kalolo. Nsaa yatusangula bakuuku ba Yehowa bwashi bekale bakuuku betu, na kufula baaba babadi bafule kwi Efile Mukulu, atukyebe kwikala na mushindo wa kwikala munkatshi mwa bakuuku bebuwa. Myanda yatupete kwabadi ayikyebe kwitukwasha bwa kulombasha kitshibilo kyetu kya kusangasha eshimba dya Yehowa.